ጆ ባይደን፡ ‘ኣመሪካ ኢዳ እንተእትያ፡ ሳልሳይ ኲናት ዓለም ክለዓል እዩ’

ቀጥታዊ ሸፈነ

1. 9 መጋቢት 2022ሙዚቀኛታት ኪቭ፡ 'ኮንሰርት ንሰላም' ኣካይዶም

   ኣብ ርእሰ ከተማ ዩክረይን፡ ኪቭ፡ ስነጥበባውያን ሙዚቃ እታ ሃገር 'ኮንሰርት ንሰላም' ወዲቦም።

   ኣብ'ዚ እዋን ጭንቅን ጓህን፡ ከምዚ ዓይነት ተበግሶ ንነበርቲ እታ ከተማ ንእሽቶ ሩፍታ ዝህብ እዩ ተባሂሉ።

   እቲ ኮንሰርት ሙዚቃ፡ 'ኣደባበይ ናጽነት' ተባሂሉ ኣብ ዝጽዋዕ ማእከል እታ ርእሰ ከተማ፡ ኣብ ክፉት ኣየር እዩ ተኻይዱ ተባሂሉ።

   እቶም ሙዚቀኛታት፡ ኣብ'ቲ ኣዝዩ ቀዝሒ ኩነታት ኣየር ኮይኖም፡ ቆቢዕን ጃኬትን ገይሮም፡ መዝሙር ሕብረት ኣውሮጳ ክዝምሩን ተራእዮም ተባሂሉ።

   ኣብ ማሕበራዊ ሚድያ ዝተቓልሑ ተንቀሳቓሲ ምስልታት ድማ፡ ብዙሓት ዕዱማት እቲ ኮንሰርት፡ ባንዴራታት ዩክረይን ከውለብልቡን ድጋፎም ክገልጹን ተራእዮም።

   ዋና ኣሰናዳኢ እቲ ሙዚቃ፡ እቲ ኮንሰርት፡ ክሊ ኣየር እታ ሃገር 'ካብ በረራ ነጻ ይኹን' ዝብል ጻውዒት መንግስቲ ዩክረይን ንምድጋፍን እቲ ኲናት ንከብቅዕን ንምጉስጓስ ዝዓለመ ምዃኑ ተዛሪቡ።

   Skip X post

   ንትሕዝቶ X ተፍቅድ ዶ?

   እዚ ጽሑፍ ካብ X ዝተረኽቡ ትሕዝቶታት ኣሎዎ። እንተኾነ ኩኪስ ይዅን ካልእ ቴክኖሎጂ ክጥቀሙ ስለዝኽእሉ፡ ቅድሚ ምኽፋቱ ፍቓድኩም የድሊ። ፍቓደኛታት ቅድሚ ምዃንኩም፡ ነቲ ናይ X ፖሊሲ ኩኪስ ከምኡ’ውን ፖሊሲ ብሕትና ክተንብብዎ ትኽእሉ ኢኹም። ነዚ ትሕዝቶ ንምርኣይ፡ ‘እሰማማዕ’የ ቀጽል’ ዝብል ጠውቑ።

   Accept and continue

   Warning: ቢቢሲ ኣብ ካልእ ገጻት ንዘሎ ሓበሬታ ሓላፍነት ኣይወስድን።

   End of X post

2. 9 መጋቢት 2022ካብ ዩክረይን 800 ሽሕ ህፃናት ከምዝተሰደቱ ሕቡራት ሃገራት ኣፍሊጡ

   

   ምንጪ ስእሊ, Slovak Interior Ministry

   ካብ ዩክረይን ካብ ሞንጎ ዝተሰደቱ ክልተ ሚልየን ሰባት እቶም 800 ሽሕ ህፃናት ከምዝኾኑ ተገሊፁ።

   ኣብ ሕቡራት ሃገራት ትካል ምድሓን ህፃናት - ሴቭ ዘ ችልድረን፡ ብዙሓት ህፃናት ብዘይ ሓጋዚ ስድራ ንበይኖም ይሃድሙ ከምዘለዉ ኣጠንቂቑ።

