د بریتانیا پاچا وايي دی او مېرمن یې په افغانستان کې د زلزلې په خبر خواشيني‌ دي

ژوندی پوښښ

1. ۱۰ وږی ۱۴۰۴ - ۱ سپتمبر ۲۰۲۵د ملګرو ملتونو د بشري مرستو ادارې ویلي، په زلزله کې لږ تر لږه ۸۰۰ کسان مړه شوي

   د ملګرو ملتونو د بشري مرستو ادارې وايي، لومړني راپورونه ښيي چې د ۶.۰ درجې زلزلې وروسته د افغانستان په څلورو ولایتونو کې لږ تر لږه ۸۰۰ کسان مړه شوي دي.

   د ملګرو ملتونو د بشري مرستو د همغږۍ دفتر (اوچا) وايي چې لږ تر لږه ۲۰۰۰ کسان ټپیان شوي دي، چې ډېر یې په لرې پرتو او غرنیو سیمو کې دي چې د ژغورنې ډلې ورته لاسرسی نه لري.

   باور کیږي چې لږ تر لږه ۱۲۰۰۰ کسان د زلزلې له امله مخامخ اغېزمن شوي دي، کورونه ویجاړ شوي او د ټولګټي سیمې زیانمنې شوې دي.

2. ۱۰ وږی ۱۴۰۴ - ۱ سپتمبر ۲۰۲۵هند سملاسي د افغانستان ختیځ کې زلزله ځپلو ته د خیمو، خوراکي توکو او درملو مرستې لېږلي

   افغانستان کې پر ویجاړوونکي زلزلې ګڼو هېوادونو او نړیوالو بنسټونو خواشیني ښودلې او د اړتیا پر مهال یې د مرستو ویلي دي.

   هند: هند لومړنی هېواد دی چې له زلزله ځپلو سره یې د خیمو، خوراکي توکو او درملو مرسته اعلان کړې. افغانستان کې د طالبانو حکومت د بهرنیو چارو وزارت ویلي د هند بهرنیو چارو وزیر جې شنکر له امیر خان متقي سره د تیلیفوني خبرو له لارې د زلزلې له امله په اوښتو زیانونو په پار غمرازي کړي او د بشري مرستو اعلان یې کړی دی.

   د یاد وزارت ویاند احمد تکل وايي د هند په بېړنیو بشري مرستو کې زر خیمې او ۱۵ ټنه غذايي مواد شامل دي. د هند د بهرنیو چارو وزیر پر خپله اېکس پاڼه لیکلي، دا مرستې کابل کې د دوی استازولۍ له خوا سملاسي کونړ ته لېږل شوې دي. جې شنکر ویلي سبا به له هنده هم افغانستان ته د مرستو جوپه ولېږل شي.

   د هند لومړي وزیر نریندرا مودي هم د اېکس پر پاڼه لیکلي د زلزلې له امله په اوښتو زیانونو خواشینی دی هغه ویلي: "هند د اړتیا وړ هر ډول بشري او روغتیايي مرستو ته چمتو دی."

   پاکستان: د پاکستان لومړي وزیر شهباز شریف هم پر اېکس لیکلي، د دغه هېواد په ځینو سیمو کې هم د زلزلې ټکانونه حس شوي خو هغه د پاکستان خوا د کومو زیانونو یادونه نه ده کړې. ښاغلي شریف د افغانستان په ختیځ کې په اوښتو ځاني او مالي زیانونو د خواشیني تر څنګ همکارۍ ته چمتووالی ښودلی دی.

   ایران: د ایران ولسمشر مسعود پزشکیان په یوه پیغام کې د افغانستان له خلکو سره خپله خواخوږي څرګنده کړې او ویلي یې دي چې د ایران اسلامي جمهوریت چمتو دی زلزله ځپلو سیمو ته هر ډول همکاري، مرستې او بشري مرستې ولېږدوي. د ایران د بهرنیو چارو وزارت هم پر اېکس لیکلي "حکومت یې له افغانستان سره هر ډول همکارۍ او ژغورنې عملیاتو ته چمتو دی."

   د افغانستان په ختیځ کې د دغې زورولې زلزلې له کبله د سلګونو کسانو پر مړینې د چین، ترکیې، سعودي عربستان، متحده عرب اماراتو، اذربایجان او د یو شمېر نورو هېوادونو مشرانو هم ژوره خواشني ښودلې او د مرستو ډاډ یې ورکړی دی.

