Украина Киев атрофидаги Россия қўшинларини сиқиб чиқармоқда, Россия отган ракеталарнинг 60 фоизи яроқсиз, Мариуполдаги театрда жон сақлаган 300 киши ўлгани айтилмоқда

Жонли ёритиш

1. 15 март 2022Уруш ва музокаралар қандай кетмоқда?, Можаронинг 19-куни

   Украина Президенти маъмурияти маслаҳатчиси Михаил Подолякнинг ёзишича, Россия билан бўлаётган музокараларда Украина томони ўт очишни тўхтатиш ва мамлакат ҳудудларидан ҳарбийларни олиб чиқишни муҳокама қилмоқда.

   Украина ва Россия ўртасидаги музокаралар душанба куни эълон қилинган “техник танаффус”дан сўнг қайта бошланган.

   Россия Ташқи ишлар вазири Сергей Лавров сешанба куни музокараларда Москва учун бош мавзу – Украинанинг “бетараф мақоми” эканлигини айтган.

   Украина Қуролли кучлари бош штабининг таъкидлашича, урушнинг 19 куни сўнггига келиб жанг қилаётган томонларнинг эгаллаган мавқеида ўзгариш бўлмаган.

   АҚШ Мудофаа вазирлиги Россия армияси олдинга ҳаракатлана олмай қотиб қолгани айтди. Россия ҳозирча на осмонда ва на мамлакатнинг бирорта йирик шаҳрида тўлиқ назорат ўрнатган.

   Бироқ Россия томони ёппасига ўт очиш ва украин шаҳарларини бомбардимон қилишда давом этмоқда.

2. 15 март 2022Украина ва Россия ўртасидаги адоват илдизи нимада?, Можаронинг 19-куни

   Владимир Путин бугунги Украинанинг тарихан мустақил давлатчилик даъвоси бўлмаганини айтган. Унга кўра, замонавий Украинани Россия барпо қилган. Аслида ҳам шундайми? Видеомизни томоша қилинг:

3. 15 март 2022Россия Мудофаа вазирлиги Херсон вилояти тўлиқ эгалланганини билдирди, Можаронинг 19-куни

   Россия Мудофаа вазирлиги Херсон вилояти тўлиқ эгалланганини билдирди

   Россия ҳарбийлари Херсон вилоятини тўлиқ эгаллагани ва яна Украинадаги бир нечта ҳарбий иншоатларни йўқ қилиб, ғаниматлар қўлга киритганини маълум қилган.

   Би-би-си ушбу маълумотларни мустақил манбалардан тасдиқлата олгани йўқ.

4. 15 март 2022Россияга қарши навбатдаги санкциялар тайёр бўлди, Можаронинг 19-куни

   Европа Иттифоқи Россияга қарши тўртинчи босқич санкцияларни тайёрлади

   Иттифоқ Расмий Москвага қарши санкцияларнинг навбатдаги босқичини қўллашини жума куни айтганди. Якшанба куни ушбу жазо чоралари маъқуллангани маълум қилинди.

   Европа Иттифоқи масъуллари Душанба куни Президент Зеленскийга қўнғироқ қилиб, санкциялар тасдиқланганини билдирди. Сешанба куни эса бу ҳақда пресс-релиз чоп қилинди. Аммо унда санкциялар ҳақида тўлиқ маълумот йўқлиги айтилмоқда.

   Аммо бундан олдинги хабарларда айрим тақиқлар ҳақида умумий тушунча берилган.

   Унга кўра, Россияга қимматбаҳо автомобиллар ва буюмлар етказиш, Россиядан металл маҳсулотлари сотиб олиш, нефтгаз соҳасига ҳамда россия банкларининг кредит рейтингларини ўзлаштиришга сармоя киритиш тақиқланади.

   Ушбу пакетда Америка ва Британия киритган Россия нефтини сотиб олишга тақиқ йўқ.

