ਭਾਰਤੀ ਫ਼ਿਲਮ 'ਮੈਂ ਵਾਪਸ ਆਊਂਗਾ' ਦੇ ਚਰਚੇ ਪਾਕਿਸਤਾਨ 'ਚ ਵੀ ਹੋ ਰਹੇ, ਇਮਤਿਆਜ਼ ਅਲੀ ਦੀ ਇਸ ਕਹਾਣੀ ਵਿੱਚ ਅਜਿਹਾ ਕੀ ਖ਼ਾਸ ਹੈ?

ਮਸ਼ਹੂਰ ਭਾਰਤੀ ਡਾਇਰੈਕਟਰ ਅਤੇ ਫਿਲਮਮੇਕਰ ਇਮਤਿਆਜ਼ ਅਲੀ ਦੀ ਨਵੀਂ ਫ਼ਿਲਮ "ਮੈਂ ਵਾਪਸ ਆਊਂਗਾ" ਨੂੰ ਨਾ ਸਿਰਫ਼ ਭਾਰਤ ਵਿੱਚ ਸਗੋਂ ਪਾਕਿਸਤਾਨ ਅਤੇ ਦੁਨੀਆ ਦੇ ਹੋਰ ਦੇਸ਼ਾਂ ਵਿੱਚ ਵੀ ਖੂਬ ਪਸੰਦ ਕੀਤਾ ਜਾ ਰਿਹਾ ਹੈ। ਫ਼ਿਲਮ ਨੂੰ ਇਸ ਦੀ ਭਾਵਨਾਤਮਕ ਕਹਾਣੀ, ਭਾਰਤ ਦੀ ਵੰਡ ਵਰਗੇ ਸੰਵੇਦਨਸ਼ੀਲ ਵਿਸ਼ੇ ਅਤੇ ਸ਼ਾਨਦਾਰ ਅਦਾਕਾਰੀ ਲਈ ਖ਼ਾਸ ਤੌਰ 'ਤੇ ਸਰਾਹਿਆ ਜਾ ਰਿਹਾ ਹੈ।

ਜਿੱਥੇ ਬਾਲੀਵੁੱਡ ਦੇ ਦਰਸ਼ਕ ਪਹਿਲਾਂ ਹੀ ਇਮਤਿਆਜ਼ ਅਲੀ ਦੇ ਕਹਾਣੀ ਸੁਣਾਉਣ ਦੇ ਅੰਦਾਜ਼ ਦੇ ਕਾਇਲ ਰਹੇ ਹਨ, ਉੱਥੇ ਹੀ ਇਸ ਵਾਰ ਪਾਕਿਸਤਾਨ ਵਿੱਚ ਵੀ ਆਨਲਾਈਨ ਇਸ ਫ਼ਿਲਮ ਦੀ ਕਾਫ਼ੀ ਚਰਚਾ ਹੋ ਰਹੀ ਹੈ।

ਫ਼ਿਲਮ ਦੇ ਸ਼ੁਰੂਆਤੀ ਦ੍ਰਿਸ਼ ਵਿੱਚ ਨਸੀਰੁੱਦੀਨ ਸ਼ਾਹ ਹੱਥ ਵਿੱਚ ਕਲਮ ਫੜ ਕੇ ਉਰਦੂ ਦੇ ਕੁਝ ਅੱਖਰ ਲਿਖਦੇ ਨਜ਼ਰ ਆਉਂਦੇ ਹਨ। ਇਸੇ ਪਲ ਤੋਂ ਇਹ ਅਹਿਸਾਸ ਹੋ ਜਾਂਦਾ ਹੈ ਕਿ ਕਹਾਣੀ ਅਤੀਤ, ਯਾਦਾਂ ਅਤੇ ਇੱਕ ਅਧੂਰੀ ਦਾਸਤਾਨ ਦੇ ਆਲੇ-ਦੁਆਲੇ ਘੁੰਮੇਗੀ। ਸਿਨੇਮਾ ਹਾਲ ਵਿੱਚ ਫ਼ਿਲਮ ਦਾ ਸਿਰਲੇਖ ਵੀ ਉਰਦੂ ਲਿਪੀ ਵਿੱਚ ਦਿਖਾਈ ਦਿੰਦਾ ਹੈ।

