یوه سپي ۸۰ ورځې د مړې څښتنې انتظار کاوه

چین کې یو وفادار سپی نژدې ۸۰ ورځې هغه ځای کې ویرجن ګرځېده چې څښتنه یې پکې مړه شوی وه.

د منګولیا هوهوت سیمې یوه سړک پر سر د دغه سپي اخیستل شوي تصویرونه پر سینا وایبو نومې خواله رسنۍ یو اعشاریه څلور میلیونه ځله کتل شوي دي.

د چاینا پېر ویډیويي پاڼې رپوټ ښيي د اګست پر ۲۱ مه د څښتنې له مړینې وروسته دغه سپی هره ورځ د پېښې ځای کې لیدل کېده.

یو ټیکسي چلوونکي وایي، خلکو به هڅه کوله چې مرسته ورسره وکړي، خو په وینا یې سپي به له هغه ځایه منډه کړه.

هغه وايي:

''دغه سپی خپلې څښتنې ته سخت وفادار و. د هغې له وژل کېدو وروسته دی دلته ګواکې پهره کوي. هره ورځ یې وینم. ډرېوران خواړه ورکوي، خو دی منډه کړي. د سپي او انسان تر منځ تعلق رښتینی دی. ''

پر سېنا واېبو دسپي ویډیو د نومبر پر لسمه خپره شوې او ګڼو کسانو پرې کمنټونه کړي. یوه کس لیکلي:

''دا کوچنی سپی ډېر وفادار دی. موږ هم یو سپی درلود. د کلي له ښوونځي د راوتلو تر مهاله به یې راته انتظار کاوه. ''

یوه بل کاروونکي بیا د سپي خوندیتوب ته اندېښنه ښوولې.

''د دغه سپي لپاره د لوی سړک په منځ کې درېدل خطرناک دي. هیله کوم یو څوک راپیدا شي، چې دا واخلي او یوه خوندي ځای ته یې یوسي. ''

خو دا په چینايي خواله رسنیو کې لومړنی سپی نه دی، چې ستایل کېږي او پام وراوړي.

له دې مخکې د پېر ویډیو وېبياڼې کاروونکو پام هغه زاړه سپي ته واوښت چې له کاره د راتلو تر مهاله به یې اورګاډي تم ځای کې خپل څښتن ته انتظار کاوه.

۱۹۲۰ کال کې د جاپان هاچیکو د اکیتا نومی سپی ځکه مشهور شو، چې خپل څښتن به یې هره ورځ اورګاډي تم ځای کې لیدو ته ورته او د هغه له مړیني وروسته یې هم نهه کاله هره ورځ همدا معمول و.