آپ اس وقت اس ویب سائٹ کا ٹیکسٹ پر مبنی ورژن دیکھ رہے ہیں جو کم ڈیٹا استعمال کرتا ہے۔ مرکزی ویب سائٹ جہاں تمام تصاویر اور ویڈیوز موجود ہیں دیکھیے
دنیا میں کورونا وائرس کے مریضوں کی تعداد 9 لاکھ سے اور ہلاکتیں 45 ہزار سے زیادہ ہو چکی ہیں۔ صرف امریکہ میں مریضوں کی تعداد 2 لاکھ سے زیادہ ہے۔ یورپ میں 30 ہزار سے زیادہ اموات ہو چکی ہیں۔ غیر یقینی صورتحال کے پیشِ نظر سعودی عرب نے مسلمانوں پر زور دیا ہے کہ وہ بکنگ کروانے سے پہلے مزید انتظار کریں۔ اس کے علاوہ برطانیہ میں ٹینس کا ٹورنامنٹ ومبلڈن بھی کینسل ہو گیا ہے۔
ایرانی خبر رساں ادارے ارنا کے مطابق مشہد سے پاکستان کی سرحد کی طرف جانے والی بس پر سوار ایک پاکستانی خاتون مسافر کا کورونا کی وجہ سے انتقال ہوا ہے۔
خبر رساں ادارے کے مطابق خاتون کی حالت بگڑنے کے بعد بس کو صوبہ نہبندان میں روکا گیا لیکن وہ جانبر نہ ہو سکیں۔
ارنا نے نہبندان کے گورنر ماجد بیکی کے حوالے سے بتایا ہے کہ خاتون کی میت کو مردہ گھر میں رکھا گیا ہے اور قانونی کارروائی کے بعد اسے تفتان کی سرحد پر پاکستانی حکام کے حوالے کیا جائے گا۔
ایران نے سنیچر کو اپنے ملک میں کورونا وائرس کے تین ہزار 76 نئے متاثرین کی تصدیق کی ہے جس کے بعد ملک میں کورونا وائرس کے متاثرین کی کُل تعداد 35 ہزار 408 ہوگئی ہے۔
ایرانی وزارتِ صحت کے ترجمان کیانوش جہانپور نے کہا ہے کہ 3206 مریض تشویش ناک حالت میں ہیں۔
ایک نیوز کانفرنس سے خطاب کرتے ہوئے انھوں نے کہا کہ گذشتہ 24 گھنٹوں میں ایران میں 139 افراد ہلاک ہوئے ہیں جس کے بعد ہلاکتوں کی تعداد 2517 ہوگئی ہے۔
انھوں نے کہا کہ اب تک 11 ہزار 679 افراد صحتیاب ہوچکے ہیں۔
مصر کی حکومت نے کورونا وائرس کے پھیلاؤ کو روکنے کے لیے کئی نئے اقدامات اٹھائے ہیں جن میں قرنطینے کی مدت کو 28 دن تک بڑھانا بھی شامل ہے۔
اس سے قبل دوسرے ممالک سے آنے والے لوگوں کے لیے قرنطینے کی مدت 14 دن تھی۔
نجی نیوز ویب سائٹ المصری الیوم نے صدارتی مشیر برائے صحت کے حوالے سے بتایا کہ یہ اقدام ان اطلاعات کے بعد اٹھایا گیا کہ چند ممالک میں وائرس کی نشونما کا دورانیہ 14 دن سے بھی زیادہ ہے۔
اس دوران مصری طبی حکام نے بالائی مصر میں کورونا وائرس کے آٹھ مشتبہ متاثرین کے سامنے آنے کے بعد وہاں کے دو دیہات کو قرنطینہ کر دیا ہے۔
عرب میڈیا کے مطابق اردن نے کورونا وائرس سے اپنے ملک میں پہلی ہلاکت کا اعلان کر دیا ہے۔
83 سالہ خاتون کو اردن کے دارالحکومت عمان کے پرنس حمزہ ہسپتال میں داخل کیا گیا تھا۔
