پنجاب پولیس کے چھاپے، 12 ن لیگی رہنماؤں کی اسلام آباد ہائی کورٹ سے حفاظتی ضمانت کی درخواست

لائیو کوریج

1. 16 اگست 2022پیٹرولیم مصنوعات کی قیمتوں میں رد و بدل، مریم نواز نے اضافہ مسترد کر دیا

   پاکستانی حکومت نے پیٹرول کی قیمت میں چھ روپے 72 پیسے کا اضافہ کرنے اور ہائی سپیڈ ڈیزل کی قیمت میں 51 پیسے کمی کا اعلان کیا ہے۔

   اپنی پریس ریلیز میں وزارتِ خزانہ نے اس کی وجہ عالمی منڈی میں تیل کی قیمت اور روپے کی شرحِ تبادلہ میں اتار چڑھاؤ کو قرار دیا۔

   دلچسپ بات یہ ہے کہ پاکستان مسلم لیگ (ن) کی نائب صدر مریم نواز نے اپنی ہی جماعت کی وفاقی حکومت کے اس اعلان کو مسترد کرتے ہوئے لکھا کہ وہ ’عوام کے ساتھ‘ کھڑی ہیں اور اس فیصلے کی تائید نہیں کر سکتیں۔

   اپنی ایک اور ٹویٹ میں اُنھوں نے دعویٰ کیا کہ ’میاں صاحب‘ بھی پیٹرول کی قیمت میں اضافے کے خلاف ہیں۔

2. 15 اگست 2022نوازشریف سیاسی ڈیل سے ملک سے باہر گئے تھے، اسی انڈر سٹینڈنگ سے واپس آنا چاہتےہیں: شاہ محمود قریشی

   پاکستان تحریکِ انصاف کے رہنما اور سابق وزیرِ خارجہ شاہ محمود قریشی نے کہا ہے کہ سابق وزیرِ اعظم نوازشریف سیاسی ڈیل کے ذریعے اور انڈرسٹینڈنگ سے ملک سے باہر گئے تھے اور اب وہ اسی سیاسی انڈر سٹینڈنگ سے واپس آنا چاہتےہیں۔

   شاہ محمود قریشی نے ایک بیان میں مزید کہا کہ موجودہ صورتحال میں عمران خان کا بیانیہ عوام کے دل میں اتر چکا ہے اور نواز شریف کی واپسی بھی انتخابات کے حوالے سے متاثر کن ثابت نہیں ہو گی۔

   انھوں نے کہا کہ ’نواز شریف خراب طبیعت اور علاج کی غرض سے بیرون ملک گئے تھے لیکن حقیقت اس کے برعکس تھی اور ان کی زندگی کو کوئی خطرہ نہیں تھا۔‘

3. 15 اگست 2022بریکنگ, نواز شریف ستمبر میں پاکستان آئیں گے تو انھیں جیل نہیں جانے دیں گے: جاوید لطیف

   مسلم لیگ ن کے رہنما اور وفاقی وزیر میاں جاوید لطیف نے کہا ہے کہ نواز شریف ستمبر میں پاکستان آئیں گے تو انھیں جیل نہیں جانے دیں گے۔

   انھوں نے ایک پریس کانفرنس میں بات کرتے ہوئے کہا کہ ’نواز شریف کا وطن واپسی پر ایسا استقبال کریں گے کہ سب دیکھیں گے، ریاستی ادارے آئین کے مطابق کام کریں گے تو ملک مشکلات سے نکلے گا۔‘

   انھوں نے دعویٰ کیا کہ ’کیونکہ نواز شریف کے ساتھ ثاقب نثار کے ساتھ مل کر ناانصافی کی گئی اس لیے انھیں جیل نہیں جانے دیں گے، لیکن نواز شریف کبھی جیل جانے سے ڈرا نہیں ہے۔‘

   جاوید لطیف کا کہنا تھا کہ ’عمران خان کو لانے والے سب کچھ سامنے آنے کے بعد کچھ نہ سیکھیں گے اور جو کچھ ہو رہا ہے، کچھ لوگ آج بھی عمران خان کی ڈوریاں ہلا رہے ہیں۔‘

