ایا سعودۍ ښځې د خپلې نکاح واک درلودلی شي؟

د سعودي د "مجلس الشوری" (پارلمان ته ورته جوړښت) یوې غړې اقبال درندري تر ټویټ وروسته چې له ولي امر پرته یې د مېرمنو د ودېدو په اړه د خپل ځان د ودولو د حق په اړه بحث غوښتی و، پر خواله رسنیو د سعودي ښځو بحثونه تاوده شوي دي.

اقبال په خپل ټویټ کې د شرعي علومو څېړونکې او حقوقپوهې سهیله زین العابدین حماد د مقالې ځینې برخې راخیستې او دا حدیث یې هم ذکر کړی چې "له وکیل پرته نکاح نه شته".

هغې په خپله مقاله کې د پوهنتونونو پر نصاب هم نیوکه کړې ده او وايي چې "د ښځې ځان ودول د زنا دودول" دي.

اقبال په تېره مې میاشت کې د سعودي یوې شورا ته په تېره مې میاشت کې سپارښتنه وکړه چې یوې بالغې نجلۍ ته د ولي امر له اجازې پرته د ځان ودولو حق ورکړل شي، خو د دې شورا قضايي جرګګۍ "ددغې سپارښتنې له نه منلو بخښنه وغوښته؛ ځکه چې له شرعي متنونو سره په ټکر کې ده او په نکاح کې د ولي امر حضور یو شرط دی."

"شرعي متن روښانه دی"

د سعودي د شورا د غړې دې ټویټ سعودي عربستان کې پر خواله رسنیو تاوده بحثونه جوړ کړي او بیا یې دا لانجمن بحث پیل کړی چې "ایا ښځه د خپل ځان ودولو حق لري".

تر ډېره پر خواله رسنیو لیکل شوي غبرګونونه او تبصرې د اقبال د نظر مخالفې دي.

د ټوېټر یو کارن عبدالمجید په دې اند دی چې "اسلامي شریعت سوپر مارکېټ نه دی" چې د خلکو په خوښه او رغبت دې هرڅه بدل شي.

ډېرو نورو بیا ویلي چې "شرعي متن روښانه دی، چې د ښځې خپل ځان ودول باطل دي."

محمد الطویلعي بیا د اقبال د دغه نظر په اړه اندېښنه ښودلې او وايي چې هغه "د ټول ولس او د سړو استازیتوب نه کوي."

"ودېدل د ښځو لومړنی حق دی"

په مقابل کې ګڼو ښځو د اقبال دروندري نظر تایید کړی او د ښځو ودېدل یې د ښځو لومړنی حق بللی دی.

جاهان ویلي: "د بالغو او عاقلو مسلمانو ښځو په توګه دا زموږ حق دی چې د قانون په چوکاټ کې خپل ځان پخپله واده کړو."

د (سعودي) په نامه یوه بل ټویټر کارن لیکلي: "د ولي امر له موافقې پرته پخپله ښځه د ځان ودول او قاضۍ یا وزیره کېدل هغه مسله ده چې وخت ته اړتیا لري."

ځینو د مصر د مفتي ډاکټر شوقي علام هغه وېديويي کلیپ لاس په لاس کړی چې وايي، که څه هم په دې مسله کې د علماوو اختلاف شته، خو د حنفي مذهب پر بنسټ ښځه یو مخ خپل ځان ودولی شي.