بریکنگ, جرمنی میں ایک خطے کی حکومت نے لاک ڈاؤن دوبارہ نافذ کر دیا, ڈیمیئن مک گینیز، بی بی سی نیوز برلن
شمالی رہین ویسٹ فیلیا میں حکومت کے سربراہ آرمین لیشیٹ نے اعلان کیا ہے کہ ضلع گیوٹرسلا میں لاک ڈاؤن کا دوبارہ نفاذ کیا جا رہا ہے کیونکہ ٹونیز کے ذبح خانے سے وائرس کا پھیلاؤ ہوا تھا۔
اب تک اس ذبح خانے کے 1553 ملازمین میں اس وائرس کی تصدیق ہو چکی ہے جبکہ اس ضلع میں تین لاکھ 60 ہزار افراد آباد ہیں۔
لاک ڈاؤن کے بعد یہاں سماجی فاصلہ برقرار رکھنے کے حوالے سے لیے جانے والے اقدامات مارچ جیسے ہو جائیں گے۔ اس سے مراد یہ ہے کہ ضلع میں لوگ صرف اپنے خاندان کے افراد کے ملاقات کر سکیں گے۔ موسیقی کی محفلیں، سینما، میوزم اور گیلریز بند کر دی جائیں گی۔ پکنک اور اس طرح کی دیگر نجی تقریبات پر بھی پابندی ہو گی۔
ریستوران اور کیفے بھی بند رہیں گے جبکہ ٹونیز میں کام کرنے والے سات ہزار ملازمین کے لیے قرنطینہ میں رہنا لازمی ہو گا۔
حکام کھانے پینے کی اشیا پہنچا رہے ہیں جبکہ پولیس اس حوالے سے اقدامات لے رہی ہے۔
