کارکن پرامن احتجاج کریں اور جلاؤ گھیراؤ نہ کریں: شاہ محمود قریشی
تحریک انصاف کے سینیئر رہنما شاہ محمود قریشی نے عمران خان کی گرفتاری پر اپنے ویڈیو پیغام میں کہا ہے کہ کارکن پر امن احتجاج کریں اور جلاؤ گھیراؤ نہ کریں۔ آگے کا لائحہ عمل کور کمیٹی کے اجلاس میں آج ہی کریں گے۔
شاہ محمود قریشی نے کہا کہ ’عمران خان کی جو واضح ہدایات ہیں ان کو مد نظر رکھتے ہوئے پر امن انداز میں ہم نے آگے بڑھنا ہے۔ مجھے احساس ہے کہ آج پاکستانی اور پی ٹی آئی سے منسلک ہر کارکن اضطراب کی کیفیت میں ہے۔ آج جو فیصلہ آیا ہے اس کو عوام نے انصاف کے بنیادی تقاضوں کے برعکس جانا ہے۔‘
شاہ محمود نے کہا ’لوگوں میں اضطراب اور غم و غصہ بھی ہے۔ لوگ عمران خان کے ساتھ اظہار یک جہتی بھی کرنا چاہتے ہیں اور اپنا احتجاج بھی ریکارڈ کروانا چاہتے ہیں۔ پرامن رہتے ہوئے آپ اپنا حق استعمال کر سکتے ہیں املاک کو نقصان نہیں پہنچانا نہ ہی قانون کو ہاتھ میں لینا ہے لیکن حقیقی آذادی کی جدوجہد کو ہم نے آگے بڑھانا ہے۔‘
شاہ محمود نے کہا ’عمران خان کا جو فیئر ٹرائل کا بنیادی حق تھا وہ انھیں میسر نہیں آیا۔ مجھے اضطراب کی کیفیت کا علم ہے اور سب نے مل کر ان کی جدوجہد جاری رکھنی ہے قانونی جنگ بھی لڑنی ہے اور سیاسی جدوجہد بھی۔‘
شاہ محمود کے مطابق ’کور کمیٹی کا اجلاس بھی آج منعقد ہو رہا ہے تاکہ آئیندہ کا لائحہ عمل طے کیا جا سکے۔ مشاورت اجلاس میں اپنے وکلا اور کور کمیٹی ممبرران سے مشاورت کر کے ہی آگے بڑھیں گے۔‘
