ਆਜ਼ਾਦੀ ਦਿਹਾੜਾ 2026: ‘12 ਸਾਲ ’ਚ 25 ਕਰੋੜ ਲੋਕ ਗਰੀਬੀ ਤੋਂ ਬਾਹਰ ਆਏ’ - ਲਾਲ ਕਿਲ੍ਹੇ ਤੋਂ ਪੀਐੱਮ ਮੋਦੀ ਦੇ ਭਾਸ਼ਣ ਦੀਆਂ ਮੁੱਖ ਗੱਲਾਂ
ਤਸਵੀਰ ਸਰੋਤ, DD NEWS
ਭਾਰਤ ਦੀ ਆਜ਼ਾਦੀ ਦੀ 80ਵੀਂ ਵਰ੍ਹੇਗੰਢ ਮੌਕੇ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਨੇ ਲਾਲ ਕਿਲ੍ਹੇ ਤੋਂ 13ਵੀਂ ਵਾਰ ਤਿਰੰਗਾ ਲਹਿਰਾਇਆ ਅਤੇ ਦੇਸ਼ ਨੂੰ ਸੰਬੋਧਨ ਕੀਤਾ।
ਪ੍ਰਧਾਨ ਮੰਤਰੀ ਮੋਦੀ ਨੇ ਦੇਸ਼ ਨੂੰ ਸੰਬੋਧਨ ਕਰਦਿਆਂ ਭਾਰਤ ਵਾਸੀਆਂ ਨੂੰ ਆਜ਼ਾਦੀ ਦਿਹਾੜੇ ਦੀਆਂ ਸ਼ੁਭਕਾਮਨਾਵਾਂ ਦਿੱਤੀਆਂ।
ਇਸ ਦੌਰਾਨ ਉਨ੍ਹਾਂ ਦੇਸ਼ ਲਈ ਬਲਿਦਾਨ ਦੇਣ ਵਾਲੇ ਸਾਰੇ ਆਜ਼ਾਦੀ ਘੁਲਾਟੀਆਂ ਨੂੰ ਸ਼ਰਧਾਂਜਲੀ ਭੇਟ ਕੀਤੀ।
ਇਸ ਦੌਰਾਨ ਉਨ੍ਹਾਂ ਕਿਹਾ ਕਿ ''ਪਿਛਲੇ ਦਿਨੀਂ ਦੇਸ਼ ਦੇ ਕੁਝ ਹਿੱਸਿਆਂ 'ਚ ਹੜ੍ਹਾਂ ਕਾਰਨ ਕਈ ਪਰਿਵਾਰ ਪ੍ਰਭਾਵਿਤ ਹੋਏ, ਉਨ੍ਹਾਂ ਦੇ ਦਰਦ ਨੂੰ ਅਸੀਂ ਪੂਰੀ ਤਰ੍ਹਾਂ ਸਮਝਦੇ ਹਾਂ। ਪੀੜਿਤ ਪਰਿਵਾਰਾਂ ਨੂੰ ਮੈਂ ਵਿਸ਼ਵਾਸ ਦਿਵਾਉਂਦਾ ਹਾਂ ਕਿ ਅਸੀਂ ਅਤੇ ਪੂਰਾ ਦੇਸ਼ ਉਨ੍ਹਾਂ ਦੇ ਨਾਲ ਹੈ।''
''ਕੋਈ ਵੀ ਦੇਸ਼ ਉਦੋਂ ਮਹਾਨ ਬਣਦਾ ਹੈ, ਜਦੋਂ ਆਪਣੇ ਸੁਪਨਿਆਂ, ਸੰਕਲਪਾਂ ਅਤੇ ਸਮਰੱਥਾ ਦੇ ਦਮ 'ਤੇ ਅੱਗੇ ਵਧਦਾ ਹੈ। ਸਾਡੇ ਸੰਕਪਲ ਦ੍ਰਿੜ ਅਤੇ ਉੱਚੇ ਹੋਣੇ ਚਾਹੀਦੇ ਹਨ। ਕਿਉਂਕਿ ਇਸ ਨਾਲ ਸਾਡੀ ਸਮਰੱਥਾ ਅਤੇ ਕੋਸ਼ਿਸ਼ਾਂ ਦੀ ਉਚਾਈ ਵੀ ਵਧਦੀ ਹੈ ਅਤੇ ਅਸੀਂ ਆਪਣੇ ਸੁਪਨਿਆਂ ਨੂੰ ਪੂਰਾ ਕਰ ਸਕਦੇ ਹਾਂ।''
