آپ اس وقت اس ویب سائٹ کا ٹیکسٹ پر مبنی ورژن دیکھ رہے ہیں جو کم ڈیٹا استعمال کرتا ہے۔ مرکزی ویب سائٹ جہاں تمام تصاویر اور ویڈیوز موجود ہیں دیکھیے
دنیا میں کورونا وائرس کے مریضوں کی تعداد 9 لاکھ سے اور ہلاکتیں 45 ہزار سے زیادہ ہو چکی ہیں۔ صرف امریکہ میں مریضوں کی تعداد 2 لاکھ سے زیادہ ہے۔ یورپ میں 30 ہزار سے زیادہ اموات ہو چکی ہیں۔ غیر یقینی صورتحال کے پیشِ نظر سعودی عرب نے مسلمانوں پر زور دیا ہے کہ وہ بکنگ کروانے سے پہلے مزید انتظار کریں۔ اس کے علاوہ برطانیہ میں ٹینس کا ٹورنامنٹ ومبلڈن بھی کینسل ہو گیا ہے۔
چھ مریض ایسے بھی ہیں جن میں صحت یابی کے بعد دوبارہ کورونا وائرس پایا گیا ہے۔ عام نزلہ زکام جیسے انفیکشن کا شکار ہونے والے مریض میں عموماً ایسی بیماریوں کے لیے قوتِ مدافعت بھی پیدا ہو جاتی ہے سو کورونا وائرس کے معاملے میں مختلف کیا ہے۔
عالمی ادارہ صحت کا کہنا ہے کہ وہ کورونا وائرس کے حوالے سے تائیوان کے صورتحال پر گہری نظر رکھے ہوئے ہے اور تائیوان کی جانب سے وائرس کے خلاف کیے جانے والے اقدامات سے سبق بھی سیکھ رہا ہے۔
عالمی ادارہ صحت کا یہ بیان ایک ایسے وقت میں آیا ہے جب تائیوان نے اعتراض اٹھایا ہے کہ ادارے کی جانب سے انھیں جان بوجھ کر نظر انداز کر رہا ہے۔
خیال رہے کہ تائیوان عالمی ادارہ صحت کا رکن نہیں ہے کیونکہ چین نے اس کی رکنیت پر اعتراضات اٹھا رکھے ہیں اور دعویٰ کیا ہے کہ تائیوان دراصل چین کا حصہ ہے۔
تائیوان کی حکومت نے بارہا کہا ہے کہ اسے عالمی ادارہ صحت سے علیحدہ رکھنا تائیوان کی عوام کی زندگیوں کے ساتھ سیاست کھیلنے کے مترادف ہے۔ تاہم عالمی ادارہ صحت اور چین کا کہنا ہے کہ تائیوان کو ضرورت کے تحت امداد دی جا چکی ہے۔
گذشتہ ہفتے تائیوان نے عالمی ادارہ صحت پر کورونا وائرس کے پھیلاؤ کے آغاز میں ان کے سوالات نظر انداز کرنے کا الزام لگایا تھا۔ تائیوان کا کہنا ہے کہ چین کی جانب سے اسے عالمی اداروں سے باہر رکھنے کے بعد یہی ہوتا ہے۔
تائیوان نے اب تک کورونا وائرس کے صرف 298 کیسز رپورٹ کیے ہیں جن میں سے اکثر غیر ملکی ہیں اور صحت کے ماہرین نے تائیوان کے اس حوالے سے تیز ردِ عمل اور دیگر اقدامات کی تعریف کی ہے۔
اتوار کے روز تائیوان کے وزیر خارجہ جوزف وو نے ٹویٹ میں عالمی ادارہ صحت پر تنقید کی۔ اس ٹویٹ کا پسِ منظر عالمی ادارہ صحت کے اسسٹنٹ ڈائریکٹر جنرل بروس ایلوارڈ کا ایک رپورٹر کو تائیوان سے متعلق سوال کا جواب نہ دینا تھا۔
انھوں نے لکھا کہ ’بہت خوب، کیا عالمی ادارہ صحت میں تائیوان کا نام بھی نہیں لے سکتے؟ ہمیں ایک عالمی وبا سے نمٹنے کے لیے سیاست کو پسِ پشت ڈالنا ہو گا۔‘
