ఫిఫా వరల్డ్ కప్ సెమీ ఫైనల్: ఆఖరి నిమిషాల్లో అర్జెంటీనా అద్భుతమైన గోల్స్, చెదిరిన ఇంగ్లండ్ కలలు

అట్లాంటాలో జరిగిన ఉత్కంఠభరిత సెమీ ఫైనల్ మ్యాచ్‌లో, చివరి నిమిషాల్లో రెండు గోల్స్ సాధించి అర్జెంటీనా అనూహ్య విజయం సాధించడంతో ఇంగ్లండ్ వరల్డ్ కప్ కలలు చెదిరిపోయాయి.

మ్యాచ్ 55వ నిమిషంలో జరిగిన హోరాహోరీ పోరులో ఆంథోనీ గోర్డాన్ గోల్ సాధించి ఇంగ్లండ్‌కు ఆధిక్యం అందించాడు. ఆ సమయంలో, హెడ్ కోచ్ థామస్ టుచెల్ నేతృత్వంలోని ఇంగ్లండ్ జట్టు 1966 నాటి విజయం తర్వాత, మొదటిసారిగా పురుషుల ప్రపంచ కప్ ఫైనల్‌కు చేరేలా కనిపించింది.

అయితే, అద్భుతమైన ఆటతీరుతో అర్జెంటీనా పుంజుకుంది. మ్యాచ్ ముగియడానికి మరో ఐదు నిమిషాలు ఉందనగా ఎంజో ఫెర్నాండెజ్ అద్భుతమైన గోల్ కొట్టి స్కోరును సమం చేశాడు. ఆ తర్వాత స్టాపేజ్ టైం(రిఫరీ నిర్ణయించే అదనపు సమయం)లో లియోనెల్ మెస్సీ అందించిన క్రాస్‌ను లౌటరో మార్టినెజ్ హెడర్ (తలతో) ద్వారా గోల్‌గా మలిచి విజేతగా నిలిపాడు.

మూడో స్థానం కోసం జరగనున్న ప్లే-ఆఫ్ మ్యాచ్‌లో ఇంగ్లండ్ తలపడనుంది. అలాగే, డిఫెండింగ్ చాంపియన్‌గా బరిలోకి దిగనున్న అర్జెంటీనా ఆదివారం స్పెయిన్‌తో ఫైనల్ మ్యాచ్‌లో తలపడుతుంది.

అట్లాంటా స్టేడియం లోపల, బయట నెలకొన్న ఉత్కంఠభరిత వాతావరణం మైదానంలోనూ కనిపించింది. ఫస్టాఫ్‌లో ఏకంగా 19 ఫౌల్స్ నమోదవడంతో, మ్యాచ్‌‌ను నియంత్రించేందుకు అమెరికన్ రిఫరీ ఇస్మాయిల్ ఎల్ఫాత్ శ్రమించాల్సి వచ్చింది.

అర్జెంటీనా ఆటగాడు ఫెర్నాండెజ్ కొట్టిన లాంగ్‌రేంజ్ డ్రైవ్ గోల్ పోస్టుకు సమీపంలో నుంచి వెళ్లడంతో తృటిలో గోల్ మిస్సైంది. అయితే, ఇంగ్లండ్ జట్టు మొదటి గోల్ వేసి ఆధిక్యం సాధించింది. రైట్ వింగ్ నుంచి మోర్గాన్ రోజర్స్ అందించిన అద్భుతమైన క్రాస్‌ను గోర్డాన్ గోల్‌గా మలిచాడు.

ఈ గోల్ తర్వాత అర్జెంటీనా మరింత వేగంగా ఎదురుదాడికి దిగింది. నికో గొంజాలెజ్ హెడర్ ద్వారా చేసిన గోల్ ప్రయత్నాన్ని ఇంగ్లండ్ కీపర్ జోర్డాన్ పిక్‌ఫోర్డ్ వేగంగా స్పందించి అద్భుతంగా అడ్డుకున్నాడు.

ఈ దశలో ఇంగ్లండ్‌పై ఒత్తిడి తీవ్రమైంది, అర్జెంటీనా ఆటగాడు అలెక్సిస్ మాక్ అలిస్టర్ తలతో కొట్టిన బంతి గోల్ పోస్టుకు తగిలి వెనక్కి వచ్చింది. అయితే, మ్యాచ్ ముగిసేందుకు మరో 5 నిమిషాలు ఉందనగా అర్జెంటీనా స్కోరును సమం చేసింది. 25 గజాల దూరం నుంచి కొట్టిన బలమైన షాట్‌ కీపర్ పిక్‌ఫోర్డ్‌ను బురిడీ కొట్టించింది.

ఇంగ్లండ్ కోచ్ టుచెల్, నలుగురు సెంట్రల్ డిఫెండర్లతో గోల్ పోస్టు రక్షణకు వ్యూహం రచించినప్పటికీ, అర్జెంటీనా జోరును నిలువరించడం సాధ్యం కాలేదు.

మాక్ అలిస్టర్ కొట్టిన బంతి మరోసారి గోల్ పోస్ట్‌కు తగిలింది.

చివరికి, 92వ నిమిషంలో ఇంగ్లండ్ డిఫెన్స్ కుప్పకూలింది, మార్టినెజ్ అద్భుతమైన గోల్ చేసి ఈ ఉత్కంఠభరిత సెమీ ఫైనల్ మ్యాచ్‌ను ముగించాడు.

