تاسې د وېبسایټ داسې بڼه ګورئ چې یوازې متن لري او لږ انټرنېټ کاروي. که غواړئ عکسونه او ویډیوګانې وګورئ، نو د وېبسایټ اصلي (لومړنۍ) بڼې ته ورشئ.
د وېبسایټ اصلي بڼې ته مې وروله
د وېبسایټ دې بڼې په اړه چې ډېر انټرنېټ نه مصرفوي نور معلومات دلته موندلای شئ.
په داسې حال کې چې د غزې اوربند تړون باندې یوه ورځ اوړي خو راتلونکو ګامونو په اړه یې حالت ناڅرګند دی. د اسرائيل دفاع وزارت ویلي چې د حماس له لوري د ورسپارل شوو څلورو یرغملو مړي پېژندل شوي دي. د امریکا ولسمشر ډونلډ ټرمپ د شرم الشیخ په سرمشریزه کې د غزې د اوربند تړون لاسلیک کړ. وروسته د مصر ولسمشر عبدالفتاح السیسی، د قطر امیر شیخ تمیم بن حمد ال ثاني او د ترکیې ولسمشر رجب طیب اردوغان هم د اوربند دغه سند لاسليک کړ.
د ازادو شویو فلسطيني بندیانو لومړي تصویرونه خپاره شول
د اشغال شوې لوېدیزې غاړې له رامالله ښاره د ازادو شویو فلسطیني بندیانو په لومړنیو تصویرونو کې لیدل کېږي چې د کورنیو له غړو سره کتلي دي.
دوی په بسونو کې رامالله لېږدول شوي او هلته ورته د کورنۍ غړو، خپلوانو او دوستانو لخوا هرکلی ویل شوی.
د اسرائیل پوځ وايي، غزه کې د حماس لخوا شل واړه ازاد شوي یرغمل اسرائیل ته رسېدلي دي.
حماس نن سهار په لومړۍ جوپه کې ۷ او وروسته پاتې ۱۳ ژوندي یرغمل ازاد کړل.
هممهاله له اسرائیل څخه ترلاسه شویو تصویرونو کې ښکاري چې ازادو شويو کسانو د خپلو کورنیو له غړو او دوستانو سره کتلي دي.
د مصر ولسمشرۍ ماڼۍ ویلي، ټاکل شوې د اسرائیل لومړی وزیر بنیامین نتنیاهو هم نن په شرم الشیخ کې د سولې په تړاو نړیواله سرمشریزه کې برخه واخلي.
مخکې داسې فکر کېده چې نتنیاهو به په دې غونډې ته ورنشي.
ټاکل شوې دا سرمشریزه نن ناوخته د امریکا په ګډون د نړۍ د شاوخوا ۲۰ هېوادونو د مشرانو په ګډون پیل شي.
د حماس تر کنټرول لاندې روغتیا وزارت وايي، غزه کې روغتیايي ډلو د هغو فلسطیني بندیانو ورتګ ته چمتوالی نیولی چې ټاکل شوې له اسرائيل سره د بندیانو د تبادلې هوکړې له مخې نن ازاد شي.
د دغه وزارت په وینا ازاد شوي بندیان به د غزې تراړې په ناصر روغتون کې له روغتیايي پلوه وکتل شي.
ټاکل شوې اسرائیل له حماس سره د یرغمل شویو کسانو د تبادلې له مخې ۲۵۰فلسطیني بندیان او له ۱۷۰۰ډېر نور د غزې اوسېدونکي چې د جګړې له پیل راهیسې یې نیولي، خوشې کړي.
بېځایه شوي فلسطینیان د غزې تر ټولو لوی ښار، غزې ښار شمال ته بېرته ستنېږي. له هوا ښکاري چې د ښار ډېره برخه ورانه شوې او پراخې سیمې په بشپړ ډول هوارې شوې دي. اسرائیلي ځواکونو په تېرو میاشتو کې دا سیمه سخته بمبار کړې وه.
