پاکستان اب دوبارہ لاک ڈاؤن کا متحمل نہیں ہو سکتا: وزیر اعظم عمران خان

لائیو کوریج

1. 5 جون 2020کیا چین میں مقامی طور پر کورونا وائرس کا پھیلاؤ رک گیا؟

   جمعرات کو چین میں مقامی طور پر کورونا وائرس منتقلی کا کوئی بھی مریض رپورٹ نہیں کیا ہے۔

   بدھ کو بھی چینں میں مقامی طور پر منتقلی کا کوئی نیا مریض سامنے نہیں آیا تھا۔ باہر سے آئے صرف ایک متاثرہ شخص کی تصدیق کی گئی تھی۔

   جس سے یہ سوال پیدا ہوتا ہے کہ کیا مقامی طور پر چین میں وائرس منتقلی رک گئی ہے؟

   چین میں جمعرات کو بھی بیرون ملک سے آئے کورونا وائرس کے پانچ نئے متاثرین چین میں سامنے آئے ہیں، جن میں سے چار شنگھائی میں اور ایک سچوہان صوبے میں ہے۔

   چین میں اس وقت کورونا وائرس متاثرین کی کل تعداد 83،027 بنتی ہے۔

2. 5 جون 2020یورپ کے دروازے کب کھل رہے ہیں؟

   موسم گرما کی آمد کے ساتھ یورپی ممالک چاہتے ہیں کہ جلد مقامی سختیاں اور غیر ضروری سفر کے لیے بین الاقوامی سرحدی رکاوٹیں ختم کردیں تاکہ سیاحت کو فروغ مل سکے۔

   اٹلی نے ایسا ہی کیا ہے۔ جبکہ یہ امکان ہے کہ دیگر یورپی ممالک بھی رواں ماہ کے اواخر تک ایسا ہی کریں گے۔

   اکثر ممالک جون کے وسط میں سرحدی پابندیاں ختم کر رہے ہیں یا ان میں نرمی لا رہے ہیں۔ ان میں فرانس، بیلجیئم، یونان، آسٹریا، نیدرلینڈز اور چیک ریپبلک شامل ہیں۔

   سپین کے بارے میں امکان ہے کہ یہاں ہوسکتا ہے بین الاقوامی سیاحوں کے لیے سختیاں جولائی میں ختم کر دی جائیں۔

   بعض یورپی ممالک دوسرے پورپی ممالک سے آنے والے تمام شہریوں کو داخلے کی اجازت دیں گے۔ جبکہ کچھ میں محض ان ممالک کے شہریوں کو داخلے کی اجازت ہوگی جہاں وائرس کے پھیلاؤ کا خطرہ کم ہے۔ کچھ ممالک داخلے کے لیے ٹیسٹ لازم قرار دیں گے۔

   کیونکہ برطانیہ اب یورپی یونین کا حصہ نہیں رہا اس لیے اس کے شہریوں کو داخلے کی اجازت نہیں ملے گی۔

   برطانیہ میں 8 جون سے آنے والے تمام مسافروں کو دو ہفتے تک خود ساختہ تنہائی میں رہنا ہوگا۔

3. 5 جون 2020تھائی لینڈ میں کورونا کا صرف ایک نیا مریض

   جمعے کو تھائی لینڈ میں کورونا وائرس سے کوئی موت واقع نہیں ہوئی ہے جبکہ اس وائرس سے متاثر ایک نئے مریض کی تصدیق ہوئی ہے۔

   اس وقت تھائی لینڈ میں اس وائرس کے متاثرین کی تعداد 3،102 ہے جبکہ کل 58 ہلاکتیں ہو چکی ہیں۔

   نیا مریض کویت سے تھائی لینڈ آیا تھا اور اب وہ قرنطینہ میں ہے۔

   اس وائرس سے اب تک 2،971 مریض صحت یاب بھی ہو چکے ہیں۔

4. 5 جون 2020بریکنگ, ’پاکستان اور آئی ایم ایف کے درمیان مذاکرات جاری ہیں‘

   پاکستان میں آج سینیٹ کا اجلاس چیئرمین صادق سنجرانی کی زیر صدارت جاری ہے۔

   پاکستان کے وفاقی وزیر صنعت و پیداوار حماد اظہر کا کہنا ہے کہ عالمی مالیاتی ادارے (آئی ایم ایف) کے ساتھ پاکستان کے مذاکرات جاری ہیں۔

