جګو بوټانو کې د پوځي مارش پلان توند غبرګونونه پارولي

د اوکراین دفاع وزارت هغې پرېکړې ته توند غبرګونونه څرګند شوي، چې غواړي ښځینه سرتېرې یې راتلونکې میاشت د پوځي بوټانو پر ځای داسې پیزارو (بوټانو) کې مارش وکړي، چې اوږدې پوندې لري.

د دغه هېواد پارلمان کې د اپوزیسیون یوه مشره ارېنا ګیراشچینکو وايي، دا د مساواتو پر ځای جنسیتي تبعیض دی.

اوکراین کې د اګست پر ۲۴ مه د شوروي اتحاد له منځه تلو وروسته د خپلواکۍ ورځې په مناسبت یو پوځي مارش پلان شوی دی.

د اوکراین دفاع وزارت چارواکي بیا وايي، دغه ډول بوټان له مقرراتو سره سم د یونیفورم برخه دي.

بل لور ته اوکراین کې دې پرېکړې ګڼ کسان حیران کړي دي او د پارلمان یو شمېر غړو له دفاع وزیر اندرې تاران غوښتي چې بښنه وغواړي.

مبصر ویټالي پورتنیکوف پر فېسبوکپاڼه لیکلي:

''د اوږدو پوندو په بوټانو کې پوځي مارش رښتیا چې رسوايي ده. '' د نوموړي په وینا ځینې چارواکي یو ډول ''لرغونی ذهنیت '' لري.

اغلې ګیراشچینکو وايي، لومړی ځل یې په پوځي یونیفورم کې د دې ښځینه پوځیانو د تصویر له لیدو وروسته چې د مارش لپاره یې تمرین کاوه، ګومان وکړ، چې دا ګواکې یوه ټوکه ده.

نوموړې زیاتوي دا مساواتو پر ځای جنسیتي تبعیض دی او دا حیرانه ده، چې چارواکو ته ولې د ښځینه پوځیانو لپاره د مناسب زره پوښ طرح کولو پر ځای د اوږدو پوندو بوټان ډیزاین کول ډېر مهم ښکاره شوي.

د پارلمان مرستیاله مشره اولینا کوندراتیوک وايي، دا وروستیو کې د هېواد په ختیځ کې د هغو بېلتون پالو پر ضد چې د روسیې ملاتړ ورسره وو، ۱۳۵۰۰ ښځینه پوځیانو په جګړه کې برخه درلوده.

د اوکراین پوځ کې له ۳۱ زرو ډېرې ښځینه پوځیانې خدمت کوي، چې نژدې ۴۰۰۰ یې افسرانې دي.