''ਅੱਜ ਭਾਰਤ ਨੇ ਵੀ ਇੱਕ ਬਹੁਤ ਵੱਡਾ ਸੁਪਨਾ ਦ੍ਰਿੜ ਸੰਕਲਪ ਨਾਲ ਦੇਖਿਆ ਹੈ ਕਿ ਜਦੋਂ 2047 ਵਿੱਚ ਆਜ਼ਾਦੀ ਦੇ 100 ਸਾਲ ਹੋਣਗੇ, ਅਸੀਂ ਵਿਕਸਿਤ ਭਾਰਤ ਬਣਾ ਕੇ ਰਹਾਂਗੇ।''
ਮੋਦੀ ਨੇ ਕਿਹਾ, ''ਦੇਸ਼ ਬਹੁਤ ਸਾਰੇ ਸੁਪਨੇ ਲੈਕੇ ਆਜ਼ਾਦ ਹੋਇਆ ਪਰ ਅਸੀਂ ਰਫ਼ਤਾਰ ਨਹੀਂ ਫੜ੍ਹ ਸਕੇ। ਹੋ ਜਾਵੇਗਾ, ਦੇਖਿਆ ਜਾਵੇਗਾ.. ਉਸੇ 'ਚ ਗੁਆਚੇ ਰਹੇ। ਅਜਿਹੇ ਸਮੇਂ ਪਿਛਲੇ 12 ਸਾਲ 'ਚ ਭਾਰਤ ਨੇ ਇੱਕ ਨਵੀਂ ਰਫ਼ਤਾਰ ਫੜ੍ਹੀ ਅਤੇ ਅਸੀਂ ਅੱਗੇ ਵਧ ਰਹੇ ਹਾਂ।''
''ਪਿਛਲੇ 12 ਸਾਲਾਂ 'ਚ ਡਿਫੈਂਸ ਪ੍ਰੋਡਕਸ਼ਨ ਲਗਭਗ 4 ਗੁਣਾ ਹੈ। ਖਾਦੀ ਅਤੇ ਗ੍ਰਾਮ ਉਦਯੋਗ ਦਾ ਉਤਪਾਦਨ ਲਗਭਗ 5 ਗੁਣਾ ਹੈ। ਇਲੈਕਟ੍ਰੋਨਿਕ ਮੈਨਿਉਫੈਕਚਰਿੰਗ ਲਗਭਗ 7 ਗੁਣਾ ਵਧਿਆ ਹੈ।''
ਮਹਿਲਾ ਸਸ਼ਕਤੀਕਰਨ ਬਾਰੇ ਬੋਲਦਿਆਂ ਪ੍ਰਧਾਨ ਮੰਤਰੀ ਮੋਦੀ ਨੇ ਕਿਹਾ ''ਅਸੀਂ 'ਨਾਰੀ ਸ਼ਕਤੀ ਵੰਦਨ ਅਧਿਨਿਯਮ' ਪਾਸ ਕੀਤਾ ਹੈ। ਹਾਲਾਂਕਿ, ਕਿਸੇ ਨਾ ਕਿਸੇ ਕਾਰਨ ਕਰਕੇ ਪਿਛਲੇ 40 ਸਾਲਾਂ ਤੋਂ ਸਿਆਸੀ ਖੇਤਰ ਵਿੱਚ ਇਹ ਸੁਪਨਾ ਸਿਆਸਤ ਦਾ ਨਿਸ਼ਾਨਾ ਬਣਦਾ ਰਿਹਾ ਹੈ।”
