د ځنکندن شېبو کې د ناروغې ښځې وروستۍ هیله پوره شوه

استرالیا کې ډاکټرانو د هغې ښځې وروستۍ هیله پوره کړه، چې غوښتل یې د ځنکندن پر مهال د سمندر غاړې ته لاړه شي.

د کوینزلنډ سیمې امبولانس خدمتونو هغه تصویر خپور کړی، چې په کې یو روغتیا پال د دغې ښځې د روغتون کټ څنګ ته ولاړ دی. ښځه او روغتیا پال داسې حال کې لیدل کېږي، چې هاروې بې له ساحله د سمندر اوبو ته ګوري.

ځايي افسرې هیلین ډونالډسن ویلي ناروغه د روغتون ځانګړي پام برخې ته لېږدول کېده، خو هیله یې وکړه، چې یوازې دا غواړي چې دا مهال د سمندر پر غاړه واوسي. هغې لیکلي:

''روغتیا پالانو همالته لنډ سمندر غاړې ته ستانه شول، چې ناروغه ښځه دا فرصت ومومي. اوښکې توې شوې او ناروغه ډېره خوشحاله وه. ''

نوموړې زیاتوي:

''کله داسې هم کېږي، چې د دارو درملو، ټریننګونو او وړتیاوو پر ځای یوازې خواخوږي ډېر توپیر رامنځته کوي. ''

د نوموړې دغه پیغام چې پر فېسبوک یې د چهارشنبې پر ورځ خپور کړی، له ۱۲۰۰۰ هم ډېر ځله شریک شوی دی.

له مرګه یو ساعت مخکې وروستۍ هیله

د روس پاچا د واکمنۍ وروستۍ شېبې

پر ټویټر دغه معلومات د برسبین یوې ورځپاڼې د کوریر مېل خبریالې کات کایریاکوو خپور کړی او ځواب کې ورته لیکل شوي:

''څومره ښه کار شوی. موږ ټول پای لرو. هغه مهال کوچني شیان ډېر مهم وي. ''

ځینې نورو کسانو هم ورته تجربې شریکې کړې. جو لوریمر د استرالیا امبولانس ادارې په ملاتړ کاږي:

''یوه نژدې ملګرې مې واده کېده. د واده پر ورځ یې مور ولوېده، ځکه د سرطان ناروغه وه. روغتیا پالانو روغتون ته د هغې لېږدولو پر ځای نوموړې کلیسا ته یووړه او هلته یې پر اسټریچر څملوله، هغې د لور واده ولید او څو ورځې وروسته ومړه. ''

دغه پوسټ ته هم ۱۸۰۰ غبرګونونه ښوول شوي.

دغه مطلب د بي بي سي یو جي سي او خواله رسنیو ټیم روزینا سینې چمتو کړی دی.