وروستی, د طالبانو حکومت وايي، د کونړ ولایت زلزله کې د وژل شوو شمېر ۱۴۵۷ ته ورسېد
د عکس سرچینه، TALIBAN
په افغانستان کې د طالبانو حکومت وايي چې په کونړ ولایت کې د تېرې یکشنبې په ماخوستن (اګست ۳۱ / وږی ۹) شوې زلزله کې د وژل شوو شمېر تر ۱۴۵۰ او د ټپیانو تر ۳۳۰۰ اوښتی دی.
د طالبانو حکومت مرستیال ویاند حمدالله فطرت د زلزلې د قربانیانو وروستۍ شمېرې خپرې کړې دي او ویلي یې دي چې، "تر دې مهاله د شهیدانو شمېر ۱۴۵۷ او د زخمیانو ۳۳۹۴ ته رسېدلی دی."
ښاغلي فطرت همدا راز لیکلي چې د زلزلې په ترڅ کې د ویجاړو شوو کورونو شمېر هم اوس "۶۷۸۲" ته رسېدلی دی.
"د ژغورنې عملیاتو لپاره ځينو هېوادونو خپل ټيمونه رالېږلي"
د طالبانو حکومت دغه ویاند پرخپله اېکسپاڼه لیکلي چې لا هم په سیمه کې د ژغورنې عملیات او هلته د مرستو لېږد دوام لري او ځينې ټپیان په الوتکو کې روغتونونو ته لېږدول شوي دي.
دې لیکنه کې له social media راخیستل شوي مواد شته. له ښودلو وړاندې یې ستاسې اجازه پکار ده، ځکه ښایيکوکیز یا بله تکنالوژي پکې کارول شوې وي. کولی شئ له اجازې مخکې د social media site پالیسي ولولئ. د دې لپاره غوښتنه ومنئ او مخکې لاړ شئ
د پوسټ X پای
حمدالله فطرت همداراز لیکلي چې د ځينو نورو هېوادونو له لوري هم د ژغورنې مسلکي ټيمونه افغانستان ته لېږل شوي چې اوس په اغېزمنو سیمو کې د ژغورنې په عملیاتو کې برخه اخلي.
د ده په وینا، "د زلزلې سیمو ته تړل شوې لارې د تګ راتګ پر مخ خلاصې شوې دي او ټولې حکومتي ادارې د خلکو په ملتیا هڅه کوي چې متضررینو سره مرسته وکړي."
دا په داسې حال کې ده چې تر دې مخکې رپوټونه وو چې د زلزلې له کبله زیانمنو شوو ځينو لرو پرتو سیمو ته لا هم د ورتګ ځمکنۍ لارې بندې پاتې دي.