   اسیايي هېوادونه: جاپان هم ویلي حالت له نږدې څاري او د زیانمنو خلکو سره یې همکارۍ ته چمتووالی ښودلی دی. د چین، ترکیې، سعودي عربستان، متحده عربي اماراتو او اذربایجان مشرانو هم د دې مرګونې زلزلې د قربانیانو له کورنیو سره خپله ژوره خواخوږي څرګنده کړې او د مرستې چمتووالي یې اعلان کړی دی.

   نړیوالې ادارې: د ملګرو ملتونو عمومي مشر انتونیو ګوتېرېش د زلزلې له قربانیانو سره خپله خواخوږي څرګنده کړې او په خپله اېکس پاڼه یې لیکلي چې "د هر ډول ملاتړ او همکارۍ لپاره د افغانستان د خلکو تر څنګ ولاړ دی." د روغتیا نړیوالې ادراې هم له قربانیانو سره د مرستې لپاره خپل چمتووالی څرګند کړی او ویلي یې دي چې خپلې طبي او مرستندویه ډلې یې سیمې ته لېږلي دي.له ماشومانو سره د مرستو بنسټ سېو دې چېلډرن او د ماشومانو لپاره د ملګرو ملتونو وجهي صندوق یونېسیف زلزله ځپلو سیمو ته د روغتیايي او مرستندویه ډلو د رسېدو ویلي دي. دوی ویلي ډلې یې ماشومانو او کورنیو ته بېړني روغتیايي چوپړونه وړاندې کوي.

   پخوانيو ولسمشرانو حامد کرزي او محمد اشرف غني هم پر ټولنیزو رسنیو د خواشینۍ پیغامونه شریک کړي او پر خلکو یې غږ کړی چې له زیانمنو سره د مرستو لپاره یو ځل بیا همکارۍ ته ودانګي. ښاغلي غني لیکلي " طبیعي ناورینونو په ځانګړي ډول سېلابونو خیبر پښتونخوا کې هم زیانونه اړولي چې سر په سر د چاپېریال دغو بدلونونو د ولس کړاوونه بیا برسېره کړي.

   د پښتونخوا مشهور پانګه وال جاوېد افریدي هم له افغانانو سره په دې غم کې ځان شریک بللی دی. هغه چې د پاکستان په سوپر لیګ کې د پېښور زلمو کرېکټ لوبډلې څښتن هم دی له زلزله ځپلو سره یې سملاسي د لس میلیونه کلدارو مرستې اعلان کړی دی.

   د افغانستان د کرېکټ ملي لوبډلې لوبغاړي چې دا مهال له پاکستان او متحده عرب اماراتو سره د درې اړخیزه سیالیو په موخه شارجه کې دي هم د خپلو ټولنیزو رسنیو له لارې د زلزلې له کبله د نړېدلو کورونو انځورونه خپاره کړي او ورسره یې خپلې غمشریکي لیکلې ده.

   لوبغاړي: راشد خان، محمد نبي، ابراهیم ځدران، رحمان الله ګوربز او نورو د زلزلې له کبله په اوښتو زیانونو د خواشنیۍ تر څنګ غږ کړی چې "راځئ په دې ویرجن چاپېریال کې په ګډه د خپلو وروڼو او خویندو لاسنیوئ وکړو."

3. ۱۰ وږی ۱۴۰۴ - ۱ سپتمبر ۲۰۲۵ولې سطحي زلزله ډېر زیان اړولی شي؟, جورجینا رنارډ، د بي‌بي‌سي ساینس چارو خبریاله

   د زلزلې کچه او له ځمکې د هغې ژوروالی دوه هغه جیولوژیکي عوامل دي چې د زلزلې د زیان کچه معلومولی شي.

   دغه زلزله د ځمکې له سطحې یوازې ۸ کیلومتره ژوره وه چې دا د یوې زلزلې لپاره ډېره کمزورې یا سطحي ګڼل کېږي. که زلزله د ځمکې له سطحې تر ۷۰ کیلومترو ژورو کې وشي نو سطحي زلزله بلل کېږي.

   سطحي زلزلې د ژورو هغو پرتله ډېرې عامې دي او په عمومي ډول ډېر زیان هم اړوي.

