د دمشق مفتي عدنان الافیوني وژل شوی
د عکس سرچینه، Getty Images
د دمشق مفتي شیخ عدنان الافیونيي د پلازمېنې شمال لوېديځ قدسیا سیمه کې هغه مهال ووژل شو، پر موټر پورې نښلول شوي چاودېدونکي توکي وچاودل.
د سوریې د اوقافو وزارت وايي، افیوني د سوري ولسمشر بشارالاسد نژدې کس و او له سوري مخالفو ډلو سره د حکومت د هوکړې عملي کولو کې یې مهم رول لوبولی دی.
تر اوسه سوري چارواکو د نوموړي د وژل کېدو د پړې ګوته کومې ډلې ته نه ده نیولې.
شیخ افیوني څوک و؟
د سوریې د اوقافو وزارت وايي، شیخ افیوني د سوریې او اسلامي نړۍ لوی عالم و او د سخت دریخۍ پر وړاندې د شام نړیوال اسلامي مرکز منشي هم و.
د عکس سرچینه، Reuters
شیخ عدنان افیوني په ۱۹۵۴ کال دمشق ښار کې زیږېدلی، لومړنۍ زدکړې یې په مدرسو کې کړې دي، بیا د دعوت او ارشاد شرعي انستیتیوت ته لېږدېدلی دی.
ام درمان اسلامي پوهنتون کې یې هم لوړې زدکړې کړې دي، هلته یې ماسټري کړې ده.
عدنان افیوني په دیني چارو کې بېلابېلې دنده ترسره کړې.
د دمشق د ارشاد مشر تېر شوی.
د عکس سرچینه، Reuters
په ۲۰۱۹ کال نوموړی د سخت دریځۍ پر وړاندې د شام نړیوال اسلامي مرکز مشر شو، دا مرکز د ملا امامانو او خطیبانو لپاره پروګرامونه لري.
افیوني داسې مهال وژل شوی چې له تېرې څه مودې راهیسې هلته هدفي وژنې کمې شوې دي.د دمشق مفتي عدنان الافیوني وژل شوی
