ఆంధ్రప్రదేశ్‌లోని ప్రైవేటు మద్యం దుకాణాల్లో నేటితో అమ్మకాలకు తెర: ప్రెస్ రివ్యూ

ఆంధ్రప్రదేశ్‌లోని ప్రైవేటు మద్యం షాపుల్లో విక్రయాలు సోమవారం నుంచి ఆగిపోతున్నాయని ఆంధ్రజ్యోతి కథనం ప్రచురించింది.

రాష్ట్ర రాజకీయాలను.. ప్రభుత్వ ఖజానాను ప్రభావితం చేసిన మద్యం అమ్మకాల్లో ఇకపై సమూల మార్పులు రానున్నాయి. ప్రైవేటు మద్యం షాపులు కనుమరుగై.. వాటి స్థానంలో ప్రభుత్వ దుకాణాలు ఏర్పాటు కానున్నాయి.

ప్రైవేటు మద్యం దుకాణాలకు సెప్టెంబరు 30వ తేదీ అంటే సోమవారమే చివరి రోజు. మంగళవారం (1వ తేదీ) నుంచి ప్రభుత్వమే మద్యం దుకాణాలను నిర్వహించనుందని ఆంధ్రజ్యోతి చెప్పింది.

సరుకునంతా విక్రయించేసి షాపులను ఖాళీచేసే పనిలో ప్రైవేటు మద్యం వ్యాపారులు బిజీగా ఉండగా, ఎక్సైజ్‌ శాఖ అద్దెకు తీసుకున్న దుకాణాల్లో సరుకు నింపి.. సిబ్బందిని సమకూర్చుకుని.. కొత్తగా అమ్మకాలు ప్రారంభించేందుకు అధికారులు ఏర్పాట్లు చేసుకుంటున్నారు.

ప్రస్తుతం రాష్ట్రంలో 4,380 ప్రైవేటు మద్యం షాపులు ఉన్నాయి. మద్య నిషేధాన్ని దశలవారీగా అమలు చేస్తామని ప్రకటించిన ప్రభుత్వం ప్రస్తుతం ఉన్న 4,380 షాపుల్లో 20 శాతం తగ్గించి.. 3,448 ప్రభుత్వ మద్యం దుకాణాలు ఏర్పాటు చేస్తోందని కథనంలో వివరించారు.

గతంలో పాలసీ గడువు ముగిసినా మళ్లీ ప్రైవేటు వ్యాపారులే వస్తారు కాబట్టి, పాత వ్యాపారులు సరుకును కొత్తవారికి ఇచ్చేవారు. కానీ ఇప్పుడు ప్రభుత్వ షాపుల వల్ల ఆ అవకాశం లేదు. దీంతో ప్రైవేటు మద్యం షాపులన్నీ ఖాళీ చేస్తున్నారు.

రాష్ట్రంలో మద్యం కొరత రాకుండా ఎక్సైజ్‌ శాఖ ఇప్పటికే ప్రభుత్వ షాపులకు సరుకును చేర్చింది. ఒక్కో షాపునకు రూ.లక్ష నుంచి రూ.2లక్షల విలువైన మద్యాన్ని చేర్చింది. షాపుల్లో సిబ్బంది నియామక ప్రక్రియను పూర్తిచేసి, వారికి శిక్షణ ఇచ్చింది.

1వ తేదీ నుంచి ఎలాంటి అవాంతరాలు లేకుండా అన్ని షాపులను అందుబాటులోకి తెచ్చేందుకు అధికారులు ప్రయత్నిస్తున్నారని కథనంలో చెప్పారు.

30 రోజుల్లో విధుల్లో చేరకపోతే ఉద్యోగం లేనట్లే

గ్రామ సచివాలయ ఉద్యోగాలకు నియామక పత్రాలు అందుకున్న అభ్యర్థులు 30 రోజుల్లో ఉద్యోగంలో చేరకపోతే వారిని ఎంపిక జాబితాల నుంచి తొలగిస్తారని ఈనాడు కథనం ప్రచురించింది.

గ్రామ, వార్డు సచివాలయాల్లో ఉద్యోగాలకు ఎంపికైన వారికి సోమవారం నుంచి నియామక పత్రాలు అందజేయనున్నారు. విజయవాడలో నిర్వహించే కార్యక్రమంలో ముఖ్యమంత్రి వై.ఎస్.జగన్మోహన్ రెడ్డి పాల్గొని మొదటి నియామక పత్రాన్ని అందజేయనున్నారు. పురపాలక, పంచాయతీ రాజ్ శాఖలు సంయుక్తంగా నిర్వహించే ఈ కార్యక్రమంలో కృష్ణా, గుంటూరు జిల్లాల నుంచి దాదాపు 5000 మంది హాజరు కానున్నారు. జిల్లాల్లో మంత్రుల చేతులమీదుగా నియామక పత్రాలు అందిస్తారు.

దీనికి సంబంధించి ప్రభుత్వం విధివిధానాలను విడుదల చేసింది.

నిబంధనలు పరిమితులకు వ్యతిరేకంగా వ్యవహరిస్తే ఒక నెల నోటీసుతో ఉద్యోగం నుంచి తొలగిస్తారని ఈనాడు కథనంలో తెలిపింది.

మరో 30 వేల కోట్లివ్వండి

రిజర్వు బ్యాంకును కేంద్రం మరో 30వేల కోట్లు ఇవ్వాలని కోరుతోందని నమస్తే తెలంగాణ ఒక కథనం ప్రచురించింది.

