You’re viewing a text-only version of this website that uses less data. View the main version of the website including all images and videos.
INEC, di electoral joinbodi for Nigeria don declare President Muhammadu Buhari of di All Progressives Congress, APC, di winner of di 2019 presidential elections.
Daniel Semeniworima and Nduka Orjinmo
Thugs don block road and no dey allow election officials transport results to state INEC office for Kogi State.
Dem don call police and army to protect di senatorial collation Centre for kogi West.
Kogi state electoral commissioner James Apam say no single result of di 21 local goment areas don enta di commission hand, for state wey tension already dey ground.
Nigeria election bodi INEC go open dia collation centre by 6pm on Sunday.
Dis collation centre na wia dem go receive all di different state results for di presidential election.
Na hia di INEC Chairmo oga Mahmood Yakubu go also announce di winner of di presidential election.
Candidate of di People's Democratic Party for Rivers State don win Obio Akpor Federal constituency for House of Reps and im go return to di Green Chamber.
Dis na as di INEC Returning Officer Dr. Godfrey Ngozi Woke announce di result for di collation centre for Obio Akpor local goment area.
Omoni Oboli na ogbonge Nigerian actress wey don collect plenti accolades ontop her acting skills and contribution for Nollywood but di hailing wey she collect on Saturday no get anything to do wit her acting skills.
Di actress na one of di pipo wey organise evri evri for Ward 4 Polling unit 033 for Victoria Garden City Lagos to make sure say di election go well-well.
She be one of di first pipo to reach di polling unit before 6:am, register pipo, organise tins, stay and monitor di whole process wey last till pass midnight into Sunday morning.
Nigerians salute am ontop social media.
Reports for Abonnema, Rivers State say about six boys from di community die from gbege wey happun.
According to statement from Acting Army tok tok pesin Col. Sagir Musa, di attack start from Charles and Bob-Manuel compound on Saturday afternoon for Abonnema wen jaguda boys block di major road for di town but troops from 6 Division Nigerian Army come face dem and six of di boys and one army lieutenant die.
Col. Musa come add say pipo wey dey behind di attack go face di law.
Police for Edo State, south-south Nigeria say dem arrest five jagusa pipo wey cause katakata for polling units.
Police tok-tok pesin, DSP Chidi Nwabuzor say all di five of dem wey go cause confusion for polling units dey police hand.
Im say for one polling unit dem scata di card reader while for one riverine community four gunmen enta polling unit snatch di election materials even before vote start. For anoda one DSP Nwabuzor say di jaguda pipo snatch ballot box full wit ballot paper afta pipo don suffer cast dis vote.
Oga patapata for INEC inside Umuahia North for Abia State, Ezinne Chiebonam say di elections for Ndume ward dem rescheduled am to Sunday as result sheets for di National Assembly bin no complete.
Tori be say oda party agents accept, but APC party agents dey greedie say make dem postpone am to Monday or Tuesday as voters don go church and no go fit come out on Sunday
Di place wey dem go gada all di election results inside Ekiti State for south west Nigeria don open.
Na hai dem go bring all di different results from di local goment areas.
Di Obong of Calabar, His Royal Highness Edidem Ekpo Abasi Otu V, don advise politicians say politics no be do or die affair. Im say make dem accept di result of di election.
Di Obong say politics na game wey anybody fit lose or win.
Kano Police Command say dem arrests eight pipo wey commit various offences across some polling units for di state on Saturday.
Di command tok tok pesin DSP Haruna Abdullahi say dem arrest four pipo wey carri ten PVCs wey no be dia own for Sabon Gari while dem arrest anoda four for Gabasawa local goment area afta dem destroy some ballot boxes but dem no carry am go.
E say all di eight pipo dey wit Criminal Investigations Department for now.
Meet Baba wey night duty no allow am vote. Mallam Yunusa wey dey do mai guard for Hausawa Primary School wey serve as voting station just dey watch pipo dey vote: “Wetin happun be say I do night work and as I go house around 7am say make I go carry my PVC. By di time I reach, my wife and children don lock di house comot go vote and my PVC dey inside, na till anoda four years for me,” im tok
Sani Jibo oversleep sotey voting time pass on Saturday.
By di time e wake up around 2pm go im polling unit for Kano State, officials say dem don close.
For around 3am on Sunday, gunmen enta one collation center begin cause wahala for Osun State, southwest Nigeria.
Kano Police tok tok pesin Abdullhi Haruna don tell BBC Pidgin say dem dey look for one man wey snatch ballot box for Takai local goment area for di state.
Di policeman add say dem dey hopeful say dem go arrest am on Sunday as pipo wey vote for di unit say dem know am.
”Na as di presiding officer dey try put di box for car afta counting na im e seize am from her come run away," DSP Haruna tok.
Election bodi INEC say dem go soon announce di date wen dem go do election for some areas wia election no hold sake of violence wey happun dia.
Two local goment areas for Rivers state - Akuku Toru and Bonny follow for di areas wia INEC go do election again. Abonnema wey be di capital of Akuku Toru local goment na di hometown of APC oga Tonye Cole.
INEC oga for Voter Education and Publicity Festus Okoye tok for Abuja say di commission receive report of violence for Akuku Toru and Bonny come add say, “ so long as di commission no fit deploy to dis areas dem, e mean say voting no happun dia and di commission go consult wit relevant authorities and Resident Electoral Commissioners as e concern those places and we go announce di date wey election go take place.”
Tori be say some pipo wey carri gun attack INEC office for Oriade local goment area of Osun state for early mor-mor of Sunday.
Dem shoot for air and burn INEC voting materials. Dem also burn two generators and BBC Yoruba tori pesin wey bin dey ground say bullet hit two corpers wey bin dey ground.
Sunday morning afta di presidential and National Assembly election for Port Harcourt, e be like pipo neva wake up from sleep as evriwia dey quite and di normal busy Aba road still dey dry.
Even though di ‘no movement’ order wey police bin give start from 12 midnight on Friday till afta election don end, pipo still dey indoors.
Even though Port Harcourt city bin dey peaceful on Saturday, reports from oda local goment dem like Okrika, Ikwerre, Emohua, Abua/Odual, Andoni, Asari Toru, Akuku Toru and Bonny show say gbege bin happen.
INEC don say dem go announce di date dem go do election wey no hold for Akuku Toru, Bonny and some wards for Okrika Local goment wia gbege bin happun dia.
A day afta presidential and senatorial elections happun for Nigeria, pipo for Akwa Ibom dey wait to hear result of who and who win for di state.
At about 9:30pm on Saturday most polling units bin don paste dia results and return back di materials to INEC headquarters for Uyo. Despite say di elections dey largely peaceful, for places like Ibiono Ibom, Itam and Essien Udim wia PDP baba Senator Godswill Akpabio come from, tori be say Jaguda pipo scatta di place with pletin gunshots.
For Ward 4 for Uyo, kasala burst wen voters notice say result sheet no dey for House of Reps and dem protest say dem no go vote until dem see am. At around 2pm na im voting start for di unit as INEC say dem mistakenly carri di result sheet go anoda place.
Dem dey gada election results go collation centers for Cross Rivers State, wia voting bin dey peaceful and pipo comot wella to vote.
Small wahala bin dey Bakassi local goment area wia IDPs no fit vote because of say Inec no bring dia card readers come di unit wey dem bin register.