   ሰራሕተኛ እቲ ትካል ኢሪና ሳጎያን፡ “ወለዲ ደቆም ንምድሓን ብጣዕሚ ተስፋ ዘቕብፅን ልቢ ዝሰብሩን ስጉምትታት ይወስዱ ኣለዉ። ንደቆም፡ ምስ ጎረባብቶምን መሓዙቶምን ካብ ዩክረይን ወፃኢ ውሑስ ናብ ዝኾኑ ከባብታት ይልእኽዎም ኣለዉ። ንሶም ድማ ገዝኦም ንምሕላው ኣብ ዩክረይን ይተርፉ” ኢላ።

   ካብ ዩክረይን ንብሕቱ ተበጊሱ ናብ ስሎቫኪያ ዝበፅሐ ወዲ 11 ዓመት ሰገን ቀልቢ ብዙሓት ስሒቡ ነይሩ።

   እዚ ሓሰን ዝተብሃለ ሰገን፡ ወላዲቱ ንኣዴኣ ገዲፋ ክትሃድም ብዘይምኽኣላ፡ ንበይኑ ካብ ዩክረይን ክወጽእ ተገዲዱ።

   ሓሰን፡ ክልተ ኣናእሽተይ ሻንጣታትን ፓስፖርትን ሒዙ፡ ናይ ኣዝማዱ ቁፅሪ ስልኪ ኣብ ኢዱ ብምፅሓፍ’ዩ፡ 1200 ኪሎሜትር ኣቋሪፁ ናብ ስሎቫኪያ በፂሑ።

   ካብቲ ኵናት ህይወቶም ንምድሓን ካብ ዩክረይን ካብ ዝወፅኡ ልዕሊ ፍርቂ ስደተኛታት፡ ናብ ፖላንድ፣ ሃንጋሪን ስሎቫኪያን ይኸዱ።

3. 9 መጋቢት 2022ትልሚ ፑቲን ንኪቭ ኣብ ክልተ መዓልቲ ምሓዝ’ዩ ነይሩ፡ ሲኣይኤ

   

   ምንጪ ስእሊ, Getty Images

   ሲኣይኤ፡ ኣብ ልዕሊ ዩክረይን ወራር ዝፈፀመ ቭላድሚር ፑቲን ኣብ ውሽጢ 48 ሰዓታት ንርእሰከተማ ዩክረይን ኪቭ ክቆፃፀር ትልሚ ከምዝነበሮ ገሊፁ።

   ዳይሬክተር ሲኣይኤ ዊሊያም በርንስ ትማሊ ሰሉስ ንኮሚቴ ደሕንነት ተወከልቲ ባይቶ ኣብ ዘስምዖ መደረ፡ ፑቲን ኣብቶም ዝቕፅሉ መዓልታት ሰራዊቱ ኣጠናኺሩ ከቢድ ናይ ሓይሊ ስጉምቲ ክወስድ ከምዝኽእል ኣጠንቂቑ።

   “ፑቲን ኣብዚ ሰዓት ዝሓረቐን ትዕግስቲ ዝሰኣነን እመስለኒ” ዝበለ እቲ ዳይሬክተር፡ ብዝሒ ሰራዊቱ ብኽልተ ዕፅፊ ብምዕባይ፡ ኣብ ልዕሊ ዩክረይን ከቢድ መጥቃዕቲ ንምፍፃም ይዳሎ ኣሎ” ኢሉ።

   ዊልያም በርንስ፡ በዚ መጥቃዕቲ ኣብ ልዕሊ ሲቪላት ዩክሬናውያን ከቢድ ጉድኣት ክበፅሕ ከምዝኽእል ድማ ስግኣቱ ገሊፁ።

4. 9 መጋቢት 2022መራሕቲ ስዑድያን ኢማራትን ንባይደን ከቲቶሞ

   

   ምንጪ ስእሊ, Reuters

   ዋይት ሃውስ፡ ኣብ መንጎ ፕረዝደንት ጆ ባይደንን መራሕቲ ስዑዲ ዓረብን ኢማራትን ንምርኻብ ዝገበሮ ፃውዒት ስልኪ ከምዘይሰመረ ዎል ስትሪት ጆርናል ኣቃሊሑ።

   ኣሜሪካ፡ ንዩክረይን ዓለምለኻዊ ድጋፍ ንምድልዳልን እቲ ዝውንጨፍ ዘሎ ዋጋ ነዳዲ ንምግታእን ኣብ ትሰርሐሉ ግዜ'ዩ፡ ዋይትሃውስ ንሰለስቲኦም መራሕቲ ንምርኻብ ፈተነ ኣካይዱ።

