کورونا: سعودي عرب سږکال یوازې ځايي اوسېدونکو ته د حج کولو اجازه ورکړه
سعودي عرب اعلان کړی چې د کورونا وېروس خپریدو د دوام له امله یې سږکال د حج مراسم یوازې د سعودي وګړو او په سعودي عرب کې د اوسېدونکو بهرنیانو لپاره محدود کړي دي.
د سعودي عربستان د حج او عمرې وزارت ویلي، سږکال به یوازې ۶۰ زرو کسانو ته اجازه ورکړي چې د حج په مراسمو کې ګډون وکړي.
د وزارت په وینا یوازې هغه کسان چې عمرونه یې له ۱۸ تر ۶۵ کلونو پورې وي، د کورونا ضد واکسین شوي وي او کومه بله پخوانۍ ناروغي و نه لري کولای شي چې د حج په مراسمو کې ګډون وکړي.
تر دې وړاندې د سعودي چارواکو ویلي وو چې د ځانګړو شرایطو له مخې به بهرنیانو ته هم سږکال اجازه ورکړي چې د حج په مراسمو کې د ګډون لپاره سعودي عرب ته سفر وکړي.
پروسږکال هم د کورونا وېروس د خپرېدو له امله سعودي عرب د حج په مراسمو کې د بهرنیانو ګډون منع کړ او یوازې په خپله له سعودي عربه یې یو محدود شمېر کسانو ته یې اجازه ورکړه چې د حج په مراسمو کې ګډون وکړي.
تېر کال ځینو هېوادونو هم د حج له مراسمو وړاندې اعلان کړی و چې خپلو وګړو ته به د حج په مراسمو کې د ګډون اجازه ورنکړي.
د عکس سرچینه، EPA
د یادونې وړ ده چې د کورونا وبا له خپرېدو مخکې هر کال د حج په مراسمو کې له ټولې نړۍ نه څه باندې دوه میلیونه مسلمانانو ګډون کاوه.
تېر اکتوبر کې د سعودي عرب حکومت له ۷ میاشتنې ځنډ وروسته خپلو وګړو او په سعودي کې مېشتو بهرنیانو ته د عمرې ترسره کولو اجازه ورکړه.
عمره کوونکي اړ وو چې له اعلان شویو سپارښتنو سره سم ماسکونه وتړي، خپل جای نماز ولري او خپلمنځي واټن وساتي.
دغه راز د کعبې شریفې او حجر الاسود لمس کول هم منع شوي وو.
