فائزر کی ویکسین کورونا وائرس کی نئی اقسام کے خلاف بھی کارگر

تازہ تحقیق میں بات سامنے آئی ہے کہ ادویات بنانے والی عالمی کمپنیوں فائزر اور بائیو این ٹیک کی ویکسین کورونا وائرس کی نئی اقسام کے خلاف بھی کارگر ہیں۔ ادھر جان ہاپکنز یونیورسٹی اور امریکی میڈیا کے جاری کردہ اعداد و شمار کے مطابق امریکہ میں پہلی بار ایک دن میں چار ہزار اموات ہوئی ہیں۔

لائیو کوریج

3 دسمبر 2020پاکستان میں کورونا ویکسین 2021 کی دوسری سہ ماہی تک دستیاب ہو گی: ڈاکٹر فیصل سلطان
YouTube پوسٹ نظرانداز کریں
Google YouTube کا مواد دکھانے کی اجازت دی جائے؟?
اس تحریر میں ایسا مواد ہے جو Google YouTube کی جانب سے دیا گیا ہے۔ کسی بھی چیز کے لوڈ ہونے سے قبل ہم آپ سے اجازت چاہتے ہیں کیونکہ یہ ممکن ہے کہ وہ کوئی مخصوص کوکیز یا ٹیکنالوجیز کا استعمال کر رہے ہوں۔ آپ اسے تسلیم کرنے سے پہلے Google YouTube ککی پالیسی اور پرائیویسی پالیسی پڑھنا چاہیں گے۔ اس مواد کو دیکھنے کے لیے ’تسلیم کریں، جاری رکھیں‘ پر کلک کریں۔
تنبیہ: بی بی سی دیگر ویب سائٹس کے مواد کی ذمہ دار نہیں ہے۔ YouTube کے مواد میں اشتہارات ہو سکتے ہیں۔
YouTube پوسٹ کا اختتام
پاکستان کو کورونا وبا کی دوسری لہر کا سامنا ہے۔ بی بی سی کی شمائلہ جعفری نے وزیر اعظم کے معاون خصوصی برائے صحت ڈاکٹر فیصل سلطان سے بات کی اور ان سے پوچھا کہ حکومت اس صورتحال سے نمٹنے کے لیے کیا کر رہی ہے اور پاکستان میں ویکسین کب دستیاب ہوگی؟ ویڈیو ایڈیٹنگ: فاخرمنیر
3 دسمبر 2020ضلعی انتظامیہ کا پشاور بھر میں کورونا ضابطہ اخلاق کی خلاف ورزی پر کریک ڈاؤن
،تصویر کا ذریعہFacebook/DCPeshawar
پشاور میں بار بار نوٹس کے باوجود سیفٹی ماسک کا استعمال نہ کرنا اور مارکیٹوں میں رش اور سماجی فاصلے کا خیال نہ رکھنے پر ضلعی انتظامیہ کی جانب سے کارروائی کی گئی ہے۔
ضلعی انتظامیہ کی جانب سے جاری کردہ اعلامیے کے مطابق بی آر ٹی سٹیشنوں اور بسوں میں سیفٹی ماسک استعمال نہ کرنے پر 52 افراد پر موقع پر جرمانہ کیا گیا ہے جبکہ مختلف شادی ہال اور ریستورانوں کو سیل کرنے کا حکم دیا گیا ہے۔
ضلعی انتظامیہ کی جانب سے تاجر برادری اور عوام سے اپیل کی گئی ہے کہ بازاروں میں رش نہ بنائیں اور حکومتی ضابطہ اخلاق پر عمل درآمد کریں۔
3 دسمبر 2020ہیکرز کی ویکسین کی فراہمی کے سلسلے کو نشانہ بنانے کی کوشش
،تصویر کا ذریعہGetty Images
آئی بی ایم کے مطابق بین الاقوامی ویکسین کی فراہمی کے سلسلے کو ہیکرز کی جانب سے نشانہ بنانے کی کوشش کی گئی ہے۔