   ጆ ባይደን እዋን ጎስጓስ ፕረዚደንታዊ ምርጫ፡ ንስዑድ ዓረብ "ፋሉል" ሃገር ብምባል ገሊጽዋ ከምዝነበረን፡ ንዝፍፀሙ ግህሰታት ሰብኣዊ መሰል ድማ "ዋጋ ክትከፍል'ያ" ክብል ቃል ምእታዉ ይዝከር።

5. 9 መጋቢት 2022ኣብ ዩክረይን እንታይ እዩ ዝኸውን ዘሎ? ጽማቝ ሓበሬታ

   ወራር ሩስያ መበል 14 መዓልቱ ሒዙ’ሎ። ኣገደስቲ ምዕባለታት ናይዚ ዝሓለፈ 12 ሰዓታት ከኣ ብኸምዚ ዝስዕብ ተጠቓሊሉ ይቐርብ፥

   • ረቡዕ ንግሆ፡ ኣብ ኪቭን ካልኦት ሓየለ ከተማታትን ዩክረይን፡ ደወል መጠንቀቕታ ነፋሪት ተሰሚዑ።
   • ካብታ ጽዑቕ ደብዳብ ሩስያ ዝቐናያ ሰሜን-ምብራቓዊት ከተማ ሱሚ ዝተገብረ ክልተ መስርሕ ምውጻእ ብዓወት ከም ዝተፈጸመ ዩክረይን ኣፍሊጣ።
   • ፕረዚደንት ዩክረይን ቮሎድሚር ዘለንስኪ፡ ካብቲ ኣብ ኪቭ ዝርከብ ቤት ጽሕፈቱ ኰይኑ፡ ንኣባላት ባይቶ ብሪጣንያ ትጽቢት ዘይተገብረሉ መደረ ኣስሚዑ።
   • ንሱ፡ ንዊንስተን ቸርችል ጠቒሱ፡ “ኣብ ጫካ፡ ኣብ በረኻ፡ ኣብ ገማግም ባሕሪ፡ ኣብ ጐደናታት ክንቃለስ ኢና፡” ክብል ንሩስያ ኣጠንቂቝ።
   • ፕረዚደንት ጆ ባይደን፡ ኣሜሪካ ኣብ ልዕሊ ነዳዲ፡ ጋዝን ከሰልን ሩስያ ምሉእ እገዳ ከም ዝገበረት ኣፍሊጡ።
   • ኣብዚ እዋን ክልተ ሚልዮን ዝበጽሑ ስደተኛታት ካብ ዩክረይን ከም ዝወጽኡ፡ ውድብ ሕቡራት ሃገራት ኣፍሊጡ። እዚ ኸኣ ድሕሪ ካልኣይ ኲናት ዓለም ዝተመዝገበ ቅልጡፍ ናህሪ ቅልውላው ስደተኛታት ኣብ ኤውሮጳ ኰይኑ’ሎ።
   • ማክዶናልድ፡ ስታርባክስን ኮካኮላን፡ ስርሐን ኣብ ሩስያ ደው ኣቢለን ዘለዋ ቀዳሞት ኩባንያታት ምዕራብ ኰይነን ኣለዋ።

6. 9 መጋቢት 2022ቅልውላው ዩክረይን፡ ምልባዕ ስኑዕ ሓበሬታታት ከም መላገጺ

7. 9 መጋቢት 2022ሓድሽ ዜና, ሩስያን ዩክረይንን፡ ብመገዲ ምኒስተራት ጕዳያት ወጻኢአን ኣብ ቱርኪ ክዘራረባ እየን

   ምኒስተር ጕዳያት ወጻኢ ሰርገይ ላቭሮቭን ናይ ዩክረይን መዘናኡ ድሚትሮ ኩሌባን ኣብ ቱርኪ ክራኸቡ ምዃኖም፡ ምኒስትሪ ጕዳያት ወጻኢ ሩስያ ኣረጋጊጹ።