ਭਾਰਤ ਦੀ ਵੰਡ ਦੀ ਪਿਛੋਕੜ 'ਤੇ ਬਣੀ ਇਸ ਫ਼ਿਲਮ ਨੇ ਇੱਕ ਵਾਰ ਫਿਰ ਦੋਵੇਂ ਦੇਸ਼ਾਂ ਦੇ ਦਰਸ਼ਕਾਂ ਦਾ ਧਿਆਨ ਉਸ ਇਤਿਹਾਸ ਵੱਲ ਖਿੱਚਿਆ ਹੈ ਜਿਸ ਨੇ ਲੱਖਾਂ ਲੋਕਾਂ ਦੀ ਜ਼ਿੰਦਗੀ ਬਦਲ ਦਿੱਤੀ ਸੀ।

ਪਾਕਿਸਤਾਨੀ ਫ਼ਿਲਮਕਾਰ ਉਮੈਰ ਨਾਸਿਰ ਅਲੀ ਨੇ ਫ਼ਿਲਮ ਦੀ ਤਾਰੀਫ਼ ਕਰਦਿਆਂ ਕਿਹਾ ਕਿ ਇਹ ਵੰਡ ਦੀ ਮਨੁੱਖੀ ਕੀਮਤ ਨੂੰ ਬਹੁਤ ਸੰਵੇਦਨਸ਼ੀਲਤਾ ਨਾਲ ਪੇਸ਼ ਕਰਦੀ ਹੈ।

ਬੀਬੀਸੀ ਉਰਦੂ ਨਾਲ ਗੱਲ ਕਰਦਿਆਂ ਉਮੈਰ ਨਾਸਿਰ ਅਲੀ ਨੇ ਕਿਹਾ, "ਮੈਨੂੰ ਹਮੇਸ਼ਾ ਤੋਂ ਇਮਤਿਆਜ਼ ਅਲੀ ਦੀਆਂ ਫ਼ਿਲਮਾਂ ਪਸੰਦ ਰਹੀਆਂ ਹਨ, ਪਰ ਮੇਰੇ ਖ਼ਿਆਲ ਵਿੱਚ ਫਿਲਮਮੇਕਰ ਦੇ ਤੌਰ 'ਤੇ "ਮੈਂ ਵਾਪਸ ਆਊਂਗਾ" ਉਨ੍ਹਾਂ ਦੀ ਸਭ ਤੋਂ ਬਿਹਤਰੀਨ ਫਿਲਮ ਹੈ। ਇਹ ਬਹੁਤ ਹੀ ਖੂਬਸੂਰਤ ਅਤੇ ਰਚਨਾਤਮਕ ਕੰਮ ਹੈ। ਇਹ ਇੱਕ ਸੱਚੀ ਫਿਲਮ ਹੈ ਜਿਸਨੂੰ ਬਹੁਤ ਪਿਆਰ ਨਾਲ ਬਣਾਇਆ ਗਿਆ ਹੈ।"

ਪਾਕਿਸਤਾਨੀ ਫ਼ਿਲਮ 'ਨਾਯਾਬ' ਦੇ ਨਿਰਦੇਸ਼ਕ ਉਮੈਰ ਦਾ ਕਹਿਣਾ ਹੈ ਕਿ ਫ਼ਿਲਮ ਦੀ ਐਡੀਟਿੰਗ ਉਨ੍ਹਾਂ ਨੂੰ ਖ਼ਾਸ ਤੌਰ 'ਤੇ ਪ੍ਰਭਾਵਿਤ ਕਰਦੀ ਹੈ। ਉਹ ਕਹਿੰਦੇ ਹਨ, "ਪੂਰੀ ਫ਼ਿਲਮ ਦੌਰਾਨ ਦੋ ਵੱਖ-ਵੱਖ ਕਹਾਣੀਆਂ ਅਤੇ ਭਾਵਨਾਵਾਂ ਨੂੰ ਇੱਕੋ ਸਮੇਂ ਅੱਗੇ ਵਧਾਉਣਾ ਆਸਾਨ ਨਹੀਂ ਹੁੰਦਾ, ਪਰ ਐਡੀਟਰ ਆਰਤੀ ਬਜਾਜ ਨੇ ਜਿਸ ਤਰ੍ਹਾਂ ਇਸ ਨੂੰ ਸੰਭਾਲਿਆ ਹੈ, ਉਹ ਵਾਕਈ ਕਾਬਿਲ-ਏ-ਤਾਰੀਫ਼ ਹੈ। ਫਿਲਮ ਦੀਆਂ ਭਾਵਨਾਵਾਂ ਅਖੀਰ ਤੱਕ ਬਣੀਆਂ ਰਹਿੰਦੀਆਂ ਹਨ।"