   زلزله‌ییزې څپې د زلزلې له سیمې د ځمکې سطحې ته لېږدول کېږی او هلته زیان اړوي. دغه څپې چې هرڅومره ډېر واټن مزل کوي هومره خپله انرژي له لاسه ورکوي. نو هر څومره چې ځمک‌ښوېدنه ژوره وي هومره باید څپې اوږد مزل وکړي. په دې معنا چې کله د ځمکې تر سطحې رسېږي ځواک یې کمېږي.

   خو که زلزله سطحي وي، څپې خپل ځواک ساتي او کله چې سطحې ته رسېږي نو ډېر سخت لړزښت رامنځته کوي.

   سخته لړزېدا ډېر زیان اړولی شي، ودانۍ او جوړښتونه ویجاړولی شي او د ودانیو د نړېدو لامل هم کېدلی شي.

   په افغانستان کې سطحي زلزلې عامې دي، په ځانګړې توګه د همالیا غرونو د لمنو په هغو سیمو کې چې ټکټونیکي دړې د یو بل د پاسه اوړي.

   ټکتونیکي تختې یا دړې د ځمکې د لیتوسفییر (سطحي قشر) ډېرې سترې او په کراره داسې خوځېدونکې ټوټې دي چې لویې وچې او د سمندرونو تلې له ځانه سره لېږدوي.

4. ۱۰ وږی ۱۴۰۴ - ۱ سپتمبر ۲۰۲۵مجاهد: د زلزلې له کبله څه باندې ۸۰۰ کسان مړه شوي، د مرستې لپاره 'سملاسي' سل میلیونه افغانۍ ځانګړې شوې دي

   افغانستان کې بېګانۍ زورورې زلزلې د دغه هېواد په کونړ او ننګرهار ولایتونو کې درانه ځاني او مالي زیانونه اړولي دي.

   د طالبانو حکومت ویاند ذبیح الله مجاهد ساعت مخکې په یوه خبري غونډه کې وویل د افغانستان په ختیځ کې د تېرې شپې زلزلې له کبله له ۸۰۰ ډېرو کسانو ژوند بایللی او له ۲۵۰۰ ډېر نور ټپیان شوي دي.هغه همدا راز وویل چې حکومت یې سملاسي زلزله ځپلو ته د مرستو رسولو په موخه سل میلیونه افغانۍ ځانګړې کړې دي. ښاغلي مجاهد وویل اړتیا ته په کتو د مرستو دا اندازه ډېرېدی شي.

   د طالبانو حکومت د کلیو د بیا رغاونې او پراختیا وزیر ملا محمد یونس اخندزاده په مشرۍ زلزله ځپلو ته د رسېدو په موخه یوه کمیټه هم جوړه کړې چې په کې بېلابېل وزیران او د یو شمېر ادارو استازي شامل دي.

   ځینو زلزله ځپلو ولایتونو ته ژغورونکې ډلې نه دي رسېدلي چې ښایي د مرګ‌ژوبلې دا شمېرې ورسره بدلې شي.

   د طالبانو حکومت ویلي د ځمک‌ښوېدنې له کبله ځای ځای سړکونه بند شوي او هڅې کوي زلزله ځپلو سیمو ته د هوا له لارې مرستې ورسېږي.

5. ۱۰ وږی ۱۴۰۴ - ۱ سپتمبر ۲۰۲۵زلزله کې د ژوبلو شویو ښځو شمېر په روغتونونو کې تر اوسه کم دی, شعیب شریفي، د بي‌بي‌سي افغان څانګې مشر

   که څه هم موږ د ښځو او ماشومانو هېڅ انځورونه په روغتونونو کې نه وینو، خو ښکاره خبره ده چې هغوی هم اغېزمن شوي دي.

   یو ځايي ازاد خبریال چې د جلال‌ اباد مرکزي روغتون ته ورغلی د دې پخلی کوي چې د چورلکو په مرسته ځينې ژوبلې شوې مېرمنې روغتون ته لېږدول شوي دي خو دغه خبریال وايي دم‌ګړۍ په روغتون کې د نارینه‌‌وو شمېر د ښځو پرتله څو برابره ډېر دی.