   እዚ፡ ኲናት ዩክረይን ብ 14 ለካቲት ድሕሪ ምጅማሩ፡ ኣብ መንጐ’ዞም ላዕለዎት ሰብመዚ ንፈለማ ግዜ ዝካየድ ዘሎ ርክብ እዩ።

   መንግስታዊ ማዕከን ዜና ሩስያ፡ ‘RIA’ ንኣፈኛ ምኒስትሪ ጕዳያት ወጻኢ ‘ታ ሃገር፡ ማሪያ ዛኮሮቫ ጠቒሱ፡ ረቡዕ ንግሆ ከም ዝሓበሮ፡ ሰርገይ ላቭሮቭ፡ ኣብቲ ኣብ ኣንታልያ [ቱርኪ] ዝካየድ ኣህጉራዊ ዲፕሎማስያዊ መድረኽ ዝሳተፍ ኰይኑ፡ ምስ መዘናኡ ኩሌባ ዝግበር ርክብ ከኣ ኣብኡ ክኸውን ተመዲቡ ከም ዘሎ ተፈሊጡ’ሎ።

   እዚ ርክብ፡ ብምኒስተር ጕዳያት ወጻኢ ቱርኪ፡ መቭሉት ካቩሶግሎ ዝተኣመመን፣ ብመልክዕ ስሉሳዊ ርክብ፡ ኣብ መንጐ ላቭሮቭ፡ ኩሌባን መቭሉትን ዝካየድን እዩ።

   ዛጊት ተረጋጊጹ ከም ዘሎ፡ ርክብ ክልቲኦም ምኒስተራት 10 መጋቢት ክካየድ እዩ። እቲ ኣህጉራዊ ዲፕሎማስያዊ መድረኽ ከኣ ንጽባሒቱ 11 መጋቢት ክጋባእ እዩ።

   ኣብ መንጐ ሩስያን ዩክረይንን ክካየድ ዝጸንሐ ዘተታት ሰላም፡ ብድሆታት ዝበዝሖን ዛጊት ምንም ፍረ ዘየምጽአን ምዃኑ ይፍለጥ።

   

   ምንጪ ስእሊ, Getty Images

8. 8 መጋቢት 2022ፕረዚደንት ዩክረይን ቮሎድሚር ዘለንስኪ ንፓርላማ ብሪጣንያ መግለጺ ሂቡ

   

   ምንጪ ስእሊ, Parliament

   ፕረዚደንት ዩክረይን ቮሎድሚር ዘለንስኪ ንፓርላማ ብሪጣንያ ኣብ ዝሃቦ መግለጺ፡ ኣንጻር ወራር ሩስያ ክሳብ መወዳእታ ክቃለሱ ምዃኖም ኣነጺሩ።

   ኣብቲ ሎሚ ብቓና ናይቲ ኣብ እዋን ካልኣይ ኲናት ዓለም መራሒ ብሪጣንያ ዝነበረ ዊንስተን ቸርቺል ዘስምዖ መደረ፡ “ኣብ ጫካታት፡ ሜዳታት፡ ገማግም ባሕርናን ጎደናታትን ክንዋጋእ ኢና” ክብል ፈኪሩ።

   ቀዳማይ ሚኒስተር ቦሪስ ጆንሰንን መራሕቲ ተቓወምቲን ኣባላት ባይቶን ድማ ንዩክረይን ዘለዎም ደገፍን ምሕዝነትን ገሊጾምሉ።

   ኣብቲ ንምሉእ መጋባእያ ፓርላማ ዘስምዖ መደረ፡ ኣባላት ባይቶ ካብ መናብሮም ብምትሳእ ዘለዎም ክብሪ ገሊጾምሉ።

   ንሱ፡ ከምቲ ብሪጣንያ ኣንጻር ናዚ ጀርመን ብምሉእ ሓይላ ዝተቓለሰት፡ ዩክሬናውያን’ውን ክሳብ መወዳእታ ክቃለሱ ምዃኖም ተዛሪቡ።

   ዘለንስኪ ንምሉእ ፓርላማ ብሪጣንያ ኣብ ኣደራሽ (ኮመንስ) መደረ ዘስምዐ ፈላሚ ወጻእተኛ መራሒ ሃገር’ዩ።

   ቀዳማይ ሚኒስተር ጆንሰን፡ ሃገሩ ወተሃደራዊ ኣጽዋር ምሃብ ክትቅጽሎ ምዃና ድማ ቃል ኣትዩሉ።

   

