’جان بوجھ کر ٹیسٹنگ کی صلاحیت کم کرنا اپنے ہی عوام کے خلاف سازش ہے‘ بلاول بھٹو
پاکستان پیپلزپارٹی کے چیئرمین بلاول بھٹو زرداری کا کہنا ہے کہ جہاں جہاں پاکستان تحریکِ انصاف کی حکومت ہے، وہاں جان بوجھ کرٹیسٹنگ کم کی جا رہی ہے اور یہ پاکستان کے عوام کی زندگی اور صحت کو مزید خطرے میں ڈال رہے ہیں۔
کراچی میں پریس کانفرنس سے خطاب کرتے ہوئےان کا کہنا تھا کہ اگر آپ ٹیسٹنگ کرکے بیمار افراد کو نہیں پکڑیں گے تو اس سے ناصرف آپ بیماروں کو نہیں بچا پائیں گے بلکہ دوسرے پاکستانیوں کو بھی خطرے میں ڈال رہے ہیں۔
انھوں نے کہا کہ جب جان بوجھ کر ٹیسٹنگ کی صلاحیت کم کی جاتی ہے تو پھر یہ اپنے عوام کے خلاف سازش ہے۔
بلاول بھٹو کا کہنا تھا کہ ’آپ کسی کو بیوقوف نہیں بنارہے بلکہ وزیراعظم اور ان کے وزرا اپنا ہی مذاق بنوارہے ہیں جب وہ یہ کہتے ہیں کہ گراف نیچے جارہا ہے۔ اگر آپ ٹیسٹنگ نہیں کریں گے تو گراف خود بخود نیچے ہی جائے گا۔‘
انھوں نے کہا کہ آپ کو مریض نظر نہیں آئیں گے لیکن اتنے ہی لوگ بیمار ہوں گے اور اتنے ہی فوت ہوں گے اور عوام کا نقصان ہوگا۔
