په الاقصی جومات کې د لمونځ کونکو او اسراییلي پولیسو ترمنځ نښتې شوې

د اسراییلو پولیس وايي، سهار وختي عملیاتو کې یې ۳۵۰ مسلمان عبادت کوونکي نیولي دي. پولیس وايي دغو عبادت کوونکو سره چې اعترضیان یې بولي، په جومات کې دننه د اور اچونې وسایل، لرګي او ډبرې وې.

فلسطینیان بیا وایي چې اسراییلو ځواکونو له خلکو د سیمې پاکولو لپاره لاسي بمونه او ربړي ګولۍ کارولې او ۱۴ تنه یې ټپیان کړي دي.

د فلسطینۍ ادارې سرې میاشتې ټولنه وایي، اسراییلي ځواکونو ان سیمې ته د روغتیایي ډلو د ورتګ مخه هم نیولې ده.

له پېښو وروسته وسله والو له غزې تراډې د اسراییلو په لور نهه راکټ توغولي او اسراییلو یې هم په ځواب کې هوایي بریدونه کړي دي.

وروستی تاوتریخوالي د روژې میاشتې او د یهودیانو د عید الفصح سره هم مهال رامنځته شوي.

الاقصی جومات چې د مسلمانانو او یهودیانو لپاره سپېځلی ځای دی، وخت ناوخت د دواړو خواو ترمنځ د مذهبي مراسمو په وخت کې د تاوتریخوالي سیمه وي.

د سه شنبه په ورځ فلسطینیان له همدې امله په جومات کې راټول شوي وو چې یهودي سخت دریځو غوښتل هلته دننه شي او د فصح اختر په مناسبت هلته په ټاکلي ځای کې یوه وزه قرباني کړي.

اسراییلي پولیسو ویلي، ځوانو فلسطینیانو قانون مات کړی او غوښتل یې هلته ګډوډي رامنځته کړي.

په شخړو کې یو پولیس هم د ډبرې ګوزار له امله ټپي شوی.

په خواله رسنیو خپرو شویو وېډیوګانو کې هم لیدل کېږي چې پولیس او معترضین یو پر بل بریدونه کوي.

د فلسطین د ولسمشر ویاند نبیل ابو ردینه د اسراییلي ځواکونو عملیات غندلي او هغه یې د مسلمانو عبادت کونکو او سپیڅلي ځای پر ضد د " اشغالګرو" برید بللی دی.

حماس ډلې هم دا نه بښونکی عمل بللی او خبرداری یې ورکړی چې بدې پایلې به ولري.

دې ډلې د اسراییلو په لور توغندي هم توغولي او اسراییلي ځواکونو بیا د ځمکې او هوا له لارې په سیمه کې بریدونه کړي دي.

له یادو پېښو وروسته وېره ډېره شوې چې ښایې د روژې په میاشت کې بیا د دواړو خواوو ترمنځ جګړې زور واخلي.