   ምንጪ ስእሊ, PA

9. 8 መጋቢት 2022መበል 13 መዓልቲ፡ ቀንዲ እዋናዊ ምዕባለታት ኲናት ዩክረይን

   

   ምንጪ ስእሊ, Ukraine Ministry of Internal Affairs/Handout via REUTERS

   • ዛጊት ልዕሊ 2 ሚልዮን ህዝቢ ዩክረይን ናብ ስደት ወጺኡ ምህላዉ ሕቡራት ሃገራት ገሊጹ
   • ኣብ ከተማታት ኢርፒን፡ ኪቭን ሳሚን ዝነብር ህዝቢ ብውሑስ መተሓላለፊ ክወጽእ ጀሚሩ። እቲ መተሓላለፊ ኣብ መንጎ ሩስያን ዩክረይንን ብዝተበጽሐ ስምምዕ’ዩ ተኸፊቱ።
   • እንተኾነ ግን፡ ሩስያ ነቲ ካብ ከተማ ማሪዮፖል ዝብገስ መውጽኢ ትድብድቦ ከምዘላ ሰበስልጣን ዩክረይን ከሲሶም።
   • ሩስያ ከም ግረብመልሲ ናይቲ ኣብ ልዕሊኣ ዝቕጽል ዘሎ እገዳታት ንኣውሮጳ እትህቦ ቀረብ ጋዝ ከተቋርጾ ከምእትኽእል ኣጠንቂቓ።
   • ኩባንያ ነዳዲ ሼል፡ ዘይተጻረየ ነዳዲ ካብ ሩስያ ብምዕዳጉ ይቕሬታ ብምሕታት፡ ከቋርጾ ምዃኑ ገሊጹ።
   • ፕረዚደንት ዩክረይን ቮሎድሚር ዘለንስኪ ንፓርላማ ብሪጣንያ ብማንዛ መግለጺ ክህብ ትጽቢት ይግበር።
   • ጸሓፊ ምክልኻል ብሪጣንያ በን ዋለስ፡ ኣብ ዩክረይን ካብ በረራ ናጻ ዝኾነ ክሊ ኣየር ንምውሓስ ወጥን ከምዘይብሎም ተዛሪቡ። ኣብ ክንድኡ፡ ሃገሩ ንዩክሬናውያን ብረት ዝተሓወሶ ወተሃደራዊ ደገፍ ከምእትህብ ኣፍሊጡ።

10. 8 መጋቢት 2022ሳልሳይ ዙር ዘተ ሰላም ዩክረይንን ሩስያን ብዘይፍረ ተበቲኑ

    ሩስያ ንዩክረይን ምውራራ ስዒቡ ተወሊዑ ዘሎ ኵናት ብዘተ ንምፍታሕ፡ ንሳልሳይ ግዘ ዝተኻየደ ዘተ ሰላም ብዘይፍረ ከምዝተበተነ ተገሊፁ።

    ማዕኸን ዜና ሮይተርስ ንሓደ ናይ ዩክረይን ተወካሊ ፀሪሑ ከምዝፀብፀቦ፡ ነቲ ዘሎ ኩነታት ንምህዳእ ኣብ ዘኽእል ስምምዕ ኣይተበፅሐን።

    ሃገራዊ ተሌቬዥን ሩስያ ድማ፡ ንሩስያ ወኪሉ ኣብቲ ዘተ ዝተወከለ፡ ካብቲ ዘተ ውፅኢት ኣይተረኸበን ከምዝበለ ፀብፂቡ።

    ንዩክረይን ወኪሉ ኣብቲ ዘተ ይሳተፍ ዘሎ ኣማኻሪ ፕረዝደንት ዩክረይን ብወገኑ፡ ኣብ ጉዳይ ሲቪላት ካብቲ ናይ ኵናት ዞባ ንምውፃእ ሰብኣዊ ኮረድዮ ኣብ ምኽፋት ዝምልከት፡ “ቅሩብ እወንታዊ” ውፅኢት ተረኺቡ ኢሉ።

    ክልቲአን ሃገራት፡ ኣብ ጎረቤት ሃገር ቤላሩስ ምዝታየን ከምዝቕፅላ ኣፍሊጠን።

11. 8 መጋቢት 2022ሰብኣዊ ኮሪደራት ተኸፊቶም

    

