پاکستان کې درنې واورې؛ ''په موټرو کې ایسار ۲۲ سیلانیان وژل شوي''

پاکستاني چارواکي وايي، په مري سیمه کې د درنې واورې له کبله لږ تر لږه ۲۲ کسان وژل شوي دي. د کورنیو چارو وزیر شیخ رشید احمد وايي، پلازمېنې اسلام اباد ته څېرمه د پنجاب مري سیمه کې دغه کسان چې ډېری یې سیلانیان دي، په ګاډو کې ایسار پاتې وو. په وژل شویو کې د یوې کورنۍ اته کسان هم شامل دي.

د نوموړي په وینا اوس هم په سیمه کې نژدې زر ګاډي ایسار دي او د مرستې لپاره سیمې ته پوځيان استول شوي دي.

د ژغورنې د ډلو په وينا وژل شويو کې ۱۰ نارينه، دوې مرمنې او لس ماشومان شامل دي.

شیخ رشید احمد په یوه ویډیويي بیان کې ویلي، له ۱۶ تر ۱۹ پورې د هغو کسانو مړینه تایید شوې، چې د مري سیمې په لار کې په ګاډو کې ایسار پاتې شوي وو.

پنجاب حکومت په سیمه کې بېړنیز حالت اعلان کړی دی او له اسلام اباده د مري پر لور غځېدلې لارې تړل شوې دي.

پاکستان کورنیو چارو وزیر وايي، خورا ډېر خلک لا هم د مري په شاوخوا کې د درنې واورې له کبله د لارې اوږدو کې ایسار پاتې دي.

د پاکستان هوا پېژندني ادارې وړاندوینه کړې چې راتلونکو شپږ ساعتونو کې ښايي په سیمه کې نور اورښت هم وشي.

لومړي وزیر عمران خان پر پېښه خواشیني څرګنده کړې او د پلټنو امر یې کړی.

له دې مخکې د راولپنډي سیمې چارواکو په یوه ټویټر پیغام کې وویل، ۲۳ ګاډي له سیمې ایستل شوي دي، خو تر ۱۰۰۰ پورې ګاډي لا هم ایسار پاتې دي.

د مري سیمو کمشنر هم په یوه ټویټر پیغام کې ویلي، ګڼ شمېر ونې له بېخه ختلې چې له کبله یې د مرستې چارې له خنډ او ځنډ سره مخامخ دي.

مري سیمې ته د سیلانیانو ننوتو مخنیوي لپاره په سیمه کې پولیس ځای پر ځای شوي دي.

د پاکستان هوا پېژندنې ادارې چارواکي وايي، مري سیمه کې تر اوسه پورې نژدې څلور فوټه واوره شوې.

د یادونې ده، چې له دې مخکې د پاکستان په شمالي سیمو کې د اورښتونو له کبله لومړی د خیبر پښتونخوا په ځینو سیمو کې د سیلانیانو پر ورتګ بندیز ولګېد او پرون جمعه ماښام مري ته هم د سیلانیانو پر ورتګ بندیز لګول شوی و.