   انھوں نے کہا کہ ’جوڈدیشل مارشل کا آغاز جسٹس منیر نے کیا اور اس کی انتہا جسٹس ثاقب نثار نے کی۔‘

   ان کا مزید کہنا تھا کہ ’میرے خلاف بغاوت کا مقدمہ بنا کر پورے 14 دن کا ریمانڈ لیا گیا، شہباز گل کو صرف دو دن کے ریمانڈ پر رکھا گیا لیکن میں یہ بات نہیں بتاؤں گا کہ مجھے جیل سے رات کو کون کہاں لے کر جاتا تھا۔‘

   جاوید لطیف کا مزید کہنا تھا کہ ’عمران خان کہہ رہے ہیں کہ نواز شریف ستمبر میں آ رہا ہے، اور اسے اور مجھے ایک جیسا کرنے کے بعد کہا جائے گا کہ الیکشن لڑو۔

   ’ان تمام افراد کو بتانا چاہتے ہیں کہ نواز شریف ستمبر میں پاکستان اس قوم کی نمائندگی کے لیے آ رہے ہیں۔‘

4. 15 اگست 2022اگر شہباز گل نے کوئی جرم کیا ہے تو یہ عدالتیں دیکھیں گی، ان کے ساتھ ہونے والے سلوک کی مذمت کرتے ہیں: فواد چوہدری

   پاکستان تحریکِ انصاف کے رہنما فواد چوہدری کا کہنا ہے کہ عمران خان 19 اگست سے انتخابات کے لیے ایک ملک گیر تحریک چلائیں گے جو 10 ستمبر تک جاری رہے گی۔

   انھوں نے کہا کہ ’حکومت کی معاشی پالیسیوں کے اوپر میثاق کرنا پاکستان کو بہت بڑا نقصان پہنچانے کے مترادف ہو گا، صرف مذاکرات الیکشن پر ہو سکتے ہیں۔‘

   فواد چوہدری کا کہنا تھا کہ ’اگر آپ اس لیے انتخابات نہیں کروانا چاہتے کہ عمران خان الیکشن جیت جائے گا، تو ایسا جمہوریت میں نہیں ہوتا، پھر آپ ملک میں مارشل لا لگا لیں۔‘

   فواد چوہدری نے کہا کہ ’جو لوگ عمران خان کو نا اہل کرنے اور پی ٹی آئی کو معطل کرنے کے بارے میں سوچ رہے ہیں انھیں سنہ 1970 سے سبق سیکھنا چاہیے۔‘

   فواد چوہدری کا کہنا ہے کہ ’ہم سمجھتے ہیں کہ جس طرح سے شہباز گل کو ٹارچر کا نشانہ بنایا گیا وہ ناقابلِ قبول ہے۔

   ’کوشش کی جا رہی ہے کہ اسے اغوا کر کے پمز لے جا کر، تندرستی کا سرٹیفیکیٹ لیا جائے۔‘

   انھوں نے کہا کہ اگر شہباز گل نے کوئی جرم کیا ہے تو یہ عدالتیں دیکھیں گی۔ اس روز شہباز گل نے جو بیان دیا وہ سب کے سامنے ہے۔ پوری جماعت شہباز شریف کے ساتھ ہونے والے سلوک کی مذمت کرتا ہے۔‘

   ان کا مزید کہنا تھا کہ ’آج عمران خان نے شیریں مزاری کو ہدایت کی ہے کہ عالمی انسانی حقوق کی تنظیموں کو اس بارے میں بتایا جائے۔

   ’ہم سمجھتے ہیں جو سلوک میڈیا کے ساتھ کیا گیا ہے، وہ صرف اس لیے ہے کیونکہ وہ ایک متبادل بیانیہ دکھا رہیں ہیں۔‘

5. 15 اگست 2022سٹاک مارکیٹ میں 750 پوائنٹس سے زیادہ کا اضافہ، ڈالر کی قیمت میں ڈیڑھ روپے کی کمی, تنویر ملک، صحافی

   پاکستان میں مقامی کرنسی کے مقابلے میں ڈالر کی قیمت میں کمی کا رجحان سوموار کے دن بھی جاری رہا۔