“ਮੈਂ ਲਾਲ ਕਿਲ੍ਹੇ ਤੋਂ, ਤਿਰੰਗੇ ਦੀ ਛਾਂ ਹੇਠ ਖੜ੍ਹੇ ਹੋ ਕੇ ਸਾਰੀਆਂ ਸਿਆਸੀ ਪਾਰਟੀਆਂ ਨੂੰ ਅਪੀਲ ਕਰਦਾ ਹਾਂ - ਆਓ, ਅਸੀਂ ਮਹਿਲਾਵਾਂ ਦੀ ਸਮਰੱਥਾ ਦਾ ਸਨਮਾਨ ਕਰੀਏ ਅਤੇ ਉਨ੍ਹਾਂ ਨੂੰ 33 ਫ਼ੀਸਦੀ ਨੁਮਾਇੰਦਗੀ ਦੇ ਕੇ ਸਸ਼ਕਤ ਬਣਾਈਏ। ਤੁਸੀਂ ਵੀ ਇਸ ਪਹਿਲ ਵਿੱਚ ਸ਼ਾਮਿਲ ਹੋਵੋ ਅਤੇ ਇਸ ਦਾ ਸਿਹਰਾ ਆਪਣੇ ਸਿਰ ਲਵੋ।''
ਪ੍ਰਧਾਨ ਮੰਤਰੀ ਮੋਦੀ ਦੇ ਭਾਸ਼ਣ ਦੀਆਂ ਅਹਿਮ ਗੱਲਾਂ:
- ਪਿਛਲੇ 12 ਸਾਲ ਵਿੱਚ 25 ਕਰੋੜ ਲੋਕ ਗਰੀਬੀ ਤੋਂ ਬਾਹਰ ਨਿਕਲੇ ਹਨ।
- ਦੇਸ਼ ਨਿਊਕਲੀਅਰ ਐਨਰਜੀ ਦੀ ਦਿਸ਼ਾ ਵਿੱਚ ਕੰਮ ਕਰ ਰਿਹਾ ਹੈ।
- ਭਾਰਤ 2047 ਤੱਕ 100 ਗੀਗਾਵਾਟ ਐਨਰਜੀ ਪੈਦਾ ਕਰਨ ਦੀ ਦਿਸ਼ਾ ਵਿੱਚ ਅੱਗੇ ਵੱਧ ਰਿਹਾ ਹੈ।
- ਅਸੀਂ ਮਹੱਤਵਪੂਰਨ ਖਣਿਜਾਂ ਦੇ ਮਾਮਲੇ ਵਿੱਚ ਵੀ ਆਪਣੇ ਆਪ ਨੂੰ ਆਤਮ ਨਿਰਭਰ ਬਣਾਉਣ ਲਈ ਕੰਮ ਕਰ ਰਹੇ ਹਾਂ। ਅਸੀਂ ਇੱਕ ਕ੍ਰਿਟੀਕਲ ਮਿਨਰਲ ਕੋਰੀਡੋਰ ਦਾ ਐਲਾਨ ਕੀਤਾ ਹੈ ਅਤੇ ਇਸ ਮੁੱਦੇ 'ਤੇ ਕਈ ਦੇਸ਼ ਸਾਡੇ 'ਤੇ ਭਰੋਸਾ ਜਤਾ ਰਹੇ ਹਨ।
- ਭਾਰਤ ਗਹਿਰੇ ਸਮੁੰਦਰ ਦੀ ਖੋਜ 'ਤੇ 85,000 ਕਰੋੜ ਰੁਪਏ ਖਰਚ ਕਰੇਗਾ।
- 'ਆਤਮ ਨਿਰਭਰ' ਬਣਨ ਦੀ ਕੋਸ਼ਿਸ਼ ਵਿੱਚ ਭਾਰਤ ਨੇ ਸੈਮੀਕੰਡਕਟਰ ਪਲਾਂਟ ਲਗਾਏ ਹਨ ਅਤੇ ਇਨ੍ਹਾਂ ਵਿੱਚ ਉਤਪਾਦਨ ਪਹਿਲਾਂ ਹੀ ਸ਼ੁਰੂ ਹੋ ਚੁੱਕਾ ਹੈ।
- ਦੇਸ਼ ਵਿੱਚ ਹੁਣ 50 ਲੱਖ ਤੋਂ ਵੱਧ ਘਰਾਂ ਤੱਕ ਸੋਲਰ ਐਨਰਜੀ ਪਹੁੰਚ ਚੁੱਕੀ ਹੈ।
