کوویډ: مسکو کې خوړنځي او دکانونه تړل شوي دي
د عکس سرچینه، Getty Images
په داسې حال کې چې روسیه کې د کوویډ - ۱۹ نوي ناروغان ډېر شوي، د دغه هېواد پلازمېنې مسکو په ځینو برخو کې ښوونځي، رستورانونه او دکانونه د وېروس خپرېدو مخنیوي په پار تړل شوي دي.
د پلازمېنې ډېری برخو کې یوازې د ورځنیو اړتیاوو پلور توکو دکانونو، درملتونونو ته د پرانیستل کېدو اجازه ورکړل شوي او دغه راز د خوړو پلور هټیو ته ویل شوي چې کورونو او مېشت ځایونو ته پاخه خواړه استولای شي.
روسیې کې کارګرانو ته د شنبې له ورځې د نهو ورځو لپاره د وېروس خپرېدو مخنیوي په پار رخصت ورکړل شوی.
دغه هېواد کې د تېرو ۲۴ ساعتونو کې د کورونا له کبله د ۱۱۵۹ کسانو مړینه تایید شوې ده.
بل لور ته په همدې موده کې د روسیې په بېلا بېلو سیمو کې پر کورونا وېروس د اخته شویو کسانو شمېر ۴۰ زره ۹۶ کسانو ته رسېدلی، چې دا خپله یو ریکارډ کچه بلل کېږي.
روسیه کې د کوویډ - ۱۹ له کبله تر اوسه په رسمي توګه له ۲۳۰ زره د ډېرو کسانو مړینه تایید شوې ده.
دا شمېر په اروپا کې د کوویډ له کبله د مړو شویو کسانو تر ټولو لوړ شمېر دی او دغه راز روسیه د کورونا وېروس له کبله د نړۍ له ډېرو ځپل شویو هېوادونو یو بلل کېږي.
تېر اکتوبر کې د هېواد احصایې دولتي ادارې 'روستات ' د کوویډ له کبله د مړو شویو روسیانو شمېر له ۴۰۰ زره کسانو هم ډېر وباله چې د حکومتي شمېرو پرتله زیات دی.
د 'اوور ورلډ ' شمېرو ادارې رپوټ کې ویل شوي، د روسیې ټولټال نفوس پرتله اوس هم دغه هېواد کې د واکسین شویو کسانو شمېر لږ دی او ایله ۳۲ اعشاریه اتو ته رسېږي.
د روسیې پرتله په ډېری اروپايی هېوادونو کې د واکسین شویو کسانو شمېرې خورا لوړې دي.
