መጥቃዕቲ ኢራን ይገድድ፡ መጻረዪ ነዳዲ እስራኤል ይነድድ፡ ትራምፕ ተስፋን መጠንቀቕታን ይሰድድ

ቀጥታዊ ሸፈነ

1. 4 ጥሪ 2026ፕረዚደንት ኒኮላስ ማዱሮ ብኸመይ'ዩ ተማሪኹ?

   ሰለይቲ ኣመሪካ፡ ንነፍሲ ወከፍ ምንቅስቓሳት ፕረዚደንት ቬነዝወላ ኒኮላስ ማዱሮ ክከታተልዎ ካብ ዝጅምሩ ኣዋርሕ ተቖጺሩ።

   ኣብ ውሽጢ መንግስቲ ቬነዝወላ ዝርከብ ሓደ ምንጪ ንኡስ ጉጅለ፡ ወዲ 63 ዓመት ማዱሮ ኣበይ ከም ዝድቅስ፡ እንታይ ከም ዝበልዕ፡ እንታይ ከም ዝኽደንን ክትዕዘብ ጸኒሓ እያ።

   ድሕሪኡ፡ ኣብ መጀመርታ ወርሒ ታሕሳስ፡ "ስርሒት ፍጹም ውሳነ" ብዝብል ዝተሰመየ ተልእኾ ተፈጺሙ። እዚ ውጽኢት ናይቲ ንኣዋርሕ ዝቐጸለ ጽፉፍ ውጥንን ልምምድን እዩ።

   እቲ ልምምድ ድማ ፍሉይ ወተሃደራት ኣመሪካ ከምቲ ኣብ ካራካስ ዝርከብ ውሑስ መንበሪ ማዱሮ ኣምሲሎም ኣብ ዘዳለዉዎ መእተዊ ብኸመይ ከምዝኣትዉ ዘጠቓለለ ነይሩ።

   እቲ ውጥን፡ ድሕሪ ዝሑል ኲናት ዘይተራእየ ኣመሪካ ኣብ ላቲን ኣመሪካ ዝገበረቶ ፍሉይ ወተሃደራዊ ምትእትታው እዩ። ብሚስጥር እዩ ተሓልዩ።

   ኮንግረስ ኣቐዲሙ ብዛዕባኡ ኣይተሓበረን ወይ ኣይተማኸረን።

   ምሉእ ትሕስቶ ንምንባብ ኣብዚ ጠውቑ

2. 4 ጥሪ 2026‘ብዙሕ ዘይርጉጽ ነገራት’ዩ ኣብ ቅድሚኣ ዘሎ” ኣማኻሪ ኣመሪካ ነበር ብዛዕባ መጻኢ ቬነዝወላ ዝበሎ

   ኣብ ጉዳይ ፖሊሲ ቬነዝወላ ኣማኻሪ ኣመሪካ ነበር ኢቫን ኢሉስ ምስ ቢቢሲ ኣብ ዝገበሮ ቃለ መሕተት፡ ኣብ ጉዳይ ብሕጂ ዝመጽእ መሪሕነት ቬንዘወላ ኣዝዩ ብዙሕ ዘይርጉጽ ነገራት’ዩ ዘሎ ኢሉ።

   ከም ሓደ ምኽንያት ኢሉ ዘቕረቦ ከኣ፡ መሪሕነት ፕረዚደንት ዶናልድ ትራምፕ ድሕሪ ምትሓዝ ኒኮላስ ማድሮ ኣብ ክንዲ ናብ ቅጽበታዉ ዲሞክራስያዊ መሰጋገሪ መንግስቲ ምቋም ኣብ ዘተ ምስ ቬነዝወላ’ዩ ኣትዩ ይብል።

   ምክትል ፕረዚደንት ኒኮስ ማድሮ ዝዀነት ሮድሪገዝ ፕረዚደንት ግዝያዊ መንግስቲ ቨነዝወላ ኮይና ቃለ መሓላ ፈጺማ ኣላ፡ እቲ ቀንዲ ሕቶ ግን ይብል ኢቫን ኢሉስ ‘ዶናልድ ትራምፕ ምስኣ ኰይኑ ክሰርሕ ቅሩብ ድዩ?’ ብምባል ሕቶ የቐምጥ።

   ኣብ እዋን ኒኮላስ ማድሮ፡ ትራምፕ ካብ ቬነዝወላ ዝደልዮ ክረክብ ኣይክኣለን፡ ሕጂኸ ዝብል ሕቶ ኸኣ ብሕጂ ዝርአ’ዩ ኽኸውን ብምባል ግምቱ የቐምጥ።

3. 4 ጥሪ 2026ክሳብ ሕጂ ብዛዕባ እቲ ኣብ ቬነዝወላ ዝተፈጸመ መጥቃዕትን ምትሓዝ ፕረዚደንት ኒኮላስ ማድሮን ፈሊጥናዮ ዘለና, ክሳብ ሕጂ ብዛዕባ እቲ ኣብ ቬነዝወላ ዝተፈጸመ መጥቃዕትን ምትሓዝ ፕረዚደንት ኒኮላስ ማድሮን ፈሊጥናዮ ዘለና