- ਭਾਰਤ ਨੇ 1925 ਵਿੱਚ ਇੰਡੀਅਨ ਰੇਲਵੇ ਦਾ ਇਲੈਕਟ੍ਰੀਫਿਕੇਸ਼ਨ ਸ਼ੁਰੂ ਕੀਤਾ ਸੀ ਪਰ 90 ਸਾਲਾਂ ਵਿੱਚ ਸਿਰਫ਼ 30% ਕੰਮ ਹੀ ਹੋ ਸਕਿਆ ਸੀ। ਪਿਛਲੇ ਦਹਾਕੇ ਵਿੱਚ ਸਾਡੀ ਸਰਕਾਰ ਨੇ 100% ਇਲੈਕਟ੍ਰੀਫਿਕੇਸ਼ਨ ਦਾ ਕੰਮ ਪੂਰਾ ਕਰ ਲਿਆ ਹੈ।
ਤਸਵੀਰ ਸਰੋਤ, DD NEWS / YT
- ਸਾਡੀ ਸਰਕਾਰ ਨੇ ਇਹ ਯਕੀਨੀ ਬਣਾਇਆ ਕਿ ਕੋਵਿਡ-19 ਅਤੇ ਹਾਲੀਆ ਐਨਰਜੀ ਸੰਕਟ ਦੌਰਾਨ ਲੋਕਾਂ ਨੂੰ ਪਰੇਸ਼ਾਨੀ ਨਾ ਹੋਵੇ।
- ਅੰਤਰਰਾਸ਼ਟਰੀ ਬਾਜ਼ਾਰ ਵਿੱਚ ਯੂਰੀਆ ਬਹੁਤ ਜ਼ਿਆਦਾ ਕੀਮਤ 'ਤੇ ਵਿਕ ਰਿਹਾ ਹੈ। ਪਰ, ਕਿਸਾਨਾਂ 'ਤੇ ਇਸ ਦਾ ਮਾੜਾ ਅਸਰ ਨਾ ਪਵੇ, ਇਸ ਲਈ ਅਸੀਂ ਇਹ ਯਕੀਨੀ ਬਣਾਇਆ ਹੈ ਕਿ ਉਨ੍ਹਾਂ ਨੂੰ ਯੂਰੀਆ ਬਹੁਤ ਘੱਟ ਕੀਮਤ 'ਤੇ ਮਿਲੇ।
- ਅਸੀਂ ਇੱਕ ਨਵੀਂ ਉਪਲੱਬਧੀ ਹਾਸਲ ਕੀਤੀ ਹੈ ਅਤੇ ਇੱਕ ਨਵੀਂ ਹਾਈਡ੍ਰੋਜਨ ਟ੍ਰੇਨ ਚਲਾਈ ਹੈ। ਇਹ ਸਭ ਤੋਂ ਲੰਬੀ ਅਤੇ ਸਭ ਤੋਂ ਸ਼ਕਤੀਸ਼ਾਲੀ ਹਾਈਡ੍ਰੋਜਨ ਟ੍ਰੇਨ ਹੈ।
- ਅਸੀਂ 40 ਦੇਸ਼ਾਂ ਨਾਲ FTA ਸਮਝੌਤਿਆਂ 'ਤੇ ਕੰਮ ਕਰ ਰਹੇ ਹਾਂ। ਇਹ ਵਪਾਰ ਸਮਝੌਤੇ ਇੱਕ ਵੱਡਾ ਮੌਕਾ ਹਨ। ਮੈਂ ਆਪਣੇ ਐਮਐਸਐਮਈ ਸੈਕਟਰ ਨੂੰ ਕਹਿਣਾ ਚਾਹੁੰਦਾ ਹਾਂ ਕਿ ਕਿਰਪਾ ਕਰਕੇ ਇਸ ਮੌਕੇ ਨੂੰ ਹੱਥੋਂ ਨਾ ਜਾਣ ਦਿਓ।
- ਪੰਜਾਬ ਦੇ ਲੁਧਿਆਣਾ ਤੋਂ ਲੈਕੇ ਤਾਮਿਲਨਾਡੂ ਦੇ ਤਿਰੂਪੁਰ ਤੱਕ, ਸਾਡਾ ਟੈਕਸਟਾਈਲ ਸੈਕਟਰ ਦੁਨੀਆ ਤੱਕ ਪਹੁੰਚ ਸਕਦਾ ਹੈ।
- ਕੇਰਲ ਤੋਂ ਗੁਜਰਾਤ ਅਤੇ ਤਮਿਲਨਾਡੂ ਤੋਂ ਬੰਗਾਲ ਤੱਕ, ਸਾਡੇ ਸਮੁੰਦਰੀ ਭੋਜਨ (ਸੀਫੂਡ) ਦੇ ਨਿਰਯਾਤ ਦੇ ਮੌਕੇ ਵਧੇ ਹਨ।
