'په هره کوڅه کې مړي پراته دي': د غزې مرستندویان د ویجاړۍ کچه معلوموي
په غزه کې پر دوشنبه چې د اوربند لومړنۍ بشپړه ورځ تېره شوه، مرستندویانو او ملکي خلکو د جګړې له کبله د رامنځته شوي زیان معلومولو هڅې پیل کړې. په غزه کې د مدني دفاع ادارې چې په سیمه کې د بېړنیزو مرستو یوازینۍ اداره ده وايي، دوی اندېښمن دي، چې ښايي د ورانو شویو ودانیو تر خاورو- خځلو لاندې لا هم له ۱۰ زرو ډېر مړي پراته دي.
د دې ادارې ویاند محمد باسل بي بي سي ته وویل، دوی ګومان کاوه، چې په ۱۰۰ ورځو کې به وتوانېږي، چې تر ورانو ودانیو لاندې مړي راوباسي، خو اوس فکر کوي، چې د بلډوزرونو او نورو اړینو تجهیزاتو کموالي له کبله به دا چاره وځنډیزي.
بل لور په تازه تصویرونو کې چې د یکشنبې ورځې له اوربند وروسته اخیستل شوي، په ځانګړې توګه د غزې شمال کې د ویجاړۍ هغه پراخه کچه لیدل کېږي، چې د ۱۵ میاشتنۍ جګړې په ترڅ کې رامنځته شوې ده.
مخکې ملګرو ملتونو د اټکل له مخې ویلي و، چې د غزې نژدې ۶۰ سلنه برخه په کنډوالو بدله شوې ده.
که څه هم د یکشنبې پر ورځ د اوربند له پیل سره په غزه کې د بمباریو غږونو ځای د خوښۍ غږونو ونیو، خو د غزې اوسېدونکو لپاره ځمکنی واقعیت لا هم خورا تریخ او ناهیلي کوونکی دی.
د ملګرو ملتونو خوړو سازمان مسوولین وايي، د جګړې له کبله د غزې دوه میلیونه اوسېدونکي بې کوره شوي، هېڅ عاید نه لري او د ژوندي پاتې کېدو لپاره په بشپړه توګه د خوړو پر مرستې تکیه دي.
د اوربند له ټینګښت سره سملاسي د خوړو مرستې غزې ته ورسېدې او ملګري ملتونه وايي، د لومړۍ ورځې له پای ته رسېدو مخکې په مرستو بار ۶۳۰ لارې غزې ته ننوتې. پر دوشنبه بیا د دې لاریو شمېر ۹۱۵ ته ورسېد، چې د جګړې له پیل راهیسې د مرستو لاریو تر ټولو لوړ شمېر دی.
د عکس سرچینه، Reuters