   • ንኒኮላስ ማድሮን ንብዓልቲ ቤቱን ዝሓዘት ነፋሪት ቀዳም ምሸት ኣብ ኒውዮርክ ሃገራዊ መዓስከር ሓይሊ ኣየር ስቲዋርት ዓሊባ
   • ብድሕሪ እዚ ማድሮ ናብ ብሪክሊን ዝተባሃለ ቤት ማእሰርቲ ተወሲዱ፡ እዚ ቤት ማእሰርቲ ከም ብዓል ዲዲን ጉሽለይን ማክስዌልን ዝኣለሰሉ ተኣሲረሙሉ ዘለዉ ቤት ማእሰርቲ’ዩ
   • ላዕለወይ ቤት ፍርዲ ቬነዝወላ ንምክትል ፕረዚደንት ዴልቺ ሮድሪገዝ ግዝያዊት ፕረዚደንት እታ ሃገር ገይሩ ሸይምዋ
   • ዋና ጽሓፊ ምክልኻል ኣመሪካ ፔት ሀግዝ ምስ ማዕከን ዜና ሲቢኤስ ትማሊ ኣብ ዘካየዶ ቃለ መሕተት፡ ንፕረዚደንት ዶናልድ ኣመሪካ ‘ኣብ ተግባር ዝኣምን ፕረዚደንት’ዩ’ ኢሉ ንኢድዎ።
   • ንድሕሪ እቲ መጥቃዕቲ ካብ ዝዀነ ዓይነት በረራ ተኸልኪሉ ዝነበረ ሰማያት ካሪብያን ካብ ፍርቂ መዓልቲ ብኣቆጻጽራ ምብራቕ ኣመሪካ ነጻ ክኸውን ምዃኑ ጸሓፊ መጓዓዝያ ኣመሪካ ሲን ዳፊ ኣፍሊጡ።

   • ብዙሓት መራሕቲ ሃገራት ገለ ንተግባር ኣመሪካ ብትሪ ክኹንኑ እንከለዉ ገለ ከኣ ንኣመሪካ ዝወሰደቲ ስጉምቲ ዘለዎም ደገፍ ይገልጹ ኣለዉ።

4. 4 ጥሪ 2026ኒኮላስ ማዱሮ ኣብ ቤት ማእሰርቲ ተዳጒኑ ከምዘሎ ተገሊጹ, ኒኮላስ ማዱሮ ኣብ ቤት ማእሰርቲ ተዳጒኑ ከምዘሎ ተገሊጹ

   ኣብ ቬነዝወላ ብፍሉይ ስርሒት ሰራዊት ኣመሪካ ምስ ብዓልቲ ቤቱ ተታሑዙ ናብ ኒውዮርክ ዝተወሰደ መራሒ ቬነዝወላ ኒኮላስ ማዱሮን ብዓልቲ ቤቱን ኣብ ቤት ማእሰርቲ ብሩክሊን ከምዝኣተዉ ተገሊጹ።

   እቲ ቤት ማሕቡስ ዓቢ ሽም ዘለዎም ውልቀ ሰባት ዝእሰርሉ ግኑን ቤት ማእሰርቲ’ዩ።

   እቲ መራሒ፡ ናብ ኣመሪካ ምስ ኣተወ፡ ኣብ ኒውዮርክ ብቤት ጽሕፈት ምክልካል ዕጸ ፋርስ፡ ብምስግጋር ዕጸ ፋርስ ንዕኡን ንብዓልቲ ቤቱን ክሲ ተመስሪትዎም ኣሎ።

   ንሱን ብዓልቲ ቤቱን ምዓስ ናብ ቤት ፍርዲ ከምዝቐርቡ ግን ኣይተገለጸን።

5. 4 ጥሪ 2026ላዕለዋይ ቤት ፍርዲ ቬነዝወላ ንምክትል ፕረዚደንት ግዝያዊ መራሒት እታ ሃገር ገይሩ ሸይምዋ, ላዕለዋይ ቤት ፍርዲ ቬነዝወላ ንምክትል ፕረዚደንት ግዝያዊ መራሒት እታ ሃገር ገይሩ ሸይምዋ

   ላዕለዋይ ቤት ፍርዲ ቬነዝወላ፡ ንምክትል ፕረዚደንት ዴልቺ ሮድሪገዝ ግዝያዊት መራሒት እታ ሃገር ገይሩ ሸይምዋ።

   ሮድሪገዝ ናይቲ ብሰራዊት ኣመሪካ ተታሒዙ ምስ ብዓልቲ ቤት ናብ ኣመሪካ ተወሲዱ ተቐይዱ ዘሎ ኒኮላስ ማዱሮ ምክትሉ ኰይና ክትሰርሕ ዝጸንሐት’ያ።

   ፕረዚደንት ዶናልድ ትራምፕ፡ ሮድሪገዝ መራሒት ኣታ ሃገር ኮይና ቃለ መሓላ ምፍጻማ ብምሕባር “ንቬነዝወላ ዳግማይ ዓባይ ሃገር ኣብ ምግባር ክትሓባበር ፍቓደኛ ዀይና ኣላ” ኢሉ።