5. 15 март 2022Россия ҳаводан Киевни бомбаламоқда, Можаронинг 19-куни

   Ҳаводан берилган зарба натижасида Пойтахт Киевдаги аҳоли яшайдиган кўп қаватли уйда икки киши ҳалок бўлди. Украина давлат фавқулодда вазиятлар хизматининг хабар беришича, вайроналар остидан 35 киши қутқарилган.

   Киев шаҳар маъмурияти тун давомида қилинган бомбардимон натижасида зарар кўрган биноларнинг рўйхатини эълон қилди:

   • Святошинский туманида 9 ва 16 қаватли иккита уй;
   • Подолский туманидаги 10 қаватли уй;
   • Дарницкий туманидаги хусусий уй;
   • Лукьяновская метро бекатининг бир қисми вайрон бўлган. Метро тармоғи ҳамон ишламоқда

6. 14 март 2022Википедияда Марина Овсянникова саҳифаси очилди

   14 март кечқурун Россиянинг Биринчи канали "Время" янгиликлар дастурининг жонли эфири аксилуруш намойиши билан бузилди.

   Биринчи телеканалининг муҳаррири Марина Овсянникова қўлида "Урушга йўқ" плакати билан "Время" кўрсатувининг бошловчиси Екатерина Андреева сўзларини бўлди.

   Кўрсатувни тўхтатишга тўғри келган.

   Ҳодисадан сўнг Марина Овсянниковани полиция бўлимига олиб кетишгани хабарлари тарқалди.

   Адвокати Павел Чиков телеканал муҳарририни Москва шаҳридаги "Останкино" Ички ишлар бўлимига олиб кетилганини хабар қилди.

   "Тахмин бўйича унинг устидан Россия қуролли кучларини обрўсизлантириш деган модда бўйича протокол тузилган. Адвокат Даниил Берман унинг олдига кетди", – деб хабар қилган Павел Чиков.

   Бироқ орадан бир неча соат ўтиб адвокатлар Марина Овсянниковани тополмаётганлари, унинг "Останкино" полиция бўлимида йўқлиги ҳақидаги хабарлар тарқалди.

   Ижтимоий тармоқларда Марина Овсянникованинг норозилик акциясини уюштиришдан олдин ёзиб олган видео баёноти тарқалди.

   Телеканал муҳаррири отасининг украин, онаси рус эканини, Биринчи каналда ишлаб Кремль пропагандаси билан шуғулланганидан афсусда эканини айтган, биродаркушлик урушини тўхтатишга чақирган.

   Марина Овсянникованинг жонли эфир кетаётган студияга бостириб кириши ва ўз баёноти видеолари қисқа вақт ичида ижтимоий тармоқларда тарқалди, дунёнинг асосий оммавий ахборот воситалари янгилигига айланди.

   Мухолифатчи Алексей Навальний раҳбари бўлган ташкилот Мария Овсянникова бўйнига қўйиладиган жаримани тўлаб беришга тайёрлигини маълум қилди.

   Марина Овсянникованинг Фейсбукдаги шахсий саҳифаси кўпгина тилларда миннатдорликлар қолдирилди, Википедияда у ҳақдаги саҳифа ҳам пайдо бўлди.

7. 14 март 2022Россия Мариуполни жон-жаҳди билан босиб олишга уринаяпти

   Украина жанубидаги бандаргоҳ шаҳар Мариуполь қуршовда қолган, Украина расмийларига кўра, шаҳар тўхтовсиз бомбардимонга тутилаяпти.

   Шаҳар ҳокимининг ўринбосари Сергей Орлов сўнгги вазиятни Би-би-сига айтиб берган.

   Унинг сўзларига кўра, шаҳар мунтазам бомбардимон остида, айрим жойларда кўча жанглари давом этаяпти.

   Охирги бир кеча-кундузда ҳаводан ва артиллериядан 22 зарба берилган.