   انھوں نے کہا کہ وزیر اعظم عمران خان نے عالمی برادری سے قرضوں کی شرائط میں نرمی کا مطالبہ کیا ہے جس نے ’پذیرائی حاصل کی ہے۔‘

   انھوں نے یہ امید ظاہر کی ہے کہ اس اپیل کے بعد کورونا کے بحران سے نمٹنے میں مدد ملے گی۔

   انھوں نے کہا کہ آئی ایم ایف نے ہمارے اقدامات کی تعریف کی تھی اور کورونا کے بحران میں ہماری مدد کی ہے۔

5. 5 جون 2020کووڈ 19 سے سب سے زیادہ اموات کہاں ہوئی ہیں؟

   دنیا بھر میں اب تک کووڈ 19 سے 391,136 اموات پیش آچکی ہیں۔

   ان کی تفصیلات کچھ اس طرح ہیں:

   امریکہ 108,211

   برطانیہ 39,987

   برازیل 34,021

   اٹلی 33,689

   فرانس 29,068

   سپین 27,133

   میکسیکو 12,545

   بیلجیئم 9,548

   جرمنی 8,635

   ایران 8,071

6. 5 جون 2020سب سے زیادہ متاثرین کن ممالک میں

   امریکہ 1,872,660

   برازیل 614,941

   روس 440,538

   برطانیہ 283,079

   سپین 240,660

   اٹلی 234,013

   انڈیا 226,713

   فرانس 189,569

7. 5 جون 2020عمران خان: کاروباری طبقے کے لیے سہولیات کی فراہمی حکومتی ترجیح ہے

   حکومت کی طرف سے جاری کردہ ایک بیان کے مطابق وزیر اعظم عمران خان نے کہا ہے کہ صنعتی شعبے کا فروغ اور کاروباری طبقے کو سہولیات کی فراہمی ان کی ترجیحات میں ہیں۔

   انھوں نے کہا ہے کہ رواں سال آنے والے بجٹ میں بھی کورونا کے بعد صنعتی شعبوں کی بحالی اور ترقی پر توجہ دی جائے گی۔

   بیان کے مطابق صنعتوں کی بحالی کے لیے مختلف شعبوں کو سبسیڈی اور مراعات دی جائیں گی۔

8. 5 جون 2020پاکستان میں پارلیمان کے اجلاس کے لیے اقدامات جاری

   پاکستان میں پارلیمان کے دونوں ایوانوں قومی اسمبلی اور سینیٹ میں آج اجلاس ہونے جا رہے ہیں۔

   اس حوالے سے حکام نے سماجی فاصلے کے نفاذ سمیت دیگر اقدامات کیے ہیں۔ ہال میں جراثیم کش سپرے کیا گیا ہے۔

9. 5 جون 2020بریکنگ, کووڈ 19: پاکستان میں گذشتہ ایک روز میں 4896 متاثرین، 68 اموات کا اضافہ

   پاکستان میں کورونا کی روک تھام کے لیے قائم نیشنل کمانڈ اینڈ آپریشن سینٹر کی جانب سے جاری کردہ بیان کے مطابق ملک میں گذشتہ 24 گھنٹوں کے دوران کووڈ 19 کے 4896 نئے متاثرین سامنے آئے جبکہ 68 اموات پیش آئیں۔

   ان کی تفصیلات کچھ یوں ہیں:

   پنجاب میں کل متاثرین 33144

   سندھ میں کل متاثرین 33536

   خیبر پختونخوا میں کل متاثرین 11890

   بلوچستان میں کل متاثرین 5582

   گلگت بلتستان میں کل متاثرین 852

   اسلام آباد میں کل متاثرین 3946

   پاکستان کے زیر انتظام کشمیر میں کل متاثرین 299

   اس وقت ملک میں کل 56,213 متاثرین زیر علاج ہیں۔ جبکہ 31198 صحتیاب ہوچکے ہیں۔

   ملک میں کووڈ 19 کے کل متاثرین کی تعداد 89,249 ہے۔ جبکہ 1838 اموات پیش آچکی ہیں۔

10. 5 جون 2020برازیل میں اب اموات اٹلی سے بھی زیادہ, کیٹی واٹسن، نمائندہ بی بی سی، جنوبی امریکہ