   ጓል 56 ዓመት ሮድሪገዝ፡ ኒኮላስ ማዱሮ ብቀዳም ብሰራዊት ኣመሪካ ተታሒዙ ምስ ተወሰደ፡ ብህይወት ምህላዉ ካብ ኣመሪካ መረጋገጺ ክውሃበና ኣለዎ ኢላ ሓቲታ ነይራ’ያ።

   ኣብ 2018 ምክትል ፕረዚደንት ኮይና ዝተሸመት ሮድሪገዝ ኣብ ልዕሊ እቲ ናይ ምክትል ፕረዚደንት ሓላፍነታ ሚኒስተር ነዳዲ እታ ሃገር’ውን እያ።

6. 4 ጥሪ 2026መራሕቲ ዓለም ብዛዕባ መጥቃዕቲ ኣመሪካ ኣብ ልዕሊ ቬነዝወላ እንታይ ኢሎም?, መራሕቲ ዓለም ብዛዕባ መጥቃዕቲ ኣመሪካ ኣብ ልዕሊ ቬነዝወላ እንታይ ኢሎም?

   ኣብ መላእ ዓለም ዝርከቡ መራሕቲ፡ ኣመሪካ ንፕረዚደንት ቬንዝወላ ኒኮላስ ማዱሮ ሑዛ ናብ ኣመሪካ ምውሳዳ ገለ ንኣመሪካ ክዅንኑ እንከለዉ ገለ ከኣ ንኣመሪካ ዘለዎም ደገፍ ገሊጾም።

   ትማሊ ቀዳም ኣብ ልዕሊ ቬንዙዌላ ዝተፈጸመ ሰፊሕ መጥቃዕቲ ስዒቡ፡ ማዱሮን በዓልቲ ቤቱን ብሓይልታት ኣመሪካ ተታሒዞም ካብታ ሃገር ተወሲዶም ድሮ ኣብ ኒውዮርክ ኣትዮም ኣብ ቀይዲ ኣለዉ።

   እዞም ክልተ መጻምድቲ ብኣመሪካ ክሲ ምዝውዋር ዕጸ ፋርስ ተመስሪትዎም ኣሎ።

   ቀዳማይ ሚኒስተር ዓባይ ብሪጣንያ ኬር ስታርመር ኣብ ዝሃቦ ናይ መጀመርታ መልሲ፡ መንግስቱ ንስርዓት ማዱሮ ኢሉ "ጥብ ትብል ንብዓት" ከምዘይብሉ ገሊጹ።

   ጎረባብቲ ቬንዘወላ ዝዀና ሃገራት ላቲን ኣመሪካ ከምኡ ኸኣ ንነዊሕ እዋን መሓዙት ቬንዝወላ ዝኾና ሩስያን ቻይናን ንተግባር ኣመሪካ ብትሪ ኰኒነነኦ።

   ቻይና ኣብ ልዕሊ ልኡላዊት ሃገርን ፕረዚደንታን ሓይሊ ምጥቃም "ኣዝዩ ዘሰንብድ'ዩ ብትሪ ኸኣ ንዅንኖ" ኢላ።

   ሩስያ ብወገና ኣመሪካ ኣብ ልዕሊ ቬነዝወላ ሓይሊ ምጥቓማ ነቒፋታ።

   መሉእ ትሕስቶ ንምንባብ ኣብዚ ጠውቑ

7. 3 ጥሪ 2026ኣመሪካ፡ 'ውሑስ ስግግር መንግስቲ' ክሳብ ዝግበር ንቬነዝወላ ክትመርሕ እያ - ትራምፕ

   ኣመሪካ "ውሑስ፣ ግቡእን ፍትሓውን መስርሕ ምስግጋር ስልጣን ክሳብ ዝግበር" ንቬነዝወላ "ክትመርሓ" እያ ክብል ተዛሪቡ።

   ትራምፕ፡ ሓይሊ ኣመሪካ ንማዱሮ "ናብ ፍርዲ" ንምቕራብ "ኸቢድ ወተሃደራዊ ዕርዲ" ኣፍሪሱ ካብ ማእከል ካራካስ ወሲድዎ ክለል ተዛሪቡ።

   እዚ ስርሒት፡ ምስቲ ቅድሚ ሕጂ ኣንጻር ኢራን ዝተኻየደ ወተሃደራዊ ስርሒታት - ኣንጻር ኒዩክለራዊ ዒላማታት ሓዊሱ - ኣነጻጺሩዎ።

   "ኣብ ዓለም ዝዀነት ሃገር ከምቲ ትማሊ ኣመሪካ ዘዐወተቶ ክትበጽሕ ኣይትኽእልን፡" ይብል።

   ኩሉ ወተሃደራዊ ዓቕሚ ቬነዝወላ ድማ ኣብቲ መጥቃዕቲ "ተዳኺሙ'ዩ" ኢሉ።

   እቲ ፕረዚደንት ወሲኹ፡ ኣብ እዋን እቲ ስርሒት ኣገልግሎት ኤሌክትሪክ ጠፊኡ ከም ዝነበረ ሓቢሩ።

   ሕጂ፡ ማዱሮን በዓልቲ ቤቱን "ፍትሒ ኣመሪካ ክጽበዮም'ዩ" ክብል ተዛሪቡ።

8. 3 ጥሪ 2026ዞባዊ መራሕቲ እንታይ ኢሎም?