عالمی ادارہ صحت نے خبر رساں ادارہ روئٹرز کو ایک ای میل کے ذریعے دیے گئے جواب میں کہا کہ تائیوان کی رکنیت عالمی ادارہ صحت کے رکن ممالک کے ہاتھ میں ہے ان کے سٹاف کے ہاتھ میں نہیں۔
جموں وکشمیر پولیس کے چیف دلباغ سنگھ نے کہا ہے کہ خطے میں لاک ڈاؤن کی خلاف ورزی کرنے پر 337 ایف آئی آر درج کی گئیں اور 627 افراد کو گرفتار کیا گیا ہے۔
انڈیا کی وزارتِ صحت کے مطابق ملک میں کورونا کے مصدقہ مریضوں کی تعداد 979 تک پہنچ گئی ہے جبکہ 25 افراد اب تک اس وائرس سے ہلاک ہو چکے ہیں۔
حکام کا کہنا ہے کہ گذشتہ 24 گھنٹوں کے دوران ملک میں 106 نئے مریض سامنے آئے ہیں جبکہ چھ ہلاکتیں بھی ہوئی ہیں۔
اس وقت انڈیا کی 22 ریاستوں کے 75 اضلاع میں کورونا وائرس کے انفیکشن کی تصدیق ہو چکی ہے اور مہاراشٹر، کرناٹک، کیرالہ، دہلی-این سی آر اور اترپردیش سب سے زیادہ متاثرہ علاقے ہیں۔
انڈیا میں ہلاک ہونے والوں میں سے مہاراشٹر میں چھ ، گجرات میں چار ، کرناٹک میں تین اور مدھیہ پردیش میں دو افراد کی موت ہوئی۔
کورونا کی عالمی وبا سے دنیا بھر میں روزانہ کی بنیاد پر متاثرین اور ہلاک ہونے والوں کی تعداد میں اضافہ ہو رہا ہے۔
جان ہاپکنز یونیورسٹی کے کورونا ٹریکر کے اعدادوشمار کے مطابق اتوار کی دوپہر تک دنیا میں چھ لاکھ 80 ہزار سے زیادہ افراد اس وائرس سے متاثر ہو چکے ہیں جبکہ ہلاکتوں کی تعداد بھی 31 ہزار سے بڑھ گئی ہے۔
دنیا بھر میں ایک لاکھ 45 ہزار افراد صحت یاب بھی ہوئے ہیں۔
امریکہ ایک لاکھ 24 ہزار سے زیادہ متاثرین کے ساتھ دنیا میں سب سے متاثرہ ملک ہے جبکہ اٹلی 92 اور چین 82 ہزار متاثرین کے ساتھ دوسرے اور تیسرے نمبر پر ہے۔
یورپ میں اٹلی اور سپین اس وائرس سے سب سے زیادہ متاثرہ ملک ہیں جبکہ برطانیہ میں بھی کوورنا تیزی سے پھیل رہا ہے۔
ایشیا میں چین کے بعد ایران سب سے متاثرہ ملک ہے جہاں 38 ہزار سے زیادہ افراد متاثر ہوئے ہیں جبکہ 2600 سے زیادہ ہلاکتیں بھی ہوئی ہیں۔
انڈیا کے وزیرِ اعظم نرینرر مودی کی جانب سے رواں ہفتے منگل کے روز 21 روزہ ملک گیر کرفیو کا اعلان کیا گیا جس لوگوں کو گھروں تک محدود رکھنے کے علاوہ دیگر پابندیوں کے نفاذ کا بھی اعلان کیا گیا۔
تاہم اس کے بعد سے انڈیا میں اس فیصلے اور اس حوالے سے کی جانے والی حکمتِ عملی پر تنقید کی جا رہی ہے کیونکہ سنیچر کے روز سے ہزاروں افراد کی نقل مکانی کی تصاویر اور ویڈیوز سوشل میڈیا پر موضوع بحث ہیں جن میں ہزاروں لوگوں کا جھنڈ بس اڈوں پر دیکھا جا سکتا ہے۔