    برازیل میں کورونا وائرس کی وجہ سے ہونے والی اموات اب اٹلی سے بھی زیادہ ہو گئی ہیں۔ جمعرات کی شام تک صرف چوبیس گھنٹوں میں برازیل میں 1,473 اموات ہوئیں۔

    وائرس سے ہونے والی کل ہلاکتوں کی تعداد 34 ہزار سے زیادہ ہے۔

    برازیل میں کورونا وائرس کے متاثرین کی کل تعداد 580,000 سے زائد ہے۔ مسلسل تین دنوں میں اموات میں ریکارڈ اضافہ ہوا ہے۔

    خراب صورتحال میں اب حکومت بھی وقت پر اموات کی صیحح تعداد بتانے میں تاخیر کر رہی ہے۔ عام طور پر سہہ پہر کو نئے متاثرین اور اموات کی تعداد کے بارے میں بتا دیا جاتا تھا مگر اب چند ہفتوں سے ایسا نہیں ہو رہا ہے۔

    اب گذشتہ دو دنوں سے حکام اس تعداد کو شام کے خبرنامے کے بھی بعد بتا رہے ہیں، جسے محض حسن اتفاق نہیں کہا جا سکتا۔

    برازیل کے صدر جو لاک ڈاؤن جیسے اقدامات کے حامی نہیں ہیں اس حوالے سے کم ہی بات کرتے ہیں، تاہم انھوں نے فیس بک لائیو کے دوران ریاستوں کے گورنرز سے ناراضی کا اظہار کرتے ہوئے کہا کہ وائرس کے پھیلاؤ سے ہونے والا مجموعی نقصان اموات سے بڑا ہوسکتا ہے۔

11. 5 جون 2020اپنی ہی پالیسیاں توڑنے والے دس عالمی رہنما کون ہیں؟

12. 5 جون 2020پاکستان میں کووڈ 19 کی تشخیص کے لیے کون سا ٹیسٹ کتنے میں دستیاب ہے؟

    دنیا بھر میں کورونا وائرس کی تشخیص کے لیے کئی قسم کے ٹیسٹ کیے جا رہے ہیں۔ ان ٹیسٹوں کا طریقہ ایک دوسرے سے مختلف ہونے کے ساتھ ساتھ ان کے نتائج کی حساسیت بھی مختلف ہے۔

    اس وقت پاکستان سمیت دنیا بھر میں اس وائرس کی تشخیص کے لیے زیادہ تر ’پی سی آر‘ ٹیسٹ ہی کیے جا رہے ہیں۔

    تاہم پاکستان کی کچھ نجی لیبارٹریوں نے پی سی آر ٹیسٹ کے علاوہ اینٹی باڈی ٹیسٹ (آئی جی جی اور آئی جی ایم) بھی متعارف کروائے ہیں۔

    مکمل تحریر

13. 5 جون 2020یورپی یونین چاہتا ہے کہ ’جون کے اواخر تک سرحدیں کھول دی جائیں‘

    یورپی یونین نے اپنے رکن ممالک سے مطالبہ کیا ہے کہ کورونا وائرس سے بچاؤ کے لیے لگائے گئے لاک ڈاؤن میں رواں ماہ یعنی جون کے دوران نرمی لائیں اور پاسپورٹ کے بغیر لوگوں کو دوسرے یورپی ممالک میں داخلے کی اجازت دی جائے۔

    یورپی یونین میں داخلی امور کی سفیر نے کہا ہے کہ وائرس کے بعد اب صورتحال ’جلد بہتر‘ ہو رہی ہے۔

    انھوں نے یورو نیوز سے بات کرتے ہوئے کہا کہ: ’ہم ان حالات کے بہت قریب ہیں جن میں ہم تمام اندرونی سرحدی رکاوٹیں ہٹائی جاسکتی ہیں۔‘

    ان کا کہنا تھا کہ اس کام کے لیے جون کے آخر کی ایک تاریخ بہتر ہوگی۔

    انھوں نے کہا کہ وہ یہ جان کر خوش ہیں کہ رکن ممالک خود سے سرحدی سختیاں ہٹا رہے ہیں۔

    یورپ کے کئے ممالک مقامی سطح پر وائرس سے بچاؤ کے اقدامات میں نرمی لا رہے ہیں۔ حالیہ دنوں میں بعض نے سرحدیں کھول بھی دی ہیں۔

