ዘመትቲ ከብቲ፡ ልዕሊ 20 ናይጀሪያውያን ቀቲሎም

ኣብ ሰሜናዊ ግዝኣት ዛምፋራ ናይ ናይጀሪያ ዘመትቲ ከብቲ 20 ሰባት ከምዝቐተሉ ሰበ-ስልጣን`ታ ሃገር ኣፍሊጦም።

እቶም ዘመትቲ ኣብ ሞተር ብሽግለታታት ተወጢሖም ናብታ ዓዲ ድሕሪ ምእታው ናብ ሰባት ክትኩሱን ኣባይቶም ብሓዊ ከቃጽሉን ጀሚሮም።

ኣብ መንጎ ኣባላት ጉጅለታት ነብሰ-ምክልኻል (ቪጂላንተ) ናይ ዛምፋራን ዘመትቲ ከብትን ዝካየዱ ግጭታት ኣብ ዝሓለፉ ሒደት ኣዋርሕ እናዛየዱ ክመጹ ጸኒሖም ኣለዉ።

ኣብ ናይጀርያ፡ ምስ ምዝማት ከብቲ ዝተተሓሓዙ ግጭታት ካብቲ ኣብ ሰሜናዊ ክፋል ናይ`ታ ሃገር ዘሎ እስላማዊ ምንቅስቓስ ይኹን ኣብ ደቡባዊ ክፋል ዘሎ ዝምታ ነዳዲ ንላዕሊ ንዓመታት ዝኣክል ክካየዱ ጸኒሖም`ዮም። ቁጽሪ ናይቶም ኣብ እዋን ምዝማት ከብቲ ዝቕተሉ ሰባት ድማ ካብቶም ኣብ እዋን ግጭት ቦኮ ሓራም ዝቕተሉ ንላዕሊ`ዩ ድማ ይበሃል፡ ዋላ`ኳ ወግዓዊ ሓበሬታ ንምርካብ ኣሸጋሪ እንተኾነ።

ነበርቲ ናይታ ዓዲ፡ `ነቶም ሸፋቱ ንምብዳህ ዝፈተኑ ኣባላት ነብሰ-ምክልኻል ሓዊስካ ኣብቲ መጥቃዕቲ ዝተቐትሉ 23 ሰባት ከምዝቐበሩ` ኣቦ መንበር ዞባዊ መንግስቲ ዛኖካ ሙስጣፋ መሓመድ ንማዕከን ዜና ኤ ኤፍ ፒ ሓቢሩ።

ብመሰረት ሓበሬታ ምምሕዳር ግዝኣት ዛምፋራ፡ ኣብ ዝሓለፉ ሸውዓተ ዓመታት ልዕሊ 10,000 ከብቲ ተዘሚተን ኣለዋ።

ዝበዝሑ ምስ ዝምታ ከብቲ ዝተተሓሓዙ ግጭታት ዝካየዱ ኣብ መንጎ`ቶም ኣብቲ ዋሕዲ ተፈጥሮኣዊ ጸጋታት ዘለዉ ከባቢታት ናይ ማእከላይ ማዕጥቖ ተባሂሉ ዝፍለጥ ቦታ ዝነብሩ ጓሶትን ሰፋሮ ሓረስቶትን`ዩ ኢላ ልእኽቲ ናይ ቢቢሲ ሜሪ ሃርፐር።

ገለ ተንተንቲ ድማ እቲ ግጭት ኣብ መንጎ ሰበኽ-ሳግም ኣስላምን ክርስቲያን ሓረስቶትን`ዩ ዝካየድ ይብሉ። እንተኾነ ግን እቲ ጉዳይ ገበነኛታትን ፖለቲከኛታትን ዝሳተፍዎ ዝተሓላለኸ ከምዝኾነ ልኡኽና ሓቢራ።

ሕማቕ ምሕደራ መበቆል ናይ`ቲ ግጭት ከምዝኾነ ብዙሓት ሰባት ይዛረቡ፡ ሓይልታት ጸጥታ ድማ ብልሽዋትን ብቕዓት ኣልቦን ምዃኖም ይንገረሎም ኢላ ንሳ ብምውሳኽ።

ገንዘብ ንምርካብ ተባሂሎም ዝካየዱ ጭውያ ሰባት`ውን እናዛየዱ ክመጹ ጸኒሖም ኣለዉ። ኣብ ፈለማ ወርሒ ግንቦት፡ ኣብ ሓደ ኣብ ጥቓ ዶብ ናይ ግዝኣታት ካዱናን ዛምፋራን ዝርከብ መንገዲ ኣብ ውሽጢ ክልተ መዓታት ጥራይ ኣስታት 100 ሰባት ተጨውዮም።