په ۴۵ کلنۍ ورو تګ "د ژر زړېدو نښه ده"

نیو زیلنډ کې څېړونکي وايي، تر۴۰ کلنۍ د ډېر عمر لرونکو خلکو د تګ چټکتیا دا ښیي چې ماغزه او بدن یې په کوم سرعت زړېږي. د یوه ساده ازمېښت په مرسته چې د انسان د تګ سرعت معلوموي، څېړونکو د وګړو د زړښت بهیر معلوم کړ.

له پایلو جوته شوې چې د 'سوکه تلونکو' خلکو بدن ژړ په زړېدو و، مخ یې هم زوړ ښکارېده او ماغزه یې هم کوچني ول. دغه نړیوالې څېړنیزې ډلې ویلي، د دوی موندنه"عالي ناببره" ده.

ډاکتران ډېری مهال د تګ سرعت اندازه کوي چې په ټوله کې د یوه کس روغتیا معلومه کړي، په تېره بیا تر ۶۰ کلونو مشرانو کې.

د قدم وهلو سرعت ځکه مهم دی چې د عضلو د ځواک، د سږو د فعالیت، توازن، د تاوېدو قوت او د سترګو له لید سره تړلی دی.

په زاړه عمر ورو ورو ګرځېدل د حافظې زوال په ستونزې د اخته کېدو د خطر له علایمو سره هم تړلی دی.

د څېړنې ډول:

په نیو زیلنډ کې ترسره شوې دې څېړنه کې ۱۰۰۰ کسانو برخه اخیستې وه. دوی په ۱۹۷۰ لسیزه کې زېږېدلي ول او وروسته بیا تر ۴۵ کلنۍ تعقیب شوي ول. د دوی د تګ سرعت لا وړاندې هم د ژوند په منځنیو کلونو کې ازمویل شوی و.

په څېړنه کې د ګډونوالو فزیکي ځواک او د مغزو فعالیت هم ازمویل شوی وو، او په ماشومتوب یې په هرو څو کلونو کې ادراکي ازموینې تېرې کړې وې.

څېړونکي وايي په ماشومتوب د تګ سرعت اندازه کول کېدای شي مرسته وکړي چې درملنې وازمویل شي او د زړېدو سرعت کم کړي.

اوس د کمو کالوریو خوراکونو په ګډون پر یو شمېر لارو چارو څېړنې کېږي چې د ستونزې حل وموندل شي.