اردن کی ویب سائٹ المملکۃ ٹی وی کے مطابق اس سے قبل وہ ایک نجی ہسپتال میں زیرِ علاج تھیں۔
جاپان کے دارالحکومت ٹوکیو میں گذشتہ 24 گھنٹوں کے دوران کورونا وائرس کے 50 نئے کیسز سامنے آئے ہیں جو کہ ایک دن میں ریکارڈ کی جانے والی سب سے بڑی تعداد ہے۔
یہ اعداد و شمار سرکاری نشریاتی ادارے این ایچ کے نے رپورٹ کیے جس کا کہنا ہے کہ جاپانی دارالحکومت میں اب 300 سے زیادہ تصدیق شدہ متاثرین ہیں۔
ٹوکیو کے گورنر یوریکو کوئکے نے شہر اور مضافاتی علاقوں کے رہائشیوں پر زور دیا ہے کہ وہ گھر کے اندر ہی رہیں۔
جانز ہاپکنز یونیورسٹی کے اکٹھا کردہ اعداد و شمار کے مطابق جاپان نے کورونا وائرس کے تقریباً 1500 سے زائد متاثرین اور 49 ہلاکتوں کی اطلاع دی ہے۔
رواں سال ٹوکیو میں اولمپک اور پیرالمپک کھیل منعقد ہونے تھے مگر وبا کی وجہ سے انھیں 2021 تک ملتوی کر دیا گیا ہے۔
ووہان، جہاں سے گذشتہ سال کورونا وائرس پہلی مرتبہ سامنے آیا تھا، اسے دو ماہ تک باقی چین سے علیحدہ رکھنے کے بعد اب جُزوی طور پر کھول دیا گیا ہے۔
اب لوگ ووہان میں داخل ہوسکتے ہیں مگر ووہان چھوڑ نہیں سکتے۔ چین کے صوبے ہوبائی کے اس شہر کو جنوری میں لاک ڈاؤن کر دیا گیا تھا، سفر معطل اور روز مرہ کی زندگی پر سخت ترین پابندیاں عائد کر دی گئی تھیں۔
سرکاری میڈیا پر جاری ہونے والی تصاویر میں دکھایا گیا کہ باضابطہ منظوری کے بعد پہلی ٹرین نصف شب کے بعد شہر میں داخل ہوئی۔
ووہان کا زیادہ تر سب وے نیٹ ورک بھی کھول دیا گیا ہے جبکہ چند شاپنگ سینٹر اگلے ہفتے سے کھولے جائیں گے۔
ایک کروڑ 10 لاکھ آبادی والے شہر کے حکام نے دسمبر میں مطلع کیا تھا کہ وہ ایک پراسرار نمونیا جیسی بیماری کے متاثرین کا سامنا کر رہے ہیں۔
جانز ہاپکنز یونیورسٹی کے ڈیٹا کے مطابق چین میں اب تک تقریباً 3299 اموات ہوچکی ہیں۔
یورپ اب کورونا وائرس کی عالمی وبا کا مرکز بن چکا ہے لیکن اسی براعظم پر ایک ایسا ملک بھی ہے جہاں حکام عوام کو اپنے روز مرہ کی زندگی کے معمولات کو تبدیل نہ کرنے کی ہدایات دے رہے ہیں۔
بیلاروس کئی اعتبار سے ایک انوکھا ملک ہے۔ یہ یورپ کے دیگر ملکوں اور اپنے قریب ترین ہمسایہ ممالک، یوکرین اور روس، سے بہت مختلف رویہ اختیار کیے ہوئے ہے۔
یوکرین ہنگامی حالت نافذ کرنے والا ہے جبکہ روس میں سکول بند کر دیے گئے ہیں، بڑے اجتماعات پر پابندی ہے اور ملک میں آنے اور جانے والی تمام پروازوں کو معطل کر دیا گیا ہے۔ دوسری جانب بیلاروس میں کئی لحاظ سے زندگی معمول کے مطابق چل رہی ہے۔