- ਭਾਰਤ ਵਿੱਚ ਬੈਂਕਿੰਗ ਸੈਕਟਰ ਤੇਜ਼ੀ ਨਾਲ ਤਰੱਕੀ ਕਰ ਰਿਹਾ ਹੈ; ਇੱਕ ਭਾਰਤੀ ਬੈਂਕ ਦੁਨੀਆ ਦੇ ਟੌਪ ਪੰਜ ਬੈਂਕਾਂ ਵਿੱਚ ਹੋਣਾ ਚਾਹੀਦਾ ਹੈ।
- ਫਾਰਚੂਨ 500 ਕੰਪਨੀਆਂ ਵਿੱਚ 50 ਭਾਰਤੀ ਕੰਪਨੀਆਂ ਹੋਣੀਆਂ ਚਾਹੀਦੀਆਂ ਹਨ।
- ਅਸੀਂ ਆਉਣ ਵਾਲੇ ਦਿਨਾਂ ਵਿੱਚ ਸਿਵਿਲ ਡਿਫੈਂਸ ਦਾ ਇੱਕ ਨੈਟਵਰਕ ਖੜ੍ਹਾ ਕਰਾਂਗੇ। ਉਨ੍ਹਾਂ ਨੂੰ ਆਧੁਨਿਕ ਵਿਵਸਥਾਵਾਂ ਨਾਲ ਜਾਣੂ ਕਰਾਂਵਾਂਗੇ।
ਮੋਦੀ ਨੇ ਨਸ਼ੇ ਬਾਰੇ ਕੀ ਐਲਾਨ ਕੀਤਾ
- ਭਾਰਤ ਆਪਣੇ ਨੌਜਵਾਨਾਂ ਨੂੰ ਮੁਫ਼ਤ ਕੋਚਿੰਗ ਦੀਆਂ ਸਹੂਲਤਾਂ ਦੇਣ ਲਈ ਇੱਕ ਨੈੱਟਵਰਕ ਸਥਾਪਤ ਕਰੇਗਾ ਤਾਂ ਜੋ ਉਨ੍ਹਾਂ ਦੇ ਪਰਿਵਾਰਾਂ 'ਤੇ ਆਰਥਿਕ ਦਬਾਅ ਨਾ ਪਵੇ।
- ਦੇਸ਼ ਦੇ ਇੱਕ ਕਰੋੜ ਨੌਜਵਾਨਾਂ ਨੂੰ ਆਰਟੀਫਿਸ਼ੀਅਲ ਇੰਟੈਲੀਜੈਂਸ (AI) ਦੀ ਟ੍ਰੇਨਿੰਗ ਦਿੱਤੀ ਜਾਵੇਗੀ।
- 5 ਤੋਂ 15 ਸਾਲ ਤੱਕ ਦੇ ਬੱਚਿਆਂ ਦੇ ਖੇਡਾਂ ਦੇ ਹੁਨਰ ਨੂੰ ਲੱਭਣ ਲਈ ਪਿੰਡ-ਪਿੰਡ, ਸ਼ਹਿਰ-ਸ਼ਹਿਰ ਵਿੱਚ ਟੈਲੰਟ ਹੰਟ ਪ੍ਰੋਗਰਾਮ ਚਲਾਇਆ ਜਾਵੇਗਾ।
- ਨਸ਼ਾ ਮੁਕਤ ਭਾਰਤ ਦਾ 100 ਹਫਤਿਆਂ ਦਾ ਇੱਕ ਪ੍ਰੋਗਰਾਮ ਸ਼ੁਰੂ ਹੋਣ ਜਾ ਰਿਹਾ ਹੈ। ਮੈਂ ਦੇਸ਼ ਦੇ ਲੋਕਾਂ ਨੂੰ ਕਹਿਣਾ ਚਾਹੁੰਦਾ ਹੈ ਕਿ ਅੱਗੇ ਆਓ ਅਤੇ ਇਸਦਾ ਹਿੱਸਾ ਬਣੋ।