د پنجشنبې په ورځ وروسته له هغې اوربند پلي شو چې د اسرائیلو حکومت د امریکا د ولسمشر ډونلډ ټرمپ د اوربند او د بندیانو د بېرته ستنېدو د موافقې لومړی پړاو ومانه. د دې موافقې راتلونکي پړاوونه لا هم تر خبرو لاندې دي.
تمه ده چې اسرائیل به له حماس سره د یرغمل شویو کسانو د تبادلې هوکړې د یوې برخې په توګه یو شمیر فلسطیني بندیان نن ازاد کړي.
څو موټرونه چې ګومان کېږي فلسطيني بندیان به لیږدوي، اسرائيل کې له عوفر زندان سره لیدل شوي دي.
د یادونې ده چې اسرائیل به د یرغمل شویو کسانو بدل کې ۲۵۰ فلسطیني بندیان او له ۱۷۰۰څخه ډېر نور د غزې اوسېدونکي چې د جګړې له پیل راهیسې یې نیولي دي، خوشې کړي.
د اسرائيل پوځ تایید کړه چې په غزه کې له حماس سره پاتې ۱۳ ژوندي یرغمل کسان هم اوس سرهصلیب ته سپارل شوي دي.
ټاکل شوې سور صلیب دغه کسان په غزه کې د اسرائیل دفاعي ځواکونو 'ایډياېف' او د دغه هېواد د امنیتي اژانس ځواکونو ته وسپاري.
حماس تر دې مخکې نن سهار د یرغملو لومړۍ اووه کسیزه جوپه ازاده کړې وه چې اسرائیلي ځواکونو وايي هغوی خپل هېواد ته رسېدلي دي.
د اسرائيل پوځ لږ مخکې د هغو یرغملو ځينې تصویرونه خپاره کړي چې حماس نن په غزه کې ازاد کړل.
د اسرائيل دفاعي ځواکونه 'ایډياېف' وايي، د اوو ازادو شویو یرغملو لومړۍ جوپه اوس بېرته خپل هېواد ته ستنه شوې.
په دغو تصویرونو کې الون اوهېل ښکاري چې اسرائیلي ځواکونو سره ولاړ دی او غبرګونو وروڼو ګالي او زېف بېرمن یو بل ته غاړه ورکړې.
نورو عکسونو کې ښکاري چې ګالي بېرمن او ګوی ګیلبوا-دېلې هم نن سهار غزه کې له اسرائيلي سرتېرو سره ولاړ دي
حماس لخوا غزه کې نن له اوو ازادو شویو یرغملو سره هممهاله د امریکا ولسمشر ډونلډ ټرمپ هم اسرائیل ته رسېدلی دی.
د هغه الوتکه لږ مخکې د اتلابیب په بن ګوریون هوايي ډګر کې کیناسته.
د اسرائيل د لومړي وزیر بنیامین نتنیاهو او د هغه د ښځې سارا، د منځني ختیځ لپاره د ټرمپ د ځانګړي استازي سټېف ویټکاف، د خپل زوم او سلاکار جارډ کوشنر او لور ایوانکا ټرمپ په ګډون ګڼ مهم اشخاص د هغه بدرګې او هرکلي ته ورغلي وو.
ټاکل شوې ډونلډ ټرمپ د اسرائيل پارلمان ته وینا وکړي او وروسته نن (دوشنبه د اکتوبر ۱۳مه) په شرم الشیخ کې د سولې په تړاو جوړېدونکې غونډه کې ګډون لپاره د مصر پر لور وښوځېږي.
د اسرائيل پوځ وايي اووه یرغمل، چې نن په غزه کې ازاد شول، لږ مخکې خپل هېواد ته اوښتي دي.
حماس دغه یرغمل سره صلیب ته سپارلي وو او وروسته د اسرائیلي ځواکونو تایید کړه چې دوی ته رسېدلي دي.