بیلا روس کی سرحدیں کھلی ہیں، لوگ اپنے کاموں پر جا رہے ہیں اور سراسیمگی کے عالم میں کوئی ٹوائلٹ پیپر خرید کر ذخیرہ نہیں کر رہا۔
بیلاروس کے صدر الیگزیندر لوکاشنکو کہتے ہیں کہ ملک کو کورونا وائرس کی وبا کو پھیلنے سے روکنے کے لیے کوئی احتیاطی اقدامات اٹھانے کی ضرورت نہیں ہے۔
ملک کے دارالحکومت منسک میں چین کے سفیر کے ساتھ ایک ملاقات میں انھوں نے اس بات پر زور دیتے ہوئے کہ دہشت زدہ ہونے کی کوئی ضرورت نہیں ہے کہا ہے کہ ’واقعات ہوتے رہتے ہیں۔‘
مکمل خبریہاںملاحظہ کیجیے۔
امریکہ کی سابق وزیرِ خارجہ اور سابق خاتونِ اول ہلری کلنٹن نے سوال اٹھایا ہے کہ امریکی صدر ڈونلڈ ٹرمپ اپنے اندازے لگانے کے بجائے ماہرین کی باتیں کب سنیں گے؟
انھوں نے اپنی ایک ٹویٹ میں لکھا کہ 'ایک ماہ قبل ٹرمپ نے کہا تھا کہ یہ ختم ہوجائے گا۔ کل انھوں نے کہا کہ میں نہیں مانتا کہ ہمیں 30 ہزار یا 40 ہزار وینٹیلیٹرز کی ضرورت پڑے گی۔'
واضح رہے کہ اس وقت امریکہ کورونا وائرس کے متاثرین کی تعداد کے اعتبار سے دنیا میں پہلے نمبر پر ہے جہاں اس وقت ایک لاکھ چار ہزار سے زائد متاثرین ہیں، جبکہ ہلاکتوں کی تعداد 1700 سے تجاوز کر گئی ہے۔
امریکہ میں مختلف ٹیکنالوجی اور گاڑیاں بنانے والی کمپنیوں نے اپنی معمول کی پیداوار سے ہٹ کر وینٹیلیٹرز بنانے کا اعلان کیا ہے جبکہ ٹیسلا کی جانب سے نیویارک کو وینٹیلیٹرز عطیہ کیے گئے ہیں۔
روسی صدر ولادیمیر پوتن کی جانب سے اعلان کیا گیا کہ اس ہفتے کام نہیں ہوگا تاکہ کورونا وائرس کے پھیلاؤ کو روکا جا سکے۔
روسی حکومت لوگوں کو گھروں پر رہنے کی ترغیب دے رہی ہے مگر ملے جلے پیغامات کی وجہ سے زیادہ تر روسی شہری غیر یقینی کے شکار ہیں۔ اب حکام نے یہ عندیہ دیا ہے کہ طبی صورتحال کو مدِنظر رکھتے ہوئے نئی پابندیوں کو پانچ اپریل تک بڑھایا جا سکتا ہے۔
جمعے کو کووِڈ-19 سے ہلاکتوں کی تعداد ایک ہزار سے تجاوز کر گئی تھی جبکہ سب سے زیادہ متاثرین دارالحکومت ماسکو میں سامنے آئے تھے۔ اس کی بنا پر روسی حکومت کے ترجمان نے زور دیا ہے کہ یہاں 'وبائی صورتحال نہیں ہے'۔
شٹ ڈاؤن کا اعلان ہونے پر روسی شہریوں کی جانب سے چھٹیوں پر جانے کے لیے ہوٹل بکنگز میں اضافہ ہونے لگا جس کے بعد حکومت نے یہ وضاحت کی ہے کہ یہ چھٹیاں نہیں ہیں۔
اٹلی میں گذشتہ 24 گھنٹوں کے دوران کورونا وائرس کی وجہ سے 919 ہلاکتیں ہوئی ہیں جو کہ اب تک اس کی روزانہ ہونے والی ہلاکتوں کی سب سے بڑی تعداد ہے۔