اس کے علاوہ انڈیا میں ٹرانسپورٹ اور ٹرینوں کی بندش کے باعث اکثر افراد کو اپنے آبائی علاقوں تک پیدل سفر کرنا پڑ رہا ہے۔
اس کے علاوہ کاروباری نظام کی بندش کے باعث اکثر افراد بے روزگار بھی ہو گئے ہیں اور انھیں معاشی مشکلات کا سامنا کرنا پڑ رہا ہے۔
انڈیا کے وزیرِ اعظم نریندر مودی نے اتوار کے روز ریڈیو کے ذریعے خطاب میں قوم کے غربا سے لاک ڈاؤن کے باعث بڑھتی معاشی غیریقینی پر معذرت کی ہے۔
ان کا یہ بیان ایک ایسے وقت میں سامنے آیا ہے جب حکومت کو 21 روزہ لاک ڈاؤن کے حوالے سے بنائی گئی حکمتِ عملی کے بارے میں تنقید کا سامنا ہے۔ سنیچر کے روز ایک ٹویٹ میں حذبِ اختلاف کی جماعت کے رکن راہل گاندھی نے بھی حکومت کی ’ناقص حکمت عملی‘ پر تنقید کی تھی۔
خیال رہے کہ رواں ہفتے منگل کے روز انڈیا کے وزیرِ اعظم نریندر مودی نے کورونا وائرس کے پھیلاؤ کے پیشِ نظر 21 روزہ ملک گیر لاک ڈاؤن کا اعلان کیا تھا اور عوام کو گھروں تک محدود رہنے کی ہدایت کی تھی۔
تاہم اس فیصلے کے بعد ہزاروں بے روزگار افراد کو اپنے آبائی علاقوں تک پیدل سفر کرنا پڑا اور ملک کے غریب افراد اس سے سب سے زیادہ متاثر ہوئے۔
مودی نے اپنے خطاب میں کہا کہ ’غربا یقیناً یہی سوچ رہے ہوں گے کہ یہ کیسا وزیرِ اعظم ہے جس نے ہمیں اتنی مشکلات میں ڈال دیا ہے۔‘
انھوں نے کہا میں اپنی عوام سے معافی چاہتا ہوں۔ لیکن اس وقت لیے جانے والے اقدامات انڈیا کو کورونا وائرس کے خلاف جیت کا سبب بنیں گیں۔
خبر رساں ادارے رؤٹرز کے مطابق اب تک پولیس نے پیدل سفر کر کے اپنے گھروں کو جانے والے افراد میں سے چار کی ایک حادثے کے باعث ہلاک ہونے کی تصدیق کی ہے۔
ایسے ہی ایک ورکر نے روئٹرز سے بات کرتے ہوئے کہا کہ ’کورونا کے باعث مرنے سے پہلے ہم ایسے پیدل چلنے اور بھوک سے مر جائیں گے۔‘
جنوبی کوریا نے کہا ہے کہ ملک میں باہر سے آنے والوں کو اب لازماً 14 دن کے لیے قرنطینے میں رہنا ہوگا۔
یکم اپریل سے نافذ ہونے والے ان ضوابط کی پاسداری نے کرنے والے غیر ملکی شہریوں کو ملک بدری جبکہ جنوبی کوریائی شہریوں کو جرمانوں کا سامنا کرنا پڑ سکتا ہے۔
باہر سے آنے والے تمام افراد کو اپنے اپنے فونز پر قرنطینے کی ایپ ڈاؤن لوڈ کرنی ہوگی جو ان کی علامات اور نقل و حرکت پر نظر رکھے گی۔
حالیہ دنوں میں جنوبی کوریا میں کورونا وائرس کے مصدقہ متاثرین میں سے نصف سے زائد بیرونِ ملک سے آئے تھے۔
سپین کی وزارتِ صحت نے اعلان کیا ہے کہ گذشتہ 24 گھنٹوں کے دوران 838 افراد کورونا وائرس کی وجہ سے ہلاک ہوئے ہیں۔
یہ اب تک سپین میں یومیہ ہلاکتوں کی سب سے بڑی تعداد ہے۔