    ምንጪ ስእሊ, EPA

    ካብ ኲናት ዩክሬን ዝሃድሙ ሰባት ዝወጽኡሎም ሰብኣዊ ኮሪደራት ከምዝተኸፈቱ ተገሊጹ።

    ሚንስትሪ ምክልኻል ሩስያ ከምዝሓበሮ፡ እቶም መንገድታት ተኸፊቶም ዘለዉ ካብ ከተማታት ቸሪሂቭ፣ ሳሚ፣ ካርኪቭ፣ ማሪፑልን ኪዬቭን ዘውጽኡ እዮም።

    ቅድም ክብል ነቶም ኮሪደራት ንምኽፋት ዝተገበረ ፈተነ ብሰንኪ ኣብ ልዕሊ ሰላማውያን ሰባት ዝተኸፈተ ተኹሲ ተኣጓጒሉ ነይሩ።

12. 8 መጋቢት 2022ልዕሊ 1200 ሲቪላት ሰባት ተጎዲኦም፡ ሕቡራት ሃገራት

    

    ምንጪ ስእሊ, Getty Images

    ሩስያ ንዩክረይን ምውራራ ስዒቡ፡ ዛጊድ ልዕሊ 1200 ንፁሃት ሰባት ከምዝተጎድኡ ኮምሽን ሰብኣዊ መሰል ሕቡራት ሃገራት ኣፍሊጡ።

    እቲ ኮምሽን፡ ኣብቶም ዝሓለፉ ክልተ ሰሙናት ካብ ሞንጎ ዝተጎድኡ እቶም 406 ሰባት ከምዝሞቱን 801 ሰባት ዝተፈላለየ መጠን ዘለዎ ጉድኣት ከምዘጋጠሞም ገሊፁ።

    እዚ ጉድኣት፡ ሩስያ ከም ሃገር ኣፍልጦ ኣብ ዝሃበተን ክልላት ዩክረይን ዝኾና ዶነስክን ሉሃንስክን ከምዘጋጠማ ድማ ሓቢሩ።

    ቁፅሪ ዝተጎድኡ ሰባት ልዕሊ እዚ ክኸውን ከምዝኽእል ተገሊፁ።

    ሕቡራት ሃገራት፡ ኣብዚ 13 መዓልታት ኣቑፂሩ ዘሎ ኵናት ልዕሊ 1 ነጥቢ 7 ሚልየን ዩክሬናውያን ካብ መረበቶም ከምዝተሰደቱ ኣፍሊጡ።

13. 8 መጋቢት 2022ባንኪ ዓለም ንዩክረይን ንምድጋፍ 700 ሚልየን ዳላር ኣፅዲቑ

    

    ምንጪ ስእሊ, Getty Images

    ባንኪ ዓለም ንዩክረይን ንምሕጋዝ 723 ሚልየን ዳላር ከምዘፅደቐ ተገሊፁ።

    እዚ ሓገዝ መንግስቲ ዩክረይን ንሰራሕተኛታት መንግስትን ጡረታኛታትን ንክኸፍል ዘኽእሎ’ዩ።

    እቲ ሓገዝ ገንዘብ ካብ ዓባይ ብሪጣንያ፣ ኔዘርላንድስ፣ ስዊድን፣ ጃፓን፣ ዴንማርክ፣ ላትቪያ፣ ሊቱዌንያን ኣይስላንድ ከምዝተረኸበ ባንኪ ዓለም ገሊፁ።

    ኣብ ዝቕፅሉ ኣዋርሕ ንዩክረይንን ጎረባብቲ ሃገራትን ተወሳኺ ሰለስተ ቢልየን ዳላር ንምልቃቕ ይሰርሕ ከምዘሎ ድማ ኣፍሊጡ።

14. 8 መጋቢት 2022ኲናት ሩስያ-ዩክረይን ንዋጋ ምግቢ ከምዘዕርጎ ፕሮግራም ምግቢ ዓለም ኣጠንቂቑ

15. 8 መጋቢት 2022ሩስያዊ ኣዛዚ ሰራዊት ኣብ ኲናት ከምዝተቐተለ ዩክሬን ኣፍሊጣ

    

