لبنان کې بانکونه 'تر نامعلوم وخته' پورې تړل شوي دي

په لبنان کې د بانکونو اتحادیه وايي، تر څو چې یې چارواکو امنیت خوندي کړی نه وي، تر 'نامعلوم وخته ' به بانکونه تړلي پاتې شي.

تېره اونۍ د لبناني بانکونو مشتریانو خپلو کنګل شویو بانکي حسابونو ته د لاسرسي په موخه پر ځايي بانکونو یرغلونه وکړل، چې له کبله یې د لبنان بانکونو ټولنې د بانکونو تړلو اعلان وکړ.

دوی وايي، د بانکونو کارکوونکي له خطرونو سره مخامخ دی.

د چهارشنبې پر ورځ یوې ښځې په یوه بانک کې له جعلي وسلې سره وېره، ترهه رامنځته کړه او د کورنۍ درملنې لګښتونو لپاره یې د پیسو غوښتنه کوله.

ورته نورې پېښې هم شوې او یوازې د جمعې پر ورځ د ورته پنځو پېښو رپوټونه ورکړل شوي دي.

لبنان له یوه سخت مالي او اقتصادي بحرانه تېرېږي. د دې هېواد نژدې اتیا سلنه وګړي د خوړو او دارو - درملو لګښتونو پوره کولو لپاره ستونځې ګالي.

په لبناني بانکونو کې د داسې پېښو په هکله ولس ملاتړ څرګندوي او د داسې کسانو مایوسي څرګندونه یې بولي، چې مجرمان نه دي، خو د لګښتونو پوره کولو لپاره بله لار نه لري.

په ۲۰۱۹ کال کې چې د ډالر پر وړاندې د لبناني پاونډ ارزښت وغورځېد او انفلاسیون زیات شو، ځايي بانکونو د ډالرو پر ترلاسه کولو محدودیتونه ولګول.