యుక్రెయిన్: జెలియెన్‌స్కీకి వ్యతిరేకంగా సొంతదేశంలో ఆందోళనలు.. రక్షణ మంత్రి తొలగింపుపై ప్రజల్లో ఆగ్రహం

యుక్రెయిన్ రక్షణ మంత్రి మైఖైలో ఫెదొరోవ్‌ను మార్చాలని అధ్యక్షుడు వ్లాదిమిర్ జెలియెన్‌స్కీ ఆకస్మికంగా నిర్ణయించడంపై అక్కడి పౌర సమాజం నుంచి తీవ్ర ఆగ్రహం వ్యక్తమవుతోంది.

జెలియన్‌స్కీ చర్యకు వ్యతిరేకంగా ఎంపీలు నిరసన ప్రదర్శనలు చేస్తున్నారు.

కీయెవ్‌తో పాటు ఇతర యుక్రెయిన్ నగరాల్లో పెద్ద సంఖ్యలో ప్రజలు ఆందోళనలకు దిగారు. వారిలో యువత ఎక్కువమంది ఉన్నారు.

''ఫెదొరోవ్‌ను తొలగించొద్దు'', ''విజయాన్ని దెబ్బతీయడం ఆపండి'' వంటి నినాదాలు రాసి ఉన్న ప్లకార్డులు పట్టుకుని ఆందోళనలు జరిపారు. సిగ్గుపడాలి అంటూ నినాదాలు చేశారు.

సెక్యూరిటీ సర్వీస్(ఎస్‌బీయూ)తాత్కాలిక అధిపతిగా ఉన్న మేజర్ జనరల్ యెవ్‌హెనీ ఖ్మారాను తాత్కాలిక రక్షణమంత్రిగా జెలియన్‌స్కీ ప్రతిపాదించారు.

కాగా.. ''సాంకేతిక ఆధారిత యుద్ధ కార్యకలాపాల్లో ఖ్మారాకు విస్తృతమైన, ప్రత్యేకమైన అనుభవం ఉంది'' అని జెలియెన్‌స్కీ తెలిపారు.

ఫెదొరోవ్‌కు కమాండర్ ఇన్ చీఫ్ ఒలెక్సాండర్ సిర్‌స్కీకి మధ్య ఉన్న విభేదాలకు, ఫెదొరోవ్ పదవీకాలం ముగియడానికి సంబంధం ఉందంటూ వచ్చిన వదంతులను ఫెదొరోవ్, జెలియెన్‌స్కీ దాదాపుగా ధ్రువీకరించారు.

‘రక్షణశాఖ రూపురేఖలు మార్చేసిన ఫెదొరోవ్’

సిర్‌స్కీని, చీఫ్ ఆఫ్ జనరల్ స్టాఫ్ ఆండ్రీ హ్నటోవ్‌ను మార్చాలని తాను జెలియెన్‌స్కీకి సూచించినట్టు ఫెదొరోవ్ గురువారం(జూలై 16)వెల్లడించారు.

''సిర్‌స్కీని మార్చే ఉద్దేశం లేదని అధ్యక్షుడు చెప్పినప్పుడు ఆయనతో కలిసి పనిచేయడం నేర్చుకుంటానని నేను చెప్పా. కానీ మేం ప్రతిపాదించిన ప్రతి కార్యక్రమాన్ని అడ్డుకుంటున్నారు''అని ప్రెస్ కాన్ఫరెన్స్‌లో ఫెదొరోవ్ చెప్పారు.

''భిన్నమైన వ్యూహాలతో రష్యాను ఓడించడానికి మార్గాన్ని అన్వేషించడానికి బదులుగా కమాండర్ ఇన్ చీఫ్ దేశాన్ని విభజించడానికి మార్గాన్ని చూస్తున్నారు'' అని సిర్‌స్కీపై ఫెదొరోవ్ విమర్శలు చేశారు.