    ምንጪ ስእሊ, Ukrainian ministry of defence

    ላዕለዋይ ኣዛዚ ሰራዊት ሩስያ ኣብ ጥቓ ከተማ ካርኪቭ ይካየድ ኣብ ዝነበረ ውግእ ከምዝተቐተለ፡ ኣገልግሎት ስለላ ሰራዊት ምክልኻል ዩክሬን ዕላዊ ገይሩ።

    ቢቢሲ ነዚ ሓበሬታ ካብ ዘይሻራዊ ኣካል ከጻርዮ ኣይከኣለን፤ ሰበስልጣን ሩስያ’ውን ኣብዚ ጉዳይ ዝበልዎ ነገር የለን።

    ሜጀር ጀነራል ቪታሊ ጌራሲሞቭ ምኽትል ዋና ኣዘዚ መበል 41 ማእከላዊ እዚ ሩስያ ከምዝነበረ ኣዘዝቲ ሰራዊት ዩክሬን ሓቢሮም።

    ካልኦት ብዙሓት መኮንናት ሩስያ ከምዝተቐተሉን ዝቖሰሉ ከምዘለዉን ድማ ወሲኹ ገሊጹ።

    ትካል ስለላ ዩክረይን ከምዝበሎ፡ ጌራሲሞቭ ኣብ ካልኣይ ናይ ቺቺንያ ውግእን ኣብ ሶርያ ዝተኻየደ ወተሃደራዊ ወፍርን ተሳቲፉ ነይሩ።

    ግዝኣት ክሬምያ “ንምምላስ” ብዝገበሮ ኣበርክቶ’ውን ሽልማት ሜዳልያ ክረክብ በቒዑ።

    ሰበስልጣን ዩክሬን ነቲ ናይ ጌራሲሞቭ ዝበልዎ ስእሊ ኣብ ትዊተር ብምዝርጋሕ ኣብ ትሕቲኡ “ተወጊዱ’ሎ” ዝብል መልእኽቲ ብቐይሕ ሕብሪ ኣቐሚጦምሉ ኣለዉ።

16. 8 መጋቢት 2022ሩስያ ነዳዲኣ እንተተኣጊዱ ቀረብ ጋዝ ክተቋርፅ ምዃና ኣጠንቂቓ

17. 8 መጋቢት 2022ግስጋሰ ሰራዊት ሩስያ ዓቢ ምዝሕሓል ከምዝተረኣዮ ሰበስልጣን ዩክረይን ሓቢሮም

    

    ምንጪ ስእሊ, EPA

    ሰራዊት ምክልኻል ዩክረይን ኣብ ዝሃቦ እዋናዊ ሓበሬታ፡ “ፀላኢ ወራር ናይ ምፍጻም ስርሒቱ ቀጺልሉ ይርከብ፤ ግን ከኣ ናህሪ ግስጋሰ ወተሃደራቱ ኣዝዩ ዝንጉዕ ኮይኑ’ሎ” ኢሉ።

    ኣብቲ 13 መዓልታት ኣቑጺሩ ዘሎ ወራር ሩስያ፡ ብወገን ኣዛዚ ሰራዊት ሓይልታት ዩክረይን ዝተወሃበ መግለጺ፡ ወተሃደራቱ ኣብ ደቡባዊ፣ ምብራቓውን ሰሜናውን ኣንፈታት ኣንጻር ሩስያ ይከላኸሉ ምህላዎም ኣፍሊጡ።

    ዋና ከተማ ኪቭን ሰሜናዊት ከተማ ቸርኒሂቭን ክሳብ ሎሚ ኣብ ኢድ ዩክሬናውያን ይርከባ።

    ሓይሊ ምክልኻል መጥቃዕቲ ኣየር ዩክረይን ነቶም ብወገን ሩስያ ዝፍነዉ ሚሳይላትን ቁምቡላታትን ነፈርትን የምክኑ ምህላዎም’ውን ሰራዊት ምክልኻል እታ ሃገር ሓቢሩ’ሎ።