రిజర్వు బ్యాంకు వద్ద ఉన్న మిగులు నిధులపై కేంద్ర ప్రభుత్వం మరోమారు కన్నేసింది. ప్రస్తుత ఆర్థిక సంవత్సరంలో ద్రవ్యలోటును 3.3 శాతానికి కట్టడి చేయడానికి ఆపసోపాలు పడుతున్న కేంద్ర ప్రభుత్వం..తాజాగా ఆర్బీఐ నుంచి మధ్యంతర డివిడెండ్‌ కింద రూ.30 వేల కోట్లు చెల్లించాలని కోరబోతోందని కథనంలో చెప్పారు.

నెల రోజుల క్రితం రూ.1.76 లక్షల కోట్ల నిధులను కేటాయించడానికి సెంట్రల్‌ బ్యాంక్‌ అంగీకరించిన విషయం తెలిసిందే. కార్పొరేట్‌ ట్యాక్స్‌ను పదిశాతం తగ్గించడం, సంస్థాగత మదుపరులపై సర్చార్జిని ఎత్తివేయడంతో ఖజానాపై పడుతున్న భారాన్ని తగ్గించుకోవడానికి ఈ నిర్ణయం తీసుకోబోతున్నట్లు ప్రభుత్వ వర్గాలు సూచనప్రాయంగా వెల్లడించాయని నమస్తే తెలంగాణ వివరించింది.

వచ్చే మార్చి నాటికి ఆర్బీఐ నుంచి రూ.25 వేల నుంచి రూ.30 వేల కోట్ల వరకు మధ్యంతర డివిడెండ్‌ కింద కోరవచ్చని ప్రభుత్వ ఉన్నతాధికారి ఒకరు తెలిపారు. అటు డివిడెండ్‌తోపాటు ఖజానాను నింపే చర్యలో భాగంగా ప్రభుత్వరంగ సంస్థల్లో వాటాల విక్రయం, జాతీయ చిన్న పొదుపు మొత్తాలను వినియోగించుకోవడం వంటి చర్యలు చేపట్టొచ్చని విశ్వసనీయ వర్గాలు తెలిపాయి అని కథనంలో చెప్పారు.

ఉల్లి ఎగుమతులపై నిషేధం

ఉల్లి ధరలకు కళ్లెం వేసేందుకు కేంద్రం ఎగుమతులను నిషేధించిందని సాక్షిసహా అన్ని ప్రధాన పత్రికలూ రాశాయి.

వంటింట్లో మంటరేపుతున్న ఉల్లి ధరలకు కళ్లెం వేసేందుకు కేంద్ర ప్రభుత్వం చర్యలు చేపట్టింది. విదేశాలకు ఉల్లి ఎగుమతులను తక్షణమే నిషేధించడంతోపాటు దేశంలోని వ్యాపారుల వద్ద ఉండే ఉల్లి నిల్వలపై పరిమితులను విధించింది.

రిటైలర్లు 100 క్వింటాళ్లు, హోల్‌సేల్‌ వ్యాపారులు 500క్వింటాళ్లకు మించి ఉల్లిని నిల్వ చేసుకోరాదని కేంద్రం స్పష్టం చేసింది. తదుపరి ఉత్తర్వులు వెలువడే వరకు ఈ ఆదేశాలు అమల్లో ఉంటాయని చెప్పినట్లు కథనంలో రాశారు.

దేశవ్యాప్తంగా కురిసిన భారీ వర్షాలకు ఉల్లి దిగుబడులు తగ్గడం, డిమాండ్‌ అనూహ్యంగా పెరగడం, వ్యాపారులు కృత్రిమ కొరత సృష్టిస్తున్న నేపథ్యంలో కేంద్రం ఆదివారం ఈ మేరకు నిర్ణయం తీసుకుంది.

అక్రమ నిల్వలను అరికట్టేందుకు, ధరలను అదుపులో ఉంచేందుకు అన్ని రాష్ట్రాలు పకడ్బందీ చర్యలు తీసుకోవాలని కేంద్రం ఆదేశించింది. ఈ మేరకు కేంద్ర వినియోగదారుల వ్యవహారాల మంత్రిత్వశాఖ ప్రకటన విడుదల చేసిందని సాక్షి చెప్పింది.

కేంద్రం నిర్ణయంతో బంగ్లాదేశ్, శ్రీలంకలకు ఉల్లి ఎగుమతులు తక్షణమే నిలిచిపోనున్నాయి. సాధారణంగా ఉల్లి నిల్వలపై పరిమితులు విధించాల్సిందిగా రాష్ట్రాలకు కేంద్రం మార్గదర్శకాలు జారీ చేస్తుండగా ఈసారి మాత్రం ఏకంగా కేంద్రమే నేరుగా రంగంలోకి దిగి అన్ని రాష్ట్రాల్లో ఉల్లి నిల్వలపై పరిమితి విధించడం గమనార్హం.

మరోవైపు ఉల్లి ధరల భారం నుంచి వినియోగదారులకు ఉపశమనం కల్పించేందుకు 50 వేల టన్నుల బఫర్‌ స్టాక్‌ను కేంద్రం దేశ వ్యాప్తంగా అందుబాటులోకి తెస్తోందని కథనంలో వివరించారు.

ప్రస్తుతం దేశ రాజధాని దిల్లీ సహా వివిధ రాష్ట్రాల బహిరంగ మార్కెట్‌లలో ఉల్లి ధర కిలోకు రూ.60 నుంచి రూ.80 మధ్య పలుకుతోంది అని కథనంలో వివరించారు.

ఇవి కూడా చదవండి:

(బీబీసీ తెలుగును ఫేస్‌బుక్, ఇన్‌స్టాగ్రామ్‌, ట్విటర్‌లో ఫాలో అవ్వండి. యూట్యూబ్‌లో సబ్‌స్క్రైబ్ చేయండి.)