   پیر کو 1.51 روپے کی کمی کے بعد ڈالر 213.98 روپے پر بند ہوا۔ ڈالر کی قیمت میں مسلسل دس کاروباری دنوں میں کمی دیکھی گئی اور مجموعی طور پر ڈالر کی قیمت میں 25.96 روپے کی کمی ریکارڈ کی گئی جو 28 جولائی کو 239.94 کی بلند سطح پر پہنچ گیا تھا۔

   پیر کے روز سٹاک مارکیٹ میں ساڑھے سات سو پوائنٹس سے زائد کا اضافہ ریکارڈ کیا گیا۔

   مارکیٹ میں خریداری کا رجحان غالب رہا اور تجزیہ کاروں کے مطابق آئی ایم ایف اور دوست ممالک کی جانب سے پاکستان کی فنانسنگ ضرورت پوری کرنے کے لیے ہونے والی پیش رفت کی خبروں نے سٹاک مارکیٹ میں مثبت رجحان کو فروغ دیا۔

6. 15 اگست 2022بریکنگ, سعودی عرب کی جانب سے پاکستان کو دیے گئے تین ارب ڈالر کی واپسی کی مدت میں توسیع پر رضامندی, تنویر ملک، صحافی

   سعودی عرب نے پاکستان کے پاس موجود تین ارب ڈالر کے ڈیپازٹ کی واپسی میں توسیع پر رضامندی ظاہر کر دی ہے۔

   پاکستان نے سعودی عرب کی جانب سے دیے جانے والے تین ارب ڈالر کے ڈپازٹ کو اس سال دسمبر میں واپس کرنا تھا تاہم اب پاکستان کی فنانسنگ ضرورت کے پیش نظر اس ڈپازٹ کی واپسی کی تاریخ میں مزید توسیع کر دی گئی ہے، جو ایک سال تک ہو سکتی ہے۔

   سعودی عرب کی جانب سے اس ڈپازٹ کے واپسی میں توسیع کی خبریں کچھ دنوں سے ذرائع سے مقامی میڈیا پر شائع کی جا رہی تھیں۔

   اس سلسلے میں پاکستان کے سیکریٹری خزانہ حامد یعقوب شیخ نے بی بی سی اردو کے رابطہ کرنے پر اس پیش رفت کی تصدیق کی ہے۔

   انھوں نے کہا کہ ’سعودی عرب نے اس سلسلے میں پاکستان کو یقین دہانی کروا دی ہے کہ پاکستان کو اس وقت بیرونی ذرائع سے ملنے والی فنانسنگ کی اشد ضرورت ہے جس کی وجہ ملک کے تیزی سے کم ہوتے زرمبادلہ کے ذخائر ہیں۔’

   اس وقت پاکستان کے زرِ مبادلہ کے زخائر 14 ارب ڈالر کی سطح سے نیچے گر چکے ہیں۔

   پاکستان کو اس ماہ کے آخر میں آئی ایم ایف سے بھی ایک ارب ڈالر سے زائد قرضے کی قسط بھی ملنی ہے جس کے لیے آئی ایم ایف ایگزیکٹو بورڈ اجلاس میں منظوری دے گا۔

7. 15 اگست 2022پنجاب کی کابینہ میں رد و بدل، سات وزرا کے قلمدان تبدیل

   پنجاب کے وزیرِ اعلٰی پرویز الٰہی کی جانب سے کابینہ میں موجود سات وزرا اور خصوصی معاونین کے قلمدان تبدیل کیے گئے ہیں۔

   ان وزرا میں راجہ بشارت، خرم شہزاد، یاسمین راشد، محمد اختر، راجہ یاسر ہمایوں، محمد مصدق عباسی، اور ارسلان خالد شامل ہیں۔

   ڈاکٹر یاسمین راشد سے پرائمری اینڈ سیکنڈری ہیلتھ کیئر لے کر محمد اختر کو دیا گیا ہے۔

