شري لنکا کې د احتجاجونو دوام؛ ولسمشر خپله استعفا تائید کړې
د عکس سرچینه، Getty Images
شري لنکا کې د لومړي وزیر رانیل ویکرما سنګا دفتر وایي ولسمشر ګوتابایا راجاپاکسا ورته خپله استعفاء تائید کړې ده.
د لومړي وزیر دفتر یوه اعلامیه کې ویلي ښاغلی راجاپاکسا به د چارشنبې پر ورځ استعفا وکړي.
دا په داسې حال کې ده چې پخپله له ولسمشر ګوتابایا راجاپاکسا لا په دې تړاو څه نه دي اورېدل شوي.
لومړي وزیر رانیل ویکرما سنګا ژمنه کړې چې دی به هم ګوښه کېږي.
شري لنکا کې اعتراض کوونکو له وړمې ورځ راهیسې ولسمشرۍ ماڼۍ او د لومړي وزیر استوګنځی نیولي او وايي تر هغې به ترې ونه وځي چې دوی نه وي ګوښه شوي.
د دغه هېوا د اساسي قانون له مخې د ولسمشر استعفا یوازې هغه مهال رسمآ منل کېدای شي، چې د پارلمان رئیس ته لیکلې استعفا وسپاري چې دا کار تر اوسه نه دی شوی.
تر دې وړاندې د پارلمان رئیس د شنبې پر روځ ویلي و چې ولسمشر راجاپاکسا به د جولای پر ۱۳ مه ګوښه شي.
احتجاج کوونکي څه غواړي؟
د عکس سرچینه، EPA
شري لنکا کې احتجاج کوونکو ویلي، دوی به تر هغې د ولسمشر او لومړي مرستیال له استوګنځایونو و نه وځي چې ولسمشر او لومړی وزیر یې په رسمي ډول له واکه نه وي لرې شوي.
د شري لنکا ولسمشر ګوتابايا راجاپاکسا تر هغې وروسته د استعفا اعلان وکړ چې لاريونوال د هغه پر رسمي استوګنځي ورننوتل او د لومړي وزير کور يې هم وسوځاوه.
د پېښې پر مهال ولسمشر او لومړی وزير په خپلو استوګنځايونو کې نه وو او ويل کېږي چې لا مخکې خوندي ځايونو ته لېږدول شوي وو.
شري لنکا پراخه کچه انفلاسیون سره مخ او د بهرنیو اسعارو د زېرمو کمښت له کبله د خوراکي توکو، تېلو او درملو واردولو کې له ستونزو سره لاس ګریوان ده.