   • ሚኒስተር ዘቤታዊ ጉዳያት ቬነዙወላ ዲዮስዳዶ ካቤሎ፡ ዜጋታት ሃገሩ ክረጋግኡን ኣብ መሪሕነትን ወተሃደራዊ ሓይሊ እታ ሃገር ክኣምኑን ይላቦ። ማዕከን ዜና ሮይተርስ "ዓለም ብዛዕባ እዚ መጥቃዕቲ ክትዛረብ ኣለዋ" ከም ዝበለ ጸብጺቡ።
   • ፕረዚደንት ኮሎምብያ ጉታቮ ፔትሮ ሰራዊት ናብ ዶብ ቬነዙወላ ይዋፈር ከም ዘሎ ብምግላጽ፡ ትካል ግዝኣታት ኣመሪካን (OAS)፡ ሕቡራት ሃገራትን "ብህጹጽ ክራኸቡ" ይጽውዕ።
   • ፕረዚደንት ቺለ ጋብሪኤል ቦሪክ፡ ሃገሩ ብዛዕባ "ወተሃደራዊ ተግባራት ኣመሪካ ዘለዋ ስክፍታን ውግዘትን" ገሊጹ።
   • ፕረዚደንት ኵባ ሚግኤል ዲያዝ-ካነል ሃገሩ "ኣመሪካ ኣብ ልዕሊ ቬነዙወላ ዘካየደቶ ገበናዊ መጥቃዕቲ ከም እትኹንኖን፡ ​​ግብረ መልሲ ማሕበረሰብ ዓለም ብህጹጽ ትሓትትን፡" ኢሉ።
   • ቀዳማይቲ ሚኒስተር ትሪኒዳድን ቶባጎን ካምላ ፐርሳድ-ቢሰሳር፡ "ትሪኒዳድን ቶባጎን ምስ ህዝቢ ቬነዙወላ ዘለወን ሰላማዊ ዝምድና ከም ዝቕጽል፡" ተዛሪባ።

9. 3 ጥሪ 2026ፕረዚደንት ኮሎምቢያ ሓይልታቱ ናብ ዶብ ክልእኽ እንከሎ፡ ሙሉእ ዞባ ኣብ ዓቕሊ ጽበት ይርከብ

   ፕረዚደንት ኮሎምብያ ጉስታቮ ፔትሮ፡ ድሕሪ እቲ ኣብታ ሃገር ዝጀመረ ኣኼባ ባይቶ ሃገራዊ ድሕነት፡ ኣብ ዶብ ቬንዙዌላ ህዝባዊ ሓይልታት ከም ዝተዋፈረ ኣፍሊጡ።

   ኣመሪካ ኣብ ካራካስን ካልእ ከባቢታት እታ ሃገርን ዘካየደቶ መጥቃዕቲ ስዒቡ፡ ኣብ ቦጎታ ሰፊሕ ዋሕዚ ቬንዙዌላውያን ስደተኛታት ክህሉ ከም ዝኽእል ኣብ ግምት ብምእታው ምድላዋት ይግበር ኣሎ።

   ፕረዚደንት ዶናልድ ትራምፕ ከም ዝገለጾ፡ ፕረዚደንት ቬንዙዌላ ኒኮላስ ማዱሮን በዓልቲ ቤቱ ሲልያ ፍሎረስን ተታሒዞም ካብ ርእሰ ከተማ እታ ሃገር ካራካስ ክወጽእ ተገይሩ'ዩ።

   ነዚ ስዒቡ ኣብቲ ዞባ ወጥሪ ዓሲሉ ይርከብ።

   ፔትሮ፡ ኣብ ካራካስ ፈላሚ ፍንጀራታት ካብ ዝስማዕ ኣትሒዙ ሰላምን ዘተን ክህሉ ብተደጋጋሚ ጸዊዑ እዩ።

   ኮሎምብያን ቬንዙዌላን ልዕሊ 2000 ኪ.ሜ ዝንውሓቱ ዶብ ይካፈላ - ኣብ ታሪኽ ድማ ኣብ መንጐ ክልቲአን ሃገራት ዘጋጠመ ቁጠባውን ጸጥታውን ቅልውላዋት ብኽልቲኡ ወገን ሚልዮናት ዕቝባ ክሓቱ ደሪኽዎም እዩ።

   እዚ ናይ ሕጂ ክስተት፡ ንቬንዙዌላ ተራእዩ ዘይፈልጥ ህሞት ኰይኑ ኣብ ካልኦር ሃገራት ቀጥታዊ ሳዕቤን ክህልዎ እዩ ብዝብል ኮሎምብያ ቅድመ ምድላው ትገብር ኣላ።

10. 3 ጥሪ 2026ቅድሚ ሕጂ ከምዚ ኣጋጢሙ ይፈልጥ ድዩ?

