د ۱۲۰ زره ډالرو په ارزښت کېله وخوړله شوه
د عکس سرچینه، Getty Images
یو هنري اثر چې یوه پخه کېله یې برخه وه او پر دېوال په سکاشټېپ نښلول شوې وه او په ۱۲۰ زره ډالره پلورل شوې وه یوه بل هنرمن وخوړله.
ایټالیوي هنرمن ماریزیو کاتلان دغه "اثر "چې "کمدېن "نومېده د امریکا په میامي ښار کې یوه نندارتون کې ایښی و، خو امریکايي هنرمن ډېوېډ داتونا دغه کېله له دېواله واخیسته او ویې خوړله.
ښاغلي داتونا تر دغه وروسته پر خپل انسټاګرام ولیکل: "د ماریزیو کاتلان پر کار مین یم. ډېر مې خوښېږي چې پر دیوال یې نصبوي. ډېر خوندور دی. "
کله چې په ۱۲۰ زره ډالره د دومره ساده اثر د پلورل کېدو خبر خپور شو نو ډېرو خلکو د میامي موزیم ته مخه کړه چې ورسره عکس واخلي.
وروسته له دې چې دغه کېله وخوړل شوه ډېر ژر بله کېله یې پر ځای پر دېوال ونښلول شوه.
د عکس سرچینه، Reuters
د عکس سرچینه، Reuters
د دغه هنري نندارتون مدیر ویلي د هنري اثر ارزښت د هغه اند له مخې ټاکل کېږي. په دې نندارتون کې کېله یو اند دی.
پولیس د بیا اېښودل شوې کېلې ساتنې ته ګومارل شوي.
ماریزیو کاتلان د سږکال پیل کې وروسته له هغه ډېر وپېژندل شو چې د اېنګلنډ په سوېل کې د بلنهایم له ماڼۍ له یوه نندارتونه د هغه د سرو زرو کمود غلا شو.