   Маруполь расмийлари шаҳарнинг 2187 тинч фуқароси ҳалок бўлгани ҳақида хабар тарқатдилар.

   Расмийларга кўра, шаҳарда қарийб 400 минг одам қамалиб қолган.

   Инсонлар сувсиз, озиқ-овқатсиз ва дори-дармонсиз қолганлар.

   Шаҳарнинг аксар қисми электр қуввати, иссиқлик ва телефон алоқасидан узилган.

   Ҳалок бўлган инсонларнинг жасадларини оммавий қабрларда дафн этишга тўғри келаяпти, чунки қабристонлар уруш жабҳаси чизиғида ёки ҳужумлар остида қолган.

   "Инсонпарварлик инқирози ва геноцид давом этаяпти", деб айтган Сергей Орлов.

   Мариуполь стратегик муҳим порт шаҳар ҳисобланади.

   Россия Мариуполни ўз назоратига олса, жанубдаги Қрим ярим ороли ва шарқий Донецк вилояти ҳудудлари тўла Россия қўшинларининг қўли остида бўлади.

8. 14 март 2022Хитой: Россия ёрдам сўрагани ҳақидаги хабар дезинформация

   Хитой АҚШ расмийларининг Россия Хитойдан ҳарбий ёрдам сўрагани ҳақидаги даъволарини дезинформация деб атади.

   Қўшма Штатларидаги қатор нашрлар номи ошкор этилишини истамаган расмий манбаларга таяниб Россия Украинага қарши ишғолида Хитойдан кўмак сўрагани ҳақида хабар тарқатганлар.

   Ушбу хабарлар ортидан агар санкциялар эълон қилинган Россияга ёрдам берадиган бўлса, бунинг Пекинга нисбатан оқибатлари "қаттиқ бўлиши" ҳақида огоҳлантиришлар янгради.

   Бироқ Пекинда матбуот брифинги чоғи гапирган Хитой Ташқи ишлар вазирлигининг сўзчиси Ван И Вашингтонни "ёвуз ёлғон" тарқатаётганликда айблади.

   Ван И таъкидлашича, Хитой Украина инқирозида "сулҳга эришишда конструктив роль ўйнаяпти ва музокараларга чақирмоқда.

   Link

9. 14 март 2022Дунё эътиборига тушган ҳомиладор аёл ва боласи вафот этди

   Россиянинг Украина жанубидаги Мариуполь шаҳридаги туғруқхонани бомбардимони ҳақидаги хабарлар тарқалган вақти бутун дунё оммавий ахборот воситалари кадрларига тушган ҳомиладор аёл ва қорнидаги боласи ҳаётдан кўз юмган.

   9 март куни туғруқхона ёнида йирик портлаш рўй берган, шундан кейин қорнини ушлаб ётган аёлни тўрт киши кўтариб олиб кетаётгани фото сурати ва видео кадрлари тарқалди.

   Шифокорлар айтишича, аёлнинг суяги синган, ҳомилани Кесарево жарроҳлик амалиёти билан туғдириб олишга уринганлар.

   Бироқ операциядан кейин бола ўлик туғилгани маълум бўлган.

   12 март куни она ҳам вафот этган.

   Россия расмийлари, туғруқхона Украина экстремистларининг базасига айлантирилган ва шифохона сифатида фойдаланилмаётганди, деган исботсиз даъволарни илгари суришди.

   Украина расмийлари ушбу иддаоларни кескин рад этишди ва Россияни уруш жиноятларини содир этишда айбладилар.

10. 14 март 2022Украина: Путин нега Украинага кўз тиккан? Таҳлил, Можаронинг 18-куни

    Россия нима учун Украинага кирди?

    Президент Владимир Путиннинг асл мақсади нима?

    Би-би-си муҳаррири Жон Симпсоннинг айтишича, бугунги Украина урушининг тарихи анча узоқларга бориб тақалади.