    ከምቲ ዝተባህለ፡ ኣመሪካ ንደልታ ፎርስ ናብ ማእከል ርእሰ ከተማ ቬነዙወላ ሰዲዳ ነቲ ፕረዚደንት ምስ በዓልቲ ቤቱ ኣውጺኣቶ እንተዀይና፡ እዚ ቅድሚ ሕጂ ካብ ዝረኣናዮ ዝተፈልየ እዩ።

    ናይ ቀረባ ዝኽሪ ዝኸውን፡ መራሒ ፓናማ ማኑኤል ኖሪጋ፡ ኣብ 1989 ብፍሉይ ሓይልታት እዩ ተታሒዙ።

    ክልቲኦም፡ ኣብ ኣካታዒ ምርጫ ዓወት ከም ዝረኸቡ ዝገለጹ ኰይኖም፡ ክልቲኦም ኣመሪካ ኣብ ዘይሕጋዊ ምስግጋር ዕጸፋርስ ተሳቲፎም ብምባል ትኸሶም።

    ምምራኽ ኖሪጋ ግን ኣብ መንጐ ክልቲአን ሃገራት ዝተኻየደ ሓጺርን ወሳኒን ኲናት ስዒቡ እዩ ተፈጺሙ።

    ሓይልታት ፓናማ ቀልጢፎም እዮም ብሓይልታት ኣመሪካ ተዓብሊሎም።

    እቲ ፕረደዚንት ድማ፡ ኣብ ኤምባሲ ቫቲካን ን11 መዓልታት ተዓቊቡ ጸኒሑ።

    ኣብ መወዳእታ ኖሪየጋ ብፍላይ ድማ ቀጻሊ ዓው ዝበለ ሮክ ሙዚቃ - ዘ ክላሽ፡ ቫን ሃለንን ዩ2ን - ብምጽዋት "ስነ -ልቦናዊ ኲናት ተኸፊቱዎ፡" ኢዱ ሂቡ።

    ናብ ኣመሪካ ድማ ተወሲዱ።

    ኣብኡ ድማ ብገበናት ዕጸፋርስ ተፈሪድዎ።

    ሕጂ፡ ዝርዝር ናይቲ ንኒኮላስ ማዱሮ ንምሓዝ ዝተኻየደ ስርሒት ገና ኣይተገልጸን።

    እንተዀነ ብስፍሓቱ ዝያዳ ዓቢ ስርሒት ዝነበረ ይመስል።

    ዕጫኡ ንጹር ኣይኰነን፤ ግን ኣብ ቤት ማእሰርቲ ኣመሪካ ክውዳእ ይኸዉን ተባሂሉ ይግምት።

11. 3 ጥሪ 2026ኣብ ቬነዙወላ ተወሳኺ ስጉምቲ ከም ዘይውሰድ ይግመት- ሴናተር ኣመሪካ

    ሓደ ሴናተር ኣመሪካ፡ ሚኒስተር ጉዳያት ወጻኢ ማርኮ ሩቢዮ ድሕሪ ምምራኽ ኒኮላስ ማዱሮ ኣብ ልዕሊ ቬነዙወላ ተወሳኺ ስጉምቲ ኣይውሰድን ዝብል ትጽቢት ከም ዘለዎ ገሊጹ።

    ማይክ ሊ፡ ፕረዚደንት ቬነዙወላ ማዱሮ ምስ ሩቢዮ ድሕሪ ዝገበሮ ናይ ቴሌፎን ጻውዒት ምእሳሩ ኣረጋጊጹ።

    "ንሱ [ሩቢዮ] ሕጂ ማዱሮ ኣብ ትሕቲ ቀይዲ ኣመሪካ ስለ ዘሎ ኣብ ቬነዙወላ ተወሳኺ ስጉምቲ ከም ዘይወስድ ይግምት፡" ይብል ሰነተር ሊ።

    ሊ ወሲኹ፡ እቲ ናይ ኣመሪካ መጥቃዕቲ "ነቶም ነቲ ናይ ማእሰርቲ ትእዛዝ ዘፈጽሙ ዝነበሩ ንምክልኻል ዝተፈጸመ፡" እዩ ይብል።

    ኣቐዲሙ፡ ሊ ኣብ ኤክስ ኣብ ዝጸሓፎ ጽሑፍ፡ "ኣዋጅ ኲናት ወይ ወተሃደራዊ ሓይሊ ንምጥቃም ፍቓድ ኣብ ዘይብሉ፡ ነዚ ስጕምቲ ብሕገ መንግስታዊ ምኽንያት ከመኽንዮ ዝኽእል እንተዀይኑ ንምፍላጥ ብሃንቀውታ ይጽበ፡" ኢሉ ነይሩ።

12. 3 ጥሪ 2026ማዱሮ ናይ እማን ተታሒዙ እንተዀይኑ፡ ድሕሪኡ እንታይ ከም ዝኸውን ንጹር ኣይኰነን

    ኣመሪካ፡ ኣብ 1989 ነቲ ሽዑ ወተሃደራዊ መራሒ ዝነበረ ማኑኤል ኖሪየጋ ካብ ስልጣኑ ንምእላይ ንፓናማ ካብ እትወርር ንድሓር፡ ኣብ ላቲን ኣመሪካ ከምዚ ዓይነት ቀጥታዊ ምትእትታው ኣይገበረትን።

    ማዱሮ ከምቲ ትራምፕ ዝብሎ ካብ ቬነዙወላ ብሓይሊ እንተ ተኣልዩ፡ እዚ ኣብ ገለ ካብቶም ንለውጢ ስርዓት ብግልጺ ዝድግፉ ከም ዓቢ ዓወት ክረአ እዩ።

