فرانس میں لاک ڈاؤن میں کمی، شراب خانے اور ریستوران کو دوبارہ کاروبار شروع کرنے کی اجازت
،تصویر کا ذریعہReuters
فرانس میں لاک ڈاؤن میں کمی کے بعد شراب خانے، دکانیں اور ثقافتی مراکز کو دوبارہ کھول دینے کی اجازت مل گئی ہے۔
بدھ (19 مئی) سے زیادہ سے زیادہ چھ افراد پر مشتمل گروپ کو ریستوران میں کھانا کھانے کی اجازت ہوگی بشرطیکہ وہ بند کمروں میں نہ ہوں۔
اس کے علاوہ فرانس میں ملک بھر میں لگائے گئے کرفیو کی اوقات کار میں بھی تبدیلی لائی گئی ہے اور اسے شام سات بجے سے بڑھا کر رات نو بجے کر دیا گیا ہے۔
تاہم دوسری جانب ملک میں صحت کے ماہرین نے تشویش ظاہر کی ہے کہ نئے متاثرین کی تعداد میں مسلسل اضافہ ہو رہا ہے، جو کہ اب اوسطاً یومیہ 13 ہزار ہے۔
یہ تعداد اس عروج سے کہیں کم ہے جب یومیہ 40 ہزار نئے متاثرین کی تشخیص ہو رہی تھی۔
حالیہ دنوں میں فرانس کی ویکیسنیشن کا عمل بھی تیزی پکڑ رہا ہے اور اب ملک میں دو کروڑ سے زیادہ افراد کو ویکسین کی ایک خوراک مل گئی ہے جبکہ نوے لاکھ افراد کو دونوں خوراکیں مل چکی ہیں۔
حکومت نے اابتدائی طور پر یہ ہدف رکھا تھا کہ وہ مئی کے وسط تک دو کروڑ افراد کو کم از کم ایک خوراک ضرور دے دی جائے۔