    Унга кўра, Путин Украинага атайдан кўз тиккан.

11. 14 март 2022Украина-Россия тўртинчи давра музокаралари

    14 март куни Украина ва Россия ҳайъатларининг янги давраси бошланган.

    Хабар қилинишича, дам олиш кунлари томонлар музокара ўтказганлар ва Украина тарафи бу музокаралар конструктив бўлганини қайд этган.

    Украина расмийларига кўра, бундан олдинги музокараларда Россия томонининг оҳанги ультиматум қўйиш бўлиб келган, мана энди гаплаша бошлаганлар.

    Украина ҳайъати агар музокаралар шу тарзда давом этса, бир неча кун ичида натижага эришиш мумкинлигини билдирган.

    Томонлар музокаралар видео мулоқот шаклида кечаётганини хабар қилмоқдалар.

12. 11 март 2022Украинани ҳимоя қилишга қасамёд этган ўзбекистонлик жангчи, Можаронинг 16-куни

    2014 йилда Украина шарқида россияпараст айирмачиларга қарши жанг қилган Ўзбекистонлик 39 яшар Шавкат Муҳаммад айни вақтда Украинада кечаётган урушда ҳам иштирок этиш ниятида.

    2012 йилда Украинага келган Шавкат Муҳаммад мамлакатда кечган қизғин сиёсий жараёнлар марказига тушиб қолган ва "Айдар" ҳарбий батальони таркибида россияпараст бўлгинчиларга қарши жангларда иштирок этган.

    У Би-би-си билан суҳбатда жорий урушда ҳам кўнгилли хорижлик жангчи ўлароқ Украина томонида жанг қилиш мақсадида эканлигини айтади.

13. 11 март 2022Беларусдаги ўликхоналар россиялик ҳарбийлар жасади билан тўлиб тошган, Можаронинг 16-куни

    Россиялик ҳалок бўлган ҳарбийларнинг жасадлари олиб келинаётган Беларус жанубидаги ўликхонада нималар бўлмоқда?

    Уруш бошлангандан бери мустақил беларус ва украин ОАВ ларида Беларус жанубидаги шаҳарлардаги ўликхона ва касалхоналар россиялик ҳарбийларнинг ўлиги билан тўлиб тошгани ҳақида хабарлар чиқа бошлаганди.

    Журналистларнинг эътиборини, айниқса, 100 мингдан кўпроқ аҳолиси бор, Украина-Беларус чегарасидан 60 чақирим масофада жойлашган Мозир шаҳри тортди.

    Би-би-си суҳбатдошининг айтишича, шаҳар кўчаларида кўринишидан чеченистонлик бўлган кўплаб ҳарбийлар бор. Россия рақами тақилган автомобилларни кўриш мумкин.

    Би-би-си рус хизмати шаҳар ўликхонасида нималар бўлаётганидан бохабар бўлди.

    “Жасадларни ҳатто музлатгичга ҳам киритишмаяпти. Балки 5x5 бўлган оддий хоналарга олиб келишяпти. Улар у ерда маълум вақт туради, чирийди, сасийди. Кейин ўликларни қаергадир олиб кетишади. Буларнинг ҳаммаси аскарлар томонидан қилинади. У ерга фақатгина бўлим бошлиқлари кириши мумкин”, дейди Беларус тиббиёт соҳасида ишлайдиган манба.

    Унинг айтишича, у ерга қанча жасад келиб кетаётганини ҳеч ким билмайди. Бўлаётган воқеалардан ҳамма даҳшатга тушиб қолган. Шифокорлар қаердадир кўчма крематория бор ёки уларни шунчаки кўмишади, деб тахмин қилишмоқда.

    Беларус давлат ОАВда россиялик яраланган аскарларни даволашаётгани ҳақида хабарлар чоп қилинмайди.

14. 11 март 2022Украина: Путин ва Россияни ким тўхтата олади?, Можаронинг 16-куни

    НАТО Украина осмонини ёпса, Россия ортга қайтадими?