దీనిపై సిర్‌స్కీ స్పందించారు. 2022లో రష్యా బలగాలు కీయెవ్‌ను చుట్టుముట్టినప్పుడు నిర్వహించిన రక్షణ ఆపరేషన్‌పై గర్వంగా ఉన్నానని సిర్‌స్కీ టెలిగ్రామ్‌లో తెలిపారు. ''నేను యుద్ధంపైన, ప్రభావవంతమైన వ్యూహం పైన దృష్టిపెడతాను'' అని చెప్పారు. ఫెదొరోవ్‌కు విజయాలు అందాలని ఆకాంక్షించారు.

35 ఏళ్ల ఫెదొరోవ్ ఈ జనవరిలోనే రక్షణమంత్రిగా నియమితులయ్యారు. అవినీతిని అరికట్టడం, సమాచారాన్ని విశ్లేషించి యుద్ధరంగంలో సైనికుల పనితీరును మెరుగుపర్చేందుకు

ప్రయత్నించడం ద్వారా రక్షణశాఖలో కొత్త ఉత్సాహం నింపారనే ప్రశంసలు ఆయనకు ప్రజల నుంచి దక్కాయి.

‘అధ్యక్షుడు చేసిన అతిపెద్ద తప్పు’

జెలియెన్‌స్కీ ఇటీవల మంత్రివర్గంలో మార్పులు చేశారు. ప్రభుత్వ చమురుగ్యాస్ సంస్థ అధిపతి సెర్హీ కొరెట్స్కీని ప్రధానమంత్రిగా నియమించగా పార్లమెంట్ ఆమోదించింది. అంతకుముందు ప్రధానిగా ఉన్న యూలియా స్విరిడెంకో ఈ వారం ప్రారంభంలో రాజీనామా చేశారు.

తన బృందంలో సలహాదారుగా ఉండాలని జెలియెన్‌స్కీ కోరారని, తాను అంగీకరించలేదని ఫెదొరోవ్ చెప్పారు.

తాను అధ్యక్షుడితో విభేదించాలనుకోవడం లేదని, యుక్రెయిన్ ప్రజల మాట జెలియెన్‌స్కీ వింటారని, ఏం చేయాలో ఆయనకు తెలుసని, సమస్యకు వందశాతం పరిష్కారం లభిస్తుందన్న నమ్మకం తనకుందని ఫెదొరోవ్ చెప్పారు.

తన పదవీకాలం మొత్తంలో జెలియెన్‌స్కీ చేసిన అతిపెద్ద తప్పు ఇదేనని ఒలెక్సాండర్ అనే యుక్రెయిన్ సైనికుడు బీబీసీతో చెప్పారు.

''ఫెదొరోవ్ బృందం, వారి దీర్ఘకాలిక వ్యూహంపై ఉన్న నమ్మకంతోనే తాను ఈ ఏడాది ప్రారంభంలో సైన్యంలో చేరా. ఆయన్ను మార్చాలన్న నిర్ణయానికి ఎవరు మద్దతిస్తున్నారో తెలియదు. సైన్యంలోనే కాదు..మొత్తం సమాజంలో కూడా ఎవరూ సమర్థించడం లేదు'' అని ఒలెక్సాండర్ తెలిపారు.

''సైన్యంలో నాకు చాలా మంది స్నేహితులున్నారు. వారిలో చాలా మంది చనిపోయారు. ఈ పరిస్థితి ఇక కొనసాగకూడదు. ఫెదొరోవ్ చేసిన పనుల వల్ల వచ్చిన ఫలితాలు మేం చూశాం. సైనికుల్లో ఆయన కలిగించిన ఉత్సాహాన్ని గమనించాం. మేం వాళ్లకు మద్దతుగా నిలబడాలి'' అని సెంట్రల్ కీయెవ్‌లోని ఐవాన్ ఫ్రాంకో స్క్వేర్‌ దగ్గర ఆందోళనల్లో పాల్గొన్న 31ఏళ్ల మరియా లావ్రినెట్స్ బీబీసీతో చెప్పారు.

‘నేను అర్థం చేసుకుంటాను’

"ప్రజలు వీధుల్లోకి రావాలనుకుంటున్నారు. అది సరైనది. సమాజం ఏం చెబుతోందో నేను అర్ధం చేసుకుంటున్నాను. వింటున్నాను. స్పందిస్తున్నాను కూడా'' అని ఆందోళనలపై జెలియెన్‌స్కీ స్పందించారు.