    تاہم اس حوالے سے کوئی واضح اشارہ نہیں مل سکا کہ یورپی ممالک کب اپنی سرحدیں ایک دوسرے کے شہریوں کے لیے کھول دیں گے۔

14. 5 جون 2020کورونا میں احتجاج کیسے کریں؟

    اس وقت مختلف تنازعات اور مسائل پر پوری دنیا میں احتجاج جاری ہے۔ ایسی صورتحال میں خدشات پیدا ہو رہے ہیں کہ اس سے کورونا وائرس کے انفیکشن میں اضافہ ہوسکتا ہے۔

    آؤٹ سائیڈ بی بی سی کے پروگرام میں گفتگو کرتے ہوئے ، مالیکیولر ایپیڈیمولوجسٹ ڈاکٹر ایما ہوڈکروفٹ نے مظاہروں میں شامل ہوکر کورونا وائرس سے کیسے بچنے کے بارے میں تجاویز دی ہیں۔

    ہر چار گھنٹے بعد ماسک تبدیل کریں اور پرانے ماسک کو بحفاظت تلف کریں۔ ماسک پہنتے وقت ماسک کو چھونے کی غلطی نہ کریں۔

    • ہمیشہ زیادہ افراد کے گروہ میں جانے سے پہلے ماسک پہنیں۔
    • اگر وہ افراد آپ کے خاندان کے نہیں ہیں تو ہر ایک سے دو میٹر کا فاصلہ رکھیں۔
    • احتجاج کے منتظمین کی جانب سے مظاہرین کو ماسک ، ہینڈ سینیٹائزر دیئے جائیں۔
    • منتظمین کو چاہیے کہ وہ احتجاج کے مقامات پر لوگوں کے کھڑے ہونے کے لیے مناسب انتظامات کریں تاکہ انہیں ایک دوسرے سے فاصلہ برقرار رکھنے کے لیے کافی جگہ مل سکے۔
    • احتجاج کے دوران نعرے بازی سے منہ میں پانی آسکتا ہے۔ ایسی صورتحال میں کسی کو شور مچانے جیسے دوسرے طریقوں جیسے ڈرم وغیرہ کے بارے میں سوچنا چاہیے۔اگر آپ اب بھی جذباتی گانے گانا چاہتے ہیں یا نعرے بلند کرنا چاہتے ہیں تو، ماسک کو ہٹائے بغیر کریں۔
    • کسی دوسرے سے پوسٹر، بینر وغیرہ شیئر نہ کریں اور ایسی کوئی چیز مت چھوئیں جو آپ کی اپنی نہ ہو۔ اپنے گھر سے پوسٹر اور پینے کا پانی لے آئیں تاکہ آپ کو یہ چیزیں کسی اور کے ساتھ بانٹنے کی ضرورت نہ پڑے۔
    • احتجاج میں ، بولنے والوں کو انفیکشن کے بارے میں کچھ زیادہ محتاط رہنے کی ضرورت ہے۔ مائیکروفون کو سینیٹائزر کے ساتھ مناسب طریقے سے صاف کرنا چاہیے۔
    • سامعین اور مقررین کے مابین کافی فاصلہ ہونا چاہیے تاکہ پانی (تھوک) جو منہ سے نکلے وہ کسی کو متاثر نہ کرے۔
    • اگر آپ کو اپنے اندر کورونا وائرس سے متعلق کوئی علامات نظر آتی ہیں تو پھر احتجاج میں نہ جائیں۔

15. 5 جون 2020بریکنگ, پاکستان: پنجاب میں 2040 نئے کیسز اور 22 اموات

    پاکستان کے صوبہ پنجاب میں گذشتہ 24 گھنٹوں کے دوران مزید 2040 افراد میں کورونا وائرس کی تصدیق ہوئی ہے جس کے بعد صوبے میں متاثرہ افراد کی مجموعی تعداد 33144 ہو گئی ہے۔

    صوبے میں ایک دن کے دوران مزید 22 افراد لقمہ اجل بن گئے جس کے بعد وبا کے باعث ہونے والی ہلاکتیں 629 ہو گئی ہیں۔

