تاسې د وېبسایټ داسې بڼه ګورئ چې یوازې متن لري او لږ انټرنېټ کاروي. که غواړئ عکسونه او ویډیوګانې وګورئ، نو د وېبسایټ اصلي (لومړنۍ) بڼې ته ورشئ.
د وېبسایټ اصلي بڼې ته مې وروله
د وېبسایټ دې بڼې په اړه چې ډېر انټرنېټ نه مصرفوي نور معلومات دلته موندلای شئ.
ډونلډ ټرمپ د امریکا د نوي ولسمشر په توګه وټاکل شو. ددې ترڅنګ د امریکا تلوېزیوني چینل سي اېن اېن وايي، هیلیري کلنټن ډونلډ ټرمپ ته خپله ماتې منلې ده.
د چین ولسمشر شي جین پینګ ډونلډ ټرمپ ته د مبارکۍ پر پیغام سربېره ویلي، دوه ستر نړیوال اقتصاده د نړیوالې پراختیا په برخه کې له یو بل سره د همکارۍ مسؤولیت لري. نوموړي د امریکا او چین پر دوو اړخیزو اړیکو هم ټینګار کړی.
د پاکستان لومړي وزیر محمد نواز شریف ډونلډ ټرمپ ته مبارکي ویلې. د پاکستان د ملي رادیو د راپور له مخې، ښاغلي شریف ویلي، دا ''په اصل کې د امریکا د خلکو بریا او پر ډیموکراسۍ، ازادۍ بشري حقونو او د ازادۍ پر روحیې د هغوی ټینګ باور دی.''
ډونلډ ټرمپ پخپل ټویټر فروفایل ځان د امریکا نوی ټاکل شوی ولسمشر معرفي کړی دی.
د سعودي عربستان پاچا سلمان ټرمپ ته په منځني ختیځ کې امنیت او ثبات ته د رسېدو په برخه کې د بریا هیله ښودلې ده.
د اسرائیلو لومړي وزیر بنیامین نتنیاهو ډونلډ ټرمپ د اسرائیلو 'رښتینی ملګری' بللی او له هغه سره یې په سیمه کې د امنیتي پرمختګ، ټیکاو او سولې راتلو کې د ګډې همکارۍ ژمنه کړې ده.
ښاغلي نتنیاهو چې له بارک اوباما سره یې چندان ښه اړیکي نه لرل، هیله ښودلې چې د دواړو هېوادونو ترمنځ یوولای به پر فرد پورې اړه نه لري، بلکې په لوړه کچه به وي.
د ایران ولسمشر حسن روحاني د ډونلډ ټرمپ د ټاکل کېدو په غبرګون کې ویلي، د امریکا د ټاکنو پایلې د ایران پر بهرنۍ تګلارې کوم اغېز نه لري.
ښاغلي روحاني د ایران مشرانو ته په ناسته کې وویل: ''په نړیواله ټولنه کې د امریکا ځای او د نړۍ عمومي افکار د امریکا د ناسم سیاست له کبله کمزوری شوی او له نړیوالې ټولنې او اروپا سره به ددغه موقعیت له کبله لوی ګوزار وویني.''
د هند لومړي وزیر نریندرا مودي د ولسمشر په توګه د ډونلډ ټرمپ د بریا مبارکي ویلې او هیله یې ښودلې چې د دواړو هېوادونو ترمنځ اړیکي نوي پړاو ته ننوځي.
د روسیې د پارلمان (دوما) مشر ویلي، باوري دی چې د امریکا له نوي ولسمشر سره بنسټیزې خبرې ترسره کېدیا شي.
د افغانستان مخکیني ولسمشر حامد کرزي د ټرمپ د بریا په تړاو هغه ته مبارکي ورکړې او وايي هیله یې دا ده چې "د سیاسي بدلون په لړ کې افغانان د ترهګرۍ روانه جګړه کې بدلون وویني."
کرزی زیاتوي "افغانان هیله لري چې د ترهګرۍ ضد جګړه کې نور دوی قرباني نه شي او د سولې په تړاو د افغانانو د څو کلونو هیلې رښتیا شي."