   نوٹیفکیشن کے مطابق راجہ بشارت سے پبلک پراسیکیوشن کا محکمہ واپس لے کر انھیں پارلیمانی امور اور محکمہ ماحولیات کا قلمدان سونپا گیا ہے جب کہ خرم شہزاد ایڈووکیٹ سے پارلیمانی امور کا محکمہ واپس لے لیا گیا ہے۔

8. 15 اگست 2022‘پاکستان جیسے ممالک میں انتظامی ڈھانچہ مضبوط نہیں ہوتا چنانچہ قیمتوں میں اضافے کے اثرات زیادہ نمایاں ہوتے ہیں‘, تنویر ملک ، صحافی

   پاکستان کے سٹیٹ بینک کے عبوری گورنر ڈاکٹر مرتضیٰ سید نے تازہ ترین اقتصادی تبدیلیوں اور معیشت کو درپیش چیلنجوں پر تبصرہ کرتے ہوئے کہا ہے کہ زمینی حقائق سوشل میڈیا پر گردش کرنے والی منفی افواہوں سے مختلف ہیں۔

   انھوں نے شہریوں کو مشورہ دیا کہ وہ ایسی افواہوں پر دھیان نہ دیں۔ سٹیٹ بینک کے اعلامیے میں انھوں نے اس تاثر کو مسترد کر دیا کہ پاکستان کی معیشت شدید مشکلات کی شکار ہے اور کہا کہ دنیا کو اگلے 12 ماہ میں سخت چیلنجوں کا سامنا کرنا پڑے گا اور پاکستان بھی اس سے مستثنیٰ نہیں ہے۔

   انھوں نے کہا کہ پاکستان جیسے ممالک میں انتظامی ڈھانچہ زیادہ مضبوط نہیں ہے چنانچہ یہاں قیمتوں میں اضافے کے اثرات زیادہ نمایاں ہو جاتے ہیں۔

   انھوں نے امید ظاہر کی کہ آئی ایم ایف کا اہم بیل آؤٹ پروگرام ملک کو ریلیف فراہم کرے گا اور پاکستان ان ممالک کے مقابلے میں کمزور نہیں ہوگا جن کے پاس آئی ایم ایف پروگرام نہیں ہے۔

9. 14 اگست 2022پٹرولیم مصنوعات پر سبسڈی نہیں دے سکتے، مفتاح اسماعیل

   وفاقی وزیر خزانہ مفتاح اسماعیل نے کہا ہے کہ حکومت اس وقت پٹرولیم مصنوعات پر سبسڈی دینے کی متحمل نہیں ہو سکتی۔

   پاکستان کے نجی ٹی وی چینل جیو نیوز کے پروگرام نیا پاکستان میں گفتگو کرتے ہوئے مفتاح اسماعیل نے ایک سوال کے جواب میں کہا کہ 15 تاریخ کو ’پٹرولیم مصنوعات پر نہ تو کوئی ٹیکس لگنے جا رہا ہے اور نہ ہی لیوی لگے گی۔‘

   واضح رہے کہ ہر ماہ کی پہلی اور 15 تاریخ کو پٹرولیم مصنوعات کی قیمتوں کا جائزہ لیا جاتا ہے۔

   مفتاح اسماعیل کا کہنا تھا کہ ’ہم پیٹرولیم مصنوعات پر سبسڈی دینےکے متحمل نہیں ہوسکتے، ہم نقصان برداشت نہیں کرسکتے۔‘

   مفتاح اسماعیل نے بتایا کہ آئی ایم ایف نے پاکستان کو قرضہ دینے کے لیے پہلے 4 ارب ڈالر کا بندوبست کہیں اور سےکرنے کی شرط لگائی تھی۔

   انھوں نے کہا کہ دوست ملکوں سے 4 ارب ڈالر حاصل کرنےکا انتظام کرلیا ہے، آئی ایم ایف کو کل تک لیٹر آف انٹینٹ پر دستخط کرکے بھیج دیں گے۔

10. 14 اگست 2022تحریک انصاف کا ’عوام میں نکلنے کا فیصلہ‘

    سابق وزیر اعظم عمران خان نے کہا ہے کہ ان کی جماعت تحریک انصاف نے عوام میں نکلنے کا فیصلہ کیا ہے۔