    Худди шу нарса Россия ва унинг президентини тўхтата оладими?

    Путин аллақачон бу катта урушга йўл очиши билан огоҳлантирган.

    Россия ҳозирга келиб Украинадаги ҳарбий амалиётлари кўламини янада кенгайтирмоқда.

    Пойтахт Киевга яқинлашаётган йирик ҳарбий карвони ҳам уюшишни бошлаган.

    Украина ҳозир нимага умид қилаяпти?

    Ҳалиям НАТО ва Ғарбга умид қила оладими?

15. 11 март 2022Facebook ва Instagram Путин ва Лукашенкога ўлим тилаганларнинг изоҳини ўчирмайди, Можаронинг 16-куни

    Facebook ва Instagram айрим давлат фойдаланувчиларига Россия ҳарбийларига нисбатан зўравонлик ишлатишга чақириш ҳамда Россия ва Беларус президентларига ўлим тилашга вақтинча рухсат берди. Россия Бош прокуратураси ушбу ижтимоий тармоқларни бирлаштирувчи Meta ширкатини экстремистик ташкилот, деб топишни сўради.

    Мета нинг бундай қарорга келгани ҳақида илк Reuters агентлиги ширкатнинг ички ёзишмаларига таяниб хабар қилди.

    Гап компаниянинг адоват қўзғаш сиёсатини вақтинча ўзгартирш ҳақида боради.

16. 11 март 2022Харковда 400 та уй вайрон қилинди, Можаронинг 16-куни

    Икки ҳафтадан ортиқ давом этаётган уруш давомида Харковда 400 тадан ортиқ уй қисман ёки буткул вайрон бўлган.

    “Отишмалар натижасида Харков шаҳрида 472 та уй, шундан 264 та кўп қаватли ва 109 та хусусий уйлар зиён кўрди ёки вайрон бўлди”, деган Харков вилояти полиция тергов бошқармаси раҳбари Сергей Болвинов. Вилоятнинг бошқа жойларида эса 13 та кўп қаватли ва 86 хусусий уйлар вайрон бўлган.

    Энг кўп Изюм шаҳридаги бинолар зарар кўрган.

17. 11 март 2022Россия янги ҳудудларни нишонга олмоқда, Можаронинг 16-куни

    Украинада урушнинг 16 кунига келиб Россия қўшинлари ҳали нишонга олинмаган ҳудудларни бомбалаб ҳужум кўламини кенгайтирди.

    Украина шимоли-ғарбида жойлашган Луцк шаҳридаги аэродром ва самолётлар мотори ишлаб чиқаришган ихтисослашган завод нишонга олинган. Украина марказий шарқидаги йирик Днепр шаҳрига уюштирилган ҳаво ҳужуми натижасида бир инсон ҳалок бўлгани айтилмоқда.

    Яна уруш чизиғида олисда, Украина ғарбидаги Ивано-Франковск шаҳрида ҳам портлаш овозлари эшитилган.

    Россия, шунингдек, стратегик муҳим бўлган Донецк ва Мариупол шаҳарлари ўртасидаги Волноваха кичик шаҳарчасини қўлга киритганини айтган. Унинг қўлдан кетиши ҳозир қийин аҳволда қолаётган Мариуполга таъминотни янада танг аҳволда қолдириши мумкин.

18. 10 март 2022Бутун оиласидан айрилган украиналик ота: Мен уларни чамадонларидан танидим, Можаронинг 15-куни

    Украиналик Серхий Перебийнис Россия армияси ўқларидан ўлган одамлар расмини кўриб, унда ўзининг аёли ва икки фарзандини таниганини айтди.

    New York Times газетаси Ирпин шаҳрида миномётлар ўқидан қочаётиб ҳалок бўлган тўрт кишининг суратини чоп қилди.

