АҚШ: Трампда коронавирус аниқланди - AQSh, O'zbekiston, Tramp, dunyo, yangiliklar

АҚШ: Трамп ва унинг рафиқасида коронавирус аниқланди - буни АҚШ президентининг ўзи расман маълум қилди. Хабар АҚШ президент сайловига яқин қолган бир пайтда бўй кўрсатмоқда. АҚШ дунёнинг коронавирус энг кўп тарқалган давлати бўлади. Жаҳоннинг энг кўп сондаги Ўзбекистон фуқаролари яшаб, ишлаб, таҳсил олиб келаётган саноқли мамлакатларидан бири экани кўрилади. Ўзбекистоннинг янгича стратегик шериги саналади.

Ташхис

Трампнинг айтишича, ёрдамчиси коронавирусга чалиниши ортидан, тест топширишган, натижаси мусбат чиққан.

АҚШ президенти бу ҳақда Twitter орқали маълум қилган.

"Карантин ва даволанишга зудлик билан киришамиз. Бундан биргаликда чиқамиз", - деб твит қилган.

Бундан бир неча соат аввал унинг яқин маслаҳатчиси Ҳоуп Ҳиксда коронавирус топилган.

Ҳали шу хабарнинг ортиданоқ, Дональд Трамп карантинни бошлашини маълум қилганди.

Ҳоуп Ҳикс шу ҳафтанинг ўзида икки сафари чоғида АҚШ президентига ҳамкорлик қилган.

Яқин ёрдамчисининг коронавирусга чалингани хабарини Дональд Трамп, "даҳшатли", деб атаган.

Ўз оиласи билан тест натижаларини кутаётганини маълум қилганди.

Аҳволи яхши

Даволовчи врачи Шон Конлининг айтишича, Дональд Трамп президентлик вазифасини бажаришга қодир.

"АҚШ президенти ва биринчи хонимининг аҳволлари яхши".

"Тузалиб кетгунча, Оқ уйда қолишни режалашмоқда".

Қисқача тафсилот ўрнида

Ҳоуп Ҳикс Дональд Трампга ҳамроҳлик қилиб аввалига Жо Байден билан дебат учун Кливлендга борган.

Унинг эртасига АҚШ президенти билан бир самолётда Миннесотага учган.

Самолёт бортида унинг катта маслаҳатчиси - куёви Жаред Кушнер ва маъмуриятининг бошқа қатор ходимлари ҳам бўлган.

Жо Байден билан дебат чоғида АҚШ президенти ва унинг командаси юз ниқобларида бўлишмаган.

Бу ҳолат Америка оммавий-ахборот воситаларида ҳам гап бўлганди.

Карантин

АҚШ президенти қандай карантин қилиши ҳозирча маълум эмас.

Штатларда амалда бўлган расмий тартиб-қоидаларга кўра, тести мусбат чиққан ҳар қандай америкалик сўнгги бўлган жойини тарк этмаслиги, охирги пайтларда ўзи мулоқотда бўлганларнинг барчаси ҳақида масъулларни огоҳ этиши шарт.

Дональд Трамп, ойларки, ниқоб тақмасликда матбуот ва мухолифларининг танқидлари остида қолиб келади.

АҚШ президенти ўзининг коронавирус пандемиясига ёндашуви сабаб, яқинда ҳажвий Шнобель мукофотига ҳам лойиқ, деб топилганди.

Бундан аввал Британия Бош вазирининг коронавирус юқтириб, жонлантириш бўлимига тушиб чиққани ҳам халқаро миқёсда энг кўп эътибор топган, сарлавҳаларга чиққан хабарлардан бири бўлганди.

Дунёнинг бошқа раҳбарлари ҳам аллақачон эҳтиёт чораларини кўра бошлашгани маълум.

Орада Россия Президентининг сўзчиси Дмитрий Песков Путиннинг ҳам коронавирусга мунтазам текширувдан ўтиб туришини айтган.

Песковга кўра, Путин "қанча керак бўлса, шунча марта коронавирусга текширилмоқда",

Коронавирус Ўзбекистон раҳбарининг доимий иш тартибига ўзгартиш киритгани маълум эмас.

Ўзбекистон раҳбари коронавирусга текшириб-текширилмагани ҳақида расмий маълумот йўқ, аммо унинг ҳам сўнгги пайтларда юз ниқобида кўриниш бераётгани кўзга ташланган.

BBCUZBEK.COM билан Telegram орқали +44 7858860002 номери билан боғланинг.

Telegram каналимиз: https://t.me/bbcuzbek