د امریکا او طالبانو ترمنځ هوکړه د کابو ۳۰ هېوادونو په حضور کې لاسلیکېږي
په قطر کې د طالبانو سیاسي دفتر یوې سرچینې بي بي سي ته ویلي، ټاکل شوې چې د شاوخوا ۳۰ هېوادونو د بهرنیو چارو وزیران او ځانګړي استازي د امریکا او طالبانو ترمنځ د تړون لاسلیک مراسمو کې ګډون وکړي.
ټاکل شوې (شنبه کب ۱۰/فبرورۍ ۲۹) دا تړون د قطر په دوحه کې لاسلیک شي. د دې تړون لاسلیک به له افغانستانه د امریکايي ځواکونو وتلو ته لار برابره او ورپسې به د سولې د بهیر بل پړاو یا بین الافغاني خبرې پيل شي.
تر اوسه دې تړون ډېر جزیات نه دي په ډاګه شوي، خو د طالبانو او امریکایانو ترمنځ د سولې مذاکراتو بهیر کې یوه بله ښکېله سرچینه وايي، ددې تړون له لاسلیک وروسته به د تاوتریخوالي د کمېدو بل پړاو پیل شي او ورسره به په دوو اونیو کې د بین الافغاني مذاکراتو لپاره په یوه اروپايي هېواد کې بشپړ چمتووالی ونیول شي.
په قطر کې د طالبانو د سیاسي دفتر ویاند سهیل شاهین بي بي سي ته وویل: "د طالبانو او امریکایانو ترمنځ د سولې تړون به سبا د فبرورۍ ۲۹ له غرمې وروسته لاسلیک شي."
د عکس سرچینه، Getty Images