ਉਮੈਰ ਨੇ ਫ਼ਿਲਮ ਦੇ ਹਰ ਪਹਿਲੂ ਦੀ ਸ਼ਲਾਘਾ ਕੀਤੀ ਪਰ ਉਹ ਨਸੀਰੁੱਦੀਨ ਸ਼ਾਹ ਦੀ ਅਦਾਕਾਰੀ ਤੋਂ ਸਭ ਤੋਂ ਵੱਧ ਪ੍ਰਭਾਵਿਤ ਹੋਏ।

ਉਨ੍ਹਾਂ ਕਿਹਾ, "ਉਨ੍ਹਾਂ ਦਾ ਕਿਰਦਾਰ ਫ਼ਿਲਮ ਵਿੱਚ ਸਭ ਤੋਂ ਔਖਾ ਹੈ ਅਤੇ ਜਿਸ ਤਰ੍ਹਾਂ ਨਸੀਰੁੱਦੀਨ ਸ਼ਾਹ ਨੇ ਇਸ ਨੂੰ ਨਿਭਾਇਆ ਹੈ, ਮੈਨੂੰ ਨਹੀਂ ਲੱਗਦਾ ਕਿ ਕੋਈ ਹੋਰ ਅਦਾਕਾਰ ਇਸ ਕਿਰਦਾਰ ਨਾਲ ਇਨਸਾਫ਼ ਕਰ ਸਕਦਾ ਸੀ।"

ਕਹਾਣੀ ਕੀ ਹੈ ?

"ਮੈਂ ਵਾਪਸ ਆਊਂਗਾ" ਦਰਸ਼ਕਾਂ ਨੂੰ ਸ਼ੁਰੂ ਤੋਂ ਹੀ ਬੰਨ੍ਹ ਕੇ ਰੱਖਦੀ ਹੈ। ਇਹ ਕਹਾਣੀ 95 ਸਾਲ ਦੇ ਈਸ਼ਰ ਸਿੰਘ ਗਰੇਵਾਲ ਦੀ ਹੈ, ਜਿਨ੍ਹਾਂ ਦਾ ਕਿਰਦਾਰ ਨਸੀਰੁੱਦੀਨ ਸ਼ਾਹ ਨੇ ਨਿਭਾਇਆ ਹੈ।

ਉਹ ਲਕਵੇ (ਪੈਰਾਲਿਸਿਸ) ਦੇ ਸ਼ਿਕਾਰ ਹਨ ਅਤੇ ਹੌਲੀ-ਹੌਲੀ ਉਨ੍ਹਾਂ ਦੀ ਯਾਦਦਾਸ਼ਤ ਕਮਜ਼ੋਰ ਹੁੰਦੀ ਜਾ ਰਹੀ ਹੈ।

ਉਨ੍ਹਾਂ ਦਾ ਪੋਤਾ ਨਰਵੀਰ, ਜਿਸ ਦਾ ਕਿਰਦਾਰ ਦਿਲਜੀਤ ਦੋਸਾਂਝ ਨੇ ਨਿਭਾਇਆ ਹੈ, ਇੰਗਲੈਂਡ ਤੋਂ ਵਾਪਸ ਉਨ੍ਹਾਂ ਕੋਲ ਆਉਂਦਾ ਹੈ।

ਈਸ਼ਰ ਸਿੰਘ ਦੀਆਂ ਬਿਖਰੀਆਂ ਯਾਦਾਂ ਵਿੱਚੋਂ ਨਰਵੀਰ ਨੂੰ ਉਨ੍ਹਾਂ ਦੀ ਜ਼ਿੰਦਗੀ ਦੇ ਕੁਝ ਅਜਿਹੇ ਸਫ਼ੇ ਮਿਲਦੇ ਹਨ ਜੋ ਵੰਡ ਤੋਂ ਪਹਿਲਾਂ ਦੇ ਪੰਜਾਬ ਅਤੇ ਪਾਕਿਸਤਾਨ ਦੇ ਸ਼ਹਿਰ ਸਰਗੋਧਾ ਨਾਲ ਜੁੜੇ ਹੋਏ ਹਨ।

