د نړۍ ځينې مشران څومره کلنۍ تنخا لري؟

یوې نوې څېړنې د نړۍ د ځینو شتمنو هېوادونو د ولسمشرانو او لومړیو وزیرانو کلنۍ تنخواه په ډاګه کړې دي.

د مشرانو معاشونه په اوسني وخت کې له ډالرو سره پرتله شوي دي.

د نړۍ د ټولو ولسمشرانو په پرتله د امریکا متحده آیالاتو ولسمشر بارک اوباما ډېره تنخواه لري، چې په کال کې څلور سوه زره ډالرو ته رسیږي. په امریکا د ولسمشر معاش د جورج بوش د واکمنۍ پر مهال (۲۰۰۱) کې دوه برابره شو.

تر هغه وروسته د کاناډا لومړی وزیر سټیفن هارپر په دویم ځای کې دی او د کال ۲۶۰۰۰۰ ډالره معاش اخلي.

د جرمني لومړۍ وزیر انګېلا مرکل ۲۱۶۰۰۰ یورو، چې ۲۳۴۰۰۰ ډالره کیږي کلنی معاش اخلي. د جرمني د لومړۍ وزیرې او نورو وزیرانو معاش په مارچ میاشت کې ۲.۲٪ ډېر شوی دی.

تر مېرمن مېرکل وروسته د سویلي افریقا ولسمشر جاکوب زوما په څلورم ځای کې دی، چې د کال ۲۲۳،۵۰۰ ډالره معاش اخلي.

د بریتانیا د لومړي وزیر کلنی معاش له ۲۱۴۸۰۰ ډالرو سره برابر دی. چې په دې کې د پارلمان د غړیتوب معاش هم ورګډ دی.

د شتمن هېواد جاپان لومړی وزیر شینزو آبې د کلني معاش اخیستلو په برخه کې شپږم ځای لري. ښاغلی شینزو ابې د کال ۲۰۲۷۰۰ ډالره معاش اخلي.

د نړۍ د یو بل شتمن هېواد فرانسې ولسمشر فرانسوا هولاند ۱۹۴۳۰۰ ډالره کلنی معاش لري. په ۲۰۱۲ کال کې واک ته تر رسېدو وروسته ولسمشر هولاند خپل دېرش سلنه معاش نه اخلي پرته له هغه یې تنخواه ۲۷۴۵۰۰ ډالرو ته رسېده.

د روسیې د لومړي وزیر ویلادیمیر پوتین کلنی معاش د نړۍ د نورو مشرانو په پرتله اتم ځای لري. د هغه معاش ۸،۲ میلیونه روبله دی چې ۱۳۶۰۰۰ ډالره کیږي. ولسمشر پوتین تېره اونۍ د خپلې تنخواه د لس سلنې د کولو اعلان وکړ.

د ایټالیا لومړی وزیر ماتیو رینزي ۱۲۴۶۰۰ ډالره کلنی معاش اخلي.

تر هغه وروسته د برازیل لومړی وزیره دیلما روزېف په لسم ځای کې دی چې د کال ۱۲۰۰۰۰ ډالره معاش لري.

د هند د لومړي وزیر کلنی معاش ۱۹۰۰۰۰۰۰ هندي کلدارې دی، چې یواځې ۳۰۳۰۰ امریکايي ډالره کیږي.

د چین ولسمشر شه جین پینګ چې هېواد یې د نړۍ دویم ستر اقتصاد دی د کال یواځې ۲۲۰۰۰ ډالره معاش لري. په داسې حال کې چې د روان کال په پیل کې یې معاش شپېته سلنه لوړ شوی دی.