ఇంగ్లండ్ : టుచెల్ అతిజాగ్రత్తకు భారీ మూల్యం

దాదాపు విజయం ఖాయమనుకున్న తరుణంలో ఇంగ్లండ్ జట్టు గతంలో మాదిరిగా (సర్ గారెత్ సౌత్‌గేట్ హయాంలో జరిగినట్లుగా) ఒక్కసారిగా రక్షణాత్మక ధోరణిలోకి ఎలా వెళ్లిపోయిందో, ఇప్పుడూ అదే చేసింది. అందుకు హెడ్ కోచ్ థామస్ టుచెల్ కూడా బాధ్యత వహించాల్సి ఉంటుంది.

ప్రపంచకప్ సెమీఫైనల్ మ్యాచ్‌లో, అర్జెంటీనా లాంటి జట్టుతో ఉత్కంఠభరితంగా సాగుతున్న పోటీలో ఆధిక్యంలో ఉన్నప్పటికీ.. టుచెల్ నేతృత్వంలోని ఇంగ్లండ్ జట్టు మ్యాచ్‌పై పట్టు కోల్పోయి తీవ్ర పరిణామాలను ఎదుర్కోవాల్సి వచ్చింది.

గోర్డాన్ చేసిన గోల్‌తో ఫైనల్ కల సాకారమయ్యే క్షణంలో, ఇంగ్లండ్ వెనకబడింది. మ్యాచ్ ముగియడానికి ఇంకా 18 నిమిషాలు ఉందనగా.. గోల్ చేసిన గోర్డాన్ స్థానంలో ఎజ్రీ కొన్సాను మైదానంలోకి దించడంతో సహా డిఫెండర్ల సంఖ్యను విపరీతంగా పెంచేసింది. అయితే, ఎత్తైన ఆటగాడు డాన్ బర్న్‌‌ను మైదానంలోకి దింపిన వ్యూహం కూడా ఈసారి ఫలించలేదు. (ఎత్తుగా ఉండడం వల్ల తలతో బంతిని గోల్ పోస్టుకు మళ్లించే అవకాశం ఎక్కువగా ఉంటుందని భావిస్తారు.)

ఇంకా సమయం ఉండగానే, టుచెల్ ఐదుగురు డిఫెండర్ల వ్యూహానికి మారడంతో ఇంగ్లండ్ జట్టు తమ సొంత పెనాల్టీ ఏరియాకే పరిమితమైంది, ప్రత్యర్థి దాడులను ఎదుర్కోవాల్సి వచ్చింది. ఇది అర్జెంటీనా ఒత్తిడి పెంచడానికి, ఇంగ్లండ్ డిఫెన్స్ విఫలమవడానికి కారణమైంది.

ఇటీవలి సంవత్సరాల్లో ఎదుర్కొన్న పరాజయాల కంటే ఇది ఇంగ్లండ్‌‌కు మరింత బాధాకరం కావొచ్చు. ఎందుకంటే, ఈసారి జట్టు విజయానికి చాలా దగ్గరగా వచ్చి, చివరకు ఎప్పటిలానే అలవాటైన చేదు ముగింపునే చవిచూడాల్సి వచ్చింది.

అర్జెంటీనా: మరోసారి మెస్సీ ఇన్‌స్పిరేషన్

నాటకీయంగా సాగుతున్న ఈ సెమీఫైనల్ మ్యాచ్‌లో తన ప్రభావం చూపేందుకు మెస్సీ కొంత సమయం తీసుకున్నప్పటికీ, చివరకు రంగంలోకి దిగి మరోసారి అర్జెంటీనాకు తిరుగులేని ప్లేయర్‌గా, స్ఫూర్తిగా నిలిచాడు.

ఈ ప్రపంచకప్‌లో ఓటమెరుగని అర్జెంటీనా తరఫున, మ్యాచ్ ముగిసేందుకు ఐదు నిమిషాలు ఉందనగా మెస్సీ అందించిన చక్కటి పాస్‌తో ఫెర్నాండెజ్ అద్భుతమైన గోల్ చేసి స్కోరును సమం చేశాడు. అనంతరం, స్టాపేజ్ టైంలో కుడికాలితో అద్భుతమైన పాస్ అందించి మార్టినెజ్ హెడర్ గోల్ చేసేందుకు కారణమయ్యాడు. ఇది ఇంగ్లండ్ జట్టును కోలుకోలేని దెబ్బతీసింది.

ఫస్టాఫ్‌‌లో తమ ఆటతీరును దెబ్బతీసిన అనవసరమైన ఫౌల్స్ నుంచి బయటపడిన అర్జెంటీనా క్రమంగా పుంజుకుంది. అదే సమయంలో, ఇంగ్లండ్ పూర్తిగా రక్షణాత్మక ధోరణిలోకి వెళ్లిపోవడంతో, వరుస దాడులతో అర్జెంటీనా పూర్తిగా పైచేయి సాధించింది.

మెస్సీ తన 39వ ఏట రెండో ప్రపంచ కప్ గెలుచుకునే సువర్ణావకాశం ముంగిట నిలిచాడు. ఫైనల్ మ్యాచ్‌లో తనకు సవాల్ విసురుతున్న స్పెయిన్ యువ సంచలనం లామిన్ యామల్‌తో పాటు సెమీఫైనల్స్‌లో ఫ్రాన్స్‌ను ఓడించి అద్భుతమైన ఫామ్‌లో ఉన్న యూరోపియన్ చాంపియన్స్ అయిన స్పెయిన్‌తో తలపడనున్నాడు.

(బీబీసీ కోసం కలెక్టివ్ న్యూస్‌రూమ్ ప్రచురణ)

(బీబీసీ తెలుగును వాట్సాప్‌,  ఫేస్‌బుక్, ఇన్‌స్టాగ్రామ్‌, ట్విటర్‌లో ఫాలో అవ్వండి. యూట్యూబ్‌లో సబ్‌స్క్రైబ్ చేయండి.)