ਈਸ਼ਰ ਸਿੰਘ ਦੀ ਸਿਰਫ਼ ਇੱਕ ਹੀ ਆਖਰੀ ਇੱਛਾ ਹੈ, ਉਹ ਇੱਕ ਵਾਰ ਫਿਰ ਸਰਗੋਧਾ ਜਾਣਾ ਚਾਹੁੰਦੇ ਹਨ। ਉਹੀ ਸ਼ਹਿਰ ਜਿੱਥੇ ਉਨ੍ਹਾਂ ਆਪਣਾ ਬਚਪਨ ਗੁਜ਼ਾਰਿਆ ਸੀ ਅਤੇ ਜਿੱਥੇ ਕੁਝ ਯਾਦਾਂ, ਕੁਝ ਵਾਅਦੇ ਅਤੇ ਸ਼ਾਇਦ ਇੱਕ ਅਧੂਰਾ ਪਿਆਰ ਰਹਿ ਗਿਆ ਸੀ।

ਫ਼ਿਲਮ ਦੀ ਖਾਸ ਗੱਲ ਇਹ ਹੈ ਕਿ ਇਮਤਿਆਜ਼ ਅਲੀ ਵੰਡ ਨੂੰ ਸਿਰਫ਼ ਇੱਕ ਰਾਜਨੀਤਿਕ ਘਟਨਾ ਵਜੋਂ ਨਹੀਂ ਦੇਖਦੇ, ਸਗੋਂ ਇਸ ਦੇ ਮਨੁੱਖੀ ਪੱਖ ਨੂੰ ਕੇਂਦਰ ਵਿੱਚ ਰੱਖਦੇ ਹਨ।

ਇਸੇ ਕਾਰਨ ਫਿਲਮ ਦੇਖਣ ਵਾਲੇ ਨਾ ਸਿਰਫ਼ ਇਸ ਇਤਿਹਾਸਕ ਘਟਨਾ ਨੂੰ ਦੇਖਦੇ ਹਨ ਬਲਕਿ ਉਸ ਦਰਦ ਨੂੰ ਵੀ ਮਹਿਸੂਸ ਕਰਦੇ ਹਨ ਜੋ ਉਸ ਪੀੜ੍ਹੀ ਨੇ ਸਹਿਆ ਸੀ।

ਲੋਕਾਂ ਨੂੰ ਫ਼ਿਲਮ ਵਿੱਚ ਕੀ ਪਸੰਦ ਆਇਆ ?

ਦਿੱਲੀ ਦੀ 28 ਸਾਲਾ ਇਕਰਾ ਮੋਹਸਿਨ ਨੇ ਬੀਬੀਸੀ ਉਰਦੂ ਨੂੰ ਦੱਸਿਆ ਕਿ ਫ਼ਿਲਮ ਨੇ ਉਨ੍ਹਾਂ ਨੂੰ ਬਹੁਤ ਭਾਵੁਕ ਕਰ ਦਿੱਤਾ।

ਉਨ੍ਹਾਂ ਕਿਹਾ, "ਅਤੀਤ ਵਿੱਚ ਜੋ ਕੁਝ ਹੋਇਆ, ਖ਼ਾਸ ਕਰਕੇ ਆਪਣਿਆਂ ਦਾ ਵਿਛੋੜਾ, ਸ਼ਾਇਦ ਉਹ ਕਦੇ ਨਹੀਂ ਹੋਣਾ ਚਾਹੀਦਾ ਸੀ।"

ਉਹ ਕਹਿੰਦੇ ਹਨ, "ਮੇਰੇ ਲਈ ਸਭ ਤੋਂ ਚੰਗੀ ਗੱਲ ਇਹ ਸੀ ਕਿ ਅਤੀਤ ਵਿੱਚ ਨਫ਼ਰਤ ਦੇ ਜੋ ਬੀਜ ਬੀਜੇ ਗਏ ਸਨ, ਉਹ ਅੱਜ ਵੀ ਦੋਵੇਂ ਪਾਸਿਆਂ ਦੇ ਲੋਕਾਂ ਨੂੰ ਪੂਰੀ ਤਰ੍ਹਾਂ ਵੱਖ ਨਹੀਂ ਕਰ ਸਕੇ ਹਨ। ਧਰਮ ਅਤੇ ਸਰਹੱਦਾਂ ਆਪਣੀ ਥਾਂ ਹਨ ਪਰ ਭਾਵਨਾਤਮਕ ਰਿਸ਼ਤੇ ਅੱਜ ਵੀ ਜ਼ਿੰਦਾ ਹਨ।"