سپین میں کورونا وائرس سے ہلاکتوں کی کُل تعداد 6528 ہوچکی ہے۔
اس کے علاوہ گذشتہ 24 گھنٹوں میں متاثرین کی تعداد بھی 72 ہزار 248 سے بڑھ کر 78 ہزار 797 ہوچکی ہے۔
آسٹریلیا کے وزیرِ اعظم سکاٹ موریسن نے مزید پابندیوں کا اعلان کیا ہے جس میں عوامی مجمعے کو صرف دو افراد تک محدود کرنا بھی شامل ہے۔
انھوں نے مزید کہا کہ لوگوں کو صرف انتہائی ضرورت کے تحت ہی باہر نکلنا چاہیے اور 70 سال سے زائد عمر کے افراد کو گھروں پر رہنا چاہیے۔
پیر سے ملک بھر کے کھیل کے میدان اور کھلی فضا میں موجود جِم بند کر دیے جائیں گے۔
ملک کے چیف میڈیکل افسر نے کہا ہے کہ انھیں بھروسہ ہے کہ آسٹریلیا زیادہ سے زیادہ مشتبہ لوگوں کو ٹیسٹ کر رہا ہے۔
چین نے اتوار کو کورونا وائرس کے 45 نئے متاثرین کی تصدیق کی ہے جن میں سے ایک کے علاوہ باقی تمام کا تعلق بیرونِ ملک سے ہے۔ اس کے مقابلے میں گذشتہ روز 54 نئے متاثرین سامنے آئے تھے اور ان تمام کا تعلق بیرونِ ملک سے تھا۔
گذشتہ 10 دنوں میں ووہان میں صرف ایک متاثرہ شخص سامنے آیا ہے، حالانکہ چند ہفتوں قبل تک ووہان ہی کورونا وائرس کی وبا کا مرکز تھا۔ اب تقریباً دو ماہ طویل قرنطینے کے بعد یہ شہر آہستہ آہستہ کھل رہا ہے۔
خبر رساں ادارے روئٹرز کے مطابق ہوبائی صوبے سے پروازیں بھی دوبارہ شروع ہو رہی ہیں اور 260 سے زائد ٹرینیں سنیچر کو شہر میں آمد پر پابندی اٹھائے جانے کے بعد شہر میں داخل ہوئی ہیں۔
اٹلی کے نائب وزیرِ صحت پیئرپاؤلو سیلیری کے مطابق انھیں لگتا ہے کہ ملک میں کورونا وائرس کی وبا اپنے عروج کے قریب ہے۔
یاد رہے کہ اٹلی اس وائرس سے دنیا کا سب سے زیادہ متاثر ملک ہے جہاں اموات کی تعداد 10 ہزار سے تجاوز کر چکی ہے۔
بی بی سی کے اینڈریو مار شو میں گفتگو کرتے ہوئے سیلیری کا کہنا تھا کہ ایک ہفتے یا 'زیادہ سے زیادہ' 10 دن کے اندر ملک میں نئے متاثرین کی تعداد میں کمی آئے گی۔
انھوں نے اس تنقید کو بھی مسترد کیا کہ اٹلی کی حکومت نے ملک میں لاک ڈاؤن کو اتنا جلد نافذ نہیں کیا جتنا کرنا چاہیے تھا۔
انھوں نے کہا کہ حکومت نے 'بروقت اقدامات اٹھائے' اور اس کی 'بدقسمتی' تھی کہ لومبارڈی کے خطے میں کئی جگہ وبا پھوٹی۔
دنیا کے معمر ترین شخص آج اپنی 112 ویں سالگرہ خود ساختہ تنہائی میں گزار رہے ہیں۔
باب ویٹن سباق ٹیچر اور انجینیئر ہیں اور ان کا تعلق جنوبی انگلینڈ کے علاقے ہیمپشائر سے ہے۔
وہ 1908 میں پیدا ہوئے تھے، یعنی اس سال جب رائٹ برادران نے پہلی مرتبہ عوام کے سامنے پرواز کا مظاہرہ کیا تھا۔
باب 1918 میں پھوٹنے والی بیماری ہسپانوی فلو میں بھی محفوظ رہے جس نے تقریباً پانچ کروڑ افراد کی جان لی تھی۔