د جرمني د بهرنیو چارو وزیر فرنک والټر شټاینمر د اروپايي ټولنې د بهرنیو چارو وزیرانو د ناستې جوړولو وړاندیز کړی. نوموړي ویلي، د ټرمپ بریا ''داسې پایله نه ده چې ما یا د جرمني خلکو غوښتله.''
د افغانستان ولسمشر د امریکا ولسمشریزو ټاکنو کې بریالي شوي جمهوریپال ډونلډ ټرمپ او د امریکا خلکو ته ټاکنو کې د بریا مبارکي ورکړې ده.
له ارګه خپره شوې خبرپاڼه وايي، ولسمشر محمد اشرف غني ویلي، له خپل اړخه او د افغانانو له لوري ټرمپ او د امریکا خلکو ته د نوي ولسمشر د ټاکل کېدو مبارکي وايي.
ولسمشر غني زیاتوي، له ترهګرۍ سره د مبارزېامریکا د افغان دولت او افغان ولس له مهمو ملګرو څخه ده.
د ارګ په خبرپاڼه کې راغلي، افغان دولت هیله لري چې د امریکا له نوي ولسمشر سره په نژدې همکارۍ سره د دواړو هېوادونو دوه اړخیز اړيکي د دواړو هېوادونو او ولسونو په ګټه لاپسې وغوړېږي.
د بریتانیا لومړۍ وزیرې تیرېزا مې ډونلډ ټرمپ ته د امریکا د ولسمشرۍ ټاکنو ګټلو مبارکي ورکړې او ټینګار یې دا دی چې بریتانیا او امریکا به 'نژدې ملګري' پاتې شي.
د ایران د بهرنیو چارو وزارت ویاند بهرام قاسمي د ټرمپ د بریالیتوب په غبرګون کې ویلي: ''د ایران او ایرانیانو لپاره د امریکا د راتلونکي حکمت اجرائیوي تګلاره مهمه ده.''
د ترکیې لومړي وزیر بن علي یلدریم، ډونلډ ټرمپ ته د بریا مبارکي ویلې او په دې هېواد کې یې د ترکي تبعید شوي مذهبي سړي فتح الله ګولن د سپارلو غوښتنه کړې ده
د امریکا ولسمشریزو ټاکنو پایلو راڅرګندېدو سره کابل کې د امریکا سفیر مایکل مک کینلي خبریالانو ته وویل؛ افغانستان سره به د امریکا اړیکې پیاوړې او نژدې پاتې شي.
ښاغلي مک کینلي زیاته کړه؛ د کابل او واشنګټن اړیکې پر ټاکنو، شخص، یا ګوند ولاړې نه دي، بلکې زموږ د ملي ګټو، د خلکو – خلکو ترمنځ اړیکو او ګډو ارزښتونو بنا دي.
هغه وویل؛ په داسې حال کې چې راتلونکې اونۍ کې امریکا کې واک لېږدول کېږي او نوې اداره رامنځته کېږي، خو موږ ډاډ ورکوو چې افغانستان به زموږ د بهرنۍ پالیسۍ د لوړې کچې اجنډا په سر کې وي.
ښاغلي مک کینلي په وارسا او بروکسل کې له افغانستان سره د اوږدمهاله ملګرتیا ژمنې ته په اشارې سره وویل؛ دا ژمنې په هر ډول شرایطو کې پرځای پاتې وي.
د روسیې ولسمشر ولادیمیر پوتین ټرمپ ته په ټاکنو کې د بریالیتوب د مبارکۍ یو ټیلیګرامي پیغام استولی.
ښاغلي پوتین هیله وښوده چې دواړه مشران به د مسکو - واشګټن ترمنځ د اړیکو ښه کولو کې همکاري وکړي. ده وویل هیله یې دا ده چې امریکا او روسیه د نړیوالو مسلو او امنیتي کړکېچونو په هواري کې متقابله همکاري وکړي.
ټرمپ پخپلو خبرو کې وویل، نور به د هېواد هېر کړل شوي وګړي نه هېرېږي.
ټرمپ: د امریکا ګټې به لومړیتوب کې راولم