    وہ کہتے ہیں کہ ’(میں نے) عوام میں نکلنے کا فیصلہ کیا ہے۔ لوگوں کے پاس جاؤں گا۔ اگلے ہفتے پنڈی جلسہ کرنے جا رہا ہوں۔ چند روز بعد کراچی۔ زرداری کے مقابلہ کرنے اس کے پاس آ رہا ہوں۔‘

    انھوں نے ملک کے تمام بڑے شہروں میں جلسوں کا اعلان کرتے ہوئے کہا کہ ’عوام کو تیار کر رہا ہے۔ حقیقی آزادی کی جنگ آخری مراحل میں ہے۔‘

11. 14 اگست 2022نواز شریف کی واپسی اور میری کردار کشی کی سازش ہو رہی ہے: عمران خان

    عمران خان نے مزید کہا کہ ان کی حکومت گرانے کے بعد ایک اور سازش ہو رہی ہے جس کے تحت ستمبر میں نواز شریف کو واپس لایا جائے تاکہ ان سے مقابلہ کرایا جائے۔

    انھوں نے کہا کہ ’پنجاب کے ضمنی الیکشن میں امپائروں کو ساتھ ملا کر دھاندلی کی گئی۔‘

    ’(الیکشن کمشنر) سکندر سلطان بزدل آدمی ہے، پیچھے سے بوٹ پڑا اس لیے اس نے ان کی مدد کی۔‘

    سابق وزیر اعظم نے دعویٰ کیا کہ ’عمران خان کو نااہل کرنے اور نواز شریف کو واپس بلانے کا منصوبہ بنایا گیا۔ عمران خان کوئی ڈیل نہیں کرنے لگا، میرا مقابلہ اس ڈاکو سے نہ کراؤ۔ یہ تیس سال سے پیسے چوری کر رہا ہے۔‘

    ’نواز شریف کو ستمبر میں واپس لانے کی سازش ہو رہی ہے۔ نواز شریف کا بہت اچھے سے استقبال کروں گا۔ عمران خان کے اوپر کردار کشی اور کیسز کی سازش ہو رہی ہے۔‘

    ان کا کہنا تھا کہ ’عدلیہ کو تقسیم کرنے کی سازش ہو رہی ہے تاکہ اپنے مرضی کے فیصلے کرائے جائیں۔۔۔ عمران خان اور فوج کے بیچ میں لڑائی کی بھی سازش ہو رہی ہے۔‘

    عمران خان نے کہا کہ ’میں کبھی نہیں چاہوں گا کہ فوج کمزور ہو۔۔۔ ملک کو بیرونی سازشوں کا سامنا ہے۔‘

    ’میری تنقید تعمیری ہوتی ہے، جیسے باپ اصلاح کے لیے تنقید کرتا ہے۔‘

12. 14 اگست 2022وادی سوات میں ٹی ٹی پی کی موجودگی کی خبریں گمراہ کن ہیں: آئی ایس پی آر

    پاکستانی فوج کے شعبہ تعلقات عامہ آئی ایس پی آر نے وادی سوات کے علاقوں میں کالعدم تنظیم تحریک طالبان پاکستان (ٹی ٹی پی) کی مبینہ موجودگی کی خبروں کو گمراہ کن قرار دے دیا ہے۔

    آئی ایس پی آر کے مطابق چند روز سے ٹی ٹی پی کے مسلح افراد کی سوات میں مبینہ موجودگی کی ’غلط فہمی پھیلائی گئی۔‘

    آئی ایس پی آر کا کہنا ہے کہ سوات اور دیر کے درمیان پہاڑوں پر چند مسلح افراد کی موجودگی پائی گئی ہے جو کہ آبادی سے دور ہیں۔ ’بظاہر یہ افراد اپنے آبائی علاقوں میں دوبارہ آباد ہونے کے لیے افغانستان سے چوری چھپے آئے۔‘

    پاکستانی فوج کے مطابق اس کی جانب سے پہاڑوں میں ان کی محدود موجودگی اور نقل و حرکت پر کڑی نظر رکھی جا رہی ہے۔ ’قانون نافذ کرنے والے اداروں نے ملحقہ علاقوں کے لوگوں کی حفاظت کے لیے ضروری اقدامات کیے ہیں۔‘

