د "اسلامي دولت" (داعش) نوی مشر عبدالله قرداش څومره پېژنئ؟
د "اسلامي دولت" نومې ډلې د ماتې خوړلو تر اعلان او په ۲۰۱۹ کال یې د مشر ابو بکر البغدادي تر وژل کېدو وروسته له تېرو دوو میاشتو راهیسې د دغې ډلې فعالیتونه یوځل بیا ډېر شوي دي.
دغې ډلې بل مشر (ابو ابراهیم الهاشمي القرشي) ټاکلی چې د امریکايي او عراقي امنیتي او استخباراتي سرچینو په وینا، اصلي نوم یې "حجي عبدالله قرداش" دی.
د بي بي سي خبریال فراس کیلاني یې په اړه دا رپوټ چمتو کړی دی.
د عراق استخباراتي سرچینو د قرداش د ژوند لاسوند موندلی چې وايي په ۱۹۷۶ کال د عراق موصل لوېدیځ "المحلبیة" سیمه کې زیږېدلی دی.
اصلي نوم یې امیر محمد سعید عبدالرحمن محمد دی. په ۲۰۰۰ کال د موصل پوهنتون کې یې قراني علوم او اسلامي روزنې برخه کې زدکړې کړې او له همدې پوهنتون فارغ شوی دی.
په ۲۰۰۲ کال یې عسکري هم کړې ده او بیا د عراق شمال لوېدیځ تلعفر ښار ته ستون شوی.
په امیر سعید (حجي عبدالله) هم مشهور و.
له "انصار السنة" ډلې سره د عبدالرحمن القاذلي له لارې یوځای شوی، خو بیا ژر په ۲۰۰۴ کال له القاعده شبکې سره یوځای شو او له ابو مصعب الزرقاوي سره یې بیعت وکړ.
د الزرقاوي له وژل کېدا او په ۲۰۰۶ کال عراق کې د "اسلامي دولت" ډلې جوړېدو تر اعلان وروسته، قرداش د داعش له خوا په ۲۰۰۷ کال د موصل ښار قانون جوړوونکی اعلان شو.
امریکايي ځواکونو د ۲۰۰۸ کال لومړیو کې ونیو. له امریکايي ځواکونو سره دوه کاله بندي و.
له زندانه تر وتلو وروسته په نینوا ولایت کې چارواکی او د داعش ډلې د مخکېني مشر ابو بکر البغدادي نژدې ملګری شو.
په ۲۰۱۲ کال د هغه یو وروستی کارت راڅرګند شو، چې ډېره لنډه ږیره پکې لري.
په سوریه او عراق کې د "اسلامي دولت" (داعش) د قلمرو په پراخېدو سره، قرداش د دغې ډلې د عدلیې وزیر یا قاضي وټاکل شو.
خو د "اسلامي دولت" نومې ډلې له ړنګېدا او پر موصل د نړیوالې ټلوالې د بمباریو له پیلېدو سره په یوه هوايي برید کې د قرداش ښۍ پښه ټپي شوه، دی قائم ښار ته ولاړ بیا بوکمال ته ولېږدېد، خو له بریده ونه ژغورل شو.
د هغه شخصي ساتونکی ووژل شو او دی ټپي شو، همدا وو چې د سوریې شمالي ادلب ښار ته ولېږدول شو.
له هماغه ځایه یې د البغدادي تر وژل کېدا پورې د "اسلامي دولت" نومې ډلې ډېری چارې مخته بوولې.
عراقي استخباراتي داسې انګېري، چې قرداش اوس له خپل هغه پټنځي چارې سمبالوي، چې د فرات ختیځ کې د سوریې دیموکراتو ځواکونو تر واک لاندې دی.