30 ਸਾਲਾ ਸੰਦੀਪ ਨੇ ਬੀਬੀਸੀ ਉਰਦੂ ਨੂੰ ਕਿਹਾ, "ਮੈਂ ਇਮਤਿਆਜ਼ ਅਲੀ ਦੀਆਂ ਸਾਰੀਆਂ ਫ਼ਿਲਮਾਂ ਦੇਖੀਆਂ ਹਨ ਅਤੇ ਮੇਰੇ ਲਈ "ਮੈਂ ਵਾਪਸ ਆਊਂਗਾ" ਉਨ੍ਹਾਂ ਦਾ ਹੁਣ ਤੱਕ ਦਾ ਸਭ ਤੋਂ ਬਿਹਤਰੀਨ ਕੰਮ ਹੈ।"

ਉਨ੍ਹਾਂ ਕਿਹਾ, "ਫ਼ਿਲਮ ਦੇ ਆਖ਼ਰੀ ਦ੍ਰਿਸ਼ ਨੇ ਮੈਨੂੰ ਅੰਦਰੋਂ ਹਿਲਾ ਦਿੱਤਾ। ਜਦੋਂ ਕੀਨੋ ਮਲਿੱਕਾ ਤੋਂ ਜਾਣ ਦੀ ਇਜਾਜ਼ਤ ਮੰਗਦਾ ਹੈ, ਮੈਂ ਆਪਣੇ ਹੰਝੂ ਨਹੀਂ ਰੋਕ ਸਕਿਆ। ਫ਼ਿਲਮ ਖ਼ਤਮ ਹੋਣ ਤੋਂ ਬਾਅਦ ਵੀ ਫਿਲਮ ਦੀਆਂ ਭਾਵਨਾਵਾਂ ਮੇਰੇ ਨਾਲ ਬਣੀਆਂ ਰਹੀਆਂ।"

ਪਾਕਿਸਤਾਨ ਦੇ ਅਲੀ ਉਸਮਾਨ ਕਾਸਮੀ ਨੇ ਸੋਸ਼ਲ ਮੀਡੀਆ ਪਲੈਟਫਾਰਮ ਐਕਸ 'ਤੇ ਲਿਖਿਆ, "ਇਮਤਿਆਜ਼ ਅਲੀ ਨੇ ਨਫ਼ਰਤ 'ਤੇ ਆਧਾਰਿਤ ਸਿਨੇਮਾ ਦੇ ਦੌਰ ਵਿੱਚ ਹਿੰਮਤ ਦਿਖਾਈ ਹੈ। ਇਸ ਫ਼ਿਲਮ ਦੀ ਸਭ ਤੋਂ ਮਹੱਤਵਪੂਰਨ ਗੱਲ ਇਹ ਹੈ ਕਿ ਇਹ ਸਾਨੂੰ ਯਾਦ ਦਵਾਉਂਦੀ ਹੈ ਕਿ ਅਸੀਂ ਵੰਡ ਦੇ ਦਰਦ ਨੂੰ ਆਪਣਾ ਨਹੀਂ ਸਕਦੇ। ਅਸੀਂ ਇਸ ਨੂੰ ਮਹਿਸੂਸ ਕਰ ਸਕਦੇ ਹਾਂ, ਇਸ ਨਾਲ ਹਮਦਰਦੀ ਰੱਖ ਸਕਦੇ ਹਾਂ, ਪਰ ਅਸੀਂ ਉਨ੍ਹਾਂ ਲੋਕਾਂ ਦੇ ਤਜ਼ਰਬੇ ਨੂੰ ਕਦੇ ਪੂਰੀ ਤਰ੍ਹਾਂ ਨਹੀਂ ਸਮਝ ਸਕਦੇ ਜੋ ਇਸ ਦਰਦ ਵਿੱਚੋਂ ਗੁਜ਼ਰੇ ਹਨ।"