    آئی ایس پی آر کا کہنا ہے کہ عسکریت پسندوں کی کسی بھی جگہ موجودگی کو برداشت نہیں کیا جائے گا۔ ’اگر ضرورت پڑی تو ان سے بھرپور طاقت سے نمٹا جائے گا۔‘

13. 13 اگست 2022جب تک حکومت کو گھر بھیج کر الیکشن نہیں ہوتے تب تک جدوجہد جاری رہے گی: عمران خان

    سابق وزیر اعظم عمران خان نے کہا ہے کہ ان کی جدوجہد اس وقت تک جاری رہے گی جب تک اس حکومت کو گھر بھیج کر الیکشن نہیں کرائے جاتے۔

    لاہور میں جلسے سے خطاب کے دوران ان کا کہنا ہے کہ انڈیا پاکستان کے ساتھ آزاد ہوا تھا اور وہ اپنی خارجہ پالیسی اپنے لوگوں کے لیے بناتا ہے۔ ’میں اس قوم کو کسی کی غلامی نہیں کرنے دوں گا۔ ہم مل کر اپنے قرضے اتاریں گے۔‘

    ’آزادی کے لیے قربانیاں دینی پڑتی ہیں۔۔۔ اوپر وہ بیٹھے ہیں جو پیسوں کے غلام ہیں۔ امپورٹڈ حکومت کو فارغ کر کے الیکشن کرائیں گے۔ تب تک جدوجہد جاری رہے گی۔‘

    انھوں نے یہ بھی کہا کہ وہ امریکہ کے مخالف نہیں مگر موجودہ حکمراں امریکہ کے آگے ’لیٹ چکے ہیں۔‘

14. 13 اگست 2022تحریک انصاف چیئرمین کا لاہور میں آزادی جلسے سے خطاب

    تحریک انصاف چیئرمین عمران خان نے لاہور میں آزادی جلسے سے خطاب کرتے ہوئے کہا کہ میں کسی ملک کے خلاف نہیں ہوں۔

    انھوں نے کہا ’مجھے کہا جاتا ہے کہ میں اینٹی امریکن ہوں، میں واضح کر دوں کہ میں امریکہ مخالف نہیں ہوں۔‘

    ’ہم کیوں ایسے ملک کے مخالف ہوں گے جہاں پیسے والے ہنر مند پاکستانی ہیں اور ہماری سب سے زیادہ برآمدات امریکہ کو ہوتی ہیں۔‘

    ’میں امریکہ سے دوستی چاہتا ہوں لیکن میں غلامی نہیں چاہتا۔‘

15. 13 اگست 2022تحریک انصاف چیئرمین کا لاہور میں آزادی جلسے سے خطاب

    تحریک انصاف چیئرمین عمران خان نے لاہور میں آزادی جلسے سے خطاب کرتے ہوئے کہا کہ آج حقیقی آزادی کا روڈ میپ دوں گا۔

    ’ہم نے کیا قدم اٹھانے ہیں حقیقی آزادی کو حاصل کرنے کے لیے، وہ ساری قوم کو راستہ بتاوں گا۔‘

16. 13 اگست 2022عمران خان کے فوج سے بہترین تعلقات ہیں، چوہدری پرویز الہی

    وزیر اعلی پنجاب چوہدری پرویز الہی نے کہا ہے کہ عمران خان کے فوج سے بہترین تعلقات ہیں۔

    لاہور میں تحریک انصاف کے آزادی جلسے سے خطاب کرتے ہوئے چوہدری پرویز الہی نے کہا کہ ’جو لوگ غلط فہمی پیدا کرنے کی کوشش کر رہے تھے وہ ناکام ہو چکے ہیں۔‘

    پرویز الہی نے کہا کہ پنجاب میں عمران خان کے وژن کو آگے لے کر چلیں گے۔

17. 13 اگست 2022وزیر اعظم شہباز شریف کا قوم سے خطاب، ’میثاق معیشت کرنے کا وقت ہے‘