- ਅਸੀਂ ਭਾਰਤ ਨੂੰ ਨਕਸਲ-ਮੁਕਤ ਬਣਾਉਣ ਦਾ ਸੰਕਲਪ ਲਿਆ ਸੀ। ਜਿਨ੍ਹਾਂ ਥਾਵਾਂ ਦੀ ਧਰਤੀ ਖ਼ੂਨ ਨਾਲ ਰੰਗੀ ਹੋਈ ਸੀ, ਉਹ ਹੁਣ ਨਕਸਲ-ਮੁਕਤ ਹਨ। ਪਰ ਦੇਸ਼ ਨੂੰ 'ਦਿਮਾਗੀ ਨਕਸਲੀਆਂ' (ਯਾਨੀ ਵਿਚਾਰਧਾਰਾ ਵਾਲੇ ਨਕਸਲੀਆਂ) ਦੀ ਪਛਾਣ ਕਰਨੀ ਚਾਹੀਦੀ ਹੈ ਅਤੇ ਉਨ੍ਹਾਂ ਨੂੰ ਅਲੱਗ-ਥਲੱਗ ਕਰਨਾ ਚਾਹੀਦਾ ਹੈ।
- ਮੈਂ ਨੌਜਵਾਨਾਂ ਨੂੰ ਅਪੀਲ ਕਰਦਾ ਹਾਂ ਕਿ ਉਹ ਆਪਣੇ ਪਰਿਵਾਰਾਂ ਦੀ ਮਦਦ ਕਰਨ ਅਤੇ ਸਹੀ ਜਾਣਕਾਰੀ ਭਰਨ ਵਿੱਚ ਸਹਿਯੋਗ ਦੇਣ, ਨਾਲ ਹੀ ਜਨਗਣਨਾ ਦੇ ਕੌਮੀ ਕੰਮ ਵਿੱਚ ਸ਼ਾਮਲ ਹੋਣ।
'ਸਪਤਧਾਰਾ'
ਤਸਵੀਰ ਸਰੋਤ, Doordarshan National
- ਸਪਤਧਾਰਾ ਦਾ ਪਹਿਲਾ ਖੇਤਰ ਮੈਨਿਊਫੈਕਚਰਿੰਗ ਸੈਕਟਰ ਹੈ। ਭਾਰਤ ਅਗਲੇ ਪੱਧਰ ਦੇ ਸੁਧਾਰਾਂ ਵੱਲ ਵੱਧ ਰਿਹਾ ਹੈ। ਅਸੀਂ ਮੈਨਿਊਫੈਕਚਰਿੰਗ ਸੈਕਟਰ ਨੂੰ ਅੱਗੇ ਵਧਾਉਣਾ ਹੈ, ਛੋਟੇ ਅਤੇ ਵੱਡੇ ਦੋਵੇਂ ਤਰ੍ਹਾਂ ਦੇ ਉਤਪਾਦ ਬਣਾਉਣੇ ਹਨ। ਪੂਰੀ ਵੈਲਿਊ ਚੇਨ ਸਾਡੀ ਹੋਣੀ ਚਾਹੀਦੀ ਹੈ। ਅਸੀਂ ਡਿਜ਼ਾਈਨ ਤੋਂ ਲੈ ਕੇ ਮੈਨਿਊਫੈਕਚਰਿੰਗ ਤੱਕ ਪੂਰਾ ਉਤਪਾਦ ਚਾਹੁੰਦੇ ਹਾਂ।
- 'ਸਪਤਧਾਰਾ' ਦਾ ਦੂਜਾ ਟੀਚਾ ਭੋਜਨ ਅਤੇ ਖੇਤੀਬਾੜੀ ਹੈ।
- ਤੀਜਾ ਖੇਤਰ ਟੈਕਨੋਲੋਜੀ ਅਤੇ ਇਨੋਵੇਸ਼ਨ ਹੈ। ਇਹ ਡੇਟਾ ਸੈਂਟਰ, ਰੋਬੋਟਿਕਸ ਅਤੇ ਉੱਭਰ ਰਹੀ ਟੈਕਨੋਲੋਜੀ ਦਾ ਦੌਰ ਹੈ। ਇਸ ਲਈ, ਭਾਰਤ ਨੂੰ ਇਨ੍ਹਾਂ ਟੈਕਨੋਲੋਜੀਆਂ ਦਾ ਹੱਬ ਬਣਨਾ ਹੋਵੇਗਾ। ਯੂਪੀਆਈ ਦੀ ਸ਼ੁਰੂਆਤ ਨਾਲ ਅਸੀਂ ਆਪਣੀ ਸਮਰੱਥਾ ਨੂੰ ਪਛਾਣਿਆ ਹੈ। ਸਾਡਾ ਟੀਚਾ ਹੋਣਾ ਚਾਹੀਦਾ ਹੈ ਕਿ 'ਮੇਡ ਇਨ ਇੰਡੀਆ' ਦੀ 6ਜੀ ਟੈਕਨੋਲੋਜੀ ਪੂਰੇ ਦੇਸ਼ ਵਿੱਚ ਪਹੁੰਚੇ।