    ኣመሪካ ንማዱሮ ገበናዊ ትካል ዘይሕጋዊ ምስግጋር ዕጸፋርስ ይመርሕ ኣሎ ክትብል ከሲሳቶ ኣላ፤ እዚ ንሱ ኣይቕበሎን።

    ከምኡ’ውን ምርጫ 2024 ነጻ ወይ ፍትሓዊ ኣይኰነን ተባሂሉ ብሰፊሑ ስለ ዝንቀፍ፡ ከም ሕጋዊ ፕረዚደንት ቬንዙዌላ ኣይትቕበሎን።

    ቬነዙወላ ብወገና፡ ኣመሪካ -ነቲ ኣብ ዓለም እቲ ዝዓበየ ምዃኑ ዝግመት ዕቝር ነዳዲ- ክትሰርቕ ትደሊ ኣላ ክትብል ከሲሳ።

    እቲ ሕጂ ንጹር ዘይኰነ ነገር፡ ብሓቂ ማዱሮ ኣብታ ሃገር እንተዘይሃልዩ፡ ኣብ ቬነዙወላ እንታይ'ዩ ከጋጥም ዝብል እዩ።

    ደገፍቲ ምትእትታው ኣመሪካ፡ ብተዓዋቲት ሽልማት ኖቤል ሰላም ማርያ ኮሪና ማቻዶ ወይ ድማ ካብ 2024 ጀሚሩ ሕጹይ ተቓዋሚ ሰልፊ ዝነበረ ኤድሙንዶ ጎንዛለዝ ዝምራሕ መንግስቲ ተቓወምቲ ቬንዙዌላ ስልጣኑ ንኽሕዝ መገዲ ዝጸርግ ምዃኑ ይምጉቱ።

    ይኹን እምበር፡ ካልኦት እዚ ፈጺሙ ቀሊል ከም ዘይከውን ይኣምኑ።

    ኣብ ቬነዙወላ ዝርከቡ ወተሃደራውን ንኡሳን ወተሃደራትን ንማዱሮ እሙናት ኰይኖም ጸኒሖም ነይሮም።

    ገለ ነቐፍቲ ማዱሮ ከይተረፉ ቀጥታዊ ምትእትታው ኣመሪካ ኣብታ ሃገር ዝያዳ ምርግጋእ ከስዕብ ከም ዝኽእል ስግኣት ነይርዎም።

    ብርግጽ ማዱሮ ተታሒዙ ዝብል ዜና ምውጽኡ ስዒቡ፡ ንመጻኢኦም ዝሰግኡ ካልኦት ናይ ቀረባ መሓዙቱ ክህልዉ’ዮም።

13. 3 ጥሪ 2026ሚኒስተር ምክልኻል ቬነዙወላ፡ ኵሎም ዕጡቓት ሓይልታት ክዋፈሩ ምዃኖም ገሊጹ

    ሚኒስተር ምክልኻል ቬነዙወላ፡ ኣብ መላእ እታ ሃገር ብቕልጡፍ ወተሃደራዊ ሓይልታት ከም ዘዋፈር ኣፍሊጡ።

    ቭላድሚር ፓድሪኖ ሎፔዝ ብቋንቋ ስጳኛ ብሬድዮ ኣብ ዝሃቦ መግለጺ፡ ኣብ ቅድሚ’ቲ ኣብ ልዕሊ ቬነዙወላ ዝተኻየደ “ዝኸፍአ ወራር” ስሙር ግንባር ተቓውሞ ክካየድ ጸዊዑ።

    ቬነዙወላ ኵሎም ዕጡቓት ሓይልታት ክዋፈሩ ምዃኖም “ትእዛዝ ማዱሮ” ትኽተል ከም ዘላ ድማ፡ ገሊጹ።

    "ኣጥቂዖምና እዮም፤ ግን ኣይግዝኡናን እዮም፡" ይብል እቲ ሚኒስተር ምክልኻል።

14. 3 ጥሪ 2026ማዱሮን በዓልቲ ቤቱን ብፍሉይ ሓልታት ኣመሪካ ተታሒዙ

    ፕረዚደንት ቬነዙወላ ኒኮላስ ማዱሮ ብፍሉይ ሓልታት ደልታ ሰራዊት ኣመሪካ ከም ዝተታሕዘ ሰበስልጣን ኣመሪካ ንመሻርኽቲ ቢቢሲ ሲቢኤስ ኒውስ ሓቢሮም።

    ደልታ ፎርስ ላዕለዋይ ኣሃዱ ጸረ ግብረሽበራ ሰራዊት ኣመሪካ ምዃኑ ይግለጽ።

15. 3 ጥሪ 2026ትራምፕ፡ ፕረዚደንት ቬነዙወላን በዓልቲ ቤቱን "ከም ዝተማረዅ" ኣፍሊጡ

    ፕረዚደንት ኣመሪካ ዶናልድ ትራምፕ፡ ፕረዚደንት ቬነዙላ ኒኮላስ ማዱሮን በዓልቲ ቤቱን ከም ዝተማረዅ ገሊጹ።

    ኣብዚ እዋን፡ ኣመሪካ ኣብ ልዕሊ ርእሰ ከተማ እታ ሃገር ሰፊሕ መጥቃዕቲ ተካይድ ከም ዘላ ሰብ መዚ እታ ሃገር ገሊጾም።

    ትራምፕ'ዉን "ኣብ ልዕሊ ቬነዙወላ ሰፊሕ መጥቃዕቲ" ከም ዝተኻየደ ኣረጋጊጹ።

    ንሱ ኣብ ሶሻል ትሩዝ ዝዘርግሖ መግለጺ ነዚ ዝስዕብ ይመስል።

    "ኣመሪካ ኣብ ልዕሊ ቬነዙወላን መራሒኣ ፕረዚደንት ኒኮላስ ማዱሮን ዕውት መጥቃዕቲ ፈጺማ፤ ንሱን በዓልቲ ቤቱን ተማሪዂም ካብታ ሃገር ክወጽኡ ተገይሩ'ሎ።

    "እዚ ስርሒት ምስ ኣኽበርቲ ሕጊ ኣመሪካ ብምትሕብባር ዝተገብረ እዩ። ዝርዝር ክስዕብ እዩ። ሎሚ ኣብ ማር-ኣ-ላጎ መግለጺ ክወሃብ እዩ፤ የቐንየልና! ፕረዚደንት ዶናልድ ጄይ ትራምፕ።"

    ኣመሪካ ንኒኮላስ ማዱሮ ኣህጉራዊ ትካል ዘይሕጋዊ ምስግጋር ዕጸፋርስ ይመርሕ ኣሎ ክትብል ካብ ነዊሕ እዋን ክትከሶ ጸኒሓ እያ። ማዱሮ ነዚ ክሲ ይነጽጐ።

    ትራምፕ ማዱሮ ብኸመይ ከም ዝተታሕዘን ናበይ ከም ዝተወስደን ዝርዝር ሓበሬታ ኣይሃበን።

    መንግስቲ ቬነዙወላ'ዉን ነዚ ክሳብ ሕጂ ኣየረጋገጸን።

    ኣመሪካ ማዱሮ ኣብ ቀይዲ ንምእታው ሓበሬታ ንዝሃበ ሰብ 50 ሚልዮን ዶላር ግንዖ ክትህብ ምዃና ሓቢራ ነይራ።

16. 3 ጥሪ 2026እዚ ኵነታት ብኸመይ ናብዚ ዓሪጕ

    • መጀመርታ፡ ኣብ ልዕሊ ብማያት ቬነዙወላ ኣቢለን ሓሽሽ ጽዒነን ዝበሃላ ፍጥነት ዘለወን ጀላቡ መጥቃዕቲ ነፈርቲ ተፈጺሙ፤ እዚ ድማ ናብ ምብራቓዊ ካሪብያን፡ ፓስፊክን ካልእ ቦታታትን ተዘርጊሑ ኣሎ
    • ክሳብ ሕጂ 110 ሰባት ተቐቲሎም
    • ሓይልታት ኣመሪካ ክልተ እገዳ ዝተገብረለን ነዳዲ ዝጽዕና መራኽብ መንዚዖም
    • ኣብ በዓል ልደት ሳልሰይቲ መርከብ ከም ዝተትሓዘት ዘመላኽት ሓበሬታ ሂቡ
    • ቢቢሲ ቃል መሰኻኽር ይርኢ'ኳ እንተሃለወ፡ ኣብታ ብነዳዲ ሃብታም ዝዀነት ግዝኣት ዙልያ ዝተፈጸመ መጥቃዕቲ ክኸውን ከም ዝኽእል ይእመን
    • እንተዀነ፡ ብዛዕባ እዚ ዝተዋህበ ዝርዝር ሓበሬታ የለን።

17. 3 ጥሪ 2026ካራካስ ድሕሪ መጥቃዕቲ ኣመሪካ ብስእሊ

18. 3 ጥሪ 2026ኣብ 2026 ክህልው ዝኽእሉ ዓበይቲ ግጭታት ኣፍሪቃን ዓለምን

    ኣብ መወዳእታ 2025 ኣመሪካ፡ ኣብ ደቡባዊ ካሪብያን ኣብ ውሽጢ ዓሰርተታት ዓመታት ዝዓበየ ወተሃደራዊ ምትእኽኻብ ኣበጊሳ።

    እዚ ድማ ንፕረዚደንት ቬንዝወላ ኒኮላስ ማዱሮ ካብ ስልጣን ንምእላይ ዝዓለመ ክኸውን ከም ዝኽእል ይግመት።

    መንግስቲ ቬነዝወላ ኣመሪካ ነቲ መንግስቲ ንምውዳቕ ዝዓለመ ወጥሪ ኣብቲ ዞባ ኣለዓዒላ ኣላ ክብል'ዩ ከሲሱ።

    "ምውፋር ዓቢ ሓይሊ ዕማም ሓይሊ ባሕሪ፡ ኣንጻር ጀላቡ ዕጸ-ፋርስ ዝበሃል መጥቃዕቲ፡ ​​ከምኡ'ውን ሓለዋ ገማግም ባሕሪ ኣመሪካ ነተን እገዳ ዝተገብረለን ዘይተጻረየ ነዳዲ ቬንዝወላ ናብ ወጻኢ ዝልእኻ ታንከራት ምሓዙን፡ ነቲ ወጥሪ ብዓቢኡ ኣጋዲድዎ ኣሎ፡" ይብል ክራይስስ ግሩፕ።

