See di world leaders wey never congratulate Joe Biden

Live Coverage

Helen Oyibo and Moseph Ekine

1. 29 September 2020How Trump dey prepare?

   E dey normal for candidates to arrange mock debates for preparation, as one of di staff go act like say im na di candidate opponent.

   But Trump no use dis method and instead im go make im staff show am tins dem don write for paper to use memorise during presidential trips, according to CBS News.

   Trump campaign manager Tim Murtaugh tok say im oga don dey prepare “regularly when im face hostile news media” and say im work as president don already prepare am well-well to face Biden.

   "You know, wetin I dey do na debate prep. Every day, I dey take questions from you people over time," Trump bin tell tori pipo on Sunday.

   According to di New York Times, e tell im staff say im dey consider to attack Biden ontop im son controversial job for one Ukrainian energy company and di accusation of sexual assault from Biden former staff Tara Reade.

2. 29 September 2020Where di battlegrounds for dis election dey?

   At di moment, polls for di battleground states - areas wey fit vote Republican or Democrat - dey look like say e favour Joe Biden.

   Tori be say im get upper hand for Michigan, Pennsylvania and Wisconsin - three industrial states wey na small (1%) Donald Trump take win dem to collect victory for 2016.

3. 29 September 2020Who dey ahead for di polls, Trump or Biden?

   Joe Biden na im dey ahead of Donald Trump for di national polls for most of di year. E dey around 50% for recent months and don get 10-point lead on some occasions.

   Find out more for here about Who dey ahead Trump or Biden?

4. 29 September 2020Who be di debate moderator?

   Na TV debate moderator, "Chris Wallace" from Fox News go anchor di Cleveland presidential debate.

   Di 72-year-old journalist na registered Democrat from Washington, DC.

   Im parents name am Christopher because dem born am on Columbus Day for Chicago in 1947.

   For Harvard, Chris Wallace work as reporter for di student radio station WHRB. Wen young protesters do I-no-go-gree inside University Hall for 1969, e cover di event. And wen dem detain and carry am go jail (wit di oda students), e use im only phone call allowance to take file report, wit sign off wey make am popular: "Dis na Chris Wallace [reporting] from custody."

5. 29 September 2020Wetin di debate go look like?

   Di first of three presidential debate go happun ontop one campus for Cleveland, Ohio.

   Coronavirus safety measure mean say di debate hall no go get plenty pipo to watch am live.

   Normally, di candidates suppose shake hand but dis year dem no go do am.

   E go last for 90-minute, and advert no go show during di period.

   Fox News host Chris Wallace go moderate, and di format go be six questions for six segments of 15 minutes each.

   Di subjects wey Wallace choose na:

   • Supreme Court
   • Trump and Biden records
   • Coronavirus pandemic
   • Race protests and violence for cities
   • Election integrity
   • Economy

6. 29 September 2020Una welcome!

   Una good evening and welcome to our live coverage of di US presidential debate.

   We go take una live to Cleveland, Ohio wia di two candidates, Republican President Donald Trump and im opposition, Democrat candidate Joe Biden go face off.

   Make una stay with us!