ኣብ ትግራይ ዝለዓለ ብዝሒ መልከፍቲ ኮሮናቫይረስ ተመዝጊቡ

ኣብ ዝሓለፉ 24 ሰዓታት፡ ኣብ ልዕሊ 656 ሰባት ምርመራ ላብራቶሪ ዝተኻየደ ኾይኑ፡ 60 ሰባት ኮሮናቫይረስ ከምዝተረኸቦም ቢሮ ሓለዋ ጥዕና ሎሚ ኣብ ዘውጸኦ መዓልታዊ ጸብጻብ ገሊጹ። ብብርኪ ሃገር ድማ፡ ኣብ ኢትዮጵያ ተወሰኽቲ 564 ሰባት ተታሒዞም።

ሓንቲ ኣብ መንበሪ ገዝአን ዝሞታ ጓል 70 ዓመት ነባሪት ከተማ መቐለ፡ ኣብ ኣስከሬነን ብዝተገበረ ምርመራ ኮሮናቫይረስ ከምዝተረኸበን ጸብጻብ ቢሮ ጥዕና ትግራይ ሓቢሩ።

ኣብቲ ክልል፡ ካብቶም በቲ ለበዳ ዝተለኽፉ ሓደሽቲ 60 ሰባት፡ 42 ደቂ ተባዕትዮ 18 ደቂ ኣንስትዮ እዮም።

እቶም 7 ካብ ማሕበረሰብ ፣ 6 ሰብ ሞያ ጥዕና፣ 5 ንግልጋሎት ናብ ትካል ጥዕና ካብ ዝመፁ፣ 15 ሰባት ምስ ዝተፈልጠ ኮሮናቫይረስ ዘለዎ ሰብ ርክብ ዝነበሮም ምዃኖም፡ እቲ መዓልታዊ ጸብጻብ የመልክት።

እቶም ዝተረፉ 27 ድማ፡ ኣብ መወሸቢ ማእኸል ዝነበሩን ጉዕዞ ታሪኽ ዝነበሮምን ምዃኖም ተገሊጹ።

ካብ መንጎ'ቲ ቫይረስ ዝተረኽቦም፡ እቶም 44 ካብ መቐለ እንትኾኑ፡ 15 ካብ ከተማ ኣላማጣ ምዃኖም እቲ መግለጺ የመልክት።

ኣብ ክልል ትግራይ፡ ዛጊድ ብኮረናቫይረስ ዝተትሓዙ ሰባት 954 በጺሑ ኣሎ፡።

ካብ መወሸቢ ማእከላት መቐለን ኣክሱምን ብድምር 21 ድሒኖም ሎሚ ናብ ገዘኦም ተፋንዮም።

ብብርኪ ሃገር

ኣብ ኢትዮጵያ፡ ኣብ ዝሓለፉ 24 ሰዓታት ኣብ ልዕሊ 9,068 ናይ ላብራቶሪ ምርመራ ዝተገብረ ኾይኑ፡ ነቶም ናይ ትግራይ ወሲኹ፡ ብድምር 564 ሰባት በቲ ቫይረስ ከምዝተለኽፉ ጽብጻብ ሚኒስተር ጥዕና እታ ሃገር ሓቢሩ።

እቲ ዝበዝሓ፡ ኣብ ኣዲስ ኣበባ ዝተመዝገበ ኾይኑ፡ 278 ሰባት በቲ ቫይረስ ተታሒዞም።

ካብኡ ቀጺሉ ድማ፡ ዝለዓለ መልከፍቲ ኣብ ክልል ኦሮምያ እንትኾን፡ 101 ሰባት በቲ ቫይረስ ከምዝተለኽፉ እቲ ጸብጻብ ይሕብር።

ኣብ ክልል ሃረሪ 41፣ ኣብ ክልል ሶማል 27፣ ኣብ ክልል ኣምሓራ ድማ 15 ሰባት ተለኺፎም።