- ਚੌਥੀ ਸਪਤਧਾਰਾ ਹੈ ਗਤੀ ਸ਼ਕਤੀ। ਭਾਰਤ ਵਿੱਚ ਤੇਜ਼ ਅਤੇ ਬਿਹਤਰ ਕਨੈਕਟੀਵਿਟੀ ਹੈ ਅਤੇ ਸ਼ਹਿਰਾਂ ਨੂੰ ਹਾਈ-ਸਪੀਡ ਰੇਲਵੇ, ਮਲਟੀ-ਮੋਡਲ ਹਾਈਵੇਅ, ਇਨਲੈਂਡ ਵਾਟਰਵੇਜ਼ ਅਤੇ ਮਲਟੀ-ਮੋਡਲ ਲੌਜਿਸਟਿਕਸ ਨਾਲ ਜੋੜਨ ਦੀ ਲੋੜ ਹੈ। ਪੋਰਟਸ ਆਧਾਰਿਤ ਵਿਕਾਸ 'ਤੇ ਧਿਆਨ ਕੇਂਦਰਿਤ ਕਰਨਾ ਹੋਵੇਗਾ।
- ਡਿਫੈਂਸ ਵੀ 'ਸਪਤਧਾਰਾ' ਦਾ ਹਿੱਸਾ ਹੈ। ਭਾਰਤ ਨੂੰ ਡਿਫੈਂਸ ਮੈਨਿਊਫੈਕਚਰਿੰਗ ਅਤੇ ਆਤਮ ਨਿਰਭਰ ਡਿਫੈਂਸ ਵੱਲ ਕੰਮ ਕਰਨਾ ਹੋਵੇਗਾ।
- ਭਾਰਤ ਨੂੰ ਗ੍ਰੀਨ ਮੋਬਿਲਿਟੀ ਅਤੇ ਗ੍ਰੀਨ ਮੈਨਿਊਫੈਕਚਰਿੰਗ ਹਾਸਲ ਕਰਨ ਦੀ ਲੋੜ ਹੈ। ਸਾਨੂੰ ਗਲੋਬਲ ਵਾਰਮਿੰਗ ਲਈ ਦੁਨੀਆ ਨੂੰ ਹੱਲ ਦੇਣੇ ਪੈਣਗੇ। ਕੋਸਟਲ ਟੂਰਿਜ਼ਮ ਅਤੇ ਫਿਸ਼ਰੀਜ਼ ਵਿੱਚ ਬਲੂ ਇਕਾਨਮੀ ਦੇ ਕਈ ਮੌਕੇ ਸਾਡੇ ਕੋਲ ਹਨ।
- ਸੱਤਵੀਂ ਧਾਰਾ ਜਿਸ 'ਤੇ ਸਾਨੂੰ ਧਿਆਨ ਦੇਣਾ ਹੈ, ਉਹ ਸਾਫ਼ਟ ਪਾਵਰ ਹੈ। ਯੋਗ ਨੇ ਦੁਨੀਆ ਨੂੰ ਜੋੜਿਆ ਹੈ, ਇਹ ਸਾਡੀ ਊਰਜਾ ਹੈ। ਸਾਡੇ ਕੋਲ ਹੋਲਿਸਟਿਕ ਹੈਲਥਕੇਅਰ ਹੈ, ਅਸੀਂ 'ਹੀਲ ਇਨ ਇੰਡੀਆ' ਨੂੰ ਹੋਰ ਅੱਗੇ ਵਧਾਉਣਾ ਹੈ। ਸਾਡੇ ਕੋਲ ਫ਼ਿਲਮਾਂ, ਕ੍ਰੀਏਟਿਵ ਦੁਨੀਆ ਅਤੇ ਗੇਮਿੰਗ ਹੈ। ਅਸੀਂ ਕ੍ਰੀਏਟਿਵ ਦੁਨੀਆ ਵਿੱਚ ਆਪਣੀ ਕਾਬਲੀਅਤ ਦਿਖਾ ਸਕਦੇ ਹਾਂ। ਸਾਡੇ ਕੋਲ 100 ਤੋਂ ਵੱਧ ਨੈਸ਼ਨਲ ਪਾਰਕ ਹਨ, ਪਰ ਗਲੋਬਲ ਟੂਰਿਸਟ ਨੂੰ ਆਕਰਸ਼ਿਤ ਕਰਨ ਦੇ ਮਾਮਲੇ ਵਿੱਚ ਅਸੀਂ ਪਿੱਛੇ ਰਹੇ ਹਾਂ। ਸਾਡੇ ਕੋਲ ਇਹ ਕਰਨ ਦੀ ਸਮਰੱਥਾ ਹੈ। ਕਨਸਰਟ ਇਕਾਨਮੀ ਵਧ ਰਹੀ ਹੈ, ਹਰ ਕਲਾਕਾਰ ਭਾਰਤ ਆਉਣਾ ਚਾਹੁੰਦਾ ਹੈ ਅਤੇ ਸਾਨੂੰ ਇਸ ਨੂੰ ਉਤਸ਼ਾਹਿਤ ਕਰਨਾ ਚਾਹੀਦਾ ਹੈ।
ਤਸਵੀਰ ਸਰੋਤ, PMO India/YT
ਇਸ ਸਾਲ ਦਾ ਸਮਾਗਮ ਇਸ ਲਈ ਵੀ ਖਾਸ ਹੈ ਕਿਉਂਕਿ ਰਾਸ਼ਟਰੀ ਗੀਤ ਵੰਦੇ ਮਾਤਰਮ ਦੇ 150 ਸਾਲ ਪੂਰੇ ਹੋਣ ਦਾ ਜਸ਼ਨ ਵੀ ਇਸੇ ਮੌਕੇ 'ਤੇ ਮਨਾਇਆ ਜਾ ਰਿਹਾ ਹੈ।
ਪਹਿਲੀ ਵਾਰ ਲਾਲ ਕਿਲ੍ਹੇ ਦੇ ਇਸ ਕੌਮੀ ਸਮਾਗਮ ਵਿੱਚ ਵੰਦੇ ਮਾਤਰਮ ਨੂੰ ਰਸਮੀ ਤੌਰ 'ਤੇ ਗਾਇਆ ਗਿਆ।
ਇਸ ਸਾਲ ਆਜ਼ਾਦੀ ਦਿਵਸ ਸਮਾਰੋਹ ਦਾ ਕੇਂਦਰੀ ਭਾਵ 'ਯੁਵਾ ਸ਼ਕਤੀ ਫਾਰ ਵਿਕਸਿਤ ਭਾਰਤ@2047' ਰੱਖਿਆ ਗਿਆ ਹੈ। ਇਸ ਦੇ ਜ਼ਰੀਏ ਵਿਕਸਿਤ ਭਾਰਤ ਦੇ ਟੀਚੇ ਵਿੱਚ ਨੌਜਵਾਨਾਂ ਦੀ ਭੂਮਿਕਾ ਨੂੰ ਪ੍ਰਮੁੱਖਤਾ ਦਿੱਤੀ ਜਾ ਰਹੀ ਹੈ।
ਤਸਵੀਰ ਸਰੋਤ, PMO India/YT
ਪ੍ਰਧਾਨ ਮੰਤਰੀ ਮੋਦੀ ਲਾਲ ਕਿਲ੍ਹੇ ਪਹੁੰਚਣ ਤੋਂ ਪਹਿਲਾਂ ਰਾਜਘਾਟ ਪਹੁੰਚੇ ਅਤੇ ਗਾਂਧੀ ਨੂੰ ਸ਼ਰਧਾਂਜਲੀ ਭੇਟ ਕੀਤੀ। ਲਾਲ ਕਿਲ੍ਹਾ ਪਹੁੰਚਣ 'ਤੇ ਉਨ੍ਹਾਂ ਨੂੰ ਗਾਰਡ ਆਫ ਆਨਰ ਦਿੱਤਾ ਗਿਆ।
ਤਸਵੀਰ ਸਰੋਤ, PMO India/YT
ਬੀਬੀਸੀ ਲਈ ਕਲੈਕਟਿਵ ਨਿਊਜ਼ਰੂਮ ਵੱਲੋਂ ਪ੍ਰਕਾਸ਼ਿਤ