    اب تک صوبے پنجاب میں 7806 افراد اس وائرس سے صحت یاب ہو چکے ہیں۔

16. 5 جون 2020بریکنگ, بلوچستان میں مزید 228 نئے متاثرین کی شناخت، دو اموات

    بلوچستان میں کورونا وائرس کے مزید 228 کیسز کی تصدیق کے بعد صوبے میں مجموعی کیسز کی تعدا 5582 ہوگئی ہے جبکہ کورونا سے مزید دو افراد کی ہلاکت کے بعد ہلاک ہونے والے افراد کی مصدقہ تعداد 53 ہوگئی ہے۔

    محکمہ صحت حکومت بلوچستان کی رپورٹ کے مطابق چارجون 2020 کو کورونا کے 798 ٹیسٹ کیے گئے جن میں سے 228 پازیٹو آئے۔

    بلوچستان میں اب تک کورونا کے مجموعی طور پر 28099 ٹیسٹ کیے گئے جن میں سے 23495 کے نتائج منفی آئے۔

    بلوچستان میں مجموعی طوپر پر68691 کی سکریننگ کی گئی۔ اب بھی صوبے میں مشتبہ مریضوں کی تعداد 25802 ہے۔

    کورونا وائرس سے اب تک صوبے میں 2037 افراد صحتیاب ہوئے ہیں۔

17. 4 جون 2020’پریشانی کی بات نہیں ہے‘: میکسیکو میں ایک دن میں ہزار سے زیادہ اموات پر صدر کا بیان

    میکسیکو کے صدر آندریس مینئیول لوپیز اوبدرادور نے اپنے ہم وطنوں کو ملک میں گذشتہ 24 گھنٹوں میں کورونا وائرس کی وجہ سے ایک ہزار سے زیادہ اموات ہونے کے باوجود تسلی دی ہے کہ یہ پریشانی کی بات نہیں ہے۔

    بدھ کی شام صحت کے نائب وزیر ہیوگو لوپیز گیٹل نے بتایا کہ ملک میں 1092 اموات ایک دن میں ریکارڈ کی گئی ہیں جو کہ اب تک کی سب سے زیادہ تعداد ہے۔

    صدر اوبدرادور نے کہا کہ تمام اموات صرف 24 گھنٹوں کی نہیں ہیں بلکہ چند پرانی ہیں جنھیں ابھی گنا جا رہا ہے۔

    جمعرات کو پریس کانفرنس سے خطاب کرتے ہوئے انھوں نے کہا کہ ’ہمیں بہت احتیاط کرنی ہوگی، سماجی فاصلہ برقرار رکھنا ہوگا، لیکن بلاوجہ ڈرنے کی ضرورت نہیں ہے۔ ہمیں ڈر و خوف پھیلانے والوں کی باتوں پر کان نہیں دھرنے چاہیے۔‘

    صدر کے ناقد کہتے ہیں کہ انطوں نے وبا کے پھیلاؤ کو سنجیدگی سے نہیں لیا اور ملک میں لاک ڈاؤن بھی قبل از وقت ختم کر رہے ہیں۔

    صدر کا کہنا ہے کہ لاک ڈاؤن نہ اٹھایا تو میکسیکو کی معیشت کو بہت نقصان پہنچے گا اور لوگوں کی زندگیوں پر اثر ہوگا۔

18. 4 جون 2020آج کے پیرس میں قدیم دور کے چینیوں کی طرح سماجی دوری برقرار رکھنا کیسے ممکن ہے؟

    فرانس کے شہر پیرس میں ایک آرٹ گیلری نے قدیم دور کے چینی حکمران کے زمانے کی ثقافت سے متاثر ہوتے ہوئے سماجی فاصلوں کے قوانین پر عملدرآمد شروع کیا ہے۔

    چین میں 960 سے لے کر 1279 عیسوی تک سونگ خاندان کی حکمرانی تھی اور ان کے دور میں مقبول ہونے والی ٹوپیاں اس طرز سے بنی ہوئی ہیں کہ اس میں سے پر نکل رہے ہوتے ہیں اور وہ پہننے والے کو دوسروں سے ایک میٹر کے فاصلے تک رکھ سکتے ہیں۔

    کہا جاتا ہے کہ سونگ سلطنت کے پہلے بادشاہ نے اپنے افسران کو یہ ٹوپیاں پہننے کا حکم دیا تھا تاکہ وہ ایک دوسرے کے ساتھ ہونے والی گفتگو نہ سن سکیں۔