د اسرائيل پوځ وايي، دغه یرغمل اوس د اسرائيلي ځواکونو په ملتیا د اسرائيل سویل کې د دوی هرکلي لپاره لومړي ټاکل شوي ځای ته پر لاره دي.
دوی به هملته د خپلو کورنیو له غړو سره یو ځای شي.
ټاکل شوې غزه کې پر ۷ ازادو شویو یرغملو سربېره، چې اسرائیلي ځواکونه اوس له دوی سره دي، ۱۳ نور ژوندي یرغمل هم ازاد شي.
موږ تر اوسه دا نه شو تاییدولی چې دوی دې ازاد شوي وي، خو داسې تصویرونه شریک شوي چې ځینې یرغمل پکې له خپلو کورنیو او دوستانو سره پر تلېفون د ویډیويي خبرو په حال کې لیدل کېږي.
د اسرائیلو پوځ وايي، "د سره صلیب د معلوماتو له مخې، اووه یرغمل شوي کسان د ساتنې ځای ته لېږدول شوي او په غزه کې د اسرائیلو دفاعي او امنیتي ځواکونو ته د سپارلو په حال کې دي. تمه کېږي چې نور یرغمل شوي کسان به وروسته سره صلیب ته وسپارل شي."
د یرغمل شویو کسانو د خوشي کولو په برخه کې ښکېل یوه چارواکي رویټرز خبري اژانس ته ويلي چې لومړني اسرائیلي یرغمل شوي کسان اوس له حماس څخه په غزه کې سره صلیب ته لېږدول شوي دي.
اسرائیلي رسنيو راپور ورکړی چې اوه یرغمل شوي کسان، په غزه کې د سره صلیب نړیوالې کمېټې ته سپارل شوي دي.
د اسرائیلو او حماس ترمنځ د اوربند د تړون له مخې، د سره صلیب نړیواله کمیټه به له غزې د اسرائیلي یرغمل شویو کسانو په لېږدولو کې مرسته وکړي.
فلسطینی خبري اژانس شهاب وايي، حماس د هغو ۲۰یرغمل شویو کسانو نومونه خپاره کړي چې نن دوشنبې (۱۳ اکټوبر) یې خوشې کوي.
داسې ښکاري چې دغه نومونه د بي بي سي لخوا راپور شوي لیست سره سمون لري:
بار کوپرسټين
ايواټار ډېوېډ
يوسف چيم اوهانه
سيګيو کالفون
ايوينتن اور
الکانه بوهبوت
ميکسم برکن
نمرد کوهن
متان زنګاوکر
ډېوېډ کينيو
ايټن هارن
متان اينګريسټ
ايتان مور
ګلی برمن
زيو برمن
عمري ميران
ايلون اوهيل
ګاي ګلبو دلال
روم هراسلابسکي
لکه څرنګه چې د امریکا ولسمشر ډونلډ ټرمپ منځني ختیځ ته په سفر وتلی، د خپلې الوتنې دمخه یې خبریالانو ته وویل چې باور لري "په غزه کې جګړه پایته رسېدلې ده" خو دوشنبه د اکټوبر ۱۳ نېټه د منځني ختیځ په ځانګړې توګه د غزې او اسرائیلو لپاره یوه مهمه ورځ ده. ویل کېږی حماس به پاتې يرغمل خوشي کړي او په بدل کې به اسرائیل سلګونه بنديان ازاد کړي.
د اوربند د شرایطو له مخې، حماس د دوشنبې په ورځ تر ۱۲:۰۰ بجو پورې وخت لري چې ټول پاتې یرغمل خوشې کړي.
که څه هم کره وخت نه دی اعلان شوی، خو اسرائیل وايي تمه لري چې د حماس لخوا نیول شوي ټول ۲۰ ژوندي یرغمل کسان به د دوشنبې په سهار سره صلیب ته وسپارل شي. سره صلیب د حماس لخوا اسرائیلو ته د یرغمل شویو کسانو د سپارلو مسؤلیت لري.
