وروستی, ملګرو ملتونو د پاکستان بریدونو کې د ماشومانو پر مرګ ژوبله اندېښنه ښودلې
یونیسف د هغو راپورونو له امله سخته اندېښنه ښودلې چې وایي د افغانستان او پاکستان ترمنځ د وروستیو نښتو په پایله کې د افغانستان په ختیځ ولایت کونړ کې د بې ځایه شویو یوه پنډغالي کې ماشومان وژل شوي او ټپیان شوي دي.
یو نیسف وايي "موږ په افغانستان کې د ملګرو ملتونو د مرستندویه پلاوي (یوناما) او د ملګرو ملتونو د نورو همکارو ادارو په همغږۍ د دغو راپورونو پر تاییدولو کار کوو، دا لا دمخه روښانه ده چې ماشومان درنه بیه پرې کوي."
په ویناپاڼه کې د ملګرو ملتونو د ماشومانو نړیوال صندوق زیاته کړې" له سختو جګړو وروسته، له هغو کورنیو چې تېر کال د افغانستان په ختیځ کې له ویجاړونکې زلزلې ژوندۍ پاتې شوې وې، ترې غوښتل شوي چې د خپل خوندیتوب لپاره سرحدي سیمو ته نږدې د بې ځایه شویو پنډغالي پرېږدي. دا پنډغالي ۱۷،۰۰۰ ژوندي پاتې شویو کسانو ته د پناه ځای، خوړو، روغتیایي خدمتونو، پاکو اوبو او حفظ الصحې، د ماشومانو لپاره د مناسبو ځایونو او بېړنیو زده کړو د چمتو کولو لپاره جوړ شوي وو، چې نږدې نیمایي یې ماشومان دي."
یونیسف خبرداری ورکړی چې د دغو کورنیو بیا ځل بې ځایه کېده به ناوریني وي "دا د هغوی کړاوونه نور هم زیاتوي. یو ځل بیا ماشومان له هغه لږ ثباته بې برخې کېږي ترلاسه کړی یې و، او هغوی د ناروغیو، خوارځواکۍ، تاوتریخوالي او ناوړه ګټې اخیستنې له لوړو خطرونو سره مخ کېږي."
د ملګرو ملتونو دغه ادارې له ډیورنډ کرښې پورې هم حالت ناوړه ښودلی او ویلي یې دي د جګړې له امله په ځینو سیمو کې شاوخوا ۱۳۸ دولتي ښوونځي تړل شوي او ښونیز بهیر له ګډوډۍ سره مخ شوی دی.
یونیسف له ټولو ښکېلو خواوو غوښتي چې له زغم کار واخلي، د ولسي وګړو ژوند وژغوري، او د نړیوالو بشري حقونو او بشردوستانه قوانینو پر بنسټ خپل مکلفیتونه پر ځای کړي او دا چې ماشومان باید په هر وخت کې خوندي وساتل شي.
