هند د ملګرو ملتونو پرېکړه لیک کې له ګډون ډډه وکړه
هند پر چهارشنبه د ملګرو ملتونو هغه پرېکړه لیک کې له برخې اخیستو ډډه وکړه، چې پر اوکرایین د روسیې یرغل پکې غندل شوی.
د مسکو او کیېف تر منځ د تاوتریخوالي پر موضوع په یوه اونۍ کې دا درېیم ځل دی، چې هند په یوه پرېکړه لیک کې له شاملېدو ډډه کوي.
دا په داسې حال کې ده، چې د امریکا متحدو ایالتونو لوړپوړو چارواکو له هند غوښتني چې دې لړ کې باید "څرګند دریځ" ولري.
هند له لوېدیځوالو او روسیې سره د اړیکو تعادل ساتلو لړ کې له سختې دیپلوماتیکې لارې تېریږي.
خو د هند همدې ستراتیژۍ په ځانګړې توګه په لوېدیځ کې پوښتنې راپورته کړې، چې ایا هند به چې د نړۍ تر ټولو لویه دیموکراسي لرونکی هېواد دی، دې موضوع کې څرګند دریځ غوره کړي او که نه.
