ਨੌਜਵਾਨਾਂ ਨੂੰ 18-18 ਘੰਟੇ ਕੰਮ ਕਰਨ ਦੀ ਸਲਾਹ ਦੇਣ ਵਾਲੇ ਸੀਈਓ ਦੀ ਕਿਉਂ ਹੋ ਰਹੀ ਹੈ ਨਿਖੇਧੀ

ਭਾਰਤ ਦੀ ਬੰਬੇ ਸ਼ੇਵਿੰਗ ਕੰਪਨੀ ਦੇ ਸੀਈਓ ਸ਼ਾਂਤਨੂ ਦੇਸ਼ਪਾਂਡੇ ਨੇ ਨੌਕਰੀ ਵਿੱਚ ਨਵੇਂ ਆਏ ਲੋਕਾਂ ਨੂੰ ਸ਼ੁਰੂਆਤੀ ਚਾਰ-ਪੰਜ ਸਾਲਾਂ ਲਈ ਦਿਨ ਵਿੱਚ 18-18 ਘੰਟੇ ਤੱਕ ਕੰਮ ਕਰਨ ਦੀ ਸਲਾਹ ਦਿੱਤੀ ਹੈ।

ਉਨ੍ਹਾਂ ਦੀ ਇਸ ਸਲਾਹ ਤੋਂ ਬਾਅਦ ਉਨ੍ਹਾਂ ਦੀ ਕਾਫ਼ੀ ਨਿਖੇਧੀ ਹੋ ਰਹੀ ਹੈ।

ਬੰਬੇ ਸ਼ੇਵਿੰਗ ਕੰਪਨੀ ਦੇ ਸੰਸਥਾਪਕ ਸ਼ਾਂਤਨੂ ਦੇਸ਼ਪਾਂਡੇ ਨੇ ਨੌਜਵਾਨ ਕਰਮਚਾਰੀਆਂ ਨੂੰ ਆਪਣੇ ਕੰਮ ਨੂੰ ਪੂਜਾ ਮੰਨਣ ਅਤੇ ਇਸ ਨੂੰ ਬਿਨਾਂ ਰੋਣ-ਧੋਣ ਦੇ ਕਰਨ ਦੀ ਸਲਾਹ ਵੀ ਦਿੱਤੀ ਹੈ। ਇਸ ਤੋਂ ਬਾਅਦ ਉਨ੍ਹਾਂ ਖ਼ਿਲਾਫ਼ ਸੋਸ਼ਲ ਮੀਡੀਆ ਉੱਤੇ ਤਿੱਖੇ ਪ੍ਰਤੀਕਰਮ ਦੇਖਣ ਨੂੰ ਮਿਲੇ।

ਮੰਗਲਵਾਰ ਨੂੰ ਲਿੰਕਡਇਨ ਉੱਪਰ ਸ਼ਾਂਤਨੂ ਨੇ ਲਿਖਿਆ ਕਿ ਨੌਜਵਾਨ ਕਰਮਚਾਰੀਆਂ ਨੂੰ ਸ਼ੁਰੂਆਤੀ ਦੌਰ ਵਿੱਚ ਹੀ ਵਰਕ-ਲਾਈਫ ਬੈਲੇਂਸ ਕਰਨ ਦੀ ਕਾਹਲੀ ਹੈ। ਨਵੇਂ ਲੋਕਾਂ ਨੂੰ ਬਗੈਰ ਰੋਏ 18-18 ਘੰਟੇ ਤੱਕ ਕੰਮ ਕਰਨਾ ਚਾਹੀਦਾ ਹੈ।

ਇਸ ਪੋਸਟ ਤੋਂ ਬਾਅਦ ਸ਼ਾਂਤਨੂ ਉਪਰ ਲੋਕਾਂ ਨੇ ਖਰਾਬ ਕੰਮਕਾਜ ਦੇ ਮਾਹੌਲ ਨੂੰ ਵਧਾਵਾ ਦੇਣ ਦੇ ਇਲਜ਼ਾਮ ਲਗਾਏ।

ਟਵਿੱਟਰ ਉੱਪਰ ਸ਼ਾਂਤਨੂ ਦੀ ਸਲਾਹ ਖ਼ਿਲਾਫ਼ ਬੋਲਦੇ ਹੋਏ ਇੱਕ ਯੂਜ਼ਰ ਨੇ ਲਿਖਿਆ, "ਲੋਕਾਂ ਦੀਆਂ ਨੌਕਰੀਆਂ ਜਾ ਰਹੀਆਂ ਹਨ ਅਤੇ ਅਜਿਹੇ ਵਿੱਚ ਸ਼ਾਂਤਨੂ ਸਿਰਫ਼ ਖ਼ਰਾਬ ਮਾਹੌਲ ਦੀ ਪੈਰਵੀ ਹੀ ਨਹੀਂ ਕਰਦੇ ਬਲਕਿ ਆਪਣੇ ਆਪ ਨੂੰ ਸਹੀ ਸਾਬਤ ਕਰਨ ਵਿੱਚ ਲੱਗੇ ਹੋਏ ਹਨ। ਲੋਕਾਂ ਦੇ ਵਿਰੋਧ ਦੇ ਬਾਵਜੂਦ ਉਨ੍ਹਾਂ ਉਪਰ ਕੋਈ ਅਸਰ ਨਹੀਂ।