    پیرس کی آرٹ گیلری کے لیے ٹوپیاں بنانےوالی ڈیزائنر ڈومینیک پوزول نے کہا کہ اس کا مطلب ہے کہ اُس زمانے میں لوگوں میں سماجی فاصلے برقرار رکھنے کا رواج تھا۔

19. 4 جون 2020خیبر پختون خوا کے ضلع دیر میں متاثرین کی بڑھتی ہوئی تعداد انتظامیہ کے لیے پریشانی کا باعث, محمد زبیر خان، صحافی

    صوبہ خیبر پختونخواہ میں ضلع دیر متاثرین کے اعتبار سے صوبے بھر میں دوسرے نمبر پر ہے۔

    صوبہ خیبر پختونخواہ کے محکمہ صحت کے مطابق دو جون تک ضلع لوئر دیر میں کورونا متاثرین کی تعداد 400 تھی جبکہ 11 افراد ہلاک ہوئے تھے۔

    ضلع لوئر دیر کے ڈسڑکٹ ہیلتھ آفسیر ڈاکٹر محمد نذیر نے بی بی سی سے بات کرتے ہوئے کہا کہ ہمارے کئی مریض پشاور کے ہسپتالوں میں بھی ہلاک ہوئے ہیںجن کا ریکارڈ ہمارے پاس نہیں ہوتا بلکہ پشاور ہی میں ان کا اندراج کیا جاتا ہے اور اسی طرح کئی لوگ پشاور میں ٹیسٹ کرواتے ہیں اور ان کا ریکارڈ پشاور ہی میں مرتب ہوتا ہے۔

    ان کا کہنا تھا کہ اس حساب سے دیر میں ہلاکتوں کی تعداد زیادہ ہونے کا امکان ہے۔

    ڈاکٹر نذیر کا کہنا تھا کہ اگر ہم صرف ریکارڈ میں مرتب کردہ اعدادوشمار بھی دیکھیں تو متاثرین کی تعداد میں اضافہ ہوتا جارہا ہے۔ ان کے مطابق ضلع میں تین جون کو کُل 84 ٹیسٹ ہوئے جن میں سے 57 مثبت آئے جو کہ ستر فیصد شرح ہے۔

    ان کا کہنا تھا کہ روزانہ کی بنیاد پر ہونے والی ٹیسٹوں میں یہ شرح تبدیل ہوتی رہتی ہے۔

    ڈاکٹر نذیر کا کہنا تھا کہ ضلع لوئر دیر کافی متاثر ہوچکا ہے اور اب تک کی صورتحال تو کچھ حد تک قابو میں ہے لیکن اگر حالات زیادہ خراب ہوتے ہیں تو پھر پاس مریضوں کو سنبھالنے کے لیے بنیادی وسائل نہیں ہیں۔

    ڈاکٹر محمد نذیر کا کہنا تھا کہ شدید متاثرہ مریض کو پشاور بھجا جاتا ہے جو کہ تین گھنٹے کے فاصلے پر ہے۔

    خیال رہے کہ وزارت صحت اسلام آباد کی حالیہ دونوں میں مرتب کردہ اعدادوشمار کے مطابق صوبہ خیبر پختونخواہ میں وینٹیلیڑز کی سہولتصوبہ کے صرف دو شہروں پشاور اور ایبٹ آباد میں موجود ہے۔

20. 4 جون 2020بریکنگ, پاکستان کے زیر انتظام کشمیر میں بھی متاثرین کی تعداد بڑھ کر 325 ہو گئی

    پاکستان کے زیر انتظام کشمیر کے حکام کے مطابق سات خواتین اور دو بچوں سمیت 27 افراد میں کورونا وائرس کی تشخیص ہوئی ہے جس کے بعد اس خطے میں کورونا وائرس سے متاثر ہونے والے افراد کی تعداد 325 ہوگئی ہے۔

    ضلع مظفرآباد کے ہیلتھ آفیسر ڈاکٹر سعید کے مطابق دارالحکومت مظفرآباد میں چھ خواتین سمیت 13 افراد کورونا وائرس سے متاثر ہوئے ہیں۔

    حکام کے مطابق کورونا کے نو مریض صحتیاب ہوئے ہیں جس کے بعد اس خطے میں صحتیاب مریضوں کی تعداد 182 ہوگی ہے.