ኣብ ኣውስትራልያ ህጻናት ዝጻወቱሉ ዝነበሩ ባላንቺና ብንፋስ ብምውሳዱ ሽዱሽተ ቆልዑ ሞይቶም

ኣብ ኣውስትራልያ ቆልዑ እናዘለሉ ዝጻወቱሉ ብኣየር ዝንፋሕ ጎማ ብንፋስ ድሕሪ ምውሳዱ ኣብ ውሽጡ ካብ ዝነበሩ ቆልዑ ሽዱሽተ ሞይቶም።

እቲ ሓደጋ ኣብ ዴቮንፖርት፡ ታስማንያ ኣብ ዝርከብ ናይ መባእታ ቤት ትምህርቲ ብሓሙስ እዩ ኣጋጢሙ። ሽዑ ትሽዓተ ተማሃሮ ካብ ኣየር (10 ሜተር ብራኸ) ናብ መሬት ክወድቁ እንከለው እቶም ሓሙሽተ ብኡ ንብኡ እዮም ሞይቶም።

እቲ ሓደ ኣብ ሆስፒታል ረድኤት ክግበረሉ እኳ እንተጸንሐ ብሰንበት ህይወቱ ከም ዝሓለፈ ተገሊጹ።

ክልተ ጌና ኣብ ትሕቲ ጽኑዕ ምክትታል ሕክምና ኣብ ሆስፒታል ከምዝርከቡ’ውን ተፈሊጡ።

ሓደ ካብቶም በቲ ሓደጋ ዝቖሰሉ ቆልዑ ብዓርቢ ካብ ሆስፒታል ክፋኖ እንከሎ ናብቲ መባእታ ቤት ትምህርቲ ብምኻድ ነቶም በቲ ሓደጋ ህይወቶም ዝሰኣኑ መማህርቱ ዕምባባ ከምዘንበረ ጸብጻባት ገሊጾም።

እቲ ሓደጋ ብኸመይ ከም ዘጋጠመ ዛጊት ኣይተነጸረን። ፖሊስ እቲ ባላንቺና ምስ መሬት ተኣሲሩ እንተነይሩ መርመራታት ይገብር ከምዘሎ ሓቢሩ።

ኮምሽነር ፖሊስ ታስማንያ ዳረን ሂን ብሰንበት ኣብ ዝሃቦ መግለጺ “ብታህዋኽ ክንገብሮ ኣይንደልን፤ ግና ነበርቲ መልሲ ከምዝደልዩ’ውን ንርዳእ ኢና” ኢሉ።

ኣብቲ እቲ ሓደጋ ዘጋጠመሉ ናይ መዕጸዊ ቤት ትምህርቲ በዓል፡ ከባቢ 40 ዝኾኑ ቆልዑ፡ መማህራንን ካልኦት ሰባትን ምንባሮም ፖሊስ ሓቢሩ።

እቲ ሓደጋ ኣብታ ካብ 30,000 ዘይበዝሑ ነበርቲ ዘለዋ ከተማ ዴቮንፖርት ራዕዲ ክፈጥር እንከሎ ንመላእ ኣውስትራልያ’ውን ኣሰንቢዱ እዩ።

ዛጊት ንስድራ ግዳያት ንምሕጋዝ ኣብ ኦንላይን ኣብ ዝግበር ዘሎ ወፈያታት ኣስታት 930,000 ዶላር ኣሜሪካ ተኣኪቡ ኣሎ።