ਇੱਕ ਹੋਰ ਸੋਸ਼ਲ ਮੀਡੀਆ ਯੂਜ਼ਰ ਨੇ ਲਿਖਿਆ ਹੈ, "ਸ਼ਾਂਤਨੂ ਵਰਗੇ ਲੋਕਾਂ ਦੀ ਬਦੌਲਤ ਅਸੀਂ ਇੱਕ ਨਵੀਂ ਪੀੜ੍ਹੀ ਤਿਆਰ ਕਰਾਂਗੇ ਜੋ ਗੁਲਾਮਾਂ ਦੀ ਹੋਵੇਗੀ ਅਤੇ ਅਜਿਹੇ ਲੋਕਾਂ ਨੂੰ ਅਮੀਰ ਬਣਾਏਗੀ। ਕਰਮਚਾਰੀਆਂ ਦਾ ਸੋਸ਼ਣ ਕਰਨ ਵਾਲੇ ਅਤੇ ਕੰਮਕਾਜੀ ਮਾਹੌਲ ਨੂੰ ਖ਼ਰਾਬ ਕਰਨ ਵਾਲੇ ਲੋਕਾਂ ਨੂੰ ਵਿਦਾ ਕਰਨ ਦਾ ਇਹ ਸਹੀ ਸਮਾਂ ਹੈ।"

ਵਰਸ਼ਾ ਵਿਜੇ ਨਾਮ ਦੇ ਇੱਕ ਯੂਜ਼ਰ ਨੇ ਲਿਖਿਆ ਹੈ, "ਅਜਿਹੇ ਸੀ ਈ ਓ ਅਤੇ ਸਟਾਰਟਅੱਪ ਕਰਕੇ ਹੀ ਨੌਜਵਾਨ ਲੋਕ ਵਰਕ-ਲਾਈਫ ਬੈਲੇਂਸ ਲਈ ਦੇਸ਼ ਛੱਡ ਕੇ ਬਾਹਰ ਜਾ ਰਹੇ ਹਨ। ਸ਼ਰਮ ਦੀ ਗੱਲ ਹੈ ਕਿ ਸ਼ਾਂਤਨੂੰ ਵਰਗੇ ਲੋਕ ਇਸ ਦੀ ਫਿਰ ਵੀ ਪੈਰਵਾਈ ਕਰਦੇ ਹਨ।"

ਨਾਰਾਇਣ ਮੂਰਤੀ ਦੀ ਹੋਈ ਸੀ ਨਿਖੇਧੀ

ਇਹ ਪਹਿਲੀ ਵਾਰ ਨਹੀਂ ਹੈ ਜਦੋਂ ਦਫ਼ਤਰ ਵਿੱਚ ਦੇਰ ਤੱਕ ਕੰਮ ਕਰਨ ਦੀ ਨਸੀਹਤ ਕਰਨ ਵਾਲੇ ਨੂੰ ਨਿਖੇਧੀ ਦਾ ਸਾਹਮਣਾ ਕਰਨਾ ਪਿਆ ਹੋਵੇ। ਇਸ ਤੋਂ ਪਹਿਲਾਂ ਇਨਫੋਸਿਸ ਦੇ ਸਹਿ-ਸੰਸਥਾਪਕ ਨਰਾਇਣਮੂਰਤੀ ਨੇ ਲੋਕਾਂ ਨੂੰ ਹਫ਼ਤੇ ਵਿੱਚ 60 ਘੰਟੇ ਕੰਮ ਕਰਨ ਦੀ ਸਲਾਹ ਦਿੱਤੀ ਸੀ ਤਾਂ ਕਿ ਮਹਾਂਮਾਰੀ ਨਾਲ ਪ੍ਰਭਾਵਿਤ ਹੋਈ ਅਰਥਵਿਵਸਥਾ ਨੂੰ ਠੀਕ ਕੀਤਾ ਜਾ ਸਕੇ। ਨਾਰਾਇਣ ਮੂਰਤੀ ਦੇ ਬਿਆਨ ਤੋਂ ਬਾਅਦ ਵੀ ਉਨ੍ਹਾਂ ਨੂੰ ਕਾਫ਼ੀ ਆਲੋਚਨਾ ਝੱਲਣੀ ਪਈ ਸੀ।