اب وہ باقی کے برطانیہ کی طرح لاک ڈاؤن میں ہیں۔
گذشتہ سال انھوں نے اپنے ریٹائرمنٹ فلیٹ میں اپنے کئی دوستوں کے ساتھ اپنی 111 ویں سالگرہ منائی لیکن اس مرتبہ ان کی سالگرہ سادگی سے ہی گزرے گی۔
وہ کہتے ہیں: 'سب کچھ منسوخ ہوگیا ہے، نہ کوئی آئے گا نہ کوئی جشن ہوگا۔'
برطانیہ میں کورونا وائرس سے نمٹنے کے لیے اب تقریباً ایک ہفتے سے سخت پابندیاں نافذ ہیں لیکن حکومتِ کے ایک صفِ اول کے مشیر نے خبردار کیا ہے کہ یہ پابندیاں جون تک جاری رکھنے کی ضرورت پڑ سکتی ہے۔
امپیریئل کالج لندن کے پروفیسر نیل فرگوسن نے سنڈے ٹائمز کو بتایا: 'میرے خیال میں ہمیں ان اقدامات (مکمل لاک ڈاؤن) کو ایک طویل عرصے تک، شاید مئی کے اختتام یا جون کے اوائل تک جاری رکھنا پڑ سکتا ہے۔'
انھوں نے مزید کہا کہ اگر لاک ڈاؤن کو اٹھا بھی لیا گیا، تب بھی لوگوں کو آنے والے کئی ماہ تک سماجی دوری اختیار کیے رکھنی پڑ سکتی ہے۔
حکومتی وزیر مائیکل گوو نے سکائے نیوز کو بتایا کہ اقدامات کا دورانیہ 'حتمی طور پر متعین' نہیں ہے۔
انھوں نے کہا: 'یہ سب ہمارے رویوں پر مبنی ہے۔ اگر ہم ہدایات کی پیروی کریں گے تو ہم اس مرض کے پھیلاؤ سے مؤثر انداز میں نمٹ سکیں گے۔'
امریکی صدر ڈونلڈ ٹرمپ کی جانب سے ریاست نیویارک کو قرنطینہ کرنے کی تجویز واپس لینے کے چند ہی گھنٹوں بعد حکام نے عوام کو خبردار کیا ہے کہ وہ غیر ضروری سفر سے باز رہیں۔
طبی حکام نے 86 لاکھ آبادی والے نیویارک شہر، اور ریاست نیویارک، نیو جرسی اور کنیکٹیکٹ کے شہریوں سے کہا ہے کہ وہ 14 دن کے لیے غیر ضروری سفر نہ کریں کیونکہ اس سے 'بڑے پیمانے پر مرض کے پھیلنے' کا خدشہ ہے۔
واضح رہے کہ امریکہ میں کورونا وائرس کے انفیکشنز کی تعداد تیزی سے بڑھ رہی ہے اور یہاں اب تک ایک لاکھ 24 ہزار سے زائد افراد اس وائرس سے متاثر ہوچکے ہیں جبکہ 2100 سے زائد افراد ہلاک ہوچکے ہیں۔
ریاست نیویارک کے گورنر نے اس سے قبل کہا تھا کہ وہ لاک ڈاؤن کی کسی بھی کوشش کی مخالفت کریں گے کیونکہ ان کے مطابق اس سے امریکی معیشت کو ناقابلِ تلافی نقصان پہنچے گا۔
برطانیہ کے وزیرِ اعظم بورس جانسن نے ملک کے تمام گھرانوں کو بھیجے گئے ایک خط میں برطانوی شہریوں کو خبردار کیا ہے کہ حالات بہتر ہونے سے پہلے مزید خراب ہوں گے۔
کورونا وائرس کا مثبت ٹیسٹ آنے کے بعد خود ساختہ تنہائی میں موجود بورس جانسن کا کہنا تھا کہ ضرورت پڑی تو سخت تر پابندیاں عائد کی جا سکتی ہیں۔