    ተወሳኺ ንባብ

19. 3 ጥሪ 2026ማዱሮ ምስ ኣመሪካ ንምዝርራብ ቍሩብ ምንባሩ ገሊጹ

    ፕረዚደንት ቬነዙወላ ኒኮላስ ማዱሮ ኣብዚ ሰሙን ኣብ ዝሃቦ ቃለ መጠይቕ፡ ምስ ኣመሪካ ብዛዕባ ዘይሕጋዊ ምስግጋር ዕጸፋርስን ነዳድን "ኣብ ዝደለዩ ቦታን እዋንን" ንምዝርራብ ቍሩብ ምንባሩ ገሊጹ።

    ማዱሮ ምስ መንግስታዊ ቴሌቪዥን ቬነዙወላ ኣብ ዝገበሮ ቃለ መሕትት፡ ኣመሪካ ኣብ ሃገሩ ንዝርከብ መዓርፎ ነፈርቲ ሃሪማ ንዝብል መግለጺ ፕረዚደንት ኣመሪካ ዶናልድ ትራምፕ ምላሽ ካብ ምሃብ እውን ተቘጢቡ።

    እዚ፡ ኣብ ውሽጢ እታ ሃገር ብሲኣይኤ ዝተፈጸመ ናይ መጀመርታ መጥቃዕቲ ምዃኑ ይንገር።

    ቅድሚ እቲ ቃለ መሕትት ማዱሮ ቅድሚ ሒደት መዓልታት፡ ትራምፕ፡ ኣመሪካ ኣብ ልዕሊ ምስ ዕጸፋርስ ቬነዙወላ ምትእስሳር ኣለወን ዝተባህላ ጀላቡ መጥቃዕቲ ከም ዝፈጸመት ብምግላጽ፡ ኣብቲ እተን "ጀላቡ ሓሽሽ ዝጽዕናሉ ከባቢ ዓቢ ፍንጀራ፡" ከም ዝነበረ ገሊጹ።

    ኣመሪካ ካብ ወርሒ መስከረም ጀሚራ ኣብ ልዕሊ እተን ዕጸፋርስ ጽዒነን ዝበሃላ ጀላቡ 30 መጥቃዕቲታት ብምፍጻም ኣብ ፓስፊክን ካሪብያንን ንዝርከባ መራኽብ ዒላማ ገይራ።

    ብ2 መስከረም ኣብ ኣህጉራዊ ማያት ኣብ ልዕሊ ጃላቡ ቨነዙወላ ፈላማይ መጥቃዕቲ ካብ እትፍጽም ንደሓር ልዕሊ 110 ሰባት ተቐቲሎም።

20. 3 ጥሪ 2026ኢራን ሰልፈኛታት ምቕታል እንተቐጺላ ጣልቃ ክንኣቱ ኢና - ትራምፕ

    ፕረዚደንት ኣመሪካ ዶናልድ ትራምፕ፡ ሰበስልጣን ኢራን ሰላማዊ ሰልፈኛታት ከይቅተሉ ኣጠንቂቑ።

    ዋሽንግተን "ከተድሕኖም ክትመጽእ እያ፡" ዝበለ ትራምፕ፡ ኣብ ማሕበራዊ መራኸቢታት ኣብ ዝዘርግሖ ሓጺር ጽሑፍ፡ "ስጕምቲ ንምውሳድ ድሉዋት ኢና፡" ኢሉ። ተወሳኺ ዝርዝር ሓበሬታ ግን ኣይሃበን።

    ምኒስተር ጕዳያት ወጻኢ ኢራን፡ ዋሽንግተን "ከተድሕኖም ክትመጽእ እያ" ብምባል ዶናልድ ትራምፕ ኣብ ኢራን ምትእትታው ንምግባር ዝኣተዎ መብጽዓ "ሸለልትነትን ሓደገኛን" ክብል ገሊጽዎ።

    ዓባስ ኣራግቺ፡ "ፕረዚደንት ትራምፕ ኣብ ውሽጢ ዶባት ኣመሪካ ሃገራዊ ሓለዋ ምውፋሩ ኣብ ግምት ብምእታው፡ ንሱ ልዕሊ ማንም ሰብ ኣብ ልዕሊ ንብረት ህዝቢ ዝፍጸም ገበናዊ መጥቃዕቲ ከምዘይጽወር ክፈልጥ ይግባእ፡" ክብል ኣብ ኤክስ ጽሒፉ።

    ኢራን "ኣብ ውሽጣዊ ጉዳያታ ዝዀነ ይዅን ምትእትታው ብሓይሊ ክትነጽጐ እያ፡" ክብል ወሲኹ ገሊጹ።

    ኣብ ኢራን፡ ኣብቲ ዝሓለፈ ሰንበት 27 ሕዳር 2025 ዝጀመረ ሰልፊታት ተቃውሞ ብውሕዱ ሸሞንተ ሰባት ከም ዝተቐትሉ ይግለጽ ኣሎ። ቢቢሲ ነዚ ብናጻ ኣካል ኣየረጋገጾን።ተወሳኺ ንባብ