ايټاليا کې د کېبل ګاډي لوېدو ۱۴ او چين کې د خرابې هوا له امله ۲۱ کسان وژل شوي

ايټاليا کې د کېبل ګاډي لوېدو له کبله ۱۴ تنه وژل شوي او دوه ماشومان سخت ټپيان شوي دي. پېښه د ايټاليا په شمال کې د مګيور جهيل ته څېرمه رامنځ ته شوې ده.

په دغه کېبل ګاډي کې د تفريح او سیلانۍ له سټرسیا ښاره سپرلۍ موټېرون غرونو ته لېږدول کېدې.

په ويډيويي تصويرونو کې د ګاډي ټوټې ښکاري چې له ونو سره نژدې پر ځمکه پرتې دي.

چارواکي وايي دوه ماشومان چې عمرونه يې د پنځو او نهو کالو دي د هليکوپټر له لارې ټورين روغتون ته لېږدول شوي دي.

د ژغورنې ډلې په يوه ټويټ کې تاييد کړې چې د مړو شويو کسانو شمېر اوس ۱۴ تنو ته رسېدلی. وړاندې دغه شمېرې لږ ښودل کېدې.

چين کې خرابې هوا ۲۱ کسان مړه کړي

د چین د شمال لوېدیځ ګانسو ولایت یوه غرنۍ سیمه کې ورښت، سړې هوا او سختو بادونو ۲۱ کسان مړه کړي دي.

دغه کسان د ۱۰۰ کیلومتره په واټن د ځغاستې یوه سیالۍ کې د ګډون په لړ کې دې ځنګلي سیمې ته تللي و.

دا سیالي د شنبې پر ورځ تر هغې وروسته ودرول شوه چې د ۱۷۲ ګډونوالو د ورکېدو خبر یې ورکړل شو.

ویل شوي ډېر ځغاستونکي د سړې هوا او د بدن د تودوخې درجې د لوېدو پایله کې مړه شوي دي.

چارواکو ویلي پاتې ۱۵۱ ځغاستونکي ژغورل شوي چې اته یې ټپي دي.