Президент Мирзиёев нималарни танқид қилдию, ҳукуматни яна сақлаб қолди? - Ўзбекистон O'zbekiston
Сурат манбаси, President.uz
Ўзбекистон Президенти Шавкат Мирзиёев 20 январь кунида Олий Мажлис Сенатининг биринчи мажлисида ва Олий Мажлис Қонунчилик палатасининг биринчи йиғилишида нутқ сўзлади.
Президент ўз нутқида депутатлар ва сенаторларни табриклаш ортидан қатор соҳалардаги камчиликларни санаб ўтди.
Унинг сенаторларга юзлана айтишича, аҳолини қийнаётган муаммоларни ҳал этишнинг самарали тизимини яратишимиз лозим.
"Уч йил олдин сенаторлар томонидан бевосита жойларга чиққан ҳолда ҳудудлардаги муаммоларни ўрганиш ва маҳаллий кенгашларда муҳокама қилиш амалиёти йўлга қўйилди. Бироқ, бу биз кутган натижаларни берди, деб ҳозирча айта олмаймиз. Жойларда ҳали жуда кўп муаммолар ўз ечимини кутиб турибди. Масалан, йўл қурилиши соҳасида жами 184 минг километр бўлган автомобиль йўлларининг 70 минг километри ёки 38 фоизи қайта қуришга муҳтож", - деди давлат раҳбари.
У, шунингдек, коммунал хизматлар тизимидаги камчиликларни ҳам тилга олди.
"Одамларнинг энг кўп эътирозига сабаб бўлаётган коммунал хизмат соҳасини оладиган бўлсак, бу борада ҳам муаммолар кўп. Масалан, мавжуд 633 та қозонхонанинг 25 фоизи ҳамда 4 минг километр иссиқлик тармоғининг 75 фоизи яроқсиз аҳволда. Энг ачинарлиси, республикамизда марказлашган тармоқлар орқали тоза ичимлик суви билан таъминлаш даражаси атиги 68 фоизни ташкил этади. Бу кўрсаткич Қорақалпоғистон Республикаси, Бухоро, Қашқадарё, Сурхондарё ва Хоразм вилоятларида 60 фоиздан ҳам паст бўлиб қолмоқда", - деди у.
Айни мақолада Google YouTube томонидан тақдим қилинган контент мавжуд. Биз бу контент юкланмасидан аввал сизнинг розилигингизни сўраймиз, чунки улар куки ва бошқа технологиялардан фойдаланган бўлиши мумкин. Сиз Google YouTube ҳаволасида кукиларга доир ва шахсий маълумотларга оид қоидалар ҳақида аввал ўқиб, кейин қабул қилишга рози бўлишингиз мумкин. Кўриш учун “қабул қилиш ва давом этиш”ни танланг.
Охири YouTube пост
Президентга кўра, 2019-2020 ўқув йилида умумтаълим мактабларида 2 минг 700 дан ортиқ педагог кадрларга эҳтиёж мавжуд бўлса, мактабларнинг жиҳозланиш даражаси 79 фоизни ташкил этмоқда.
Шу билан бирга, 3 мингта мактабда ичимлик суви ташиб келтирилади, 261 та мактаб эса сув билан таъминланмаган.
Шунингдек, Президент Мирзиёевга кўра, соғлиқни сақлаш соҳасида мамлакат бўйича 13 мингта умумий амалиёт врачлари ва тор доирадаги мутахассислар етишмайди.
Олий мажлис қонунчилик палатаси депутатлари қаршисида чиқиш қилар экан, давлат раҳбари сиёсий партиялар ўз сиёсий мақсад ва дастурларини илгари суриш ва сафларини кенгайтириш ҳақида "фақат сайлов арафасидагина эслаб" қолишларини айтди.
Унга кўра, Тошкент шаҳрида сайловчилар иштироки бошқа ҳудудларга нисбатан пастлиги кузатилди, чунки сиёсий партиялар сайловчилар билан етарли иш олиб бормаган,
Бир киши томонидан бир неча сайловчи ўрнига овоз беришга уриниш ҳолатлари "оз бўлса ҳам учради."
Президентга кўра, ажратилган маблағлардан нотўғри фойдаланиш, уларни талон-тарож қилиш, коррупция ҳолатлари ҳам "учраб турибди."
Янграган танқидларга қарамай, давлат раҳбари юқори даражали лавозимлардан ҳеч кимни ишдан олмади, қатор мансабдорлар ўринлари горизонтал равишда алмаштирилди.
Сурат манбаси, Yuksalish
BBCUZBEK.COM билан Telegram орқали +44 7858860002 номери билан боғланинг.
Telegram каналимиз: https://t.me/bbcuzbek