    وزیر اعظم شہباز شریف نے قوم سے خطاب میں کہا کہ قوم کو تقسیم در تقسیم اورقومی وحدت کو پارہ پارہ کرنے کی سازش کی جا رہی ہے۔

    انھوں نے کہا کہ گذشتہ حکومت کے پیدا کردہ مالی بحران نے صورت حال کو مخدوش بنایا جنھوں نے پاکستان کی تاریخ کا سب سے بڑا تجارتی خسارہ چھوڑا اور سب سے زیادہ قرض لیا۔

    وزیر اعظم نے کہا کہ ملک کو مختصر وقت میں معاشی بحران سے نمٹنے کے لیے محنت کی جس کی وجہ سے ملک دیوالیہ ہونے سے بچ گیا۔

    ’ہم ملک کو گندم میں خودکفیل چھوڑ کر گئے تھے لیکن گذشتہ حکومت کی پالیسیوں کی وجہ سے گندم باہر سے درآمد کرنے پر مجبور ہیں، انھوں نے ایل این جی کا کوئی طویل المدتی معاہدہ نہیں کیا جو لوڈشیڈنگ کی وجہ ہے۔‘

    ’غیر ضروری درآمدات کو سختی سے کنٹرول کیا جس کی وجہ سے روپیہ دن بدن مضبوط ہو رہا ہے۔ ہم اپنے وسائل پر انحصار کریں گے۔‘

    وزیر اعظم نے کہا کہ ’اربوں روپے کا تیل منگوا کر ہم مہنگی بجلی پیدا کرتے ہیں۔ ہم نے سولر کے منصوبے لگانے کا فیصلہ کیا جس سے اربوں ڈالر کی بچت ہو گی اور عوام کو سستی بجلی مہیا ہو گی۔‘

    انھوں نے کہا کہ یہ میثاق معیشت کا وقت ہے جس کی پیشکش پہلے بھی کی تھی۔

18. 13 اگست 2022اے آر وائے این او سی کی منسوخی: سندھ ہائی کورٹ نے وزارت داخلہ کا نوٹیفیکیشن معطل کردیا, ریاض سہیل، بی بی سی اردو ڈاٹ کام، کراچی

    سندھ ہائی کورٹ نے وفاقی وزارت داخلہ کی جانب سے اے آر وائے نیوز کا این او سی منسوخ کرنے کا نوٹیفیکیشن معطل کر دیا ہے۔

    واضح رہے کہ گذشتہ روز وفاقی وزارت داخلہ کی جانب سے ایک نوٹیفیکیشن میں کہا گیا تھا کہ اے آر وائے نیوز کا این او سی ایجنسیوں کی منفی رپورٹ کی بنیاد پر منسوخ کیا جاتا ہے۔

    اس نوٹیفیکیشن کے خلاف سندھ ہائی کورٹ میں سماعت کے دوران پیمرا کے وکیل نے درخواست کی کہ ان کو دو دن کا وقت دیا جائے جس کے بعد لائسنس منسوخی کی وجوہات بھی دی جائیں گی۔

    وکیل پیمرا کا موقف تھا کہ یہ بہت ہی حساس معاملہ ہے، تمام چیزیں عدالت کے سامنے رکھیں گے۔

    دوسری جانب اے آر وائے کے وکیل نے موقف اپنایا کہ عدالت نے چینل کی بندش پر حکم امتناع جاری کیا تھا لیکن عدالتی احکامات پر عمل درآمد نہیں ہوا جس پر توہین عدالت کی درخواست دائر کی گئی۔

19. 13 اگست 2022پنجاب حکومت 15 دن میں 25 مئی کے واقعات کی تفتیش مکمل کرے گی، فواد چوہدری

    تحریک انصاف رہنما فواد چوہدری نے کہا ہے کہ پنجاب حکومت 15 دن میں 25 مئی کے واقعات کی تفتیش مکمل کرے گی اور چند ایس ایچ اوز کو عہدے سے ہٹا دیا گیا ہے۔

    فواد چوہدری نے کہا کہ پنجاب میں عطا تارڑ اور شاید رانا ثنا اللہ کو تفتیش میں شامل کیا جا رہا ہے جو پولیس کا حق ہے۔