    Унда Тетяна Перебийнис ва унинг икки фарзанди – 18 ёшли ўғли Микита ва 9 ёшли қизи Алиса, ва Тетянанинг дугонасининг жасадлари Иккинчи жаҳон уруши ёдгорлиги ёнидаги йўлда ётганини кўриш мумкин.

    “Мен чамадонларни кўриб танидим, ана шундай билдим”, – деди Серхий.

    Унинг айтишича, оиласи билан 2014 йилда улар Украина шарқидаги урушлардан қочиб Киевга ўрнашишганди. Серхий февраль охирида уруш бошланишидан аввал бетоб онасининг олдида бўлиш учун кетганини айтади.

    “Бу ерда нималар бўлаётганини бутун дунё кўриши керак”, - дейди у.

    Киевга қайтиш учун у Украина шарқидан аввал Россияга учишга мажбур бўлгани, сўнг эса Россиянинг Калининград шаҳрига учиб, у ердан Польшага кирганини айтади.

    “Польша чегарасидаги Россия қўшинларига айтдим, менинг бутун оилам сенлар махсус операция дейдиган урушда ўлди. Мен билан истаганларингизни қилинг, йўқотадиган ҳеч нимам қолмади, дедим”, – дейди у.

    Серхий ўз Фейсбук саҳифасида бу воқеалар унинг учун “даҳшатли фильмдек” бўлаётганини ёзди.

    “Суюклик хотининг ерда қора қопда ётганини кўриш жуда қийин. Мен улар учун охиригача курашаман. Булар учун суд ҳукми бўлишига эришаман”, – деди у.

19. 10 март 2022Украина: Янги ҳужум хавфи. Одесса Россияга қарши тура оладими?, Можаронинг 15-куни

    Украина: Россия Украинани денгиздан узиб қўймоқчи.

    Одесса ҳозир Россия ҳужуми хавфи остида.

    Шаҳар Россияга қарши туришга қанчалик тайёр?

    Қора денгиз бўйидаги Одесса Украинанинг энг муҳим ва энг йирик порт шаҳри бўлади.

    Одесса Украинанинг учинчи йирик шаҳри саналади.

    Стратегик жиҳатдан энг муҳим шаҳарлари сирасига киради.

    Таҳлилчилар ҳам Одессани бой бериш Украина учун катта йўқотиш бўлади, деган фикрда якдил.

    Россиянинг режаси нима? Сўнгги тафсилотлар:

20. 10 март 2022Энди кирган бўлсангиз..., Урушнинг 15-куни

    Охирги янгиликлар:

    ·Туркиянинг Анталя шаҳрида Россия ва Украина ташқи ишлар вазирлари ўртасида ўтган музокараларда ҳеч қандай ижобий силжишга эришилмаган.

    ·Учрашув ортидан Украина ташқи ишлар вазири Дмитро Кулеба россиялик ҳамкасбининг талаблари Украинанинг таслим бўлишини англатишини билдирди. Лавров эса Россиянинг “ҳарбий амалиёти” режадагидек кетаётганини айтди.

    ·Украина Россия қўшинлари қамали остида қолган шаҳарлардан аҳолини олиб чиқиш учун еттита инсонпарварлик даҳлизларини очаётганини билдирди. Бош вазири Ирина Верешчукнинг айтишича, қаттиқ бомбаланган Мариуполдан ҳам даҳлиз очилади.

    ·Расмийларга кўра, Россия қўшинлари ҳаводан ҳужум қилган Мариупол туғруқхонасида уч киши, жумладан бир бола ҳалок бўлган.

    ·Челси футбол клуби эгаси Роман Абрамович Британия ҳукумати томонидан санкциялар рўйхатига киритилди.

    ·Келгуси сешанбадан бошлаб Британияга келаётган украиналиклар учун янгича виза тизими ишга туширилади. Улар энди махсус виза марказларига бормай туриб, онлайн виза олишлари мумкин бўлади.