   کونړ یوه ډېره محافظه‌ کاره سیمه ده، نو ښايي د کلتوري دودونو له امله ښځې ناوخته درملنه ترلاسه کړي خو داسې اندېښنې هم شته چې ځینو مېرمنو ښايي په خپله نه وي غوښتي روغتون ته ولاړې شي او یا یې د ورځې رڼا ته انتظار کړی وي چې بیا یې کورنۍ روغتون ته یوسي.

   په ۲۰۲۲ میلادي کال کې په پکتیکا ولایت کې هم له زلزلې دوې ورځې وروسته په روغتونونو کې د ژوبلو ښځو شمېر ډېر شوی و.

   د یادونې وړ ده چې په یاده سیمه کې د ژغورنې په ډلو کې هېڅ ښځه نشته.

6. ۱۰ وږی ۱۴۰۴ - ۱ سپتمبر ۲۰۲۵وروستی, ملګري ملتونه وايي زلزله ځپلې سیمې ته یې مرستندویان رسېدلي

   د ملګرو ملتونو سرمنشي انتونیو ګوتېریش افغانستان کې له زلزله ځپلو سره خواخوږي ښودلې او پر خپله ایکس پاڼه یې لیکلي "د افغانستان له خلکو سره بشپړ پیوستون او ملاتړ ته ولاړ یم."

   هغه ویلي "زه د قربانیانو کورنیو سره خپله ژوره خواخوږي شریکوم اوټپیانو ته د بېړنۍ روغتیا هیله کوم."

   د ملګرو ملتونو د روغتیا نړیوال سازمان هم له زلزله ځپلو سره د مرستې لپاره چمتوالی ښودلی او ویلي یې دي، سیمې ته یې روغتیايي ډلګۍ او نور مرستندویان رسېدلي دي.

7. ۱۰ وږی ۱۴۰۴ - ۱ سپتمبر ۲۰۲۵وروستی, د طالبانو حکومت د کورنيو چارو وزارت وايي له ۶۰۰ زيات کسان مړه شوي

   د طالبانو حکومت د کورنيو چارو وزارت وايې په کونړ او ننګرهار ولايتونو کې د تېرې شپې زلزلې له امله ۶۲۲ تنو خپل ژوند بايللی دی.

   د ياد وزارت وياند عبدالمتین قانع رسنيو ته په استولی بيانيه کې ويلي، چې یوازې په کونړ ولايت کې ۶۱۰ تنه مړه شوي او ۱۳۰۰ نور ټپيان دي.

   د اعلاميې له مخې په ننګرهار ولايت کې د ټپيانو شمېر ۲۵۵ تنه ښودل شوی دی.

   کونړ کې لرې پرتو سيمو ته د لاسرسي نشتوالي له کبله د مرګژوبلې بېلابېلې شمېرې خپرېږي.

   اعلاميه کې راغلي چې د طالبانو حکومت د کورنيو چارو وزیر سراج الدین حقاني اړونده مسولينو ته سپارښتنه کړې چې د مرستې په موخه د پېښو سیمو ته ځانونه ورسوي.

8. ۱۰ وږی ۱۴۰۴ - ۱ سپتمبر ۲۰۲۵د طالبانو حکومت د روغتیا وزارت د مرګژوبلې د لوړو شمېرو خبرداری ورکوي

   د طالبانو حکومت د روغتيا وزارت وايي، کونړ کې د يوازې څو کلينيکونو د شمېرو له مخې له څلور سوو زيات ټپیان شوي او لسګونه نور مړه دي.

   د ياد وزارت وياند ډاکتر شرافت زمان پر ټولنيزه رسنۍ اېکس ليکلي، د نورګل درې په څوکۍ او شتولت کې لا هم د ژغورنې عمليات روان دي، څو کلي په بشپړه توګه ويجاړ شوي دي.

   لا هم د مرګژوبلې کره شمېرې نه دي په ډاګه شوې.

9. ۱۰ وږی ۱۴۰۴ - ۱ سپتمبر ۲۰۲۵

   د افغانستان په ختیځ کونړ او ننګرهار ولايتونو کې د تېرې شپې له زورورې زلزلې وروسته د مرګژوبلې شمېرې مخ په زياتېدو دي.

   که څه هم د کونړ په لرې پرتو سيمو کې د کليو د نړېدو له کبله د مرګژوبلې کره معلومات نه دي په ډاګه شوي. خو ويل کېږي چې د "سلګونو کسانو د مړینې" وېره شته ده.

