د امریکا ولسمشر ډونلډ ټرمپ ویلي، امکان لري چې متحده ایالات د اسرائیلو په هغو بریدونو کې ګډون وکړي چې پر ایران روان دي – خو دا هم ویلي: "کېدای شي دا کار وکړم، ممکن ویې نه کړم."
ټرمپ دا څرګندونې وروسته له هغې کړې چې د ایران او اسرائیلو ترمنځ تاوتریخوالی ډېر شوی او د دواړو خواوو ترمنځ پوځي بریدونه دوام لري.
هغه زیاته کړه چې دی د ایران د ستر رهبر ایتالله علي خامنهاي د وژلو نیت "لږ تر لږه اوس لپاره" نه لري، خو دا هم وویل چې د امریکا زغم ختمېږي.
ټرمپ له ایران د "بې قید و شرطه تسلیمۍ" غوښتنه هم کړې، خو دا نه ده روښانه چې ایا دا د جګړې اعلان دی که د فشار یوه بله بڼه.
ټرمپ وايي ایراني مذاکره کوونکي غواړي
سپینې ماڼۍ ته راشي
ډونلډ ټرمپ چې د سپینې ماڼۍ مخې ته یې خبرې
کولې، د اسرائیل او ایران د جګړې په اړه یوې پوښتنې ته په ځواب کې وویل، د ایران مذاکرهچیانو وړاندیز کړی چې "کېدای شي سپینې ماڼۍ ته
راشي"، که څه هم "دا کار اسان نه دی."
هغه دا هم
وویل ډاډه نه دی دا جګړه "تر کله" دوام کولی شي، ځکه چې "د ایران
هوايي دفاع له منځه وړل شوې ده."
هغه پر
خپل پخواني دریځ یو ځل بیا ټینګار وکړ: "دوې ډېرې ساده کلمې: بې قید و شرطه
تسلیمي."
ټرمپ دا
هم وویل باور لري د ایران نیت په خپل اټومي پروګرام کې "مثبت نه دی."
کله چې
ترې وپوښتل
شول، ایا امریکا به د اسرائیلو
په بریدونو کې برخه واخلي، ټرمپ وویل:
"زه دا نه شم ویلی. کېدای شي دا کار وکړم، کېدای شي ونه کړم. هېڅوک نه پوهېږي
چې زه څه کول غواړم. خو دا درته ویلی شم چې ایران ډېرې ستونزې لري او غواړي خبرې
اترې وکړي."
هغه زیاته
کړه: "راتلونکې اونۍ به یوه مهمه اونۍ وي."
ټرمپ یو ځل بیا تایید کړه چې ایران باید د
اسرائیلو له برید مخکې د خبرو لپاره ډېره
لیوالتیا ښودلې وای.