کمپنی کا کہنا ہے کہ انھوں نے ایک ایسے حملے کی نشاندہی کی ہے جو آمد و رفت کے دوران ویکسین کو ایک مخصوص درجہ حرارت پر رکھنے کے مرحلے کو نشانہ بنانے کی کوشش کر رہے تھے۔
ان ہیکرز کی شناخت ابھی واضح نہیں ہے لیکن آئی بی ایم کا کہنا ہے کہ ان کے طریقے سے یہ بات ایاں ہے کہ انھیں ملکی معاونت حاصل ہے۔
اس کے ساتھ ہی مختلف حکومتوں کی جانب سے خبردار کیا گیا ہے کہ ویکسین کی تحقیق پر مختلف ممالک سائبر حملے کرنے کی کوشش کر رہے ہیں۔
3 دسمبر 2020یورپی یونین کی برطانیہ میں ویکسین کے استعمال کی منظوری پر تنقید
یورپی یونین نے برطانیہ میں فائزر ویکسین کی ہنگامی بنیادوں پر منظوری کے فیصلے پر تنقید کی ہے۔
کووڈ-19 کی منظوری کے لیے مامور یورپی میڈیسن ایجنسی نے ایک بیان میں کہا ہے کہ ویکسین کی منظوری کے لیے ان کا طریقہ کار، برطانیہ میں اپنائے گئے طریقہ کار کی نسبت زیادہ جامع ہے اور اس میں زیادہ جانچ کے بعد شواہد کو دیکھتے ہوئے منظوری دی جائے گی۔
خیال رہے کہ یورپی یونین نے کہا ہے کہ وہ 29 دسمبر کو ایک اجلاس میں فائزر بایو این ٹیک ویکسین کے بارے میں فیصلہ کرے گی۔
3 دسمبر 2020برطانیہ میں کووڈ ویکسین کس طرح اور کسے دی جائے گی؟
برطانیہ میں ویکسین اور ایمونائزیشن کے لیے بنائی گئی کمیٹی نے ویکسین کے استعمال کے لیے ترجیحی سفارشات تیار کی ہیں۔ ان کی رائے کے مطابق ویکسین سب سے پہلے کیئر ہومز میں موجود معمر افراد اور ان کی دیکھ بھال کرنے والے افراد کو دی جائے گی۔
دوسرے نمبر پر وہ افراد آئیں گے جن کی عمر 80 سال یا اس سے زیادہ ہے اور وہ تمام افراد جو صحت اور سوشل ورک کے محکموں میں براہ راست مریضوں کے ساتھ کام کر رہے ہیں۔ تیسرے نمبر پر 75 سال سے زیادہ عمر کے افراد، چوتھے نمبر پر 70 سال سے زیادہ عمر کے تمام افراد اور ایسے تمام افراد جن کی مدافعت بیماری کے باعث کمزور ہے۔
پانچویں نمبر پر 65 سال سے زیادہ عمر کے افراد، چھٹے نمبر پر 16 سے 64 سال کی عمر کے ایسے تمام افراد جنھیں صحت کے دیگر مسائل کا سامنا ہے۔
ساتویں، آٹھویں اور نویں نمبر پر بالترتیب ساٹھ، پچپن اورپچاس سال کی عمر کے افراد کو ترجیح دی جائے گی۔
خیال رہے کہ ویکسین کی ڈوز اکیس دن کے وقفے سے دو بار دی جائے گی اور دوسری خوراک کے سات دن کے بعد کووڈ کے خلاف مدافعت پیدا ہو گی۔
3 دسمبر 2020کورونا: پاکستان بھر میں سیاسی و مذہبی اجتماعات پر پابندی کی درخواست مسترد