برطانیہ کے تین کروڑ گھرانوں کو 58 لاکھ پاؤنڈ کی لاگت سے بھیجے جانے والے خط کے ساتھ شہریوں کو گھر سے باہر نکلنے کے حوالے سے قواعد اور طبی معلومات پر مبنی ایک کتابچہ بھی دیا جائے گا۔
برطانیہ میں کورونا وائرس سے ہلاک ہونے والوں کی تعداد 1019 ہوگئی ہے جبکہ سنیچر کو حکام نے مزید 260 ہلاکتوں کا اعلان کیا۔
ملک میں کورونا وائرس کے تصدیق شدہ متاثرین کی تعداد 17 ہزار 89 ہے۔
امریکہ کے صدر ڈونلڈ ٹرمپ نے کہا ہے کہ نیویارک کو قرنطینہ میں ڈالنا ضروری نہیں ہوگا، حالانکہ اس سے چند گھنٹے قبل ہی وہ کہہ چکے تھے کہ وہ پورے نیویارک، کنیکٹیکٹ اور نیو جرسی کو قرنطینہ میں رکھنے کے حوالے سے سوچ رہے ہیں۔
انھوں نے کہا کہ یہ فیصلہ وائٹ ہاؤس کی کورونا وائرس ٹاسک فورس کی سفارشات کو مدِنظر رکھتے ہوئے لیا گیا ہے۔
نیویارک میں اب تک کورونا وائرس کے 52 ہزار تصدیق شدہ متاثرین ہیں جو کہ پورے امریکہ کے تصدیق شدہ متاثرین کا تقریباً نصف ہیں۔
ٹرمپ کے فیصلے پر نیویارک کے گورنر اینڈریو کیومو کا کہنا تھا کہ ریاست نیویارک کو قرنطینے میں ڈالنا 'بے عقلی' اور 'امریکہ مخالف' قدم ہوگا۔
انھوں نے کہا کہ نیویارک میں پہلے ہی 'قرنطینے' کے اقدامات اٹھائے جا چکے ہیں جن میں بڑے اجتماعات پر پابندی اور لوگوں کو گھر پر رہنے کا حکم ہے مگر وہ 'لاک ڈاؤن' کی کسی بھی کوشش کی مخالفت کریں گے۔
امریکہ میں کورونا وائرس نے نوزائیدہ بچے کی جان لے لی جو کہ اس نوعیت کا پہلا واقعہ ہے۔
ریاست الے نوائے کے شعبہ صحت کے عہدے دار ڈاکٹر این گوزی ایزیکے نے بتایا کہ شکاگو شہر میں بچے کی موت ہوئی۔
’اس سے پہلے کسی بھی نوزائیدہ بچے کی کورونا وائرس سے موت نہیں ہوئی تھی اور ہم اس کی مکمل تحقیق کر رہے ہیں کہ ایسا کیوں ہوا۔‘
اس سے قبل ایک سال سے کم عمر کے بچوں میں صرف ایک ہلاکت سامنے آئی تھی جو کہ چین میں تھا لیکن اس بچے کو پہلے سے بیماریاں تھیں۔
کورونا وائرس کی وجہ سے دنیا بھر میں کھیلوں کے مقابلے متاثر ہونے کے بعد یورپی فٹبال کے انتظامی ادارے یوئیفا کے صدر نے خدشے کا اظہار کیا ہے کہ رواں سیزن شاید مکمل نہ ہو سکے۔
صدر الیکزانڈر سیفرین نے کہا کہ ایک طریقہ یہ ہے کہ فٹبال لیگز شائقین کے بغیر میچز منعقد کریں لیکن یہ فیصلہ جولائی سے پہلے لینا ضروری ہے۔
’اگر ہم فٹبال سیزن جلد از جلد دوبارہ نہ شروع کر سکے تو بہت ممکن ہے کہ یہ سیزن ضائع ہو جائے۔‘
سنیچر کے روز دنیا بھر میں کورونا وائرس سے متاثرہ افراد کی تعداد چھ لاکھ چالیس ہزار سے تجاوز کر گئی ہے جبکہ اب تک اس کے باعث 30 ہزار سے زیادہ اموات ہو چکی ہیں۔
دوسری جانب دنیا بھر میں کووڈ 19 سے صحتیاب ہونے والوں کی تعداد ایک لاکھ 37 ہزار سے زیادہ ہے۔