یوں اٹلی میں کورونا وائرس سے کُل ہلاکتوں کی تعداد 9134 ہوچکی ہے۔
اٹلی یورپ کا سب سے زیادہ متاثر ملک ہے جہاں تقریباً ہر چیز بند ہو چکی ہے اور لوگوں سے گھروں پر رہنے کے لیے کہا جا رہا ہے۔
شمالی خطے لومبارڈی میں کووِڈ-19 سے ہلاکتوں میں زبردست تیزی آئی ہے۔
اس سے پہلے جمعرات کو ہلاکتوں کی تعداد میں کمی ہوئی تھی جس سے یہ امید پیدا ہوئی تھی کہ وبا کا عروج گزر چکا ہے۔
اٹلی میں اب تک 86 ہزار 500 تصدیق شدہ متاثرین ہیں۔
کینیڈین حکام کا کہنا ہے کہ کورونا وائرس نے سنہ 2002 میں پھوٹنے والی سانس کی بیماری سارس کے مقابلے میں زیادہ کینیڈین لوگوں کی جان لی ہے۔
امریکہ کی جانز ہاپکنز یونیورسٹی کے ڈیٹا کے مطابق اب تک ملک بھر میں وائرس کے 4600 سے زیادہ متاثرین کی تصدیق ہوچکی ہے جبکہ 54 افراد ہلاک ہوئے ہیں۔
سرکاری ڈیٹا کے مطابق سنہ 2003 میں سارس سے 44 ہلاکتیں ہوئی تھیں۔
سارس کی بیماری 2002 میں چین سے شروع ہوئی تھی اور پوری دنیا میں پھیل گئی تھی۔ اس سے دنیا بھر میں 8000 افراد متاثر ہوئے تھے۔
سارس سے سب سے زیادہ متاثر ٹورونٹو شہر ہوا تھا جہاں طبی حکام نے 27 ہزار افراد کو قرنطینے میں ڈال دیا تھا، ہسپتالوں نے تمام غیر ضروری سہولیات معطل کر دی تھیں اور شہر کے گہما گہمی والے علاقے چائنہ ٹاؤن میں ہُو کا عالم طاری تھا۔
ٹیکنالوجی کمپنی ٹیسلا نے امریکی ریاست نیویارک کو کورونا وائرس سے نمٹنے کے لیے سینکڑوں وینٹیلیٹر فراہم کرنے کا وعدہ کیا ہے۔
یہ وینٹیلیٹر چین میں امریکی حکومت سے منظور شدہ ایک کمپنی سے خریدے گئے ہیں۔
نیویارک شہر کے میئر بِل ڈی بلاسیو نے ٹوئٹر پر ایلون مسک کا شکریہ ادا کرتے ہوئے لکھا کہ 'ہم نہایت شکر گزار ہیں۔'
یہ وینٹیلیٹر نیویارک شہر اور نیویارک ریاست کے ہسپتالوں میں تقسیم کیے جائیں گے۔
امریکہ میں کووِڈ-19 کے سب سے زیادہ کیسز نیویارک میں ریکارڈ کیے گئے ہیں۔
جمعے تک وہاں کے گورنر کا کہنا تھا کہ ریاست میں 519 لوگ کورونا وائرس کی وجہ سے ہلاک ہوچکے ہیں۔
امریکی صدر ڈونلڈ ٹرمپ نے امریکہ کی تاریخ کے سب سے بڑے امدادی بل پر دستخط کر دیے ہیں۔ اس میں موجود دو کھرب ڈالر کا پیکج عالمی وبا کورونا وائرس کی روک تھام کے لیے منظور کیا گیا ہے۔
سینیٹ میں بحث کے دو دن بعد اسے ایوانِ نمائندگان نے منظور کیا۔
بدھ کو 33 لاکھ امریکیوں نے بے روزگار ہونے کا دعویٰ کیا تھا۔ ملک میں کورونا وائرس کے سب سے زیادہ متاثرین ہیں جن کی تعداد ایک لاکھ سے زیادہ ہوچکی ہے۔
اس پیکج پر صدر ٹرمپ کا کہنا تھا کہ یہ کسی بھی پچھلے ریلیف پیکیج سے ’دگنا‘ بڑا ہے۔