اسلام آباد ہائی کورٹ نے کورونا کی وجہ سے ملک بھر میں سیاسی اور مذہبی اجتماعات پر پابندی لگانے کی درخواست مسترد کر دی ہے۔
نامہ نگار شہزاد ملک کے مطابق بدھ کو سماعت کے دوران چیف جسٹس اطہر من اللہ نے ریمارکس دیے کہ ’ہم نے تو حکم دے دیا ۔ عدالتی حکم پر کوئی عمل نہیں کرا رہا اور سیاست میں مشغول ہے تو ہم کیوں مداخلت کریں؟‘
عدالت نے فیصلے میں کہا کہ یہ پارلیمان اورایگزیکٹو اتھارٹیز پر منحصر ہے کہ کووڈ کے چیلنج سے نمٹنے کے لیے قوم کو اکٹھا کرنے میں اپنا کردار ادا کریں۔
درخواست میں موقف اختیار کیا گیا تھا کہ عدالت نے حالیہ فیصلے میں این سی اوسی کے فیصلوں پر عمل درآمد لازمی قرار دیا تھا اور اب جبکہ ملک میں بڑے اجتماعات سے کورونا پھیلنے کا خدشہ ہے تو ریاست کی ذمہ داری ہے کہ وہ کورونا ایس او پیز پر عمل کرائے اور این سی او سی کو آؤٹ ڈور جلسوں سے متعلق گائیڈ لائنز پر پابندی کرانے کا حکم دیا جائے۔
3 دسمبر 2020سندھ میں تقریباً دو ہزار نئے مریض
سندھ کی وزیرِ صحت سندھ ڈاکٹر عذرا پیچوہو کا کہنا ہے کہ موسمِ گرما کے مقابلے میں موسمِ سرما میں کورونا وائرس تیزی پھیلنے کا خدشہ ہے۔
ان کی جانب سے یہ بیان اس وقت سامنے آیا ہے جب گذشتہ 24 گھنٹوں کے دوران صوبے میں کورونا کے نئے مریضوں کی تعداد دو ہزار کے قریب رہی ہے۔
وزیرِ صحت کے مطابق سندھ میں اس عرصے میں 1983 نئے مریض سامنے آئے جو پانچ جولائی کے بعد ایک دن میں مریضوں کی سب سے زیادہ تعداد ہے۔
ایک دن قبل یہ تعداد 1333 تھی یعنی ایک دن میں نئے مریضوں کی تعداد میں تقریباً چھ سو کا اضافہ دیکھا گیا ہے۔
عذرا پیچوہو نے خبردار کیا کہ کورونا کی دوسری لہر کے دوران کیسز میں تیزی سے اضافے کا خدشہ ہے۔
ان کا کہنا تھا کہ پہلی لہر کے دوران زیادہ کیس آنے کے بعد سخت اقدامات کی وجہ سے کورونا کا پھیلاؤ روکنے میں مدد ملی تھی اور موجودہ صورتحال کو مدنظر رکھتے ہوئے ایس او پیز پر عمل کرنا لازمی ہے جبکہ عوامی مقامات پر جانے سے گریز اور ماسک پہننے سے نئے مریضوں کی تعداد میں کمی آ سکتی ہے۔
3 دسمبر 2020غیرمحفوظ جنسی تعلق سے اجتناب کی شرط سے کورونا ویکسین ٹرائل کے رضاکار پریشان
اگر آپ کورونا وائرس سے بچاؤ کی تحقیقاتی ویکسین لینا چاہتے ہیں تو ’آپ کو جنسی تعلقات قائم کرنے سے مکمل پرہیز کرنا ہو گا‘ یا پھر آپ کو ویکسین تو لگائی جا سکتی ہے مگر ’آپ کو ویکسین لگنے کے بعد کم از کم نوے دن تک مانع حمل طریقہ اختیار کرنا ہو گا۔‘