   د جلال اباد مرکزي روغتون ته ګڼ شمېر خلک د مرستې لپاره رسېدلي چې يو له دغو يې وروستي معلومات ورکوي.

10. ۱۰ وږی ۱۴۰۴ - ۱ سپتمبر ۲۰۲۵وروستی, د طالبانو حکومت وايي د "سلګونو کسانو" د مړينې وېره ده

    په کونړ او ننګرهار ولايتونو کې سرچینې وايي، وېره ده چې د تېرې شپې زلزلې له کبله "سلګونه کسان مړه" او ګڼ نور ټپیان وي.

    د طالبانو یوه مشر چې د چورلکو په واسطه د مړو د لېږدولو هڅې تنظیموي وویل د کونړ په یوه کلي کې ۲۱ کسان مړه شوي او ۳۵ نور ټپیان دي.

    هغه زیاته کړه چې اوس هم، د ولایت په ډېرو ولسوالیو کې له زلزلې وروسته ټکانونه احساس شوي دي.

    د کونړ ولایت یو بل چارواکي وویل چې "د مړو شمېر ډېر وحشتناک دی".

    خو په دې مرحله کې، هېڅوک کره شمېرې نشي وړاندې کولی ځکه چې اغېزمنې سیمې لرې پرتې دي او لاسرسی ورته ستونزمن دی.

    په ځینو سیمو کې ګرځنده شبکې کار نه کوي، پداسې حال کې چې په نورو برخو کې سړکونه د ځمکې ښویېدو او سېلابونو له امله بند شوي دي.

11. ۱۰ وږی ۱۴۰۴ - ۱ سپتمبر ۲۰۲۵

    د طالبانو حکومت وياند ذبیح الله مجاهد پر ټولنيزې رسنۍ اېکس خپاره کړي پيغام کې ويلي چې ځايي چارواکي او خلک د زیانمن شويو د ژغورلو په هڅو بوخت دي.

    نوموړي زياته کړې چې "له مرکز او ولایتونو هم کومکي ټيمونه په لاره دي، له ټولو شته امکاناتو څخه به د خلکو د ژغورلو لپاره کار واخيستل شي."

12. ۱۰ وږی ۱۴۰۴ - ۱ سپتمبر ۲۰۲۵, په کونړ کې د طالبانو حکومت سیمه ییزو چارواکو له خیریه ټولنو غوښتنه کړې چې زلزله ځپلو ته په رسېدو کې یې مرسته وکړي. دغو چارواکو بي بي سي ته ویلي، د نورګل ولسوالۍ د مزار درې ته تللې ټولې غرنۍ لارې تړلې او زلزله ځپلو ته یوازې د الوتکو له لارې مرسته شونې ده. د کونړ د امنیت امر مولوي حمیدي بي بي سي ته وویل په دغه دره کې «بشپړ کلي» ویجاړ شوي:

13. ۱۰ وږی ۱۴۰۴ - ۱ سپتمبر ۲۰۲۵

    د طالبانو حکومت هڅې کوي چې زلزله ځپلو سیمو ته مرستې ورسوي.

    د ځمکې ښویدنې له امله سړکونه بند شوي، د ژغورنې عملیات یوازې د هوا له لارې ترسره کېدی شي.

14. ۱۰ وږی ۱۴۰۴ - ۱ سپتمبر ۲۰۲۵"بشپړ کلي تر خاورو لاندې شوي"

    د طالبانو د حکومت ګڼو سرچینو بي بي سي ته ویلي چې "په لسګونو کورونه د کنډوالو لاندې دي" اوس د دې وېره ده چې ښايي سلګونه کسان د زلزلې له کبله مړه شوي وي. دا لا تراوسه په رسمي ډول نه ده تائيد شوې.

    داسې انګیرل کېږي چې ډطری کورونه د کونړ ولایت د نورګل ولسوالۍ په مزار دره کې زیانمن شوي دي چې د ډېورنډ پولې سره څېرمه پرته ده.

    دا دره په یوه غرنۍ سیمه کې موقعیت لري.

15. ۱۰ وږی ۱۴۰۴ - ۱ سپتمبر ۲۰۲۵کونړ ته د مرستې لپاره چورلکې رسېدلې

    د زلزله ځپلو سره د مرستې لپاره څلور چورلکې سهار وختي د کونړ ولايت ته رسېدلې دي.