2020 ਵਿੱਚ ਜਾਰੀ ਲਿੰਕਡਇਨ ਵਰਕਫੋਰਸ ਕਾਨਫੀਡੈਂਸ ਇੰਡੈਕਸ ਵਿੱਚ ਆਖਿਆ ਗਿਆ ਹੈ ਕਿ ਭਾਰਤ ਵਿੱਚ ਕੰਮ ਕਰਨ ਵਾਲੇ ਹਰ ਪੰਜ ਵਿੱਚੋਂ ਦੋ ਕਰਮਚਾਰੀ ਤਣਾਅ ਅਤੇ ਚਿੰਤਾ ਦਾ ਸ਼ਿਕਾਰ ਹਨ।

ਭਾਰਤ ਵਿੱਚ ਸਖ਼ਤ ਕਾਨੂੰਨ ਹਨ ਪਰ ਕਰਮਚਾਰੀਆਂ ਲਈ ਕੰਮ ਕਰਨ ਵਾਲੇ ਕਾਰਕੁਨਾਂ ਮੁਤਾਬਕ ਇਸ ਨੂੰ ਲਾਗੂ ਕਰਨ ਦੀ ਲੋੜ ਹੈ।

ਬੀਬੀਸੀ ਪੰਜਾਬੀ ਨੂੰ ਆਪਣੇ ਮੋਬਾਈਲ ਦੀ ਹੋਮ ਸਕਰੀਨ ਉੱਤੇ ਇੰਝ ਲੈ ਕੇ ਆਓ

ਸ਼ਾਂਤਨੂੰ ਦੇਸ਼ਪਾਂਡੇ ਨੇ ਦੇਰ ਤੱਕ ਕੰਮ ਕਰਨ ਦੀ ਸਲਾਹ ਉਸ ਵੇਲੇ ਦਿੱਤੀ ਜਦੋਂ ਸੋਸ਼ਲ ਮੀਡੀਆ ਉੱਤੇ 'ਕੁਆਈਟ-ਕਵਿਟਿੰਗ' ਸ਼ਬਦ ਚੱਲ ਰਿਹਾ ਹੈ। ਇਸ ਦਾ ਮਤਲਬ ਹੈ ਕਿ ਜਿੰਨੀ ਲੋੜ ਹੋਵੇ,ਓਨਾ ਹੀ ਕੰਮ ਕਰੋ ਅਤੇ ਉਸ ਤੋਂ ਜ਼ਿਆਦਾ ਨਹੀਂ।

ਇਹ ਸ਼ਬਦ ਇੱਕ ਅਮਰੀਕੀ ਟਿਕ-ਟੌਕਰ ਦੇ ਵੀਡੀਓ ਤੋਂ ਬਾਅਦ ਸ਼ੁਰੂ ਹੋਇਆ ਹੈ ਅਤੇ ਇਸ ਟਿਕਟੌਕਰ ਦਾ ਕਹਿਣਾ ਸੀ ਕਿ ਕੰਮ ਹੀ ਤੁਹਾਡੀ ਜ਼ਿੰਦਗੀ ਨਹੀਂ ਹੈ।

ਬੀਬੀਸੀ ਦੀ ਪਰੀਸ਼ਾ ਗੁੜਹਲ ਮੁਤਾਬਕ ਇਹ ਅੰਦੋਲਨ ਚੀਨ ਤੋਂ ਸ਼ੁਰੂ ਹੋਇਆ ਹੋਵੇਗਾ। ਉਥੇ 'ਤਾਂਗਪਿੰਗ' ਵਰਗੇ ਸ਼ਬਦਾਂ ਨੂੰ ਸੈਂਸਰ ਕਰ ਦਿੱਤਾ ਗਿਆ ਹੈ।

ਸਥਾਨਕ ਭਾਸ਼ਾ ਮੁਤਾਬਕ ਇਸ ਦਾ ਮਤਲਬ ਪਿੱਠ ਦੇ ਬਲ ਲੇਟ ਜਾਣਾ ਹੁੰਦਾ ਹੈ। ਚੀਨ ਵਿੱਚ ਲੰਬੇ ਸਮੇਂ ਤਕ ਕੰਮ ਕਰਵਾਉਣ ਦੇ ਖ਼ਿਲਾਫ਼ ਇਸ ਸ਼ਬਦ ਦੀ ਸ਼ੁਰੁਆਤ ਕੀਤੀ ਗਈ ਸੀ।

ਇਹ ਵੀ ਪੜ੍ਹੋ-

(ਬੀਬੀਸੀ ਪੰਜਾਬੀ ਨਾਲ FACEBOOK, INSTAGRAM, TWITTERਅਤੇ YouTube 'ਤੇ ਜੁੜੋ।)