دیگر قواعد و ضوابط پر پابندی کے ساتھ ساتھ ان شرائط پر عمل کرنا اُن افراد کے لیے ضروری ہے جو اِن دنوں پاکستان میں جاری کورونا وائرس کی تحقیقاتی ویکسین کے ٹرائل کا رضاکارانہ طور پر حصہ بن رہے ہیں یا بننا چاہتے ہیں۔
پاکستان میں تحقیقاتی ویکسین کے اس نوعیت کے ٹرائل پہلی مرتبہ ہو رہے ہیں تاہم حکام کے مطابق ان کی توقعات کے برعکس زیادہ بڑی تعداد میں لوگ اس ٹرائل کا حصہ بننے کے لیے سامنے نہیں آ رہے ہیں۔
اس کی ایک وجہ لوگوں میں ’جنسی تعلق قائم نہ کرنے‘ سے متعلقہ شرائط کے حوالے سے پائے جانے والے ’شکوک و شبہات‘ ہیں۔
3 دسمبر 2020کووڈ ویکسین کے حوالے سے انٹرنیٹ پر موجود افواہوں سے کیسے بچا جائے؟
،تصویر کا ذریعہGetty Images
اب جبکہ کووڈ 19 کی متعدد ویکسین ممکنہ طور پر تیاری کے قریب ہیں تو پاکستان سمیت دنیا کے دیگر ممالک میں ایسے خدشات بڑھ رہے ہیں کہ انٹرنیٹ پر اس حوالے سے موجود غلط معلومات کی وجہ سے کچھ لوگ ان ممکنہ حفاظتی ویکسینز کو لگوانے سے گریز کریں گے۔
عالمی ادارہ صحت یعنی ڈبلیو ایچ او کا کہنا ہے کہ دنیا ناصرف وبائی مرض سے لڑ رہی ہے بلکہ اسے ’انفیوڈیمک‘ یعنی معلومات کی افراط کا بھی سامنا ہے جن میں سے بہت سی غلط ہیں جس کی باعث لوگوں کو اپنی صحت کے بارے میں فیصلہ کرنا مشکل ہو جاتا ہے۔
3 دسمبر 2020بریکنگ, امریکہ میں وبا کے آغاز کے بعد سب سے ہلاکت خیز دن
،تصویر کا ذریعہReuters
امریکہ جو کہ دنیا میں کورونا وائرس کی وبا کا مرکز ہے وہاں بھی اس وبا کی دوسری لہر پہلی لہر کے مقابلے میں زیادہ ہلاکت خیز ثابت ہو رہی ہے۔
امریکی حکام کے مطابق بدھ کو ملک میں کووڈ 19 سے ایک دن میں 2760 اموات ریکارڈ کی گئیں جو وبا کے آغاز کے بعد اب تک ایک دن میں اس سے ہونے والی سب سے زیادہ ہلاکتیں ہیں۔
اس سے قبل امریکہ میں ایک دن میں سب سے زیادہ اموات 15 اپریل کو ریکارڈ کی گئی تھیں جو 2752 تھیں۔
امریکہ میں وبائی امراض سے متعلق ادارے سینٹرز فار ڈیزیز کنٹرول نے خبردار کیا ہے کہ موجودہ موسمِ سرما امریکہ میں عوامی صحت کے لحاظ سے ’ مشکل ترین وقت‘ ثابت ہو سکتا ہے۔
3 دسمبر 2020کووڈ-19 کی ویکسینز محفوظ ہیں، فیصلہ کون کرے گا؟
،تصویر کا ذریعہGetty Images
پاکستان میں حکام کا کہنا ہے کہ کورونا کی ویکسین سنہ 2021 کی پہلی سہ ماہی میں دستیاب ہو سکتی ہے۔ پاکستان کی وفاقی کابینہ نے ویکسین کی خریداری کے لیے 15 کروڑ ڈالر کی رقم کی فراہمی کی بھی منظوری دی ہے۔