    سرچینو بي بي سي ته ويلي په دغو چورلکو کې روغتيايي کارکوونکي لېږدول شوي دي. سخت ټپيان به له لرې پرتو سيمو څخه مرکزي روغتون او پلازمېنې کابل ته د چورلکو په مټ ولېږدول شي.

    د زلزلې او ځمکې ښويېدنې له کبله لرې پرتو سيمو ته سړکونه بند شوي دي.

16. ۱۰ وږی ۱۴۰۴ - ۱ سپتمبر ۲۰۲۵ولې افغانستان کې زلزلې ډېرې ویجاړۍ رامنځته کوي؟

    د بریتانیا د جیولوجیکي سروې رېږد پېژندونکی ډاکتر بریان باپتي وایي، جاپان او د سویلي امریکا هېوادونو کې تر افغانستان ډېرې زلزلې کېږي "خو افغانستان ځکه زیانګالی دی چې ودانۍ یې د زلزلې پر وړاندې مقاومت نه لري."

    نوموړی زیاتوي افغانستان کې ودانۍ معمولا له خټینو خښتو او لرګیو جوړېږي، یا پکې کمزورې سیمنټ کارول کېږي.

    د افغانستان غرنیو سیمو کې له دې کبله هم زلزلو کې ډېره ویجاړي اوړی چې ځمکښویدنې پکې پېښېږي.

    دغه ځمکښوېدنې وخت ناوخت کلي او کورونه لاندې کوي او د سیندونو بهېدو لوري‌ بندوي چې پایله کې یې سیلابونه راځي.

    له لرې پرتو او کلیوالي سیمو سره د اړیکو ستونزه د دې لامل کېږي،‌ چې دغه هېواد کې چارواکي کله ناکله د زلزو پایله کې له رامنځته شویو ویجاړیو څو ورځې وروسته خبر شي.

    ځمکښوېدنې د لارو ګودرو د بندېدو لامل هم ګرځي چې زیانمنو سیمو ته د مرستو او مرستندویانو رسېدل له ستونزو سره مخامخوي.

    د وارې، باران او سړو په څېر نامناسبه هوا هم د طبیعې پېښو پر مهال دغه غرني هېواد کې د ژغورنې عملیاتو د خنډ او ځنډ لامل ګرځي.

17. ۱۰ وږی ۱۴۰۴ - ۱ سپتمبر ۲۰۲۵

    د ننګرهار او کونړ د زلزله ځپلو سیمو یو شمېر اوسېدونکي وايي، د دغې زلزلې له امله یو شمېر کورونه نړېدلي او ښايي ځينې کسان لا هم تر کنډوالو لاندې بند پاتې وي.

18. ۱۰ وږی ۱۴۰۴ - ۱ سپتمبر ۲۰۲۵وروستی, د زلزلې کچه ۶.۲ درجې

    د رویټرز خبري اژانس وايي، د ریختر په کچه شپږ اعشاریه دوه زلزلې د افغانستان ختیځ او د ډیورنډ پر کرښه پرتې سیمې لړزولې دي. د زلزلې ټکانونه د پاکستان پلازمېنه اسلام اباد کې هم احساس شوې دي.

19. ۱۰ وږی ۱۴۰۴ - ۱ سپتمبر ۲۰۲۵وروستی, ننګرهار کې لږ تر لږه ۹ تنه مړه شوي

    د ننګرهار مرستيال والي مولوي عزيزالله بي بي سي ته تائيد کړې چې تر دې مهاله په ننګرهار کې لږ تر لږه ۹ تنه مړه شوي او ۱۵ نور ټپيان دي.

20. ۱۰ وږی ۱۴۰۴ - ۱ سپتمبر ۲۰۲۵وروستی, د افغانستان په ختيځ کې زلزلې درنه مرګژوبله اړولې

    د افغانستان له ختیځه رپوټونه وايي، یوې زورورې زلزلې په کونړ او ننګرهار ولایتونو کې درانه ځاني او مالي زیانونه اړولي دي.

    په تر ټولو ډېر ځپل شوي ولايت کونړ کې د لږ تر لږه ۱۰ تنو د مړینې راپور ورکړل شوی دی.

    د کونړ په ولایتي روغتون کې سرچینو بي بي سي ته ویلي، تر اوسه ۵۰ ټپیان ورسره ثبت شوي دي.