రక్షణమంత్రిగా బాధ్యతలు చేపట్టిన తర్వాత ఫెదొరోవ్ రక్షణశాఖలో సమూల మార్పులు ప్రారంభించారు. ఆ శాఖ సోవియట్ కాలం నాటి విధానాలతో ఉంటుందని ఎక్కువమంది భావిస్తారు.

అంతకుముందు ఫెదొరోవ్ డిజిటల్ ట్రాన్సఫర్మేషన్ మంత్రిగా పనిచేశారు. 2022లో రష్యా పూర్తిస్థాయి ఆక్రమణ ప్రారంభించిన తొలిరోజుల్లో రష్యన్లు వ్యతిరేకంగా సైబర్ దాడులు చేసేందుకు ''ఐటీ ఆర్మీ ఆఫ్ యుక్రెయిన్''అనే స్వచ్ఛంద సైబర్ బృందాన్ని ఏర్పాటుచేశారు.

తర్వాత ఆయన డ్రోన్స్ ఆర్మీ పేరుతో నిధుల సేకరణ విజయవంతంగా చేశారు. రష్యా లక్ష్యాలపై దాడులు చేసిన యుక్రెయిన్ సైనిక యూనిట్లకు పాయింట్లు ఇచ్చే విధానాన్ని రూపొందించి యుద్ధంలో గేమిఫికేషన్ ప్రవేశపెట్టారు.

రక్షణ మంత్రి అయిన తర్వాత కూడా డ్రోన్లు, అత్యాధునిక సాంకేతిక యుద్ధం, ఆయుధాల కొనుగోలుపై ప్రత్యేక దృష్టిపెట్టారు.

రష్యా ఆక్రమణలో ఉన్న క్రిమియా ద్వీపకల్పంపై ఇటీవల యుక్రెయిన్ జరిపిన దాడుల్లో రక్షణ శాఖ కీలక పాత్ర పోషించింది. మధ్యశ్రేణి డ్రోన్ దాడులతో రష్యా నుంచి క్రిమియాను పూర్తిగా స్వాధీనం చేసుకుంటామని గత నెలలో ఫెదొరోవ్ అన్నారు.

తనను పదవినుంచి తొలగించిన తర్వాత చేసిన ఫేస్‌బుక్ పోస్టులో ఫెదొరోవ్ తన విజయాల గురించి రాశారు. భిన్నమైన వ్యూహాలు, వేగవంతమైన ఆవిష్కరణలు, సంస్థాగత బలంతో శత్రువును ఓడించే ప్రయత్నం కొనసాగిస్తానని చెప్పారు.

''మన చరిత్రలోనే అత్యుత్తమ రక్షణమంత్రి''అని ఫెదొరోవ్‌ను ప్రముఖ బ్లాగర్ సెర్హీ స్టెర్నెంకో ప్రశంసించారు. గతంలో ఫెదొరోవ్‌కు సెర్హీ సలహాదారుగా పనిచేశారు.

ఫెదొరోవ్‌ను తొలగించడాన్ని నిరసిస్తూ ప్రముఖ డ్రోన్ యూనిట్ కమాండర్ పావ్లో యెలిజరోవ్ తన యుక్రెయిన్ ఎయిర్ ఫోర్స్ డిప్యూటీ కమాండర్ పదవికి రాజీనామా చేశారు. దేశ రక్షణసామర్థ్యానికి ఇది పెద్ద దెబ్బగా అభివర్ణించారు.

( బీబీసీ కోసం కలెక్టివ్ న్యూస్‌రూమ్ ప్రచురణ)

(బీబీసీ తెలుగును వాట్సాప్‌,  ఫేస్‌బుక్, ఇన్‌స్టాగ్రామ్‌, ట్విటర్‌లో ఫాలో అవ్వండి. యూట్యూబ్‌లో సబ్‌స్క్రైబ్ చేయండి.)