وزیراعظم پاکستان کے معاون خصوصی برائے صحت ڈاکٹر فیصل سلطان کا کہنا ہے کہ ملک میں یہ ویکسین سب سے پہلے کورونا کے خلاف جنگ میں مصروف ’فرنٹ لائن ورکرز‘ یعنی طبی عملے کو دی جائے گی۔
جہاں بہت سے لوگ جلد سے جلد ان ویکسینز کو لگوانے کے لیے بیتاب ہیں وہیں کچھ لوگ ایک انجان دوا کو اپنے جسم میں داخل کرنے پر پریشان دکھائی دیتے ہیں۔
جانیے کہ کیا یہ ویکسینز محفوظ ہیں اور ان کے محفوظ ہونے کا فیصلہ کون کر رہا ہے
3 دسمبر 2020پاکستان میں تازہ ترین صورتحال کیا ہے؟
پاکستان میں کورونا وائرس کی دوسری لہر جاری ہے اور اس کے پیش نظر تعلیمی اداروں کی بندش سمیت دوسرے اقدامات اٹھائے جا رہے ہیں تاہم کورونا وائرس سے متعلق حفاظتی اصولوں کی خلاف ورزیاں بھی نظر آرہی ہیں۔
پاکستان میں حکومتی اعدادوشمار کے مطابق چار لاکھ سے زیادہ لوگ اس وائرس سے متاثر جبکہ آٹھ ہزار سے زیادہ اس سے ہلاک ہو چکے ہیں۔
بدھ کے روز پاکستان میں کورونا وائرس کے 3499 نئے مریض سامنے آئے ہیں جبکہ 39 اموات ریکارڈ کی گئی ہیں۔
اس وقت ملک بھر میں زیر علاج مریضوں کی تعداد 51 ہزار سے زیادہ ہے۔
3 دسمبر 2020دنیا میں کووڈ-19 سے 14 لاکھ سے زیادہ اموات کہاں کہاں ہوئی ہیں؟
بی بی سی اردو کے انٹرایکٹو نقشے کی مدد سے جانیے کہ دنیا بھر میں کورونا کے متاثرین کی تعداد کیا ہے اور کون سے ملک اس سے سب سے زیادہ متاثر ہوئے ہیں:
3 دسمبر 2020کورونا وائرس: دنیا بھر میں تازہ ترین صورتحال کیا ہے؟
دنیا بھر میں کووڈ 19 یا کورونا وائرس کی دوسری لہر زیادہ ہلاکت خیز ثابت ہو رہی ہے اور اس وبا سے ہلاک ہونے والوں کی تعداد 14 لاکھ 90 ہزار سے تجاوز کر گئی ہے۔
کورونا وائرس کو عالمی ادارۂ صحت کی جانب سے عالمی وبا قرار دیا گیا ہے اور امریکہ میں اس وائرس کے باعث اب تک دو لاکھ 70 ہزار سے زیادہ ہلاکتیں ہو چکی ہیں۔
ایک کروڑ 39 لاکھ سے زیادہ سے زیادہ متاثرین کے ساتھ امریکہ ہی دنیا میں اس وبا کا سب سے بڑا مرکز ہے۔
انڈیا 94 لاکھ سے زائد متاثرین کے ساتھ دنیا میں دوسرے نمبر پر سب سے متاثرہ ملک ہے جبکہ اموات کے اعتبار سے برازیل ایک لاکھ 74 ہزار سے زیادہ ہلاکتوں کے ساتھ دنیا میں دوسرے نمبر پر ہے۔
3 دسمبر 2020کورونا کی دوسری لہر زیادہ ہلاکت خیز
بی بی سی اردو کے لائیو پیج پر خوش آمدید! دنیا بھر میں کورونا وائرس کی دوسری لہر جاری ہے جس کے پیش نظر بی بی سی اردو نے اپنے قارئین کو لمحہ با لمحہ با خبر رکھنے کے لیے دوبارہ سے لائیو پیج کا آغاز کیا ہے۔ آپ ہمارے لائیو پیج سے دنیا بھر میں کورونا وائرس کی تازہ ترین صورتحال سے آگاہ رہیں گے۔