د ډونلډ ټرمپ الوتکه، چې د یکشنبې په ماښام له واشنګټن څخه اسرائیلو ته روانه شوې، ټاکل شوې چې د دوشنبې په سهار په اسرائیلو کې ښکته شي، د اسرائیلو لومړي وزير بنیامین نتنیاهو او ولسمشر اسحاق هرزوګ به د امریکا د ولسمشر هرکلی وکړي.
ښاغلی ټرمپ به بیا مصر ته سفر وکړي، هلته به د مصر له ولسمشر عبدالفتاح السیسي سره غونډه وکړي، د نړۍ مشران به هم په غونډه کې ګډون ولري. نتنیاهو او هرزوګ به په اسرائیلو کې پاتې شي. د حماس لوړ پوړي غړي به هم په غونډه کې نه وي.
ټاکل شوې چې د غزې سولې لپاره طرحه به هم په همدې غونډه کې لاسلیک شي.
د اسرائیلو او حماس تر منځ به د تبادلې د تړون لومړی پړاو د دوشنبې په ورځ پلی شي. په دې پړاو کې به په غزه کې د اسرائیلی يرغملو په بدل کې سلګونه فلسطيني بنديان خوشي کړل شي.
د ډېپلوماټيکو سرچینو په وينا، د اسرائیلو د بنديانو ادارې د زندانيانو د خوشي کولو امرونه ترلاسه کړي او ځانګړو ځايونو ته یې د لېږد پروسه پيل کړې ده.
د ورته سرچينو په وینا په دې تړون کې د شاوخوا ۲۵۰ فلسطيني بنديانو خوشي کول شامل دي چې په عمري بند محکوم شوي وو. د دې ترڅنګ ۱۷۰۰ نور بنديان هم دي چې د ۲۰۲۳ کال د اکټوبر له اوومې نېټې وروسته نيول شوي دي.
په بدل کې د حماس غورځنګ اعلان کړی چې د اسرائیلي يرغمل شويو خوشي کول به هم د دوشنبې په ورځ ترسره شي. اسرائیلی چارواکي اټکل کوي چې په غزه کې د ۴۸ اسرائیلي يرغمل شويو له ډلې لږ تر لږه ۲۰ یې لا هم ژوندي دي.
د امریکا د ولسمشر ډونلډ ټرمپ له خوا د تازه معلوماتو له خپرېدو وروسته، په عکسونو کې ليدل کېږي چې فلسطينيان د خان یونس سیمې ته بېرته ستنېږي.
دلته د ښار لویه برخه په کنډوالو بدله شوې، کورونه او زېربناوې ویجاړې شوې دي.
د بريتانيا لومړی وزير کېير سټارمر د نړۍ د هغو مشرانوله ډلې دی چې د اسراییل او حماس ترمنځ د اوربند د وروستي لاسلیک په مراسمو کې د ګډون لپاره مصر ته رسېدلی دی.
د برتانیا د لومړي وزیر دفتر ويلي، ښاغلی سټارمر پلان لري چې د مصر، قطر او ترکیې له هېوادونو مننه وکړي، چې په خبرو اترو کې اصلي منځګړي وو، او همدارنګه د ډونلډ ټرمپ سره د لیدنې پر مهال به د امریکا د ولسمشر د هڅو ستاینه وکړي.
مصر به د اکټوبر پر ۱۳ نېټه د دوشنبې په ورځ د شرم الشیخ په ښار کې د یوې نړيوالې غونډې کوربه وي چې موخه یې د غزې په تړانګه کې د جګړې د پايته رسولو لپاره د يوې پراخې هوکړې وروستي کول دي چې ټاکل شوې له شلو زياتو هېوادونو مشران به په کې ګډون وکړي.