ਸੰਗੀਤ ਅਤੇ ਪੁਰਾਣੀਆਂ ਯਾਦਾਂ

ਉਮੈਰ ਨਾਸਿਰ ਅਲੀ ਦਾ ਕਹਿਣਾ ਹੈ ਕਿ ਫ਼ਿਲਮ ਦਾ ਸੰਗੀਤ ਅਤੇ ਇਸ ਦਾ ਸੱਭਿਆਚਾਰਕ ਮਾਹੌਲ ਵੀ ਹਕੀਕਤ ਦੇ ਬਹੁਤ ਨੇੜੇ ਲੱਗਦਾ ਹੈ।

ਉਨ੍ਹਾਂ ਕਿਹਾ, "ਮੈਂ ਆਪਣੇ ਦਾਦਾ-ਦਾਦੀ ਤੋਂ ਸੁਣਿਆ ਸੀ ਕਿ ਉਸ ਸਮੇਂ ਵੀ ਲੋਕ ਪੱਛਮੀ ਸੰਗੀਤ ਅਤੇ ਨਾਚ ਦੇ ਸ਼ੌਕੀਨ ਸਨ। ਫ਼ਿਲਮ ਵਿੱਚ ਇਸ ਸਭਿਆਚਾਰ ਨੂੰ ਬਹੁਤ ਸੁਭਾਵਿਕ ਢੰਗ ਨਾਲ ਦਰਸਾਇਆ ਗਿਆ ਹੈ।"

ਉਮੈਰ ਖੁਦ ਪਿਛਲੇ ਕੁਝ ਸਾਲਾਂ ਤੋਂ ਵੰਡ ਦੀਆਂ ਯਾਦਾਂ 'ਤੇ ਆਧਾਰਿਤ ਇੱਕ ਫ਼ਿਲਮ ਬਣਾ ਰਹੇ ਹਨ, ਜਿਸ ਦਾ ਨਾਮ ਗੁਲਜ਼ਾਰ ਦੀ ਮਸ਼ਹੂਰ ਕਵਿਤਾ ਤੋਂ ਪ੍ਰੇਰਿਤ ਹੋ ਕੇ "ਛੋੜ ਆਏ ਹਮ ਵੋ ਗਲੀਆਂ" ਰੱਖਿਆ ਗਿਆ ਹੈ।

ਉਨ੍ਹਾਂ ਦਾ ਕਹਿਣਾ ਹੈ ਕਿ ਜਿਸ ਤਰ੍ਹਾਂ ਇਮਤਿਆਜ਼ ਅਲੀ ਨੇ "ਮੈਂ ਵਾਪਸ ਆਊਂਗਾ " ਵਿੱਚ ਅਤੀਤ ਨੂੰ ਅੱਜ ਦੇ ਦਰਸ਼ਕਾਂ ਅਤੇ ਮੌਜੂਦਾ ਹਾਲਾਤਾਂ ਨਾਲ ਜੋੜਿਆ ਹੈ, ਉਹ ਵੀ ਆਪਣੀ ਫ਼ਿਲਮ ਵਿੱਚ ਕੁਝ ਨਵੇਂ ਪਹਿਲੂ ਜੋੜਨਾ ਚਾਹੁੰਣਗੇ।

ਉਮੈਰ ਨੇ ਅਹਿਮਦ ਫ਼ਰਾਜ਼ ਦੀ ਇਸ ਕਵਿਤਾ ਜ਼ਰੀਏ ਫਿਲਮ ਅਤੇ ਇਸ ਦੀ ਕਹਾਣੀ ਨੂੰ ਸੰਖੇਪ 'ਚ ਦੱਸਿਆ,

"ਸੁਨਾ ਹੈ ਉਸ ਦੇ ਸ਼ਬਿਸਤਾਂ ਨਾਲ ਜੁੜੀ ਹੋਈ ਹੈ ਬਹਿਸ਼ਤ,

ਉੱਥੇ ਰਹਿਣ ਵਾਲੇ ਵੀ ਇੱਧਰ ਦੇ ਨਜ਼ਾਰੇ ਵੇਖਦੇ ਹਨ।"

ਬੀਬੀਸੀ ਲਈ ਕਲੈਕਟਿਵ ਨਿਊਜ਼ਰੂਮ ਵੱਲੋਂ ਪ੍ਰਕਾਸ਼ਿਤ

(ਬੀਬੀਸੀ ਪੰਜਾਬੀ ਨਾਲ FACEBOOK, INSTAGRAM, TWITTER, WhatsApp ਅਤੇ YouTube 'ਤੇ ਜੁੜੋ।)