    ’اگر وہ اسلام آباد میں چھپ کر بیٹھے رہیں گے تو ان کو اشتہاری ڈیکلیئر کر دیا جائے گا۔ ان کو تفتیش میں شامل ہو کر 25 مئی کو ہونے والے واقعات میں اپنے کردار کی وضاحت کرنی چاہیے۔‘

    فواد چوہدری نے کہا کہ ’چند ایس ایچ اوز کو عہدے سے ہٹا دیا گیا ہے، کچھ لوگوں کی گرفتاریاں بھی ہوئی ہیں۔‘

    ان کا کہنا تھا کہ ’جن دو لوگوں کی راوی پل پر موت ہوئی، ان کے لواحقین کو اس وقت تک صبر نہیں آئے گا جب تک ان واقعات میں ملوث افسران اور ان کو حکم دینے والے انجام تک نہیں پہنچتے۔‘

    ایک سوال کے جواب میں فواد چوہدری نے کہا کہ ’اگر شہباز شریف الیکشن کا اعلان کرتے ہیں تو پھر فریم ورک بنانے کے لیے ہم مزاکرات کرنے کو تیار ہیں۔ میری ذاتی رائے میں اس کے بغیر استحکام نہیں آ سکتا، فاصلے کم ہونے میں بہتری ہے۔‘

20. 13 اگست 2022شہباز گل کی ضمانت کی درخواست، کورٹ کی جانب سے جواب طلب, شہزاد ملک، بی بی سی اردو

    سیشن کورٹ میں شہباز گل کی ضمانت بعد از گرفتاری کی درخواست ضمانت پر سماعت ایڈیشنل سیشن جج محمد عدنان خان نے پیر کے لیے نوٹس جاری کیے ہیں۔

    کورٹ نے جواب طلبی کے لیے تفتیشی افسر اور پراسیکیوٹر کو نوٹس جاری کر دیے ہیں۔

    درخواست میں کہا گیا ہے کہ حکومت نے پی ٹی آئی کے ساتھ حساب برابر کرنے کے لیے جھوٹا مقدمہ درج کیا، تفتیش میں پولیس شہباز گل پر کوئی الزامات ثابت نہیں کر سکی ۔

    علاوہ ازیں شہباز گل کا جسمانی ریمانڈ لینے کی درخواست مسترد ہونے حکم چیلنج کر دیا گیا ہے۔

    اس سلسلے میں ایڈوکیٹ جنرل اسلام آباد کی جانب سے اسلام آباد ہائی کورٹ میں درخواست دائر کی گئی ہے۔

    درخواست میں کہا گیا ہے کہ `جوڈیشل مجسٹریٹ کا آرڈر کالعدم قرار دیکر شہباز گل کا جسمانی ریمانڈ منظور کریں۔‘

    یہ استدعا کی گئی ہے کہ `ماتحت عدالتوں کے فیصلے کالعدم قرار دے کر شہباز گل کا مزید جسمانی ریمانڈ دیا جائے، جوڈیشل مجسٹریٹ اور ایڈیشنل سیشن جج نے شہباز گل کو جوڈیشل ریمانڈ پر جیل بھیجنے کا حکم دیا تھا۔

    دوسری جانب شہباز گل کے ڈرائیور کے برادر نسبتی ملزم نعمان کو جیل بھیجنے کا حکم عدالت نے ملزم کو جوڈیشل ریمانڈ پر جیل بھیج دیا گیا ہے۔

    پولیس نے عدالت سے استدعا کی کہ ملزم سے تفتیش مکمل ہو چکی ہے جوڈیشل ریمانڈ منظور کیا جائے۔ جبکہ ملزم کے وکیل نیاز اللہ نیازی نے کہا کہ ان کے موکل کا اس مقدمہ میں کوئی رول نہیں ہے اس کو ڈسچارج کیا جائے۔ ان کا کہنا تھا کہ `چوری کی دفعہ اس مقدمے میں بنتی ہی نہیں باقی دفعات قابل ضمانت ہیں۔‘