    “እቶም ወረርቲ ሞራሎም ወዲቑ’ሎ። ናብ ዝምታን ጥሕሰታት ዓለምለኻዊ ሕግታት ሰብኣዊ ሕግታትን ኣትዮም ኣለወ” ክብል ድማ ከሲሱ።

    ገለ ብሩስያ ዝተወደቡ ጉጅለታት ኣብተን ዝተቖጻጸርወን ከባብታት ጽልዋ ንምፍጣር “ናይ ፕሮፓጋንዳ ስራሕቲ” ከካይዱ ከምዝጀመሩ’ውን ሰራዊት ዩክረይን ይገልጽ።

    ቢቢሲ ግን ነዞም ዝቐርቡ ዘለዉ ክስታት ካብ ሳልሳይ ኣካል ከረጋግጽ ኣይከኣለን።

18. 8 መጋቢት 2022ፕረዝደንት ዩክረይን ነቲ ኲናት “ብዓወት ንምዝዛም ኣብ ኪቭ ክጸንሕ እየ” ኢሉ

    

    ምንጪ ስእሊ, Office of Ukraine's president

    ፕረዝደንት ዩክረይን ቮሎድሚር ዘለንስኪ ነቲ ኲናት “ብዓወት ንምዝዛም” ካብ ከተማ ኪቭ ከምዘይወጽእ ኣፍሊጡ።

    ንሱ ብቪድዮ ኣብ ዝዘርግሖ ሓድሽ መልእኽቲ፡ ኣብቲ ኣብ ከተማ ኪቭ ዝርከብ ቤት ዕይኡ ከምዝጸንሕ ሓቢሩ’ሎ።

    “ኣይክሕባእን፤ ዝፈርሖ የብለይን። እዚ ኲናት ብዓወት ክዛዘም ኣድላዪ ክሳብ ዝኾነ . . . “ ክብል ተዛሪቡ።

    እቲ መልእኽቲ ትማሊ ሰኑይ ምሸት ብቪድዮ ከምዝተቐድሐ መረጋገጺ ከቕርብ ዝደለየ ዘለንስኪ፡ ኣብ ዋና ከተማ ካብ ዝርከብ ቤት ጽሕፈቱ ኮይኑ ኪቭ ብምሸት እንታይ ከምእትመስል ከርእይ ፈቲኑ።

19. 8 መጋቢት 2022ውድብ ሕቡራት ሃገራት ሰላማውያን ሰባት ዝወጽኡሉ መገዲ ክኽፈት ሓቲቱ

    

    ኣብ ውድብ ሕቡራት ሃገራት ሓላፊ ሰብኣዊ ሓገዛት ማርቲን ግሪፍትስ፡ ዩክሬንን ሩስያን ነቶም ካብ ኲናት ዝሃድሙ ዘለዉ ሰላማውያን ሰባት መውጽኢ መገዲ ከውሕሳ ምሕጽንታ ኣቕሪቡ።

    ሩስያ እትፍንዎም ከበድቲ ኣጽዋራንት እተካይዶም ዘላ ደብዳባት ነፈርትን፡ ሰላማውያን ሰባት ብፍላይ ካብ ከተማታት ኪቭ፣ ማሪዮፖል፣ ሳሚን ካርኪቭን ክወጽኡ ከምዘይከኣሉ ሰበስልጣን ዩክረይን ይኸሱ።

    ሩስያ ብወገና ሰብኣዊ ኮሪደራት ንምኽፋት ድልውቲ ከምዝኾነት ሎሚ ሰሉስ ማእኸናት ዜና እታ ሃገር ኣብ ምግላጽ ይርከባ።

    መንግስቲ ሩስያ ሰላማውያን ሰባት ዝወጽኡሉ ዕድል ዘፍቅድ ውጥን ኣቕሪቡ’ኳ እንተነበረ ብወገን ሰበስልጣን ዩክረይን ግን ተቐባልነት ኣይረኸበን ጸኒሑ።

    ዩክረይን ነቲ ውጥን ዘይተቐበለትሉ ምኽንያት ድማ፡ “እቶም ሰላማውያን ሰባት ዝወጽኡሉ መንገዲ ናብ ሩስያን ፈታዊታ ዝኾነት ቤላሩስን ጥራሕ ዝወስድ’ዩ” ብዝብል ነይሩ።

20. 8 መጋቢት 2022ኣብ ኣፍሪቃ ዘጋጥሙ ውግኣት ስለምንታይ ብዝተፈለየ መገዲ ይረኣዩ?