’یہ پیکیج ہماری قوم کے خاندانوں، کارکنان اور کاروبار کی مدد کرے گا جس کی انھیں فوری ضرورت ہے۔‘
دنیا بھر میں کورونا وائرس کے پھیلاؤ اور اس کے نتیجے میں ہونے والی ہلاکتوں کی تازہ ترین صورتحال کچھ یوں ہے:
کورونا وائرس کے یورپی ممالک میں پھیلاؤ کی موجود صورتحال کا جائزہ پیش خدمت ہے:
اٹلی کے شہریوں کے لیے ہر نیا دن ایک نئی جدوجہد کا پیغام لے کر آ رہا ہے۔ اٹلی ایک ایسا ملک بن چکا ہے جو ہر گذرتے دن کے ساتھ اپنے ایک چھوٹے گاؤں کی آبادی کے برابر اپنے شہریوں کو کھو رہا ہے۔
گذشتہ 24 گھنٹوں کے دوران اٹلی کے علاقے لومبارڈی میں 541 افراد وبا کے ہاتھوں اپنی جان گنوا بیٹھے۔ اتنی بڑی تعداد میں ہلاکتیں دہشت زدہ کر دینے والی ہیں۔
فی الحال امید کی کوئی کرن نظر نہیں آ رہی ہے۔
اٹلی گذشتہ دو ہفتوں سے مکمل لاک ڈاؤن کی زد میں ہے اور اس دوران بہتری کی جانب ہونے والی پیش رفت بہت سست اور ناہموار ہے۔ خوفزدہ کر دینے والی خبریں لگاتار سامنے آ رہی ہیں۔ جب سے اٹلی میں یہ وبا پھیلی ہے اس وقت سے اب تک 46 ایسے ڈاکٹرز ہلاک ہو چکے ہیں جو وبا کا شکار افراد کا علاج کر رہے تھے۔
اٹلی کی قومی صحت کونسل کا کہنا ہے کہ ایک بات واضح ہے کہ وبا پر قابو پانے کے لیے اٹھائے گئے اقدامات کو شاید ممکنہ طور پر آئندہ کئی مہینوں کے لیے طول دینا پڑے۔
اٹلی کی معیشت کورونا کے باعث زبوں حال ہے اور اس طرح کی خبر نہ صرف اٹلی بلکہ دنیا بھر میں مزید اضطراب کو جنم دے گی۔
دنیا کے لیے یوں کہ اٹلی میں حکام کی جانب سے لاگو کردہ شہری پابندیوں کو دنیا کے بہت سے ممالک ایک ماڈل کے طور دیکھتے اور پیروی کرتے ہیں۔
وبا کے پھیلاؤ، اس کے اثرات اور لاک ڈاؤن میں اٹلی باقی یورپ سے ایک یا دو ہفتے آگے ہیں۔ چنانچہ یہاں جو کچھ بھی ہو گا یورپی ممالک اس پر گہری نظر رکھیں گے۔
امریکہ میں کورونا وائرس کا پھیلاؤ انتہائی تیز رفتاری سے جاری ہے اور جانز ہاپکنز یونیورسٹی کی جانب سے جاری کردہ تازہ ترین اعداد و شمار کے مطابق ملک میں مصدقہ متاثرین کی تعداد 100,717 ہو گئی ہے۔
امریکہ میں کسی بھی دوسری ملک کی نسبت کورونا کے سب سے زیادہ متاثرین موجود ہیں۔
امریکہ میں اب تک 1544 افراد اس وبا کے باعث ہلاک ہو چکے ہیں جبکہ 862 افراد اب تک اس مرض سے صحتیاب ہو چکے ہیں۔
اٹلی میں مصدقہ متاثرین کی تعداد 86498 ہے جبکہ چین میں یہ تعداد 81897 ہے۔
جمعہ کو روزانہ کی بنیاد پر ہونے والی پریس کانفرنس سے خطاب کرتے ہوئے امریکی ریاست نیویارک کے گورنر اینڈریو کومو نے دعویٰ کیا تھا کہ ان کی ریاست میں جنوبی کوریا کی نسبت زیادہ افراد کا کورونا ٹیسٹ کیا گیا ہے۔
یہ دعویٰ درست نہیں ہے۔
تازہ ترین اعداد و شمار کے مطابق ریاست نیویارک میں اب تک مجموعی طور پر 138,376 افراد کا کورونا ٹیسٹ کیا گیا ہے، یعنی ریاست میں بسنے والے ہر 140 افراد میں سے ایک شخص کا ٹیسٹ کیا گیا ہے۔
اگرچہ یہ تناسب امریکہ کی باقی ریاستوں کی نسبت بہت زیادہ ہے مگر اگر بات جنوبی کوریا کی کی جائے تو یہ درست نہیں ہے۔
جنوبی کوریا کی حکومت کی جانب سے جاری کردہ اعدادوشمار کے مطابق ملک میں ہر 136 افراد میں سے ایک شخص کا کورونا ٹیسٹ کی جا چکا ہے۔
امریکہ کے صدر ڈونلڈ ٹرمپ سمیت دیگر ممالک کے سربراہان نے برطانوی وزیرِ اعظم بورس جانسن کے لیے نیک تمناؤں کا اظہار کیا ہے۔
امریکی صدر نے بورس جانسن سے فون پر رابطہ کر کے ان کی خیریت دریافت کی ہے۔
یاد رہے کہ جمعہ کے روز برطانوی وزیرِ اعظم کا کورونا وائرس کا ٹیسٹ مثبت آیا تھا۔
وائٹ ہاؤس کے مطابق کہ ٹرمپ کی جانب سے وزیرِ اعظم بورس جانسن کی جلد صحتیابی کی امید ظاہر کی گئی۔
ادھر 10 ڈاؤننگ سٹریٹ کی جانب سے جاری کردہ اعلامیے میں کہا گیا کہ دونوں رہنماؤں نے اکھٹے کام کرنے اور جی 7، جی 20 اور دیگر عالمی اتحاد کی مدد سے کورونا وائرس کی عالمی وبا کو شکست دینے کا اعادہ کیا ہے۔
سربیا کے صدر الیکساندر ووجچ پہلے لیڈر تھے جنھوں نے ٹوئٹر کے ذریعے بورس جانسن کے لیے نیک تمناؤں کا اظہار کیا۔
انھوں نے لکھا کہ ’جلد صحتیاب ہوں، اور لڑتے رہیں۔‘
یورپین کونسل کے صدر چارلس مائیکل نے ٹوئٹر پر لکھا کہ ’پورے یورپ کی طرف سے آپ کے جلد صحتیابی کی تمنائیں ہیں۔
عالمی ادارہ صحت کے سربراہ ٹیڈراس غیبریسس کا کہنا تھا کہ میں آپ کا آپ اپنا بہت خیال رکھیں اور میں بہت مشکور ہوں کہ آپ نے برطانیہ کے عوام کو این ایچ ایس کی ہدایات پر عمل کرنے کا کہا ہے۔
آج برطانیہ میں حکومت کی جانب سے ملک کورونا وائرس کے حوالے سے دی جانے والی پریس بریفنگ اس لیے مختلف تھی کیونکہ آج وزیرِ اعظم بورس جانسن اور برطانیہ کے سیکرٹری صحت آج اس میں شریک نہیں ہو سکے۔
اس کی وجہ دونوں میں کووڈ 19 کی تشخیص ہے۔
کابینہ کے رکن اور وزیر مائیکل گوو، برطانیہ کے قومی ادراہ صحت این ایچ ایس کے چیف ایگزیکٹو سر سائمن سٹیونز اور ڈپٹی چیف میڈیکل افسر ڈاکٹر جینی ہیریز بریفنگ میں موجود تھے۔
گوو کا مزید کہنا تھا کہ جن افراد کا وائرس کے خلاف جنگ میں مرکزی کردار ہے ان کے کورونا وائرس ٹیسٹ کیے جائیں گے۔